¹ Dindin wayi we oxwe kpo kpɔnnɔ mado tinkɛn we oxwe kpo azan awe,Mawu we avɔsantɔ ɖaxo lɛye kpo osɛnkplanmɛtɔ le kan ayi xɔn a bo do do oyɛ Jesu a do wle-e a bo hu-i. ² Ɖo ye le ɖɔ xɔn ɖɔ:Mi ma le blo onu lemɔha tɔn le oxwe lɔ gbe xɔn gɛ,e nɛ dɛn otogun lɔ na gbɛ wa fɔn ogu. ³ Jesu le Betani we otota mɛ,le Simɔ xeni jɛ guduzɔn saan xoxo le xwegbe.E wɛ hwexenu e le tavo kɔn bo le ɖu onu xɔn,nyɔnu ɖe wa tɔn bo hɛn ogo xena ye sɔ okpɛn wewe do blo,do alɔ mɛ,celu adodwe kɔbɔ vivɛ tɔn xena ye sɔ nalu do blo gɔ-ɛ.Nyɔnu lɔ fo nusu ni le ogo lɔ nu bo ɖyɔ celu lɔ do ota na Jesu. ⁴ E ma nyɔ na omɛ xeni le flɛn lɔ gɛ,ye bo le ɖɔ na ye ɖe xɔn ɖɔ:A ni wɛ jɔ na celu nɛ do da gugu yihun ɖo lemɔha? ⁵ Ye hɛn ye na sa celu nɛ,a bo yi kɔbɔ hugan akwagan sandi atɔn(300),a bo sɔ kɔbɔ lɔ sɔ ma na ayanɔye.Ye gbɛ onu na nyɔnu lɔ vivɛɖe. ⁶ Vɔ Jesu ɖɔ:Mi jo-e do xwii,a ni wutu mi do le do hannu ni-i xɔn?Onu jijɔhun wɛ e blo na-un; ⁷ ɖo ayanɔ ye le mide tɛgbɛ,hwexenu ni jlo mi wɛ mi na blo onu jijɔhun ni-i,vɔ nyɔ un ma le mi kɔn tɛgbɛ gɛ. ⁸ E blo onu xego na e kpe,e hu celu na gbaza ce,a bo do jla-un ɖo ɖo anyi na ɖiɖi zangbe ce. ⁹ Le oxojɔxo mɛ,un le ɖɔ na mi xɔn,ofi ɖekpokpwe xena ye na jla owɛnɖagbe lɔ le ogbɛ lɔ mɛ sese,ye na ɖɔ onu xena nahwe xe blo a bo do ɖo nukun e go. ¹⁰ Juda Isikalyɔtu,xeni nyi lokpo le onukplanvi wyawe lɛye mɛ wayi mɔ avɔsantɔ ɖaxo Mawu tɔn lɛye a bo do sɔ Jesu sɔ sa na ye. ¹¹ Ye se oxo etɔn kpo jijwɛ,ye bo do akpagbe ni-i ɖɔ miye bo ba su kɔbɔ wi-i.Juda bo jɛ ayixa kinkan ji a do mɔ omɔ a bo do sɔ Jesu sɔ sa na ye. ¹² Kpɔnnɔ mado tinkɛn we oxwe lɔ we azan tintan gbe,azan xegbe na ye ɖo na hu lɛngbɔviye na dindinwayi we oxwe we onuɖuɖu lɔ.Jesu we onukplanviye kan-ɛ se ɖɔ:Bɔ wɛ a jlo ɖɔ mi na wa yi ɖa dindin wayi we oxwe lɔ we onuɖuɖu lɔ na we le? ¹³ Jesu ɖo onukplanvi etɔn awe ɖoxlan bo ɖɔ na ye ɖɔ:Mi yi toxo lɔ mɛ,dahwe ɖena wa kpe mi,e bo hɛn osinzɛn do ota,mi xo do-e. ¹⁴ E wɛ,ofi xena e na ɖyɛ,mi ɖɔ na omɛ xeni kpacɛ na oxwe lɔ ɖɔ:Onukplanmɛtɔ lɔ kanwe se ɖɔ bɔ wɛ oxɔ xemɛ na na ɖu dindinwayi we oxwe we onuɖuɖu lɔ kpo onukplanvi ce lɛye le? ¹⁵ E na sɔ oxɔ ɖaxo ɖe xena ye o jla ɖo sɔ xlɛ mi le sanŋu ji,ye boo to onu xeni hyan sese do e mɛ.Flɛn lɔ wɛ mi na ɖa onuɖuɖu lɔ le na mi. ¹⁶ Onukplanvi lɛye yi bo ɖyɛ toxo lɔ mɛ,bo mɔ onu lɛye sese ɖi ɖena Jesu ɖɔ na ye ɖo ha,ye bo ɖa dindin wayi we oxwe we onuɖuɖu lɔ. ¹⁷ Xena hwedo do,Jesu kpo onukplanvi wyawe lɛye wa. ¹⁸ Hwexenu na ye le tavo kɔn bo le ɖu onuxɔn,Jesu ɖɔ:Le oxojɔxo mɛ,un le ɖɔ na mi xɔn,omɛ lokpo le mi mɛ bo le ɖu onu xa-un xɔn na sɔ-un sɔ sa. ¹⁹ Ye jɛ onulilo ji bo ci alwɛ mɛ,wɛ omɛ lokpo-lokpo nɔ kan-ɛ se xɔn ɖɔ:E ma nyi nyɔ wɛ nɛ? ²⁰ E ɖɔ na ye ɖɔ:Omɛ lokpo wɛ le mimɛ wyawe lɛye mɛ bo le do alɔ onuɖuka lokpo mɛ xa-un xɔn. ²¹ Oxojɔxo wɛ,gbɛtɔ we ovi lɔ na ku ɖi ɖena ye wlan do e go ɖo ha,vɔ ahelu na omɛ xeji na oku ovi gbɛtɔ tɔn lɔ na gbɔn!Omɛ nɛ lɔ,ye gbɔjwɛ gɔn ma ji-i,e nyɔ xu. ²² Hwexenu na ye le ɖu onu lɔ xɔn,Jesu sɔ kpɔnnɔ xena e do okpɛ na Mawu do e ji,vɔ e ma-ɛ bo sɔ na onukplanvi etɔn lɛye bo ɖɔ:Mi yi,e xe lɔ wɛ nyi gbaza ce. ²³ E nɛ godo,e sɔ glasi xemɛ na vɛn le,bo do okpɛ na Mawu do e ji,bo sɔ na ye,ye mɛ lɛye sese bo hu-i. ²⁴ E wɛ e ɖɔ naye ɖɔ:E xe lɔ wɛ nyi ohun ce,e lɔ wɛ Mawu do blo okancica ohun xe lɔ wɛ ye na kɔn do anyi do omɛ susu we tamɛ. ²⁵ Le oxojɔxo mɛ,un le ɖɔ na mi xɔn un ma gɔ le nu vɛnti xɔn kpɔn gbeɖe gbɔɔn do yi hwexenu na na gɔ wa yi nu vɛn yɔyɔ le Mawu we xɔluɖuɖu lɔ mɛ. ²⁶ Xena ye ji dindin wayi we oxwe we ohanye vɔ,ye sɔn yi oso xeji na olivutinye le. ²⁷ Jesu ɖɔ na onukplanvi etɔn lɛye ɖɔ:Mi mɛ lɛye sese na gbɛ-un,ɖo ye wlan le Mawu we oxo lɔ mɛ ɖɔ:Na hu lɛngbɔkplantɔ lɔ,lɛngbɔ lɛye na gbakpe. ²⁸ Vɔ na un fɔn sɔn oku vɔ,na wa tle kpɔn mi le Galile. ²⁹ Piyɛ ɖɔ ni-i ɖɔ:Omɛ kpokpo na gɔ gbɛ we can,nyɔ un mɛ gbɛ we xɔn kpɔn gbeɖe. ³⁰ Jesu ɖɔ ni-i ɖɔ:Le oxojɔxo mɛ,un le ɖɔ na we xɔn,le egbe yɔ,le ozan xemɛ tesu can,hwɛkpo koklo na dase hwla we,a gbɛ-un hwlatɔn kpetekple. ³¹ Vɔ Piyɛ gɔ le tɛ oɖɛ e ji xɔn vivɛɖe ɖɔ:E nyi na tlɛ ku xa we can un ma le ɖɔ xɔn gbeɖe ɖɔ un bo ma nyɔ we gɛ gbeɖe.Onukplanvi gbokpwe lɛye can ɖɔ lemɔha. ³² Ye wa yi jɛ ofi na ye nɔ yɔ dɔ Jɛtisemanɛ,e bo ɖɔ na onukplanvi lɛye ɖɔ:Mi flɔn-anyi le fye,na ma yi xo oɖɛ. ³³ E kplan Piyɛ,Jaki kpo Jaan do sɔn,vivɔfun bo nyi-i,ota bo bla ahwan ni-i. ³⁴ E bo ɖɔ na ye ɖɔ:Un le onulilo mɛ gbɔɔn bo ja kuku gbe,mi nɔ fye,a bo nɔ nukle. ³⁵ E wɛ e sɛ yi nukɔn kpɛɖe,bo cɔn nukun mɛ anyi,bo le xo oɖɛ xɔn,e nɛ na e na do kpego jɛ e ji wɛ,na e ma gɔ do le gbɔn vivɛsise mɛ xɔn gɛ. ³⁶ E le ɖɔ xɔn dɔ:Aba,atɛye,a kpe onukpokpo go,ɖe vivɛsise we glasi lɔ sɛ le dye,vɔ nɔ kpɔn blo ojlo ce gɛ,blo ojlo tɔwe. ³⁷ E lɛkɔ wa onukplanvi atɔn lɛye de,ye bo le amlɔ mɛ,e bo ɖɔ na Piyɛ ɖɔ mɔsin:Simɔ,amlɔ wɛ a le dɔ xɔn?A ma kpego bo nɔ nukle na oganxixo lokpo tesu gɛ! ³⁸ Mi nɔ nukle a bo xo oɖɛ,hwenɛnu,mi,ma gɔ wanle jɛ anyi le xwlekpɔn hwenu xɔn gɛ;gbɛtɔ we ayixa nɔ ɖo ojlo jijɔhun,vɔ gbaza bo gbɔjɔ. ³⁹ E gɔ sɛ yi ke,bo gɔ xoɖɛ lokpo lɔ ke. ⁴⁰ E nɛ godo e gɔ lɛkɔ wa onukplanvi lɛye de,bo mɔ ɖɔ ye le amlɔ mɛ ɖo nukun kpɛn na ye,ye ka ma nyɔ oxo xena ye na ɖɔ ni-i gɛ. ⁴¹ Xena e wa ye de hwlatɔn gɔ,e ɖɔ na ye ɖɔ:Mi gbɛ le dɔ amlɔ xɔn bo gbɛ le gbɔjwɛ xɔn!E ya!Ogan lɔ xo,mi kpɔn ye sɔ gbɛtɔ we ovi lɔ sɔ sa na onunyinyla blotɔye. ⁴² Mi cite na mi a sɔn,omɛ xeni le sɔ-un sɔ saxɔn lɔ o sɛkpɔ. ⁴³ Hɔnlokpo,na e do le ɖɔ oxo nɛ lɔ xɔn,Juda xe ni nyi omɛ lokpo le onukplanvi wyawe lɛye mɛ wa tɔn kpo omɛ susu le godo ye hɛn dɛnkpweye kpo okpoye.Mawu we avɔsantɔ ɖaxo ye,osɛnkplan mɛtɔye,kpo otomɛxoye. ⁴⁴ Juda omɛ satɔ lɔ,o ɖɔ onu xena e na blo na Jesu a bo do do josi wi-i na ye.E ɖɔ mɔsin,omɛ xena na kisi na,e wɛ,mi wle-e a bo dɔn-ɛ do sɔn,a bo hɛn e go ganji. ⁴⁵ Xena Juda wa,e zɔn tlɔlɔlɔ bo yi Jesu de bo ɖɔ ni-i ɖɔ:Hlabi!Bo kisi ni-i. ⁴⁶ Ye wle Jesu bo dɔn-ɛ do sɔn. ⁴⁷ Tlololo,omɛ lokpo le ye mɛ bo ɖe ohi onu awe nɔ tɔn bo xu avɔsantɔ ga we ovi bo gbo oto lokpo ni-i. ⁴⁸ Jesu ɖɔ na ye ɖɔ:Mi hɛn ohi ye kpo okpo ye do wa dye,ɖi ajotɔ wɛ un nyi ha. ⁴⁹ Hwexenu na unle mide,bo nɔ le kplan onu le Mawu we xwegbe xɔn,mi ka ma wle-un gɛ,vɔ onu xe lɛye le jɔ xɔn na Mawu xo lɔ a do wa cicɛ mɛ. ⁵⁰ E wɛ onukplanvi lɛye sese lɛ le e de,bo si,bo sɔn. ⁵¹ Ɖekajɛ ɖe xo do-e,avɔ jan wɛ e sin do okɔ,hwexenu na ye wle Jesu; ⁵² e si bo sɔn govɛ-govɛ,ɖo e jo avɔ etɔn do. ⁵³ Ye kplan Jesu do yi Mawu we avɔsantɔ ga de,avɔsantɔ buye,otomɛxoye kpo osɛnkplanmɛtɔ lɛye o okpli le flɛn lɔ. ⁵⁴ Piyɛ le dindɛn nu voo bo do xodoye gbɔɔn do ɖyɛ avɔsantɔ ga lɔ we oxwegbe;e flɔn-anyi le omɛcɔtɔye mɛ bo le xu ozo xɔn. ⁵⁵ E wɛ avɔsantɔ ɖaxo lɛye,kpo ohwɛɖɔtɔ ɖaxo lɛye kpo le din awo xena ye na ɖo do Jesu nu,na ye a gbɛ do da oku we ohwɛ ni-i,vɔ ye ma mɔ gɛ; ⁵⁶ ɖo omɛ susu le ɖe kunnu agɔ-agɔye do e go xɔn wɛ oxo lɛye ma sɔgbe le yeɖoɖonɔ mɛye gɛ. ⁵⁷ Omɛ ɖe lɛye ɖo awo do -e nu bo ɖɔ: ⁵⁸ Mi se le onu etɔn mɛ ɖɔ mye bo na hɔ Mawu we oxɔ xena gbɛtɔye gba kpo alɔ yetɔn ye kpo a bo wa tlɔ gba obu le azan atɔn mɛ.E nɛ ma gɔ nyi gbɛtɔye we alɔ ba gɛ. ⁵⁹ Vɔ kunnuɖiɖe yetɔn lɛye ma nyi lokpo nukun mɛ do oxo nɛ lɔ go gɛ. ⁶⁰ Avɔsantɔ lɔ we oga cite le ye mɛ bo kan Jesu se ɖɔ:Kunnu na ye le ɖe do guwe xɔn nɛ,be a ma ɖo oxo ɖe bo na ɖɔ? ⁶¹ Jesu bɔ onu,e ma gbo oxoti do e go gɛ,avɔsantɔ lɔ we oga gɔ kan-ɛ se ɖɔ:Yɔ wɛ nyi Klisi Mawu na ye nɔ kanfu lɔ we ovi? ⁶² Jesu ɖo e go ni-i ɖɔ:E wɛ un nyi,mi na mɔ ovi gbɛtɔ tɔn lɔ,na wa flɔn-anyi le aɖusi mɛ na Mawu hɔnhlɔn nɔ lɔ,wɛ e na ja le sunwɔ mɛ. ⁶³ Avɔsantɔ lɔ we oga vun awu xeni le okɔ ni-i bo ɖɔ:Mi ma gɔ din kunnuɖiɖe ti gɛ. ⁶⁴ Mi se acɔn xena e kɔn do Mawu go.Tamɛ bɔtɔn ha mi lin do e go?E wɛ omɛ lɛye kpokpo ɖɔ e bo h ohwɛ,be oku jan bo jɛ-ɛ xɛ. ⁶⁵ Omɛ ɖe lɛye jɛ otan tuntun do nukun mɛ ni-i ji,ye cɔn onu kunkun mɛ ni-i bo le xwe xɔn bo le ko-e xɔn dɔ:Ɖɔ omɛ xeni xo-we na mi.Omɛ cɔtɔvyi-i a bo xo otomɛ ni-i. ⁶⁶ Xena Piyɛ gbɛ le gaji le oxwe lɔ gbe,le odo,Mawu we avɔsantɔye we oga lɔ we ozɔnwatɔ nyɔnusi ɖe wa. ⁶⁷ E mɔ Piyɛ le xu ozo xɔn,e hu nukun wi-i tlintlin,bo ɖɔ:Yɔ can,a nɔ zɔn xa Jesu Nazalɛti tɔn lɔ. ⁶⁸ Vɔ Piyɛ mɔ onu bo ɖɔ:Un ma nyɔ-ɛ gɛ,un ma tlɛ mɔ odo na oxo tɔwe gɛ.E wɛ e sɔn yi agbonu le hɔntogboji. ⁶⁹ Nyɔnuvi ozɔnwatɔ lɔ mɔ-ɛ bo gɔ jɛ ɖiɖɔ na omɛye ji ɖɔ:Dahwe nɛ,e can le ye mɛ. ⁷⁰ Piyɛ gɔ mɔ onu ke,zaanɖe omɛ xeni le flɛn lɛye gɔ ɖɔ na Piyɛ ɖɔ mɔ sin:Le oxojɔxo mɛ,a le ye mɛ,ɖo Galile tɔ wɛ a nyi. ⁷¹ Piyɛ ɖɔ mɔsin:Na awo wɛ un ɖo,be Mawu ni bo dɔn oto na-un,un xwle onu na mi,un ma nyɔ omɛ xe we oxo na mi le ɖɔ xɔn gɛ. ⁷² Tintan lokpo,koklo do ase hwlawe.Piyɛ wa flin oxo xena Jesu dɔ ni-i le osan lɔ ɖɔ:Hwɛkpo koklo na do ase hwlawe,a gbɛ-un hwlatɔn kpetekple.Kpoŋu avin jan wɛ e bɛ vivi.