¹ Le azn nɛ lɛye gbe,xena omɛ susu gbagbagba gɔ wa kpli ke,onu xena ye na ɖu ka ma le gɛ,Jesu yɔ onukplanvi etɔn lɛye bo ɖɔ na ye ɖɔ: ² Omɛ xe lɛye we onuɖu dɔnu na-un,ɖo sɔn azan atɔn diye,ye ka ma ɖo onu xena ye na ɖu gɛ. ³ Na un ɖe ogbe na ye ɖo ye ni bo sɔn yi yexwe xovɛ-xovɛ,gbafan na xo ye le omɔji ɖo omɛ ɖe lɛye sɔn dindɛn nu le ye mɛ. ⁴ Onukplanvi etɔn lɛye bo ɖɔ ni-i ɖɔ:Bɔ ha wɛ mi na mɔ onu ɖuɖu le na omɛ azlekpo xe lɛye le ogbe tlololo xe lɔ mɛ,gbɔn dɔgo na gɔ ye? ⁵ E kan ye se ɖɔ:Kpɔnnɔ nɛmu wɛ mi ɖo?Ye bo ɖɔ canwe. ⁶ E wɛ e ɖe ogbe na ye ɖɔ ye ni bo flɔn anyi,le anyizanmɔ,e yi kpɔnnɔ canwe lɛye e wɛ xena e do okpɛ na Mawu do ye ji vɔ,e ma ye bo sɔ na onukplanvi lɛye,na ye a ma-ɛ ye bo mɛ na omɛ lɛye. ⁷ Ye ɖo ohwe vuvu ɖe lɛye can,Jesu bo do okpɛ na Mawu do ye ji,bo gɔ dɔ na ye ɖɔ ye ni bo ma ye can. ⁸ Ye ɖu dɔgo bo gɔ ye, ye bɛ gbokpwe xena ye ma ɖu gɛ,e bo gɔ jaxwi canwe. ⁹ Omɛ lɛye na blo akpo ɛnɛ(4000) lemɔha,e nɛ godo Jesu ɖɔ na ye ɖɔ ye ni bo sɔn. ¹⁰ Hɔnlokpo e ɖyɛ otɔ jihun mɛ xa onukplanvi etɔn lɛye bo sɔn yi Dalumanuta we kansin mɛ. ¹² Falizitɔye wa Jesu de,bo jɛ onu dindɔn xa-ɛ ji,vɔ na do tlɛ omɔ ni-i,ye ɖɔ ni ɖɔ ni bo ɖe josi ɖe xlɛ mye lɛye gbɔn nujawu biblo mɛ. ¹¹ Jesu gbɔ fun,bo ɖɔ na ye:"A ni wɛzɔn jijimɛvi exe lɛye do le din josido xɔn?Le oxojɔxo mɛ,un le ɖɔ na mi xɔn,un ma le blo nujawu ti na jijimɛvi exe lɛye xɔn gɛ. ¹³ E nɛ godo e lɛ le yede bo ɖyɛ otɔ jihun mɛ bo sɔn yi akpa ɖyɛ xwe. ¹⁴ Onukplanvi lɛye wɔn kpɔnnɔ hinhɛn,lokpo jɛn le ye si,le otɔ jihun lɔ mɛ. ¹⁵ Jesu jɛ afɔ ɖo afɔ ji na mɛ we oxo ɖiɖɔ ji,na ye ɖɔ:Mi cɔ miɖe ganji ɖo kpɔnnɔ tinkɛn Falizitɔye tɔn kpo Elodu tɔn kpo go. ¹⁶ Ye wa jɛ onu dɔn ji,le ye ɖe mɛ,ɖo ye ma hɛn kpɔnnɔ gɛ. ¹⁷ Jesu mɔ onu jɛ ego,bo kan ye se ɖɔ:A ni wɛzɔn mi do le dɔn onu xɔn,do kpɔnnɔ xena mi ma hɛn gɛ go?Mi ma nyɔ oxo lɔ gbɔɔn bo do mɔ nukunnu jɛ emɛ hɔnɖe?Toli wɛ mi vɛ? ¹⁸ Nukun lɛye le mi si alo mi ma le mɔ onu hɔn ba?Alo mi nɔ gɔ se onu gɛ wɛ?Mi nɔ flin onu do? ¹⁹ Xena un ma kpɔnnɔ atɔɔn lɛye na omɛ akpo atɔɔn(5000) lɛye ɖe,jaxwi nɛmu wɛ kpo na mi bɛ do sɔn?Ye ɖɔ:Wyawe.. ²⁰ Hwexenu na un ma kpɔnnɔ canwe na gbɛtɔ akpo ɛnɛ(4000),kpɔnnɔ xeni kpo na omɛ ye ma ɖu gɛ,jaxwi nɛmu wɛ e gɔ?Ye ɖo e go ni ɖɔ,caanwe. ²¹ E bo ɖɔ na ye ɖɔ:Mi ma mɔ nukunnu jɛ emɛ hɔnɖe gɛ wɛ. ²² Jesu kpo onukplanvi etɔn lɛye wa yi Bɛtisayida wo otota mɛ, omɛye bo hɛn nukungbigbanɔ ɖe wa ni-i, bo le do kɛnklɛn ni-i xɔn ɖɔ ni bo ɖo alɔ e go. ²³ Jesu hɛn alɔ na nukungbigbanɔ lɔ bo kplɛn-ɛ do jɛ otota lɔ mɛ, bo si otan do nukunye ji ni-i bo ɖo lɔ ota ni-i, bo kɛn-ɛ ɖɔ:" A le mɔ onu ɖe xɔn". ²⁴ E hun nukun lɛye bo ɖɔ:" Un le mɔ omɛ ye xɔn, un le mɔ ye xɔn ɖi atinye ha, vɔ ye le zɔn zɔnlin xɔn". ²⁵ Jesu gɔ ɖo alɔ nukun lɛye ji ni-i bu ke, wɛ e le mɔ onu xɔn ganji, azɔn etɔn gbɔ, e jɛ onu mimɔ ji ceɖe-ceɖe. ²⁶ Jesu ɖɔ ni-i ɖɔ ni bo sɔn yi xwegbe etɔn, ni bo nɔ kpɔn ɖyɛ otoxo mɛ gɛ. ²⁷ Jesu kpo onukplanvi etɔnye sɔn yi otota ye xeni sɛkpɔ Sezale Filipu tɔn ye mɛ. Hwexenu na ye le mɔ ji, e kan xo onukplanvi etɔn lɛye se ɖɔ:" Mɛ ha wɛ omɛye nɔ ɖɔ un bo nyi?" ²⁸ Ye ɖo e go ni-i ɖɔ:" Omɛ ɖe lɛye nɔ ɖɔ ɖɔ yɔ bo nyi Jaan, Mawu we osin mɛ nylɔ omɛ do tɔ. Mɛɖe lɛye Eli; Mɛ bu ye nɔ ɖɔ yɔ bo nyi lokpo le ɖɔɖanyiɖɔtɔ Mawutɔn ye mɛ". ²⁹ Vɔ Jesu kan ye se ɖɔ,"miye ɖe,mɛ wɛ un nyi wɛ miye nywɛ?"Piyɛ yi oxo bo ɖɔ ni ɖɔ:Yɔ wɛ nyi Klisi lɔ. ³⁰ E wɛ Jesu do osɛn na ye ɖɔ ye ni bo nɔ kpɔn gɔ na omɛ ɖe gɛ. ³¹ E nɛ godo,Jesu jɛ onukpinkplan ye ji ɖɔ,ovi gbɛtɔ tɔn ɖo na ɖu aya susu,wɛ tomɛxoye,avɔsantɔgaye,kpo osɛn kplan omɛtɔye na gbɛ-ɛ,omɛye na hu-i azan atɔngɔ gbe etɔn e na fɔn sɔn oku. ³² E ɖɔ oxo enɛ lɛye na ye le gbagbanŋugbe, Piyɛ wa kplɛn-ɛ do jɛ azɔge bo jɛ gbigbɛ ni-i ji. ³³ Vɔ Jesu,lɛ okɔ bo kpɔn onukplanvi gbokpwe lɛye,bo gbɛ onu na Piyɛ taŋu:Lɛ le godo na-un lɛgba ɖo susu tɔwe ma sɔ ogbe xa Mawu tɔn gɛ,gbɛtɔye tɔn wɛ a ɖɔ. ³⁴ E nɛ godo Jesu yɔ togun lɛye kpo onukplanvi etɔn lɛye kpo bo ɖɔ na ye ɖɔ:Na omɛ ɖe jlo bo na xodo-un,e ɖo na gbɛ e ɖe ɖo-anyi a bo ze akluzu gban etɔn a bo xodo-un. ³⁵ Ɖo omɛ ɖekpokpwe xe jlo bo na hwlɛn ogbɛ eton gan na bu-i,vɔ omɛ ɖekpokpwe xeni na bu ogbɛ etɔn do nyɔ kpo wɛnɖagbe lɔ wutu na hwlɛn-ɛ gan. ³⁶ Na omɛ ɖe ɖo dɔkun nu lɛye sese,vɩ bo ka hɛn alindɔn sɔ xɔ bu,ale bɔ tɔn wɛ e nyi ni-i? ³⁷ A ni ha wɛ gbɛtɔ na na a bo do su axɔ na ogbɛ etɔn? ³⁸ Na ŋunya wa omɛ ɖe do nyɔ kpodo oxo ce go le jijimɛvi xe lɛye ni do godo do Mawu bo nyi danuwatɔ,ŋunya na wa gbɛtɔ we ovi can do-e le hwexenu na gbɛtɔ we ovi lɔ na wa le gigo otɔ lɔ tɔn mɛ xa wɛnzangun mimɛ lɛye.