¹ E wɛzɔn,nɔvi vɛna-vɛna ce lɛye mi,un jlo taŋu ɖɔ ma gɔ mɔ mi,miye wɛ nɔ do ojijwɛ na-un,bo nyi jɛgbakɔn ce,nɔvi vɛna-vɛna ce lɛye mi,mi nɔ ote gliŋu ɖo lemɔha le Aklunɔ lɔ mɛ! ² Un do kɛnklɛn na Evodi kpo Sɛntici kpo ɖɔ ye ni bo ɖo ogbekpɔ le Aklunɔ lɔ mɛ. ³ Yɔ can xeni nyi ozɔn wa gbɛ ce bo le ogbeji na-un,un le byɔ we ɖɔ yɔ ni bo kpe do go ye,ɖo ye kpo Klema kpo bɔ do e go tɔ ce gbokpwe xeye we nyikɔ ni le ogbɛwema lɔ mɛ,lɛye bɔ do go ye mi vbo do fun ahwan do ota na owɛnɖagbe lɔ. ⁴ Mi nɔ jaya hweɖekpokpwe hwenu le Aklunɔ mɛ,un gɔ le tɛ oɖɛ e ji xɔn,mi nɔ jaya. ⁵ Mi nyɔ xomɛ do omɛ kpokpo go,Aklunɔ lɔ ja zaanɖe. ⁶ Mi nɔ kpɔn gɔ lo onu do onuti go gɛ,vɔ le onuɖekpokpwe mɛ,mi ɖɔ onu xena mi le din xɔn na Mawu gbɔn oɖɛ xixo kpo okwe finfan mɛ,mi na blo-e kpo okpɛdido kpo. ⁷ E nɛ,fifa Mawutɔn xeni le nukɔn na gbɛtɔ we zinzin ɖekpokpwe,na hɛn ayixa mitɔnye kpo susu mitɔnye do ote le Klisi Jesu mɛ. ⁸ Na do yi vivɔnu,anɛyevi yisenɔ ye,onu xeni nyi oxojɔxo bo jɛxa sisi,bo sɔgbe,bo mɛ,bo jɛ xa owanyiyi,bo jɛ na bubu,bo jɛ nukun mɛ,bo jɛ xa kanfu,ni nɔ nɔ ayixa mɛ na mi. ⁹ Onu xena un kplan mi lɛye,onu xena mɔ le diye,oxo xena na un ɖɔ wɛ mi se lɛye kpodo onu xeye na mi mɔ wɛ un blo lɛye,mi blo do ye ji.Mawu xeni nɔ na fifa omɛ na nɔ xa mi. ¹⁰ Un mɔ jijwɛ taŋu le Aklunɔ lɔ mɛ,ɖɔ onu ce xeni le ayixa mɛ na mi,na mi mi gɔ wa jɛ ɖiɖexlɛ ji lo,onuce le ayixa mɛ na mi fɛɛ,vɔ omɔ xena mi na mɔ a bo do ɖexlɛ wɛ mi ma mɔ osan gɛ. ¹¹ E ka ma nyi hudo ce lɛye wutu mɛ zɔn na un do le ɖɔ lemɔha xɔn gɛ,ɖo nyɔ un o kplan ɖeye,e wɛ ɖena un le o nyɔ na-un. ¹² Un nyɔ onu ma le omɛsi we ogbɛ zinzan,bo nyɔ onu su le omɛsi we ogbɛ zinzan.Le onu ɖekpokpwe mɛ le ofi ɖekpokpwe,un kplan ɖeye do alɔ ɖekpokpwe ji,dɔgo gɔ-un o,dɔgo ma gɔ-un gɛ o,onu su le asi ye o alo onu ma su le asi ye o. ¹³ Un kpe onu kpokpo go,dogbɔn omɛ xeni do hɔnhlɔn-un go. ¹⁴ Co onu jijɔhun wɛ mi blo bo do gɔ alɔ na-un le vivɛsise ce mɛ. ¹⁵ Filiputɔye mi,miye tesu mi nyɔ-ɛ ganji ɖɔ xena un lɛ le Masedwani le hwexenu na owɛnɖagbe lɔ jijla bɛ,agun bu ɖe ma le zɛgbɔn mitɔn lɔ go xeni nɔ gɔ alɔ na-un le onu xeni nɔ ɖyɛ alɔ na-un kpo xena un nɔ zan mɛ gɛ, ¹⁶ sɔn hwexenu na un le Tɛsaloniki gbɔɔn wɛ mi o ɖo onu xe we hudo na un ɖo ɖoxlan-un hwla nɛmu ɖe, ¹⁷ e ma nyi ɖɔ un le din onuninaye do mi si xɔn wɛ gɛ,vɔ onu xena un le din xɔn wɛ nyi ɖɔ,ale xena tɔn sɔn onunina mɛ na mi ni le jɛ e ji xɔn. ¹⁸ Un mɔ onu xena mi sɔ ɖoxlan kpokpo odin onu su le asi ye,onunina mitɔn xena Ekpafloditi hɛn do wa na-un,e kpe-un gbɔɔn bo kpo,onunina lɔ ciɖi celu xeni hwɛn nywɛ ha,bo le ɖi avɔsinsan xena Mawu yi e bo nyɔ le nukun mɛ ni-i ha. ¹⁹ Dɔkunnɔ ɖaxo wɛ Mawu ce can nyi,onu ɖekpokpwe hudo xena mi ɖo,e na na mi kpo gigo kpo gbɔn Klisi Jesu ji. ²⁰ Gigo ni nyi Mawu mitɔn lɔ tɔn sɔn mavɔ do yi mavɔ mɛ.Ami. ²¹ Mi do ogbe na yisenɔ ɖekpokpwe xeni le Jesu Klisi mɛ ye.Nɔvi yisenɔ xeye ni le fi xe xa-un can lɛye do ogbe ɖoxlan mi. ²² Yisenɔ lɛye sese do ogbe ɖoxlan mi,le vivɛɖe,xeye ni le xɔlu ɖaxo Hlɔmatɔn we oxwegbe lɛye. ²³ Fɛnu Aklunɔ Jesu tɔn ni nɔ okpɔ xa mi!