¹ Anɛyevi yisenɔ lɛye mi, odin mi nɔ jɛ aya le Aklunɔ lɔ mɛ.Agbɔ ma kpe-un do onu lokpo nukunmɛ winwlan ɖoxlan mi go gɛ,ɖo e na blo onywɛ na mi. ² Mi cɔ miɖe do duvi nɛ lɛye,mi cɔ miɖe do ozɔnwatɔ nyinyla lɛye go,mi cɔ miɖe do adagbotɔ awonɔ ye go. ³ Ɖo mi omɛ xeni le sɛn Mawu xɔn gbɔn gbigbɔ etɔn mɛ lɛye,miye wɛ ye gbo ada oxojɔxotɔn lɔ na,Jesu Klisi xe mɛ na mi le lɔ,wɛ mi nɔ do go,wɛ mi mɔ nɔ ɖe oji do miye tesu go gɛ. ⁴ Coganke nyɔ can,un hɛn na ɖe oji do yɔ tesu go,na omɛ ɖyɛ lɛye nɔ mɔ ɖɔ miye lɛye bo na ɖe oji do miye tesu go,nɛmu-nɛmu wɛ na wa nyi ce, ⁵ ɖo nyɔ ye ji-un we azan cantɔn gɔ gbe etɔn wɛ ye gbo ada na-un,un nyi Izlayɛli we okunkan,bo jɔ le akɔta Bɛnjaminu tɔn mɛ.Hebletɔ wɛ un nyi,Hebletɔ wɛ ka ji-un un nɔ zɔn do jwifuye we osɛnye ji ɖo falizitɔ wɛ un nyi; ⁶ Na e nyi akpakpa tɔn wɛ,nyɔ wɛ do tagba na agunviye.E nyi ogbɛ jijlɔ zinzan ɖena osɛn lɔ byɔ ɖo ha,tɔn wɛ,omɛti mɔ nɔ mɔ ofɛn ti sɔn go-e gɛ. ⁷ Vɔ onu e nɛ lɛye sese na un nɔ do mɔ ale osan lɛye,do Klisi wutu le odin,un le mɔ xɔ n ɖi onu xeni la omɛ ha. ⁸ Le oxojɔxo mɛ can,un wa mɔ mɔ ɖɔ onu kpokpo bo la omɛ ɖo Jesu Klisi ce xena un nyɔ,e hugan onu lɛye sese,ɖo Jesu wutu,un yi ogbe ɖɔ onu kpokpo ni bo la-un,un nɔ mɔ onu kpokpo do mɔ baba na ma do nyi Klisi tɔn, ⁹ e nɛ, le Klisi lɔ mɛ,ye ma gɔ le sɔ-un bo do mɔ omɛ jijlɔ gbɔn osɛn ji zinzɔn gbɔn ce mɛ xɔn gɛ,vɔ dogbɔn nuɖiɖi xena un ɖo do Klisi lɔ ji mɛ.Omɛ jijlɔ nyinyi e nɛ lɔ nɔ sɔn Mawu de,bo flɔn anyi do yise ji, ¹⁰ onu xena un le din xɔn jan wɛ nyi ɖɔ ma gbɛ nyɔ Klisi lɔ,a bo nyɔ finfɔn sɔn oku etɔn we hɔnhlɔn,a bo ɖu aya ɖi e yɔ ha,a bo ku oku xe ha na e ku, ¹¹ e nɛ na e na kpego do jɛ e ji,nyɔ can na fɔn sɔn oku. ¹² Onu xe we ogbe na un le nya xɔn lɔ,un ma o wle-e hɔnɖe gɛ,vɔ un le wezun lɔ ji a do wle-e,ɖo nyɔ tesu can Jesu wle-un. ¹³ Anɛyevi yisenɔ ye,un ma o sɔ-ɛ ɖɔ un wle-e hɔnɖe gɛ,vɔ linlin lokpo xeni le asyɛ,e wɛ nyi ɖɔ, un nɔ wɔn onu xeni le godo lɛ na-un bo nya do onu xeni le nukɔn na-un we ogbe, ¹⁴ un le do wezun xɔn do le yi onu xena un le din lɔ xɔn kɔn,e nɛ na do yi oylɔ sɛxwe tɔn xena Mawu ylɔ mi na we ajɔ le Klisi Jesu mɛ. ¹⁵ Mi mɛ sese xeni hwɛn le gbigbɔ mɛ lɛye,linlin lemɔhatɔn ni nɔ mi si.Co na e gɔ do nyi linlin bu wɛ mi ɖo can,Mawu na ɖe onu xlɛ mi do e go. ¹⁶ Vɔ na onu ɖekpokpwe gɔ do le jɔxɔn can,ofi xena mi wa jɛ le odin,mi a ɖo nukɔn yiyi le omɔ mi o sɔ lɔ ji. ¹⁷ Anɛyevi yisenɔ ye, mi omɛ sese xeni sɔ afɔ sɔ do afɔdo ce mɛ,nukun mitɔn lɛye ni nɔ omɛ xeye ni le zɔn do kpɔndo e go xena mi ɖe sɔ xlɛ mi ye ji. ¹⁸ Un bo nɔ ɖɔ-ɛ na mi eji-eji,un bo gɔ gbɛ kpo le ɖɔ-ɛ na mi odin xɔn kpo ɖasin le nukun mɛ ɖɔ:Omɛ susu le,wɛ gbɛzan yetɔn ye nɔ ɖexlɛ ɖɔ ye bo nyi kɛntɔ na Klisi xena ye ka do atinsoga ji lɔ. ¹⁹ Vivɔnu yetɔn wɛ nyi bubu gbenu;adɔ yetɔn wɛ nyi Mawu yetɔn,onu xeni na nyi ŋunya ji wɛ ye nɔ go do,ogbɛmɛ fi we onu lɛye jan wɛ nɔ le ayixa mɛ na ye. ²⁰ Vɔ toxo miye tɔn le sɛxwe,e le sɛxwe flɛn lɔ wɛ hwlɛngan mitɔn xeni nyi Aklunɔ Jesu Klisi,xena mi le ote kpɔn lɔ na sɔn do wa, ²¹ ɖo na e wa tlɔ wa,hɔnhlɔn xena e ɖo bo nɔ do zin onu ɖekpokpwe do acɛ etɔn gɔ,e na zan hɔnhlɔn nɛ lɔ a do ɖyɔ agbaza mitɔn xeni ma ɖo hɔnhlɔn ɖe gɛ a do tlɔ agbaza etɔn xena bubu jɛ xa.