¹ Le zanfunnu fuu,Mawu we avɔsantɔ ɖaxo lɛye blo okpli xa otomɛxoye,osɛnkplan mɛtɔye kpo ohwɛ ɖɔtɔ ɖaxo lɛye sese.Ye bla ² Jesu bo dɔn-ɛ sɔ yi na Pilati. Pilati kan Jesu se ɖɔ:Yɔ wɛ nyi Jwifuye we xɔlu?Jesu ɖo e go ni-i ɖɔ:E nɛ a o ɖɔ. ³ Avɔsantɔ ɖaxo lɛye do ohwɛ susu ni-i. ⁴ Pilati gɔ kan oxo Jesu se ke bo ɖɔ:Kpɔn ohwɛ azlekpo xena ye do na we,a ma ɖo oxo ɖe do e go bo na ɖɔ? ⁵ Vɔ Jesu ma gɔ ɖo oxo ti e go gɛ,wɛ e kpaca do Pilati lɔ. ⁶ Vɔ na ye gbɛ ja dindin wayi we oxwe ɖuɖu gbe,Pilati nɔ ɖe gantɔ xena ye byɔ-ɛ tɔn. ⁷ Vɔ dahwe ɖe,xena ye nɔ ylɔ ɖɔ Balabasi oo le gankpamɛ xa ogufɔn tɔye xeni hu omɛ le ogu finfɔn hwenu. ⁸ Omɛ susu lɛye wa yi Pilati de bo jɛ onu xena e o nɔ blo na ye bibyɔ ji. ⁹ Pilati ɖo e go na ye ɖɔ:Mi jlo ɖɔ ma jo Jwifunu ye we xɔlu lɔ ɖo na mi wɛɛ? ¹⁰ Ɖo e tesu nyɔ-ɛ ganji ɖɔ omɛ nu vɛ le omɛgo kpo awu hwihwan bɛ bo zɔn na ye bo do hɛn-ɛ wa na mye. ¹¹ Avɔsantɔ ɖaxo lɛye le do otogun lɛye xɔn na ni-a do jo Balabasi do a bo hɛn Jesu go. ¹² Pilati gɔ yi oxo obu ke,bo ɖɔ:A ni ha wɛ mi jlo na ma blo na omɛ xena mi le ylɔ ɖɔ Jwifuye we xɔlu lɔ xɔn? ¹³ Ye gɔ do axwa bu ke bo ɖɔ:Kɛ-ɛ do atinsoga ji! ¹⁴ Pilati ɖɔ na ye ɖɔ:Onu nyinyla bɔtɔn ha wɛ e gbɛ blo lɔ?Ye do axwa do e ji ɖɔ:Kɛ-ɛ! ¹⁵ Na do nyɔ kpinkpɔn le nukunmɛ na omɛ lɛye,e ɖe Balabasi tɔn-ɛ,bo xo Jesu kpo olanba kpo,e nɛ godo Pilati sɔ Jesu sɔ do alɔmɛ na sɔja ye na ye a do kɛ-ɛ. ¹⁶ Sɔja lɛye kplan Jesu bo do yi otokplantɔ we oxwegbe,wɛ ye ylɔ sɔja gbokpwe ɖyɛ lɛye do wa. ¹⁷ Ye do awu ɖaxo vɛvɛ ni-i,bo cɔn gbakɔn xena ye sɔ owun bo do lɔn,sɔ xɔ cɔn ota ni-i. ¹⁸ Ye jɛ asikpɛ xixo do ota ni-i ji,bo le ɖɔ xɔn ɖɔ:Mi do ogbe na we Jwifu ye we xɔlu! ¹⁹ Ye sɔ atin ɖe bo le do ota ni-i xɔn,bo le tun otan do e go xɔn,a bo le jɛ klita le akɔn mɛ ni-i xɔn,a bo le do onu odo ni-i xɔn. ²⁰ Xena ye ko-e vɔ,ye wa ɖe awu vɛvɛ lɔ le okɔ ni-i bo sɔ onudido etɔn lɛye ni-i bo dɔn-ɛ do le sɔn xɔn a bo do wa yi kɛ-ɛ. ²¹ Dahwe ɖe xeni lɛ okɔ sɔn glegbo bo nɔ nyi Simɔ Silɛnu tɔn lɔ,Alɛsandlu kpo Hlufwisi kpo we otɔ,gbɔn flɛn lɔ wa le yi xɔn,ye zin e ji ni a do hɛn atinsoga gban Jesu tɔn lɔ. ²² E wɛ ye kplan Jesu do yi fi xena ye nɔ ylɔ ɖɔ Gɔlugɔta,tin e mɛ etɔn wɛ nyi ɖɔ:Taka we tɛnmɛ. ²³ Ye na vɛn xena ye kɔn do milu mɛ,wɛ e gbɛ. ²⁴ Ye kɛ-ɛ do atinsoga ji bo wa da akɔ do ma onuzinzan etɔn lɛye,a do nyɔ xena omɛ lokpo-lokpo na yi. ²⁵ Ogan cɛnnɛ wɛ xo na ye do kɛ-ɛ. ²⁶ Onu winwlan xe zɔn na ye do da oku we ohwɛ ni-i ɖye:Jwifuye we xɔlu. ²⁷ Ye ka jaguda awe do akpa ni-i,lokpo le aɖusi mɛ,lokpo bo le amyɔ mɛ. ²⁸ Đena Mawu xo lɔ wa cicɛ mɛ ɖo nɛ,e ɖɔɖɔ:Ye xlɛ-ɛ do danuwatɔ ye mɛ. ²⁹ Omɛ xeni wa le sɔn xɔn lɛye nɔ le kɔn acɔn do e go xɔn,a bo le zun-i xɔn a bo le hunhun ota a bo ɖɔ:Hoo na we,yɔ mɛ xe ɖɔ ɖɔ mye bo na hɔ Mawu we oxwe lɔ a bo gɔ gbɛ-ɛ le azan atɔn mɛ, ³⁰ yɔ tesu hwlɛn ɖe we gan a bo jɛ ote le atinsoga ji! ³¹ Lemɔhake wɛ Mawu we avɔsantɔ ɖaxo lɛye kpodo osɛnkplan mɛtɔ lɛye nɔ le ko-e xɔn ɖo bo nɔ le ɖɔ le yeɖe mɛ xɔn ɖɔ: E hwlɛn mɛ bu ye gan, e ma kpego na hwlɛ e tesu gan!. ³² Klisi lɔ, Izlayɛli we xɔlu lɔ, ni jɛ ote le atinsoga lɔ ji odin na mya kpɔn na mya ɖi onu ni-i omɛ xena ye ka do akpa ni lɛye can nɔ le zun-i xɔn. ³³ Le ganwyawe mɛ, zivlu do le anyizan lɔ ji sese gbɔɔn do jɛ ogan atɔn mɛ. ³⁴ Le ogan atɔn mɛ lɔ, Jesu do axwa sinsyɛnxu ɖe, bo ɖɔ: Eloyi, Eloyi lama sabatani? tin e mɛ etɔn wɛ nyi ɖɔ: Mawu ce, Mawu ce ani wutu wɛ a do jo un do? ³⁵ Xena omɛ xeni le flɛn lɛye ɖe se axwa dido etɔn, ye ɖɔ mɔsin: Mi kpɔn e le ylɔ Eli xɔn. ³⁶ Omɛ ɖe lɛye le ye mɛ, bo do we zun bo sɔ avɔ vunvun do vɛn hwinhwan mɛ bo bla-ɛ do atin go bo kɔ-ɛ ɖoxlan Jesu ɖe na ni a nu, e bo ɖɔ mɔsin: Mi-a kpɔn ɖo Eli lɔ na ɖe-e sɛ le atinsoga lɔ ji ja. ³⁷ Vɔ, Jesu do axwa sinsyɛnxu ɖe, bo myɔ onu. ³⁸ E wɛ xɔmɛ gbovɔ xeni le Mawu we xwegbe ma do awe, sɔn oji kaka do yi odo. ³⁹ Xena sɔja kanweko ga xeni le nukɔn ni-i lɔ mɔ ɖena e ku ɖo, e ɖɔ mɔsin: Dahwe xe Mawu we ovi wɛ e nyi xojɔxo. ⁴⁰ Nyɔnusi ɖe lɛye can le dindɛn nu bo do le kpɔn onu xɔn, omɛ xeni le ye mɛ ɖe lɛye ɖye: Malya Madalatɔn, Salomɛ, kpodo Malya xeni nyi Jaki lekajɛ lɔ onɔ bo gɔ nyi Joze onɔ. ⁴¹ Nyɔnu nɛ lɛye o o nɔ xoɖo Jesu le osan, bo nɔ wa ozɔn ni-i le hwexenu na e le Glile we kansinmɛ, nyɔnu susu buye can xo do-e do yi Jeluzalɛmu lɛye le flɛn. ⁴² Xena hwedo do, e bo gɔ nyi jijlaɖo zangbe, tin e mɛ etɔn wɛ nyi Jwifunu ye we gbɔjwɛ zan dlɔ gbe, ⁴³ Jozɛfu Alimate we toxo mɛtɔ, xeni nyi omɛ nukun leji ɖe le ohwɛɖɔtɔ daxo lɛye mɛ, wa, e yɔ can le nɔ ote kpɔn xɔluɖuɖu Mawutɔn lɔ xɔn. E do ji bo yi Pilati de bo do wa yi byɔ Jesu we ocɔ. ⁴⁴ Vɔ, e kpaca do Pilati na e do se ɖɔ Jesu bo o ku; Pilati ylɔ sɔja kanwekoga lɔ, bo kan-ɛ se ɖɔ, Jesu ku edɛn wɛ jaa. ⁴⁵ Xena sɔja kanwekoga lɔ yi ogbe ni-i vɔ, Pilati na ogbe Jozɛfu ɖɔ ni bo wa-yi kɔ ocɔ lɔ. ⁴⁶ Jozɛfu wa yi xɔ avɔ ɖe, bo ɖe ocɔ lɔ sɛ le atin soga lɔ ji, bo butu-i do avɔ lɔ mɛ bo di-i do yɔ do xena ye kun do okpɛn mɛ, bo bli okpɛn ɖaxo ɖe bo do su yɔ do lɔ nu. ⁴⁷ Malya Madalatɔn kpodo Malya xeni nyi Joze we onɔ mɔ ofi xena ye sɔ Jesu we ocɔ lɔ sɔ ɖo.