¹ Falizitɔye kpo osɛnkplan mɛtɔ ɖe lɛye sɔn Jeluzalɛmu,bo wa kpli do Jesu de. ² Ye mɔ ɖɔ onukplanvi etɔn lɛye le ɖu onu xɔn bo ma klɔ asigɛ. ³ Ɖo,ɖi ɖena akɔnu Falizitɔyetɔn kpo Jwifu nuye tɔn byɔ ɖo ha,ye ɖo na klɔ asi hwɛkpo a do ɖu onu.Ye sɔ yeɖe bo sɔ bla do dagbo-dagboye we osɛn lɔ go taŋu. ⁴ Na ye sɔn dogbaji bo wa,na ye ma sla awu gɛ,ye mɔ nɔ ɖu onu gɛ,akɔ osu bubuye gɔ le gbagbagba,ɖe ye wɛ nyi glasin kiklɔ,gannuye,kpo ogoye kiklɔ; ⁵ Ewɛzɔn Falizitɔye kpo osɛnkplanmɛ tɔye kan Jesu se ɖɔ a ni wɛzɔn onukplanvi tɔwe lɛye mɔ nɔ do zɔn do akɔnu dagbo-dagbo lɛye tɔn ji gɛ,a bo ɖu onu alɔ maklɔ-maklɔ? ⁶ E ɖɔ naye ɖɔ:"Yɛ mɛnu blotɔye,oxo xena mi ɖoɔ na Ezayi,e bo ɖɔ do migo,e ɖi le mi go,ɖi ɖena ye o wlan ɖo le Mawu xo lɔ mɛ ɖo ha:"Onugo jan wɛ otogun xenɔ sɛn-un do,vɔ ayixa yetɔn bo dɛɛn do go-e" ⁷ Sinsɛn onumɛ vɔvɔtɔn wɛ yenɔ blo na-un.Ɖo osɛn xena ye nɔ kplan omɛye,gbɛtɔye we ogbeɖiɖe wɛ. ⁸ Jesu gɔ ɖɔ na ye ɖɔ:"Mi nɔ jo Mawu we osɛnye ɖo,a bo do wa yi blo gbɛtɔye we akɔta nu ye. ⁹ E gɔ ɖɔ na ye ɖɔ:"Mi nɔ gbɛkɔ sɔn Mawu we osɛn lɛye go a bo hɛn akɔtanu mitɔn lɛye go. ¹⁰ Ɖo Mɔyizi ɖɔ mɔ sin:"Si atɔwe kpo anɔwe kpo,bo gɔ ɖɔ omɛ xeni na ɖɔ oxo nyinyla o na otɔ alo anɔ,ye ɖo na hu-i. ¹¹ Vɔ miye mi ɖɔ mɔ sin,na mɛɖe ɖɔ na otɔ alo onɔ ɖɔ,onu na un hɛn bo na na we,e wɛ nyi Kɔbanu,tin e mɛ etɔn wɛ nyi onunina ¹² Mawutɔn, mi mɔ gɔ ɖe omɔ ni-i na ni-a do blo onuti na otɔ kpo onɔ kpo gɛ, ¹³ lemɔha wɛ mi nɔ ze akɔnu mitɔn lɛye xena mi nɔ kplan omɛye a bo ɖo hu acɛ na Mawu we oxo lɔ ɖo walɔ gbigble lemɔhatɔn susu wɛ le misi wɛ mi nɔ zan. ¹⁴ E wɛ Jesu gɔ yɔ omɛ susu gbagbagba lɛye bo ɖɔ na ye ɖɔ:"Mi mɛ lɛye kpokpo mi ɖo oto un a bo mɔ nukunnu jɛ oxo xe mɛ. ¹⁵ Onuti ma le gaji bo na ɖyɛ gbɛtɔ we dɔmɛ bo na do oɖu wi-i gɛ,vɔ onu xeni nɔ tɔn sɔn gbɛtɔ we ojimɛ wɛ do oɖu wi-i. ¹⁶ Na mɛɖe ɖo oto bo na do se onu,ni se onu. ¹⁷ Xena e wa sɔn yi xwegbe bo lɛ le omɛ lɛye kɔn vɔ,onukplanvi etɔn lɛye kan oxo wi-i se do olo dido nɛ lɔ go. ¹⁸ E bo ɖo e go na ye ɖɔ:"Be mye can mi ma nyɔ onu wi gɛ wɛ?Mi ma nyɔ-ɛ ɖɔ onuti ma le gaji bo na ɖyɛ dɔmɛ na gbɛtɔ bo na do ɖu wi-i gɛ? ¹⁹ Ɖo e mɔ nɔ ɖyɛ oji etɔn mɛ gɛ,ɖɔ etɔn mɛ wɛ e nɔ ɖyɛ,a bo wa tɔn le hwenu na ye na nyɛ omi.Dogbɔn oxo nɛ lɛye mɛ,Jesu le ɖɔ xɔn ɖɔ onuɖuɖu lɛye kpokpo bo nyi onu mimɛ. ²⁰ E ɖɔ mɔ sin:"Onu xe nɔ tɔn sɔn gbetɔ mɛ wɛ nɔ gble gbɛtɔ. ²¹ Ɖo oji mɛ le ayixa etɔn mɛ wɛ linlin nyinyla lɛye nɔ tɔn sɔn:"Ogbɛ ɖuɖu zinzan ajojijɛye,omɛ huhuye. ²² Ogalilɔ ye lɛye,danu wiwa lɛye,owanyiyi na kɔbɔ zɛ ojlɛ go lɛye,omɛ biblɛɖu lɛye osɛn ji ma gbɔn do blo onu lɛye,nuvɛwun lɛye,acɔn kinkɔn do omɛ go lɛye,ogoyiyi,hanɔnu wiwa. ²³ Onu nyinyla nɛ lɛye nɔtɔn sɔn gbɛtɔ we oji mɛ bo nɔ gble gbɛtɔ. ²⁴ Jesu lɛ le flɛn,bo yi kansin Tilu kpo Sidɔn tɔn mɛ.E ɖyɛ oxwe ɖe gbe bo ma jlo ɖɔ omɛti a nyɔ-ɛ gɛ.Vɔ e ma kpego na bɛ gɛ. ²⁵ Wiwa etɔn tlololo,nyɔnu xena gbigbɔ mawe ɖyɛ ovyɛ me se ɖɔ e bo wa,e jan wɛ e do jlɛ oklo do afɔnu na Jesu. ²⁶ Nyɔnu lɔ ma nyi Jwifunu gɛ,Fenesi wɛ ye ji-i le,le Sili we kansinmɛ.E ɖɔ na Jesu ɖɔ ni bo nya gbigbɔ mawe lɔ sɛ le ovi nyɔnuvi myetɔn mɛ. ²⁷ Jesu ɖɔ ni-i ɖɔ:"Jo vikpɛ ye do na ye gɔ dɔgo hwɛkpo,ɖo e ma jɔhun ɖɔ ye a sɔ vikpɛye we onuɖuɖu a bo sɔ na duvi vuvuye gɛ. ²⁸ Nyɔnu ɖo e go ni-i ɖɔ:"Cica aɖɔ oxojɔxo,vɔ duvi vuvuye nɔ nɔ tavo a bo can onukwin vikpɛ vu lɛye tɔn xɔn ma. ²⁹ E wɛ Jesu ɖɔ ni ɖɔ:"Dogbɔn oxo xenba a ɖɔ nɛ mɛ,sɔn gbigbɔ mawe lɔ o tɔn le ovi nyɔ nuvi tɔwe mɛ. ³⁰ Nyɔnu lɔ sɔn yi xwegbe etɔn,bo mɔ ovi lɔ le anyi mimlɔ le ozan ji vɔ gbigbɔ ma lɔ oo tɔn le e mɛ. ³¹ Jesu lɛ le Tilu we kansinme,bo gbɔn Sidɔn we kansinmɛ bo gɔ gbɔn toxo awo lɛye we kansin mɛ bo lɛ okɔ wa Galile we otɔto. ³² Ye hɛn tokunɔ ɖe,xeni mɔ nɔ kpego nɔ ɖɔ oxo ganji gɛ,wa ni-i ye bo do kɛnklɛn ni-i ɖɔ ni bo ɖo alɔ ota ni-i. ³³ E dɔn-ɛ do azɔge le otogun lɔ go,bo do alɔvi oto lɛye mɛ ni-i,bo tun otan do alɔvi etɔn bo do kpoɖɛ ni-i. ³⁴ E nɛ godo e kɔ okɔ bo kpo ji,bo gbɔ fuun,bo ɖɔ:"Ɛfata"tin e mɛ etɔn wɛ ɖɔ:"Hun ɖewe" ³⁵ Le ofi lɔ zɔnlokpo,oto etɔn lɛye hun oɖɛkan etɔn bo tun,e jɛ oxo ɖiɖɔ,ji ganji. ³⁶ E Jesu do osɛn na ye ɖɔ ye ni bo nɔ kpɔn ɖɔ na mɛɖe gɛ.Vɔ odin gbɔn wɛ ye nɔ gɔ jla oxo lɔ taŋu na ome ye. ³⁷ E hu onu do ye,ye bo ɖɔ mɔsin:"E nɔ blo onu jijɔhun lɛye ganji,e nɔ blo wɛ tokunɔ lɛye nɔ se onu,a bo bla wɛ onuma ke nɔ lɛye nɔ ɖɔ oxo."