¹ E nɛ godo, Jesu jɛ olodo na ye ji bo le ɖɔ xɔn ɖɔ:" Dahwe ɖe do vɛntinye do glegbo etɔn bo do adokpa lɛdo-e, bo kun odo xemɛ na e na fyɔn hlɛzɛn lɔ le, bo gba oxɔ xemɛ na ogle cɔtɔ lɔ na nɔ. E nɛ godo, e sɔ do na kpama na oglelɛtɔ ɖe lɛye bo sɔn yi tomɛ. ² Xena sinsyɛn lɛye we gbingbɛn we gan mɛ do, e do o zɔnwatɔ ɖe ɖo xlan oglelɛtɔ lɛye de na ye a do na sinsyɛn xeni nyi axɔ susu etɔn wi-i. ³ Oglelɛtɔ lɛye wle ozɔnwatɔ lɔ bo-e, bo nyɛn-ɛ asigba-alɔgba. ⁴ E gɔ ɖo ozɔnwatɔ bu ɖoxlan, ye wo ota na e yɔ cangba, bo zun-i. ⁵ E gɔ sɔ ozɔnwatɔ atɔngɔ ɖoxlan, ye hu-i; E gɔ sɔ bu ye ɖoxlan gbagbagba, ye xo ɖe lɛ ye bo hu ɖe lɛye. ⁶ Ovi etɔn lokpo gee xena e nyi owan na jan wɛ kpo. E sɔ-ɛ ɖoxlan ye le vivɔnu, bo le ɖɔ xɔn ɖɔ: Ye na ɖinu na ovi sunnuglo ce. ⁷ Vɔ, oglelɛtɔ lɛye ɖɔ na yeɖe ɖɔ: ovi xeni na wa sɔ cinɔ lɔ nɛ. Mi wa na mi-a hu-i na cinɔ lɔ a do nyi mitɔn ⁸ Ye wle-e, bo hu-i, bo dɔn-ɛ tɔn le ogle lɔ mɛ. ⁹ Odinɖe, ani wɛ vɛngletɔ lɔ na blo na ye? E na wa, a bo hu oglelɛtɔ lɛye, a bo sɔ ogle lɔ do na kpama omɛ bu ye. ¹⁰ Mi ma oxo xe lɔ ni le wemɛ lɔ mɛ gɛ wɛ? ye wlan ɖɔ: Okpɛn xena oxɔgbatɔ gbɛ ɖo a nyi e wɛ wa tlɔ zun ko nu ji we okpɛn. ¹¹ Ozɔn wiwa Mawu tɔn nɔ kpaca do miye. ¹² Ye le din bo na wle-e xɔn, vɔ bo ka le ɖi obu na omɛ susu gbagbagba lɛye xɔn, ɖo ye mɔ nukunnu do e mɛ ɖɔ mye go bɛ Jesu bo do olo nɛ lɔ do. Ye lɛ le e kɔn bo sɔn. ¹³ Yeɖo Falizitɔye kpo omɛ xeni le Elodu we gbɛta mɛ ɖoxlan Jesu,na ye a do blo ɖo ɖe kaka ni a jɛ omɔ diɖo yetɔn mɛ gbɔn oxo ɖiɖɔ etɔn mɛ. ¹⁴ Xena ye wa Jesu de,ye ɖɔ:Onukplanmɛtɔ mi nyɔ-ɛ ɖɔ a nɔ ɖɔ oxojɔxo,bo nɔ kplan onu omɛ gbɔn omɔ jijwɛji,a mɔ nɔ ɖibu na mɛɖe gɛ,a ka mɔ nɔ nɔ mɛɖe ji gɛ Mawu we omɔji wɛ a nɔ kplan onu omɛ dogbɔn oxojɔxo mɛ.Osɛn mitɔn ɖɔ ɖɔ mi bo na su ganjɔ na Seza wɛ?Ɛɛn alo oo?ɖɔ na mi? ¹⁵ Xena Jesu nyɔ yɛmɛnu yetɔn wi,e ɖɔ na ye ɖɔ:"A ni wutu wɛ mi le ɖo omɔ na-un xɔn?Mi sɔ akwagan ɖe wa na-un na ma kpɔn. ¹⁶ Wɛ ye sɔ wa ni-i e bo kan ye se ɖɔ:Oyɛ kpo nyikɔ mɛtɔn wɛ le eji?Ye ɖo e go ni-i ɖɔ:"Seza tɔn wɛ. ¹⁷ E wɛ Jesu ɖɔ na ye ɖɔ:Mi sɔ onu xeni nyi Seza tɔn sɔ na Seza,a bo sɔ onu xeni nyi Mawu tɔn sɔ na Mawu.Oxo do oxo go yetɔn nɛ lɔ kpaca ye taŋu. ¹⁸ Sadusitɔye wa Jesu de,ye wɛ nɔ ɖɔ ɖɔ finfɔn sɔn oku bo ma le gɛ,ye kan Jesu se ɖɔ: ¹⁹ Onukplanmɛtɔ,osɛn xena Mɔyizi wlan na mi ɖye:Na mɛɖe ɖo nyɔnu bo ka ma ji ovitigɛ bo ku le nyɔnu lɔ de,vɔ nɔvyɛ sunnuglo xeni je godo ni-i bo le,nɔvye lɔ na sɔ okposi lɔ sɔ ɖe a bo do ji ovi na nɔvyɛ xeni ku lɔ. ²⁰ Odin nɔvi-nɔvi canwe ɖe lɛye le.Tintan lɔ ɖe nyɔnu,bo ku le nyɔnu lɔ de ovi ma ji. ²¹ Nɔvyɛ sunnuglo awegɔ lɔ sɔ okposi lɔ bo sɔ ɖe,bo ku ovi ma ji ke,omɛ atɔngɔ can. ²² Sɔ okposi lɔ sɔ ɖe, bo ku ovi ma ji, le mɔha wɛ ye mɛ sunnuglo canwe lɛye ɖe nyɔnu lɔ ɖo, ɖe bɔ do ɖe go, ɖo, ye bo ku sese ovi ma ji. E nɛ godo, nyɔnu lɔ can wa ku gba. ²³ Le fifɔn sɔn oku we azangbe, hwexe nu na omɛ kukuye na fɔn, mɛ ha tɔn wɛ na nyi nyɔnu lɔ le ye mɛ? Ɖo ye mɛ canwe lɛye kpokpo wɛ ɖe-e, bo do ɖo nyɔnu. ²⁴ Jesu ɖo e go na ye ɖɔ: Mi le blɛ miɖe ɖu xɔn, mi nyɔn onu ni zɔn? Mi ma nyɔ Mawu xo lɔ gbɔɔn do nyɔ Mawu we hɔnhlɔn can wi gɛ. ²⁵ Le oxojɔxomɛ, le fifɔn sɔn oku we azangbe, mɖe ma gɔ le ɖe asu xɔn gbɔɔn do le ɖe nyɔ nu xɔn gba gɛ. Vɔ ye na ciɖi Mawu we wɛnzangun xeni le sɛxwe ye ha. ²⁶ Xeni kan omɛ kukuye na fɔn sɔn oku tɔn,mi ma xlɛ Mɔyizi we onuwinwlan xeni ɖɔ oxo ɖɔ Klisi xeni le ozmɛ,vɔ bo gbɛ bibi?Ye nɔ xlɛ le emɛ ɖɔ Mawu ɖɔ na Mɔyizi ɖɔ:Un nyi Mawu Ablaxamutɔn,Mawu Izakitɔn kpo Mawu Jakɔbutɔn? ²⁷ Mawu ma nyi omɛ kukuye we Mawugɛ,vɔ omɛ xeni le ogbɛ we Mawu wɛ nyi.Onu wa nyido ɖaxo wɛ mi le blo xɔn. ²⁸ Osɛnkplanmɛtɔ ɖe se ɖena Jesu ɖo oxo lɔ e go ɖo na Sadusitɔye,e bo mɔ ɖɔ e bo jɔhun bo sɔ gbe,vɔ e kan Jesu se ɖɔ:Osɛn bɔtɔn ha wɛ nyi tintan le osɛn lɛye mɛ? ²⁹ Jesu ɖo e go ni-i ɖɔ:Tintan lɔ wɛ nyi:Izlayɛli,ɖo oto-un,Mawu mitɔn wɛ nyi Mawu lokpo gee; ³⁰ a nyi owan na Mawu tɔwe kpo oji tɔwe sese alindɔn tɔwe sese,ayixa tɔwe sese kpo hɔnhlɔn tɔwe sese. ³¹ Awegɔ lɔ ɖye:A nyi owan na hatɔwetɔ ɖi yɔ tesu ha.Osɛn ti ma gɔ le bo hugan e nɛ lɛye gɛ. ³² Osɛnkplanmɛtɔ lɔ ɖɔ ni-i ɖɔ:E jɔhun ganji onukplanmɛtɔ,a ɖɔ oxojɔxo Mawu lokpo gee wɛ le,Mawu ti ma gɔ le zɛgbɔn e yɔ lɔ go gɛ, ³³ e wɛ a nyi owan ni-i kpo oji omɛtɔn sese kpo,zinzin omɛtɔn sese kpo,hɔnhlɔn omɛtɔn sese a bo gɔ nyi owan na hamɛtɔntɔ ɖi omɛ tesu ha e nɛ lɔ nyɔ hugan avɔsinsan fifyɔ kpodo avɔsan nu sese. ³⁴ Xena Jesu mɔ ɖɔ e bo ɖɔ oxo kpo onunyinywɛ kpo,e ɖɔ ni-i ɖɔ,a ma dɛn le sɛxwe gp gɛ.Mɛti ka ma gɔ xaji kan oxo ɖe wi-i se gɛ. ³⁵ Jesu yi oxo bo gɔ jɛ onukpinkplan omɛye ji le Mawu we oxwe lɔ gbe,e bo ɖɔ:"Naɖe wɛ e nyi ɖo na osɛnkplanmɛtɔ nɔ do ɖɔ ɖɔ:"Davidi we vi kpoŋu jan bɛ Klisi lɔ bo nyi? ³⁶ Gbigbɔ ɖe ɖo ovo tɔn ɖɔ gbɔn Davidi lɔ tesu ji ɖɔ:"Xwetɔ Mawu ɖɔ na xwetɔ ce ɖɔ:Flɔn-anyi le aɖusi mɛ na-un gbɔɔn do jɛ hwexenu na na sɔ kɛntɔ tɔwe lɛye sɔ do afɔ tɔwe gɔ. ³⁷ Davidi lɔ tesu nɛ le yɔ-ɛ ɖɔ xwetɔ xɔn naɖe e nyi ovi etɔn kpoŋu ɖo?"Omɛ susu le ɖo oto oxo etɔn kpo jijwɛ kpo. ³⁸ Le onukpinkplan etɔn mɛ,e le ɖɔ xɔn ɖɔ:Mi cɔ miɖe do osɛnkplan mɛtɔ lɛye go,ojlo yetɔn wɛ nyi ɖɔ ye na nɔ le dan-a xɔn kpo awu gaga gblɛlɛlɛ yetɔn le okɔ kpo,wɛ omɛye a nɔ le do ogbe na ye xɔn kpodo sisi kpo le dogbaji lɛye; ³⁹ ye a flɔn-anyi le nukɔn tɔntlɔn gbɔn le okplitɛn yetɔn lɛye,kpo agɔ ɖutɛn lɛye; ⁴⁰ ye nɔ yi okposi lɛye we onu xeni le ye si ye,co a bo nɔ xo oɖɛ na ganxixo susu na gbɛtɔ ye a do mɔ ye,oto xena Mawu na dɔn na ye na syɛnxu taŋu. ⁴¹ Jesu flɔn-anyi bo kpan nukɔn onujijɔ we ɖaka lɔ,bo do le kpɔn ɖena omɛye le sɔ onujijɔ yetɔn do ɖaka lɔ mɛ ɖo xɔn.Dɔkun nɔ susu le sɔ kɔbɔ susu do e mɛ xɔn. ⁴² Nahwe asukudosi ayanɔ ɖe wa,bo sɔ akwagan awe xeni hwe hugan kɔbɔ ɖyɛ lɛye sese sɔ do onujijɔ ɖaka lɔ mɛ. ⁴³ Jesu ylɔ onukplanvi etɔn lɛye bo ɖɔ na ye ɖɔ mɔsin:Asukudosi ayanɔ xe,e na onu hugan omɛ gbokpwe lɛye sese; ⁴⁴ ɖo omɛ gbokpwe lɛye sese,kɔbɔ ɖukpo yetɔn go wɛ ye sɔ le bo wa na,vɔ e yɔ ayaɖkwa etɔn kpokpo xena e na do nɔ ogbɛ wɛ e sɔ wa na.