¹ Jesu gɔ ɖɔ na ye ɖɔ:Le oxojɔxo mɛ,un le ɖɔ na mi xɔn,le omɛ xeni le fye ye mɛ,omɛ ɖeye ma le ku xɔn hwɛkpo ye na mɔ Mawu we xɔluɖuɖu na wa kpo hɔnhlɔn kpo gɛ. ² Azan ayizɛn godo,Jesu kplan Piyɛ,Jakikpo Jaan dodonɔ do jɛ ovo le oso xeni yi oji de ji,nukunmɛ etɔn bo ɖyɔ do nukunmɛ na ye; ³ awu etɔn le klɛn xɔn,bo we pepepe gbɔɔn mɛti ma le ayizanji bo na blo wɛ e na wee hugan e nɛ gɛ. ⁴ Eli kpo Mɔyizi bo ze do nukun mɛ na ye bo le ɖɔ oxo xa Jesu xɔn. ⁵ Piyɛ yi oxo,bo ɖɔ na Jesu ɖɔ:Hlabi,fye na mi le xe e jɔhun,mi-a blo avɔxɔ atɔn lokpo na nyi tɔwe,lokpo na nyi Mɔyizitɔn,lokpo na nyi Elitɔn. ⁶ Vɔ Piyɛ ma nyɔ oxo na e ɖɔ gɛ,ɖo obu jɛ e yɔ lɔkpo onukplanvi ɖyɛ lɛye ji. ⁷ Sunwɔ ɖe wa cɔn ye ji,ogbe ɖe bo ɖi le sunwɔ lɔ mɛ ɖɔ:Omɛxe lɔ wɛ nyi ovi vɛna-vɛna ce,mi ɖo oto wi. ⁸ Tintan lokpo onukplanvi lɛye kpɔn akpa yetɔn ye ma gɔ mɔ mɛɖe gɛ,Jesu lokpo jan wɛ le yekɔn. ⁹ Hwexenu na ye le jɛ ote sɔn oso lɔ ji xɔn,e do osɛn na ye ɖɔ,ye ni bo nɔkpɔn ɖɔ onu xena ye bo mɔ lɔ na mɛɖe gbɔɔn do jɛ gbegbe xena ovi gbɛtɔ tɔn lɔ na wa fɔn sɔn omɛ kukuye mɛ. ¹⁰ Ye hɛn oxo lɔ go,bo kan wa yeɖe se xɔn ɖɔ:A ni ha wɛ nyi finfɔn sɔn omɛ kukuye mɛ. ¹¹ E nɛ godo,onukplanvi etɔn lɛye kan Jesu se ɖɔ:A ni wutu wɛ osɛnkplanmɛtɔ lɛye nɔ ɖɔ ɖɔ Eli bɛ bo na wa jɛnukɔn? ¹² Jesu yi ogbe na ye ɖɔ:Ɛɛ,;Eli ɖo na wa jɛnukɔn a bo do jla onu lɛye do,vɔ ɖe ani ha wɛ zɔn ye do wlan ɖɔ ovigbɛtɔ tɔn bo na ɖu aya susu,bɛ ye bo na do ovɔ-wii? ¹³ Amɔ,un le ɖɔ na mi xɔn ɖɔ Eli bo wa,wɛ ye blo onu xeni jlo-ye xa-ɛ ɖi ɖena e o nyi winwlan ɖo ha. ¹⁴ Hwexenu na ye lɛkɔ wa onukplanvi gbokpwe lɛye de,ye mɔ gbɛtɔ susu gbagbagba lɛ oto do ye wɛ osɛnkplanmɛtɔ lɛye le dɔn onu xa ye xɔn. ¹⁵ Xena omɛ susu lɛye gba nukun do Jesu go,e kpaca do ye wɛ ye bɛ wezun gbligbligbli bo na do wa yi do ogbe ni-i. ¹⁶ E kan onukplanvi etɔn lɛye se ɖɔ:A ni wɛ mi le dɔn xa ye xɔn? ¹⁷ Omɛɖe le omɛ lɛye mɛ bo ɖɔ:Onukplanmɛtɔ,un hɛn ovi ce wa na we,gbigbɔ mawe xe nɔ hu oɖɛkan na omɛ wɛ le e mɛ. ¹⁸ Na azɔn nɛ lɔ fɔn ni-i le fiɖe,e nɔ jɛ anyi le fi lɔ wɛ odɛ nɔ le gbɔn onu ni-i xɔn,a bo le ɖu adukunkun xɔn,a bo wa lintin.Un fankwe na onukplanvi tɔwe ɖɔ ye ni bo nya gbigbɔ lɔ le e mɛ,vɔ ye ma kpego gɛ. ¹⁹ E yi ogbe na ye ɖɔ:Mye omɛ xeni ma ɖinu na Mawu gɛ ye mi,kaka jɛ hwetɛ hwenu gbɔɔn wɛ na nɔ mikɔn do?A bo do ɖɔ oxo na mi,mi sɔ ovi lɔ wa na-un. ²⁰ Ye kplan ovi lɔ do wa ni-i,xena gbigbɔ lɔ gba nukun do Jesu go,e hunhun ovi lɔ kpo hɔnhlɔn kpo,wɛ e jɛ-anyi bo le bligbo xɔn,odɛ bo le gbɔn onu ni xɔn. ²¹ Jesu kan ovitɔ lɔ se ɖɔ:Kaka jɛ hwetɛ hwenu ha wɛ onu lɔ bɛ ni-i?Ovitɔ lɔ bo ɖɔ:Sɔn vikpɛvumɛ etɔn gbɔɔn wɛ. ²² Azan mɛ azanmɛ,gbigbɔ lɔ nɔ le tintin-i do ozo mɛ alo osin mɛ xɔn ni a do crɔn,vɔ a kpego bo na blo onuɖe bo gɔ alɔ na mi kpɔn dɔŋuɖunu na mi. ²³ Jesu ɖo e go ni-i ɖɔ:Na un kpego wɛ a ɖɔ?Nuti mɔ nɔ glo bibla na omɛ xeni ɖo onuɖiɖi gɛ. ²⁴ Hɔnlokpo-hɔnlokpo,ovitɔ lɔ bɛ axwa dido bo ɖɔ:Un ɖi onu,wa gɔ alɔ na-un ɖo onuɖiɖi ce hwe! ²⁵ Xena Jesu mɔ ɖɔ omɛye bo ja,ye de,e ɖe ogbe do gbigbɔ mawe lɔ bo ɖɔ ni-i ɖɔ:Yɔ gbigbɔ onumakɛtɔn,kpo onu mase tɔn kpo,un ɖe ogbe do we tɔn le e mɛ,a bo nɔ kpɔn gɔ ɖyɛ e mɛ gɛ. ²⁶ Gbigbɔ lɔ hunhun ovi lɔkpo hɔnhlɔ kpo bo tɔn kpo axwa kpo,ovi lɔ le di omɛ xe ku ha gbɔɔn omɛ susu bo ɖɔ e bo ku. ²⁷ Vɔ Jesu hɛn alɔ ni-i bo fwɛn cite wɛ e nɔ ote. ²⁸ Xena Jesu wa sɔn yi xwegbe wɛ e yɔ kpo onukplanvi etɔ lɛye ɖoɖo le okpɔ,onukplnvi lɛye kan-ɛ se ɖɔ:A ni wɛ zɔn mye ma kpego bo nya gbigbɔ mawe nɛ lɔ gɛ? ²⁹ E bo ɖo e go na ye ɖɔ:Gbigbɔ mawe nɛ lɔ,oɖɛ xixo mɛ jan wɛ e na kpego na tɔn le. ³⁰ Ye lɛ le flɛn,bo gbɔn Galile we kansinmɛ do wa le sɔn xɔn,Jesu ka ma jlo ɖɔ ye a nyɔ-ɛ ɛ. ³¹ Ɖo e le kplan onu onukplanvi etɔn lɛye ɖɔ:Yde na wa sɔ ovi gbɛtɔ tɔn lɔ sɔ sa na gbɛtɔye,ye na hu-i na ye hu-i vɔ,e na fɔn sɔn oku le azan atɔn gɔ gbe. ³² Vɔ onukplanvi lɛye ma mɔ nukunnu jɛ oxogbe nɛ lɛye mɛ gɛ,bo gɔ le ɖi obu na kinkanse xɔn. ³³ Ye wa yi jɛ Kapɛnawumu,xena ye ɖyɛ xwegbe,Jesu kan ye se ɖɔ:A ni ha wɛ mi le dɔn le omɔji xɔn? ³⁴ Vɔ ye bɔ onu,ɖo le omɔ ji,ye le dɔn onudo omɛ xeni nyi omɛ ɖaxo go. ³⁵ E wɛ e flɔn-anyi bo ylɔ onukplnvi wyawe lɛye bo ɖɔ na ye ɖɔ:Na omɛɖe jlo bo na nyi tintan,ni nyi kpotwi a bo nyi ozɔnwatɔ mɛ ɖyɛ lɛye sese tɔn. ³⁶ E nylɔ ovi vu ɖe,bo sɔ-ɛ do cɛncɛn yetɔn,e kɔ-ɛ do adamɛ etɔn lɛye mɛ bo ɖɔ: ³⁷ Mɛɖe kpokpwe xeni na nyi ovivu xe ha le nyikɔ ce mɛ,nyɔ tesu wɛ e yi,omɛ xeni yi-un,nyɔ mɛ e yi gɛ,vɔ omɛ xeni sɔ-un sɔ ɖoxlan wɛ e yi. ³⁸ Jaan ɖɔ na Jessu ɖɔ mɔ sin:Onukplanmɛtɔ,mi mɔ dahwe ɖe wɛ e le nya gbigbɔ mawe le nyikɔ tɔwe mɛ xɔn,mi bo jlo na kɔ ni-i ɖio e ma nyi onukplanvi tɔwe ɖi mye ha gɛ. ³⁹ Vɔ,Jesu ɖɔ:Mi nɔ kpɔn gbɛ ni gɛ,ɖo mɛti ma kpe go na nujawu le nyikɔ ce mɛ,bo na gɔ jɛ oxo nyinyla ɖiɖɔ do go ye ji gɛ. ⁴⁰ Omɛ xeni ma cite do mi ji gɛ,e le xa mi bo le mi ji. ⁴¹ Omɛ xeni na na osin glasin lokpo mi toli ɖɔ mi nyi Klisi we ovi,le oxojɔxo mɛ,e ma le ba ajɔ etɔn kpo xɔn gɛ. ⁴² Omɛɖekpokpwe xena nyi afɔklɛnnu na lokpo le vikpɛvu xeni ɖi onu na un,lɛye mɛ na ye gbɔjwɛ sin ote ɖaxo do okɔ ni-i bo sɔ-ɛ flɛn do oxo mɛ,e na nyɔ ni-i hugan. ⁴³ Na e nyi ɖɔ alɔ tɔwe ɖe wɛ na dɔn we do yi onu nyinyla mɛ,gbo-e sɛ, ⁴⁴ ɖo e na nyɔ na we hugan na a do ɖyɛ ogbɛ mɛ alɔ gbigbo,hugan alɔ awe lɛye na le si we wɛ a do ɖyɛ ozo ma ci mɛ. ⁴⁵ Na e nyi ɖɔ afɔ tɔwe ɖe wɛ na dɔn we do yi onu nyinyla mɛ,gbo-e sɛ ɖo e na nyɔ na we na a do ɖyɛ ogbɛ mavɔ-mavɔ mɛ afɔ lokpo, ⁴⁶ hugan afɔ awe,vɔ bo na sɔn yi ozo maci-maci mɛ. ⁴⁷ Na e nyi ɖɔ nukun tɔwe wɛ na dɔn we do onu nyinyla mɛ,ɖe-e sɛ,ɖo e na nyɔ na we na a do ɖo nukun lokpo do ɖyɛ ogbɛ mavɔ-mavɔ mɛ,hugan nukun awe lɛye na le ote wɛ a do ɖyɛ ozo maci-maci mɛ, ⁴⁸ le flɛn lɔ,oweye mɔ ku gɛ,ozo lɔ can mɔ nɔ ci gbeɖe. ⁴⁹ Ɖo ozo na bi omɛɖekpokpwe ɖi ɖena ye nɔ do ojɛ onu ɖo ha. ⁵⁰ Onu jijɔhun wɛ ojɛ nyi,vɔ na ojɛ wa bu vivɛ etɔn ɖe,naɖe ye na blo ɖo a bo do do vivɛ lɔ e mɛ?Ojɛ ni nɔ mye tesu ye mɛ mi nɔ fifa mɛ xa miɖe.