¹ Xena Jwifunu lɛye we gbɔjwɛzan lɔ wa yi vɔ,Malya Madalatɔn,kpo Salomɛ kpo Malya xeni nyi Jaki we onɔ wa yi xɔ celu hwennywɛ lɛye a bo wa kɔn do Jesu we ocɔ ji. ² Le kɔsiɖagbe,nyɔnusi lɛye yi yɔdo lɔ to le zanfunnu tɛɛn,ohwe bo le zɛ xɔn. ³ Ye ka o le ɖɔ le yeɖe mɛ xɔn ɖɔ:"Mɛ wɛ na bli okpɛn lɔ sɛ na mi le yɔ do lɔ nu? ⁴ E wɛ,ye na mɔ kpoŋu,ɖɔ ye bo o bli okpɛn lɔ sɛ le yɔdo lɔ nu,okpɛn lɔ klo taŋu. ⁵ Xena ye ɖyɛ yɔdo lɔ mɛ,ye mɔ ɖekajɛvuɖe, e bo flɔn anyi le aɖusi mɛ bo do awu gaga wewe ɖe,wɛ ye ɖi obu bo sisɔ. ⁶ Vɔ,e ɖɔ na ye ɖɔ:"Mi nɔ kpɔn gɔ ɖi obu gɛ, Jesu Nazalɛtitɔn xena ye ka ɖo atinsoga ji lɔ wɛ mi le din xɔn,e o fɔn sɔn oku,e ma le fye gɛ.Mi kpɔn fi xena ye sɔ ocɔ etɔn ɖo osan ɖye. ⁷ Mi wa yi ɖɔ na onukplanvi etɔn lɛye gbɔɔn do wa yi jɛ Piyɛ ji ɖɔ:E na wa yi tle kpɔn mi le Galile ɖi ɖena e o ɖɔ na miɖo ha. ⁸ Yetɔn bo si kpo wezun kpo,obu ɖaxo ɖe jɛ yeji kaka ye wa le sisɔ xɔn.E na wɛ ye ma kpego ɖɔ oxo lɔ na mɛɖe gɛ. ⁹ Xena Jesu fɔn le omɛ kuku lɛye mɛ le kɔsiɖagbe zanfunnu,Malya Madalatɔn xemɛ na ye nya gbigbɔ mawe canwe le e mɛ lɔ wɛ etɔn do nukun mɛ na jɛnukɔn. ¹⁰ E yɔ wa yi ɖɔ na omɛ xekpo Jesu kpo ni nɔ okpɔ san lɛye.Mɛ e nɛ lɛye le fankwe xɔn,bo le vi a vi xɔn. ¹¹ Vɔ xena ye se ɖɔ Jesu bo le ogbɛ gbɔɔn Malya bo mɔ-ɛ,ye ma ɖi onu gɛ. ¹² E nɛ godo,Jesu ɖe eɖe sɔxlɛ onukplanvi awe ɖe lɛye gbɔn ninɔmɛ bu mɛ,le hwexenu na onukplanvi lɛye jlɔ ogleta ɖe mɛ. ¹³ Ye xlɔ, bo wa ɖɔ na omɛ gbokpwe lɛye ye ma wa ɖi onu wa oxo xenna ye lɛye can ɖɔ ji gɛ ¹⁴ Vivɔnu, Jesu ɖe eɖe sɔ xlɛ ye mɛ wolokpo lɛye, le hwexenu na ye le ɖu onu xɔn. E gbɛ onu na ye do onu ma ɖi yetɔn wutu kpo toli vivɛ yetɔn kpo. Ɖo ye ma ɖi onu na oxo xena omɛ ni mɔ Jesu, ɖɔ na ye gɛ. ¹⁵ E nɛ godo, ɖɔ na ye ɖɔ:" Mi yi ogbɛ lɔ sese mɛ, a bo wa-yi la owɛnɖagbe lɔ na omɛ lɛye sese. ¹⁶ Omɛ xena ɖi onu wɛ ye na nyɔ-ɛ do osin mɛ e na mɔ hwlɛngan, vɔ omɛ xe ma ɖi onu gɛ, ye na da ohwɛ ni-i. ¹⁷ Nujawu xeni na xodo omɛ xena ɖi onu lɛye ɖye:"Le nyikɔ ce mɛ,ye na nya gbigbɔ mawe lɛye,ye na do ogbe yɔyɔ. ¹⁸ Ye na wle odan kpo alɔ kpo fɛɛ,na ye nu onu ni nɔ humɛ ɖe,onuɖe ma le wa ye xɔn gɛ,ye na ɖo alɔ ota na azɔnnɔ wɛ azɔn na gbɔ. ¹⁹ Xena Jesu lɔ ɖɔ oxo na ye ɖo lemɔha,vɔ Mawu kɔ-ɛ do sɔn yi sɛxwe,e bo flɔn-anyi le aɖusi mɛ ni-i. ²⁰ Onukplanvi lɛye sɔn yi ofiɖekpokpwe bo jɛ Mawu xo lɔ jijla ji,Mawu bo le wa ozɔn xa ye xɔn,bo le ɖo okpɛn oxo lɔ ji xɔn gbɔn onujawu lɛye mɛ.