¹ Hwexenu na Jesu le tɔn le Mawu we oxɔ lɔ mɛ xɔn,onukplanvi etɔn ɖe ɖɔ ni-i ɖɔ:"Onukplanmɛtɔ,kpɔn okpɛn jijɔhun ne lɛye kpo oxɔ jijɔhun nɛ lɛye! ² Jesu ɖɔ ni-i ɖɔ:A mɔ oxɔ ɖaxo-ɖaxo nɛ lɛye,okpɛn lokpo tesu ma gɔ wa le nɔ ɖe ji xɔn gɛ,ye na gba ye sese kpo. ³ Hwexenu e le anyi finflɔn le oso xeji na olivu we atin le,bo kpan nukɔn Mawu we oxe,Piyɛ,Jaki,Jaan kpo nɔvyɛ Andle kpo kɛɖɛ le e de,ye bo kan-ɛ se ɖɔ: ⁴ Hwetɛhwenu ha wɛ onu e nɛ lɛye na jɔ do,ɖɔ na mi? ⁵ Jesu jɛ ɖiɖɔ na ye ji ɖɔ:Mi cɔ miɖe,omɛɖe ni nɔ kpɔn blɛ mi ɖu gɛ. ⁶ Omɛ susu na wa le nyikɔ ce mɛ bo na nɔ ɖɔ,nyɔ wɛ nyi Klisi lɔ,bo na flu omɛ susu. ⁷ Na mi se ɖɔ ahwan bo le jɔ xɔn,alo ahwan bo ja,ayixa ni nɔ kpɔn gbado na mi gɛ,ɖo onu e nɛ lɛye ɖo na jɔ.Vɔ ogbɛ lɔ ma le vɔ do flɛn xɔn tlololo gɛ. ⁸ Jesu gɔ ɖɔ:Otogun ɖe na fɔn gu do otogun ɖe ji,lemɔha ke xɔluɖuto ɖe na fɔn gu do ɖe ji.Anyizan na hunhun le fiɖe lɛye,xovɛ na tɔn,e na le ɖi awuvɛ xena nyɔnusi nɔ se le alinɖuɖu hwenu ha. ⁹ Mi cɔ miɖe,omɛye na dɔn migbɔn ohwɛ nukɔn le ohwɛɖɔxweye,ye na xo mi le cɔcixɔ ye mɛ,do nyɔ wutu,wɛ mi na do ɖe kunnu na-un le nukun mɛ yetɔn. ¹⁰ Ɖo Mawu we oxo lɔ ɖo na nyi jijla na akɔta lɛye sese hwɛkpo ogbɛ lɔ na vɔ. ¹¹ Na ye wle mi bo na sɔ sa,mi nɔ kpɔn so jikan do onu na mi na ɖɔ go gɛ,vɔ mi ɖɔ onu ɖekpokpwe na gbigbɔ na sɔ do oji mitɔn mɛ le hwenɛnu. ¹² Nɔvi na din oku na nɔvi,otɔ na din oku na ovyɛ,ovi na fɔn gu do otɔ kpo onɔ kpo ji,kaka gbɔn oku jan wɛ na ɖa. ¹³ Omɛ lɛye kpokpo na gbɛ owan na mi do nyɔ wutu,vɔ omɛ xeni na do vivɛnu kaka yi vivɔnu na mɔ hwlɛngan. ¹⁴ Jesu gɔ ɖɔ na ye ɖɔ:Hwexenu na mi na mɔ onu xyawu xenɔ do obu na ome na wa le ofi xena e ma ɖo na nɔ gɛ,(na omɛ xeni le xlɛ onu lɔ xɔn ni mɔ do na ganji),na omɛ xeni na le Jude we kansinmɛ ye ni si a bo sɔn yi oso lɛye we godo. ¹⁵ Omɛ xena le oxɔta,ni nɔ kpɔn jɛ ote wa odo a bo do sɔ onu etɔn ti gɛ. ¹⁶ Omɛ xeni le oglemɛ ni nɔ kpɔn wa xwegbe a bo do sɔ awu ɖaxo etɔn gɛ. ¹⁷ Vɔ ahelu na nyɔnusi xeni na le xoxo le hwenɛnu,kpo nyɔnusi xena ovi le anɔnu na kpo. ¹⁸ Mi xo oɖɛ na ni nɔ kpɔn wa jɔ le vivɔ hwenu gɛ. ¹⁹ Ɖo le azan lɔ gbe,vivɛsise lɔ na hugan gbɔɔn,vivɛsise xeni ma jɔ kpɔn sɔn hwexenu na Mawu do da ogbɛ bo do blo onu leye do e mɛ,vivɛsise xe ma gɔ le jɔ xɔn bo na ɖi e xe lɔ ha gɛ wɛ na jo. ²⁰ Na Aklunɔ ka ma do ɖe azan lɔ kpo gɛ,mɛti ma le mɔ hwlegan xɔn ge.Vɔ,do kun do omɛ cincan etɔn lɛye go,omɛ ɖe do ovo etɔn lɛye go,e ɖe azan lɔ kpo. ²¹ E wɛzɔn na mɛɖe ɖɔ na mi ɖɔ:Mi kpɔn Klisi lɔ le fi e,kpɔn-ɛ le flɛn daxwe,mi nɔ kpɔn ɖinu na gɛ. ²² Ɖo Klisi awoɖotɔ kpo ɖɔɖanyiɖɔtɔ awonɔ ye na wa wa a bo blo nujawu,a bo blɛ omɛye ɖu gbɔn do wa jɛ omɛ cincan Mawu tɔn lɛye ji. ²³ Miye mi nɔ aceji,ɖo un o xo okpa na mi:ɖo onu lɛye sese go. ²⁴ Vɔ le azan ne lɛye gbe,le vivɛsise nɛ lɛye godo,ozan na do le okle osunhwlɛ ma gɔ le ɖi xɔn gɛ, ²⁵ sunhwlɛvi ye na flɛ sɔn oji,wɛ hɔnhlɔn we onu ni le oji lɛye na hunhun. ²⁶ E wɛ ye na mɔ ovi gbɛtɔ tɔn lɔ,sunwɔ na lɛ do-e,wɛ e na ja kpo hɔnhlɔn kpo le gigo ɖaxo ɖe mɛ. ²⁷ E na ɖo wɛnzangun etɔn lɛye ɖoxlan wɛkɛzo ɛnɛ lɛye mɛ,wɛ ye na kpli omɛ cincan etɔn lɛye sɔn odo ɖe ji,gbɔɔn do jɛ odo ɖe ji. ²⁸ Mi kplan onu sɔn figitin go,na mi mɔ ɖɔ alɔklan eton lɛye bo tlɔzun mumu,ama etɔn lɛye bo le wu xɔn,mi,bo nywɛ ɖɔ oxwde jokun bo ja bibɛ gbe. ²⁹ Lemɔha ke,miye can,na mi le mɔ onu ne lɛye le jɔ xɔn ,mi nywɛ ɖɔ ovi gbɛtɔ tɔn lɔ we wiwa bo o ya,e bo le ohɔn ji. ³⁰ Le oxojɔmɛ, un le ɖɔ na mi xɔn,jijimɛvi egbe tɔn lɛye ma le ku xɔn sese hwɛkpo na onu nɛ lɛye na jɔ gɛ. ³¹ Oji kpodo odo kpo na wa yi,vɔ oxo ce ma wa le kpɔn gbeɖe gɛ. ³² Vɔ,xeni kan azan lɔ alo xeni kan oganxixo mɛti ma nywe gɛ,wɛnzangun Mawu ton lɛye o,ovi gbɛtɔ tɔn lɔ o,amɔ otɔ lokpo gee wɛ nywɛ. ³³ Mi nɔ aceji a bo nɔ nukle,ɖo mi ma nyɔ hwenu na ogan lɔ na xo gɛ. ³⁴ Ye hɛn ye na jlɛ do dahwe xeni na zɛ ohwɛn go,e jo oxwe etɔn do,bɛ sɔ do acɛ mɛsɛntɔ etɔn lɛye tɔn mɛ,bo ɖo ozɔn na ye mɛ omɛ lokpo lokpo,e wa ɖɔ na oxwe cɔ tɔ etɔn ɖɔ,ni,bo nɔ nukle. ³⁵ E wɛzɔn,mi nɔ nukle ɖo mi ma nyɔ hwexenu na xwetɔ lɔ na wa do gɛ,hwedo wɛ,alo ozan domɛ,koklo do ase hwenu wɛ,alo zanfunnu wɛ; ³⁶ mi nɔ kpɔn na ma wa xlɔ wa xwegbe le ajijimɛ a bo wa mɔ mi le amlɔ mɛ gɛ. ³⁷ Oxo xena un le ɖɔ na mi xɔn,omɛ lɛye kpokpo wɛ un le ɖɔ na xɔn,mi nɔ nukle.