¹ Jesu lɛ le flɛn lɔ,bo wa Jude we kansinmɛ bo gɔ wa yi Judɛn we otɔsisa godo,omɛ susu gɔ wa kpli do e de e bo gɔ la kplan onuye on ɖi ɖena e o nɔ blo ɖo le osan ha. ² Falizitɔye sɛkpɔ-ɛ wɛ na do ɖo omɔ ni-i,ye kan-ɛ se ɖɔ:Le osɛn mitɔn mɛ,sunnu hɛn e na gbɛ asyɛ bo na nyɛ-ɛ. ³ Jesu yi ogbe na ye ɖɔ:Osɛn bɔtɔn ha wɛ Mɔyizi do na mi? ⁴ Ye ɖɔ mɔ sin:Mɔyizi na ogbe ɖɔ ye bo na wlan nyɔnu gbigbɛ we wema,a bo nya-ɛ. ⁵ E wɛ Jesu ɖɔ na ye dɔ:Toli vivɛ mitɔn wutu wɛ Mɔyizi do wlan osɛn nɛ lɔ na mi. ⁶ Vɔ le bibɛ ogbɛ lɔ tɔn Mawu ɖo sunnuglo kpo nyɔnusi. ⁷ E wɛ zɔn sunnuglo na lɛ le otɔ kpo onɔ kpo de,a bo wa yi tɛ do asyɛ go, ⁸ ye omɛ awe lɛye na tlɔ zun gbaza lokpo gee. ⁹ Be gbɛtɔ ni nɔ kpɔn klan onu xena Mawu ca gɛ. ¹⁰ Xena ye wa yi jɛ xwegbe,onukplanvi lɛye gɔ kan oxo wi se ke do oxo lɔ go. ¹¹ E bo ɖɔ na ye ɖɔ:Na mɛɖe nya asyɛ,bo wa yi ɖe nyɔnu bu,e da le asyɛ tintan tɔn lɔ ji; ¹² na nyɔnusi ɖe can gbɛ asuwɔ,bo wa yi ɖe asu bu,e do afɔ ogbe. ¹³ Omɛye le kplan vikpɛvuye wa na Jesu xɔn ni a do ɖo alɔ ye ji,vɔ onukplanvi lɛye nɔ le gbɛ na ye kpo zingidi kpo. ¹⁴ Xena Jesu mɔ do lemɔha,e ma nyɔ ni-i gɛ e bo ɖɔ na ye ɖɔ,mi jo vikpɛ lɛye do na ye a wa dye,mi nɔ kpɔn gɔ su omɔ do ye gɛ;ɖo sɛxwetomɛ Mawutɔn nyi omɛ xeni le ɖi vikpɛvu lɛye ha tɔn. ¹⁵ Le oxojɔxo mɛ,un le ɖɔ na mi xɔn,omɛ ɖekpokpwe xe ma yi sɛxwetomɛ lɔ ɖi ɖena vikpɛvu na yi-i ɖo ha gɛ,ma le ɖyɛ e mɛ xɔn kpɔn gbeɖe. ¹⁶ E wa dɔn vikpɛvu lɛye do aba mɛ,bo ɖo alɔ ota na ye,bo xo do na we odɛ na ye. ¹⁷ Xena Jesu le bɛnu bo na do sɔn,dahwe ɖe bɛ wezun bo wa jɛklo le nukɔn ni-i bo ɖɔ:Onukplan mɛtɔ adodwe,a ni ha wɛ na blo na do e mɔ ogbɛ mavɔ-mavɔ? ¹⁸ Jesu ɖo e go ni-i ɖɔ:A ni wɛ zɔn a do ylɔ-un ɖɔ omɛ adodwe?Omɛti ma nyi omɛ adodwe zɛgbɔn Mawu lokpo gee go gɛ. ¹⁹ A o nyɔ osɛn lɛye:Nɔ kpɔn hu omɛ gɛ,nɔ kpɔn do afɔ ogbe gɛ,nɔ kpɔn jɛ ajo gɛ,nɔ kpɔn ɖe kunnu agɔ-agɔ do omɛ ɖe go gɛ,nɔ kpɔn tafu mɛɖe gɛ,si atɔwe kpo anɔwe kpo. ²⁰ Dahwe lɔ bo ɖɔ mɔsin:Onukplanmɛtɔ,sɔn ɖekajɛ mɛ ce gbɔɔn wɛ un boo nɔ nyi osɛn nɛ lɛye. ²¹ Jesu kpɔn-ɛ,bo nyi owan ni-i,bo ɖɔ ni-i ɖɔ:E kpo onu lokpo na we,a ɖo na sa onu xena a ɖo lɛye sese bo na sɔ kɔbɔ lɔ na ayanɔ ye,hwenɛnu a ɖo dɔkun le sɛxwe,e nɛ godo do a wa bo na xo do-un. ²² Vɔ,e ci alwɛ mɛ do oxogbe nɛ lɔ wutu,bo ci linkpɔn mɛ ɖo e ɖo dɔkun taŋu. ²³ Jesu wa sa nukun gbɔn omɛ xeni lɛ do-e lɛye ji bo ɖɔ:E na vɛ awu na dɔkunnɔ ye na ye na do yi sɛxwe! ²⁴ Oxo nɛ lɔ kpaca do onukplanvi lɛye,a mɔ Jesu gɔ ɖɔ na ye ɖɔ:Vikpɛ ce lɛye,sɛxwe yiyi na vyawu titeŋugbe. ²⁵ Winnyɛ we otlomɛ gbingbɔn na fa na osɔkpotɔnɔ hugan dɔkunnɔ na do ɖyɛ sɛxwetomɛ. ²⁶ E gɔ kpaca do onukplnvi lɛye ke,ye bo le ɖɔ na yeɖe xɔn ɖɔ:Odin de,mɛ ha wɛ na kpego bo na mɔ hwlɛngan? ²⁷ Jesu kpɔn ye tlululu,bo ɖɔ na ye ɖɔ:E nɛ lɔ,gbɛtɔ ye ma kpego gɛ,vɔ Mawu ɖo onuti mɔ nɔ glo biblo na Mawu gɛ. ²⁸ Piyɛ jɛ ɖiɖɔ ji ɖɔ:Kpɔn mye mi jo onu mitɔn lɛye sese do bo xo do we. ²⁹ Jesu ɖo e go ni-i ɖɔ:Le oxojɔxo mɛ un le ɖɔ na mi xɔn:Na mɛɖe jo oxwe do,bo jo nɔvyɛ sunnuglo do do nyɔ kpo Mawu xo lɔ wutu, ³⁰ Mawu na ni-i onu xeni jo do lɛye sese do nu kanweko etɔn le ogbɛ xe mɛ:Oxweye,nɔvi sunnugloye,nɔvi nyɔnusiye,onɔye,vikpɛye,ogleye,ofun ɖi ɖena omɛye,a bo gɔ ni-i ogbɛ mavɔ-mavɔ le ogbɛ xeni na wa lɔ mɛ. ³¹ Omɛ tintantɔn lɛye na wa tlɔ zun goolo tɔ wɛ godotɔ lɛye na wa tlɔ zun omɛ tintantɔn. ³² Le mɔji bo do le sɔn yi Jeluzalɛmu xɔn,Jesu bo le nukɔn na ye,onukplanvi lɛye le onulilo mɛ,omɛe xeni xodo ye lɛye can le ɖi obu xɔn,Jesu gɔ ylɔ onukplanvi wyawe do akpa etɔn,bo jɛ onu xeni ja jijɔ do e ji gbe le madɛn-madɛn mɛ ɖiɖɔ na ye ji. ³³ E ɖɔ na ye ɖɔ:Mi mɔ mi le yi Jeluzalɛmu xɔn,e wɛ ye na sɔ ovi gbɛtɔ tɔn lo sɔ sa do ovɔsantɔ ɖaxo lɛye kpo osɛnkplan omɛtɔye,ye na da oku we ohwɛ ni-i a bo sɔ-ɛ sɔ na omɛ xeni ma nyi Jwifunuye gɛ, ³⁴ Ye na ko-e, a bo tun otan do nukunmɛ ni-i, a bo xo-e kpo olanba, a bo hu-i; azan atɔn gbe etɔn e na fɔn sɔn oku. ³⁵ Zebede we vikpɛye Jaki kpodo Jaan sɛkpɔ Jesu bo ɖɔ ni-i ɖɔ: Onu kplan mɛtɔ, mi jlo ɖɔ onu xena mi na byɔ we a blo na mi. ³⁶ E kan ye se ɖɔ: A ni wɛ mi jlo na ma blo na mi? ³⁷ Ye bo ɖo e go ɖɔ, na mi ogbe na mi-a flɔn-anyi le akpa na we, mɛɖe na flɔn adusimɛ, mɛɖe na flɔn amyɔ mɛ le hwexenu na a wa le gigo tɔwe mɛ. ³⁸ Jesu ɖo e go na ɖɔ: Mi ma nyɔ onu xena mi le byɔ xɔn gɛ. Mi na kpego bo na nu vivɛsise we glasi xena un ja nunu gbe lɔ, a lo ye na kpego bo na lɛ vivɛsise na mi ɖi ɖena ye na lɛ na-un ɖo ha? ³⁹ Ye bo ɖo e go ɖɔ: Mi kpego. Jesu ɖɔ na ye ɖɔ: Vivɛsise we glasi xena un ja nu nu gbe, mi na wa nu-i vivɛsise xena un ja lilɛ gbe lɔ, mi na wa lɛ-ɛ. ⁴⁰ Vɔ xeni nyi aflɔn-anyi le aɖusi mɛ alo amyɔ mɛ na-un tɔn, nyɔ mɛ nɔ na omɛ gɛ, omɛ xena Mawu jla tɛn mɛ nɛ lɔ ɖo anyi na ye, tɔn wɛ e nyi. ⁴¹ Onu kplanvi awe gbokpwe xeni se oxo lɔ do aɖi do Jaki kpodo Jaan. ⁴² Jesu yɔ ye, bo ɖɔ na ye ɖɔ: Mi nyɔ-ɛ ɖɔ omɛ xena ye nɔ mɔ ɖɔ oto ga lɛye ha, nɔ kpa cɛ na oto gun yetɔn lɛye gannu-gannu, omɛ ɖaxo-ɖaxo lɛye bo nɔ ɖu oga na ye. ⁴³ Ni nɔ kpɔn nyi le mɔ ha le mye mɛ gɛ, vɔ omɛ ɖe kpokpwe xeni jlo na nyi omɛ ɖaxo le mimɛ ni nyi ozɔn watɔ mitɔn. ⁴⁴ Na omɛ ɖe jlo bo na nyi nukɔn nɔtɔ le mimɛ, ni nyi kannu mɔ na omɛ gbokpwe lɛye. ⁴⁵ Ɖo gbɛtɔ we ovi lɔ ma wa na ye a do wa wa ozɔn ni-i gɛ, vɔ e wa a bo do wa wa ozɔn na omɛye, a bo sɔ ogbɛ etɔn do su axɔ do ota na omɛ susu. ⁴⁶ Ye wa jɛ Jeliko we toxomɛ, xena Jesu kpodo onukplanvi etɔn lɛye, kpodo gbɛtɔ ahwankpɔ lɛye tɔn sɔn Jeliko, nukun gbigbanɔ Batime xeni nyi Timɛ we ovi, flɔn anyi le mɔto bo di le byɔ onu xɔn. ⁴⁷ Xena e se ɖɔ Jesu Nazalɛtitɔn bɛ, e jɛ axwa dido ji ɖɔ; Jesu Davidi we ovi, kpɔn dɔŋuɖunu na-un. ⁴⁸ Omɛ susu le do axwa do ota ni-i xɔn ɖɔ ni bo bɔ onu; vɔ odin gbɔn wɛ e gɔ do axwa do e ji bo ɖɔ, Davidi we ovi, kpɔn ɖɔŋuɖunu na-un. ⁴⁹ Jesu tle bo ɖɔ: Mi ylɔ-ɛ wa. Ye ylɔ nukun gbigbanɔ lɔ, bo ɖɔ ni-i ɖɔ: Do oji, a bo cite e le ylɔ we xɔn. ⁵⁰ E wɛ e ɖe awu ɖaxo etɔn sɔ flɛn,bo cite hayaŋu bo wa Jesu de. ⁵¹ Jesu yi oxo bo ɖɔ ni-i ɖɔ: A ni ha wɛ a jlo na ma blo na we? E ɖo e go ni-i ɖɔ, onu kplan mɛtɔ, blo na ma mɔ nukun nu. ⁵² E wɛ Jesu ɖɔ ni-i ɖɔ: Wa sɔn, onu ɖiɖi tɔwe hwlɛn we gan, azɔn tɔwe gbɔ. Le tɛndo lokpo mɛ, nukun etɔn hun, e bo xodo Jesu do sɔn.