¹ Hwexenu na ye le sɛkpɔ Jeluzalɛmu we toxo xɔn,bo le Bɛtifaje kpo Betani we akpa,le oso xe ji na olivu we atinye le we akpa ji,Jesu ɖo onukplanvi etɔn awe ɖoxlan, bo ɖɔ: ² Mi yi otota xeni le nukɔn na mi mɛ,na mi o gbɛ ɖyɛ e mɛ,mi na mɔ osɔ ketɛvuɖe,xe ji na mɛɖe ma o xlɛ kpɔn gɛ,mi tlun-i a bo sɔ-ɛ wa. ³ Na mɛɖe kan mi se ɖɔ:"A ni wutu wɛ mi do le blo lemɔha xɔn,mi ɖɔ ni-i ɖɔ:Xwetɔ lɔ ɖo hudo etɔn,vɔ e na gɔ sɔ do wa le madɛn-madɛn mɛ. ⁴ Ye yi bo mɔ osɔkɛtɛvu ɖe le okan mɛ le mɔ nu le hɔntogbo ɖe we akpa ye tlun-i. ⁵ Omɛ ɖe lɛye le fi lɔ bo ɖɔ na ye ɖɔ:A ni wɛ mi le blo le flɛn ani wutu wɛ mi do le tlun osɔkɛtɛvu lɔ xɔn? ⁶ Ye bo yi ogbe na ye ɖiɖena Jesu ɖɔ ɖo ha,wɛ ye jo ye do,ye wa sɔn. ⁷ Ye hɛn osɛkɛtɛvu lɔ wa na Jesu,bo sɔ awu yetɔn lɛye do e ji,wɛ Jesu flɔn e ji. ⁸ Omɛ susu ye tɛ awu yetɔn ye do omɔ lɔ ji,mɛɖe lɛye bo tɛ ama ye,xena ye gbo sɔn glegbo. ⁹ Omɛ xeni le nukɔn kpo omɛ xeni le godo na Jesu lɛye le do axwa xɔn ɖɔ:Gigo na Mawu!Mawu ni do na omɛ xeni ja le Aklunɔ we nyikɔ mɛ! ¹⁰ Mawu ni do na axɔluɖuɖu xeni na wa lɔ,Davidi dagbo mitɔn we xɔluɖuɖu lɔ,gigo na Mawu le sɛxwe! ¹¹ Jesu ɖyɛ Mawu we oxwe lɔ gbe le Jeluzalɛmu,xena e ɖe okɔ bo mɔ onu lɛye sese vɔ,e sɔn yi Betani, e yɔ kpo onukplanvi wyawe lɛye kpo,ozan ka o le do xɔn. ¹² Ayihɔngbe etɔn,hwexenu na e jɛ Betani,xovɛ ci. ¹³ E mɔ figitin ɖe ɖoxlan,amaye bo lɛ le ji, e bo yi e de,a bo do kpɔn ɖɔ sinsyɛn ɖe na le eji vlavo wɛ ja,xena e sɛkpwɛ,ama ye kɛɖɛ jan wɛ e mɔ,ɖo e ma o nyi hwenu na hwenu na figitin na syɛn do gɛ. ¹⁴ E wɛ Jesu ɖɔ na figitin lɔ ɖɔ:Mɛti ma gɔ na ɖu sinsyɛn tɔwe kpɔnɖe gɛ!Wɛ onukplanvi etɔn lɛye bo se oxo nɛ lɔ. ¹⁵ Ye wa Jeluzalɛmu,xena Jesu ɖyɛ Mawu we oxwe lɔ gbe,e jɛ onu satɔye kpo onuxɔtɔye kpo nya ji,e fli kɔbɔ yetɔn ye we tavo kpodo hɔnnɛ satɔye we okpoye; ¹⁶ e ma jo mɛti do le onusatɔ lɛye mɛ gɛ. ¹⁷ E jɛ okplan na ye ji bo ɖɔ:"E ma nyi winwlan ɖɔ:Oxwe ce gbe na nyi oɖɛ xixo we xwegbe na akɔta lɛye sese?Vɔ,miye ka sɔ do blo jaguda ye we xwegbe. ¹⁸ Avɔsantɔ ɖaxo-ɖaxo lɛye kpo osɛnkplanmɛtɔye kpo se oxo nɛ lɔ,bo jɛ ayixa kan ji,bo na hu-i,vɔ ye ka le ɖi obu ni xɔn ɖo onukpinkplan eton lɛye nɔ vivi na omɛ lɛye kpokpo. ¹⁹ Xena hwedo do,Jesu kpo onukplanvi etɔn lɛye tɔn le oto lɔ mɛ. ²⁰ Hwenu na ye wa le sɔn xɔn le zanfunnu,ye mɔ figitin lɔ xu gbɔɔn do yi dodwe nu. ²¹ Piyɛ flin onu xeni jɔ lɔ bo ɖɔ na Jesu ɖɔ:Hlabi,kpɔn figitin xena a do onu lɔ e xu. ²² Jesu ɖo e go ni ɖɔ:Mi ɖi onu na Mawu. ²³ Le oxojɔxo mɛ un le ɖɔ na mi xɔn ɖɔ:Na omɛ ɖe ɖɔ na oso nɛ ɖɔ ni bo sɛtɛn le flɛn a bo wa yi je oxu mɛ,wɛ omɛ lɔ ma xo onu kpɔn le oji etɔn mɛ gɛ,vɔ bo ɖi onu ɖɔ oxo xena mye bo ɖɔ bo na jɔ,e na jɔ do lemɔha lɔ xonugbo. ²⁴ E wɛzɔn un le ɖɔ na mi xɔn ɖɔ: Onu ɖekpokpwe na mi na byɔ le oɖɛ mɛ,ɖinu ɖɔ miye bo o mɔ onu lɔ,wɛ e na wa cicɛ mɛ. ²⁵ Hwxenu na mi le ote bo le xo oɖɛ xɔn,na mi ɖo onu ɖe kpan nukɔn tɔ omɛ ɖe mi sɔ ohwɛ sɔ xɔ kɛ,e nɛ myetɔ xeni le sɛxwe can na sɔ ohwɛ mitɔn sɔ xɔ kɛ mi. ²⁶ Vɔ na mi ma sɔ ohwɛ sɔ xɔ kɛ omɛ gbokpwe lɛye gɛ,myetɔ xeni le sɛxwe can male sɔ xɔ mi gɛ. ²⁷ Ye lɛkɔ wa Jeluzalɛmu we toxomɛ,hwenu na Jesu le ɖisa gbɔn Mawu we xɔmɛ xɔn,avɔsantɔ ɖaxo Mawutɔn lɛye kpo osɛnkplanmɛtɔye,kpodo otomɛxo lɛye sɛkpɔ-ɛ, ²⁸ ye kan-ɛ se ɖɔ:Acɛ bɔtɔn ha wɛ a nɔ do blo onu nɛ lɛye,mɛ wɛ na acɛ nɛ lɔ? ²⁹ Jesu ɖo e go na ye ɖɔ:Nyɔ can ma kan oxo lokpo mi se na mi a ɖo ego na-un;e nɛ na ɖɔ acɛ na un do le blo onu enɛ lɛye na mi. ³⁰ Mɛ wɛ ɖo Jaan ɖoxlan ɖɔ ni bo wa nylɔ omɛye do osin mɛ,Mawu wɛ lo alo gbɛtɔye wɛ? mi ɖo ego na-un. ³¹ Vɔ ye jɛ ɖiɖɔ na yeɖe ji ɖɔ:Na mi ɖɔ Mawu,e na kan mi se ɖɔ a ni wutu mi ma kan do e ji gɛ ja? ³² Alo gbɛtɔye de wɛ mi na ɖɔ e bo sɔn...Ye le ɖi obu na omɛye xɔn,ɖo omɛ sese o nywɛ ɖɔ Jaan bo nyi ɖɔɖanyiɖɔtɔ Mawu tɔn. ³³ E wɛ ye gbɔjwɛ ɖo ego na Jesu ɖɔ:Mi ma nywɛ gɛ,Jesu bo ɖo ego na ye ɖɔ,be nyɔ can un ma le ɖɔ omɛ xeni na acɛ un na un do le blo onu nɛ lɛye na mi xɔn gɛ.