¹ Xena e nyi ɖɔ akɔnfifa le Klisi mɛ,owanyiyi xeni nɔ do akpakpa lanmɛ na omɛ bo le,lokpo ninɔ le gbigbɔ mimɛ mɛ bo le,xomɛ nywɛ kpo dɔŋuɖu kpinkpɔn na omɛ bo le, ² be, un le byɔ mi xɔn ɖɔ miye ni bo ɖo ogbe kpɔ,a bo ɖo owanyiyi lokpo nukunmɛ,a bo ɖo ayixa lokpo,kpo susu lokpo gee.E nɛ lɔ wɛ na do jijwɛ na-un taŋu. ³ Mi nɔ kpɔn sɔ onudindɔn,ce jan wɛ na nyɔ alo omɛɖe sɔ su we ayixa do blo onuti gɛ.Vɔ dogbɔn omɛɖe sɔ hwe mɛ,mi nɔ ssɔ omɛ gbokpweye a do mɔ omɛ xeye ni hugan miye tesuye. ⁴ Omɛti ni nɔ kpɔn nɔ gɔ ɖɔ ɖɔ miye lokpo tɔn bɛ,bo na nyɔ gɛ.Vɔ lokpo-lokpo mitɔn ni din omɛ gbokpweye can we onywɛ. ⁵ Mi ɖo ninɔmɛ xena Klisi ɖo lɔ, ⁶ Klisi o ɖo ninɔmɛ Mawutɔn sɔn do jɛ gbɔɔn co e ma din bo na ɖe xlɛ gannu-gannu ɖɔ miye kpo Mawu kpo bo sɔgbe gɛ, ⁷ vɔ e yɔ tesu wɛ,jo onu xeni nyi etɔn sese do,bo sɔ ozɔnwatɔ we ninɔmɛ bo wa tlɔzun gbɛtɔ vɔvɔ.E wa ciɖi gbɛtɔ vɔvɔ kpoŋu ɖe ha. ⁸ E yɔ tesu sɔ eɖe sɔ hwe,bo se otonu gbɔɔn do yi oku.Atinsoga ji we oku wɛ e tlɛ ku. ⁹ E nɛ wutu wɛ Mawu kɔ-ɛ do tɛnmɛ ɖaxo, ¹⁰ bo ni-i nyikɔ xeni hugan nyikɔ lɛye kpokpo, e nɛ,le Jesu we nyikɔ mɛ,klota lɛye kpokpo na yi odo,le ojinukunsin,le anyizan ji kpo anyizan gɔ kpo, ¹¹ oɖɛ ɖekpokpwe na ɖɔ ɖɔ Jesu Klisi bɛ bo nyi Aklunɔ lɔ,e nɛ lɔ wɛ na sɔ Mawu otɔ lɔ sɔ su. ¹² E wɛzɔn,nɔvi vɛna-vɛna ce lɛye mi,ɖi ɖena mi nɔ se otonu na-un le hwe lɛye kpokpo nu ɖo ha,odin xena un ma gɔ wa le okpɔ xa mi gɛ,e gɔ le vivɛɖe na mi na gɔ do se otonu na-un.Mi ɖe hwlɛngan mitɔn we ozɔn xlɛ gbɔn obuɖiɖi kpo sisi kpo mɛ; ¹³ ɖo Mawu wɛ wa ozɔn le mi mɛ na mia do ɖo ojlo a bo do blo onu xeni sɔgbe xa tito etesu tɔn. ¹⁴ Le ozɔn ɖekpokpwe kɔn,mi nɔ kpɔn nɔ hlun onu ɖɔ gbɔn a bo do dɔn onuti gɛ, ¹⁵ e nɛ omɛɖe ma do le mɔ onuti a ɖɔ do mi go gɛ,mi na nyi omɛ mimɛye,a bo nyi Mawuvi xeye na ablɔ ti ma le e go gɛ,le gbɛtɔ ayixa gɛndɛn-gɛndɛn kpo omɛ nyinyla egbetɔn xe lɛye mɛ.Mi ɖo na klɛn le ye mɛ ɖi ɖena onu xeye ni nɔ klɛn le ogbɛ lɔ mɛ nɔ klɛn ɖo ha, ¹⁶ a bo nɔ ɖɔ oxo ogbɛ tɔn lɔ na ye.E wɛ na do go le Klisi we azan lɔ gbe.E nɛ,e ma gɔ le nyi xɔn ɖɔ un do wezun vɔvɔ alo un jɛ tagba vɔvɔ do ota mitɔn gɛ. ¹⁷ Na e gɔ do wa byɔ ɖɔ ye na kɔn ohun ce ɖo anyi ɖi avɔsinsan ha a bo sɔ xɔkpe avɔ xena mi o le san na Mawu xɔn gbɔn nuɖiɖi mitɔn we ozɔnwiwa mɛ can,ojijwɛ wɛ e nyi na-un,un gɔ le mɔ jijwɛ xa mimɛ sese kpo xɔn. ¹⁸ Lemɔha ke,miye can mi mɔ ojijwɛ,a bo mɔ ojijwɛ xa-un. ¹⁹ Le Aklunɔ Jesu we nyikɔ mɛ,un le nukun ɖiɖo mɛ ɖɔ un bo na sɔ Timɔte ɖoxlan mi le madɛn-madɛn mɛ.E nɛ oxo xena na se le e nu do mi go na na-un glagla. ²⁰ Zɛgbɔn e yɔ lɔ go,un ma gɔ ɖo omɛbuti xeni ɖo susu lokpo nukunmɛ ɖi nyɔ ha gbɔɔn bo na do sɔ oxo mitɔn lɛye do yɔ oxo vivɛ can gba; ²¹ omɛ gbokpwe ɖyɛ lɛye,yetesunɔ lɛye wɛ onu jan wɛ nɔ mi a nukun na ye,ye ma le ɖɔ Jesu Klisi tɔn xɔn gɛ. ²² Miye tesu mi nyɔ-ɛ dɔ Timɔte ɖe omɛ jijɔhun xeni nyi sɔ xlɛ.E blo wɛnɖagbe we ozɔn lɔ xa-un ɖi ɖena ovi nɔ wa ozɔn xa otɔ ɖo ha. ²³ Un le nukun ɖiɖo mɛ ɖɔ,na un gbɛ nyɔ ɖena oxo ce na nyi ɖo,e na sɔ-ɛ ɖoxlan mi; ²⁴ un kan do Mawu ji ɖɔ nyɔ cangba bo na wa mide le madɛn-madɛn mɛ. ²⁵ Un mɔ ɖɔ e bo le vivɛɖe ɖɔ ma sɔ anɛyevi le yise mɛ Ekplafloditi xeni nyi ozɔnwagbɛ kpo ahwanfungbɛ ce ɖoxlan mi.E yɔ lɔ,wɛ mi sɔ ɖoxlan-un san na ni a do kpedo go ye le hudo ce lɛye mɛ. ²⁶ E le jlo xɔn taŋu ɖɔ miye bo na gɔ wa yi mɔ mi omɛ sese,e bo ci onulilo mɛ taŋu,ɖo mi se ɖɔ e bo jɛ azɔn. ²⁷ Ɖo le oxojɔxo mɛ, e jɛ azɔn taŋu gbɔɔn bo ɖɔ ma ku klo,vɔ Mawu bo kpɔn dɔŋuɖunu ni-i,e ka ma nyi e yɔ kɔkɔlɔkɔ gɛ,vɔ e kpɔn dɔŋuɖunu na nyɔ can e nɛ dɛn dɔŋuɖunu mɛ ninɔ ce na hugan anyi. ²⁸ E wɛzɔn un jlo ɖɔ ma ɖebla sɔ-ɛ ɖoxlan mi,e nɛ na mi mɔ-ɛ,e na nyi ojijwɛ na mi,nyɔ can ma gɔ do le cidɔŋuɖunu mɛ xɔn diin gɛ. ²⁹ E wɛzɔn,mi yi jonɔ ni-i kpo jijwɛ ɖaxo kpo le Aklunɔ lɔ mɛ,a bo nɔ ɖo bubu na omɛ lemɔha tɔn lɛye. ³⁰ Ɖo e ɖebla ku do otammɛ na Jesu we ozɔn lɔ.E ɖebla vɔ ogbɛ etɔn klo,bo do wa blo onu xena mi ma kpego bo na blo na-un do ofi e xe ma le mitɔn wutu.