¹ Mi nɔ kpɔn nɔ da ohwɛ na omɛɖe gɛ,wɛ ye ma le da ohwɛ na mye cangba xɔn gɛ. ² Ɖo ɖe na mi da na omɛ ɖo,lemɔha lɔ ke wɛ ye na da na mi ɖo,ojlɛ gannu xena mi do jlɛ na mɛɖyɛ,e ke ye na do jlɛ na miye cangba. ³ Wɛ ani wutu a le kpɔn onuywɛ xeni le nukun zin ji na anɔwevi xɔn,vɔ bo ka ma mɔ atinkpo xeni le tɔwe ji gɛ? ⁴ Alo naɖe wɛ a ɖɔ na anɔwevi ɖɔ:Wa ma ɖe onuywɛ xe le nukun ji na we,vɔ atinkpo ka le nukun tɔwe ji? ⁵ Yɛmɛnuwatɔ,ɖe atinkpo tɔwe lɔ sɛ le nukun ji,hwenɛnu a do mɔ onu ganji a bo do ɖe onuywɛ,xeni le nukun ji na anɔwevi. ⁶ Mi nɔ kpɔn nɔ sɔ onu mimɛye na duviye gɛ,a bo nɔ kpɔn sɔ oɣlɔ mitɔn lɛye na hanviye gɛ,e ma dɛn,ye na gbidi ye le afɔnu a bo wa kpan nukɔntɔ mye tesu a bo vunvun mi. ⁷ Mi byɔ,ye na na mi,mi din mi na mɔ,mi xuxu ohɔn lɔ,ye na hun na mi. ⁸ Ɖo omɛ ɖekpokpwe xeni byɔ,ye na ni-i,omɛ xeni din,e na mɔ,ye na hun na omɛ xeni xuxu. ⁹ Mɛ ha wɛ le mimɛ na ovi etɔn byɔ kpɔnnɔ wi-i,e na sɔ okpɛn sɔ ni-i? ¹⁰ Alo,na ovi etɔn byɔ ohwe wi-i,e na sɔ odan do alɔmɛ ni-i? ¹¹ Na e nyi ɖɔ mye omɛ nyinylaye nyɔ onu jijɔhun bo nɔ na ovi mitɔn lɛye,nɛmu-nɛmu wɛ ka na nyi Mawutɔn na e ma do lena onu jijɔhun omɛ xeni nɔ byɔ-ɛ lɛ xɔn gɛ. ¹² E wɛzɔn,onu ɖekpokpwe xena mi jlo na ye a blo na mi,mye cangba mi nɔ blo na omɛ gba,ɖo onu xena Mɔyizi we osɛn lɔ kpo xo ɖɔɖo anyitɔ lɛye ɖɔ e nɛ. ¹³ Mi gbɔn omɔ ovu lɔ,ɖo omɔ ɖaxo lɔ kɛ bo nɔ dɔn omɛ do yi cincrɔn mɛ,omɛ susu wɛ ka nɔ gbɔn flɛn lɔ. ¹⁴ Vɔ fi xena ye nɔ gbɔn bo nɔ do yi ogbɛ mavɔ-mavɔ lɔ,e hwe wɛ omɔ etɔn myɔ,bo nɔ kplan omɛ do yi ogbɛ mɛ,omɛ ovu tintin ɖe wɛ nɔ gbɔn e ji. ¹⁵ Mi cɔ miɖe do oxo ɖɔɖanyiɖɔtɔ agɔ-agɔ lɛye go,ye nɔ sɔ ogbɔ we gbaza sɔ xɔdo,a bo do wa mide,vɔ le oxojɔxo mɛ,kanlin onuwleɖutɔye wɛ ye nyi. ¹⁶ Mi na wa nyɔ ye gbɔn walɔ yetɔn lɛye mɛ.Ye nɔ gbɛn hlɛzɛn le oxɛtin ji wɛɛ,alo ye nɔ gbɛn figi le owun kanmɛ wɛɛ? ¹⁷ Lemɔha lɔ ke,atin jijɔhun nɔ na sinsyɛn jijɔhun,amɔ atin nyinyla nɔ na sinsyɛn nyinyla. ¹⁸ Atin jijɔhun ma kpego na na sinsyɛn nyinyla gbeɖe,atin nyinyla ma gɔ kpego bo na na sinsyɛn jijɔhun gɛ. ¹⁹ Atin xeni ma na sinsyɛn jijɔhun gɛ,ye na gbo-e a bo sɔ-ɛ do ozomɛ. ²⁰ Lemɔha ke,wɛ mi na gɔ nyɔ ye gbɔn sinsyɛn yetɔn mɛ. ²¹ Omɛ xeni nɔ ɖɔ:Mawu-Mawu lɛye kpokpo ma jlɔ sɛxwe gɛ,vɔ omɛ ɖekpokpwe xeni nɔ blo ojlo atɛye xeni le sɛxwe lɔ tɔn. ²² Na e jɛ azan nɛ lɔ gbe,omɛsusu na ɖɔ na-un ɖɔ:Aklunɔ,Aklunɔ be mi ka ma ɖɔ ɖɔɖanyi le nyikɔ tɔwe mɛ,bo nya gbigbɔ mawe lɛye le nyikɔ tɔwe mɛ,bo gɔ blo onujawu susu lɛye le nyikɔ tɔwe mɛ? ²³ Kpoŋu,nyɔ na ɖɔ na ye ganna-ganna ɖɔ:Mi bu mi ɖe le nukun mɛ na-un,mimɛ nyladonɔye,un ma nyɔ mi wi kpɔn gɛ. ²⁴ E nɛ,omɛ ɖekpokpwe xeni se oxo ce,bo zan do e ji,e le ɖi onu nywɛtɔ xe ja oxɔ etɔn gbigba gbe,bo gba-ɛ do oso ji. ²⁵ Jokun ja,anyisin wa oxɔ lɔ go,jɛhɔn xo do oxɔ lɔ go,vɔ e ma nɔ gɛ,ɖo ye gbɛ-ɛ do oso ji. ²⁶ Amɔ omɛ ɖekpokpwe xena se oxo ce bo ma sɔ do zinzanmɛ gɛ,e le ɖi gbɛtɔ oklenɔ xe gba oxɔ etɔn do okɔ gudu mɛ ha. ²⁷ Jokun ja,anyisin wa oxɔ lɔ go,jɛhɔn xo do oxɔ lɔ go,e bo hɔ,bo kankan sese. ²⁸ Xena Jesu kplan onu e nɛ lɛye vɔ,okplan etɔn lɔ hu onu na ye; ²⁹ ɖo e kplan onuye kpo acɛkpikpa kpo,e gbɔn ovo na osɛnkplan omɛ tɔye tɔn.