¹ Mi nɔ kpɔn wa Mawu we ozɔn le agbaŋugba a bo do nyɔ kpinkpɔn le nukun mɛ na gbɛtɔ lɛye gɛ; na e nyi ɖɔ lemɔha wɛ mi nɔ wa Mawu we ozɔn mi tɔn ɖo, mi ma gɔ le mɔ ajɔ e tɔn yi le myetɔ xeni le osɛxwe lɔ de xɔn gɛ. ² Lemɔhake, na ale na onu omɛ, nɔ kpɔn na ɖi yɛmɛnu watɔ lɛye ha gɛ, na yɛmɛnu watɔ lɛye na onu omɛ xɔn ogan wɛ ye nɔ xuxu gbɔn cɔ ci xɔmɛ-xɔmɛ lɛye a bo xuxu ogan gbɔn mɔji-mɔji lɛye bo nɔ do sɔ yeɖe sɔ xɔ su le gbɛtɔ ye we nu kɔn. Ma ɖɔ oxojɔ xo na mi ɖɔ, ye lɛye o mɔ ale yetɔn yi. ³ Amɔ, na ale na onu omɛ xɔn alɔ tɔwe amyɔ lɔ ni nɔ kpɔn nyɔ onu xena aɖusi tɔwe le blo xɔn gɔn, ⁴ hwenɛnu onu nina mitɔn, mi le na lɛ na do nɔ bibɛmɛ; E nɛ atɔwe xeni nɔ mɔ onu do bibɛmɛ, na na ale etɔn we. ⁵ Na mi le xo oɖɛ xɔn mi nɔ kpɔn nɔ xo ɖi yɛmɛ nu watɔ lɛye ha gɛ, xeni yiwan na nɔ ote-ote gbɔn odɛxotɛn lɛye kpodo mɔji-mɔji le ote gaga do xo alo ye nɔ xo oɖɛ lɔ gbɔn tete na gbɛtɔ lɛye a do mɔ ye. Maɖɔ oxojɔxo na mi, mɛ nɛ lɛye o mɔ ale yetɔn yi. ⁶ Amɔ yɔ, na a ja oɖɛ xo gbe, byɔ oxɔ tɔwe mɛ a bo su ohɔn do ota a bo ɖɔ oxo na atɔwe xena mɛti mɔ nɔ mɔ gɛ e nɛ, atɔwe Mawu xeni nɔ mɔ onu jɛ bibɛmɛ lɔ na na we ale etɔn. ⁷ Na mi le xo oɖɛ xon, mi nɔ kpɔn nɔ caka oɖɛ susu ɖi kosi lɛye ha gɛ, ɖo ye lɛye nɔ bwi ɖɔ oxo susu hlu ɖɔ wɛ na zɔn wɛ Mawu na do se oɖɛ gbe yetɔn sin. ⁸ Mi nɔ kpɔn blo ɖi ye lɛye ha gɛ ɖo myetɔ o nyɔ onu xe we hudo xena mi ɖo lɔ xoxo, hwɛ kpo na mi do wa le byɔ xɔn. ⁹ Ɖena mi ɖo na xo oɖɛ ɖo e ɖye: Myetɔ xeni le osɛxwe nyikɔ tɔwe ni nyi mimɛ; ¹⁰ axɔlu ɖuɖu tɔwe ni wa, ojlo tɔwe ni nyi wiwa le anyizanji ɖi ɖena e nɔ yi wiwa le sɛxwe ɖo ha. ¹¹ Na onu duɖu egbe tɔn mi; ¹² sɔ ohwɛ huhu mitɔn lɛye sɔ xɔ kɛ mi, ɖi ɖena mi nɔ sɔ xɔ kɛ omɛ xeni hu ohwɛ do mye can ɖo ha gba; ¹³ nɔ kpɔn ɖike na mya jɛ tintɛnkpɔn mɛ gɛ, amɔ hwlɛn mi le lɛgba we alɔ mɛ. Ɖo tɔwe wɛ nyi axɔlu ɖuɖu hɔnhlɔn, kpodo kpikpa kpo kaka do yi mavɔ-mavɔ! Ami ¹⁴ E nyi na, mi nɔ sɔ ohwɛ xena gbetɔ lɛye hu do mi sɔ xɔ kɛ ye, lemɔhake wɛ myetɔ xeni le sɛxwe lɔ can na sɔ ohwɛ huhu mtɔn lɛye can sɔ xɔ kɛ mi ɖo gba nɛ. ¹⁵ Vɔ, na mi mɔ nɔ sɔ ohwɛ xena gbɛtɔ lɛye hu do mi sɔ xɔ kɛ ye gɛ, myetɔ xeni le sɛxwe can gba ma ja sɔ ohwɛ mitɔn lɛye can sɔ xɔ kɛ mi gba gɛ. ¹⁶ Na mi le bla onu, mi nɔ kpɔn nɔ nɔ awu bla mɛ ɖi yɛmɛ nu watɔ ye ha gɛ, ɖo ye lɛye na ye le bla onu xɔn, ye nɔ ɖyɔ nukun mɛ, a bo do ɖe xlɛ gbɛtɔ lɛye ɖɔ mye lɛye bo le onu bibla mɛ. Ma ɖɔ oxojɔxo na mi, ye lɛye o mɔ ale yetɔn yi. ¹⁷ Amɔ yɔ, na ale bla onu, wle obo na ɖe we a bo nɔ vlu nukun mɛ, a bo nɔ jla oɖa tɔwe ɖo. ¹⁸ Na mɛɖe ni nɔ kpɔn nywɛ ɖɔ yɔ bo le onu bibla zɛ gbɔn atɔwe xeni le bibɛmɛ lɔ go gɛ, hwenɛnu, atɔwe xeni nɔ mɔ onu le bibɛmɛ lɔ na na ale etɔn we. ¹⁹ Mi nɔ kpɔn kpli dɔkun mitɔn lɛye do anyizan xe ji na onu lɛgbɛ finflin lɛye nɔ ɖu onu le gɛ, ²⁰ alo ofye na onu nɔ jɛ ohwɛ le kpo ofi xena ajotɔ na nywɛ a bo jɛ ajo le gɛ; amɔ,mi kpli dɔkun mitɔn lɛye do sɛxwetomɛ,ofi xena onu lɛgbɛ finflinye mɔ nɔ ɖu onu le gɛ,e ka mɔ nɔ jɛ ohwɛ gɛ,ajotɔ ka mɔ nɔ fin onu le flɛn gɛ. ²¹ Ɖo ofi xena dɔkun tɔwe le,flɛn wɛ ayixa tɔwe can na le. ²² Nukun tɔwe lɛye wɛ nyi zogbɛn na gbaza tɔwe,e nyi na nukun tɔwe lɛye le ganji,gbaza tɔwe kpokpo can na nɔ kinklɛn mɛ; ²³ amɔ na nukun tɔwe lɛye ma le ganji gɛ,gbaza tɔwe lɔ kpokpo na ci zinvlu mɛ,ɖo na kinklɛn xeni le yɔ go lɔ tlɔzun zinvlu,zinvlu ɖaxo bɔtɔn mɛ wɛ a na le nɛ! ²⁴ Omɛti ma kpego na sɛn oga awe do okpɔ gɛ,ɖo e na gbɛ owan na omɛɖe,a bo nyi owan na omɛɖe,alo e na se tonu na omɛɖe,a bo vɛ toli na omɛ ɖe.Mi ma kpego na sɛn Mawu q bo gɔ sɛn kɔbɔ gɛ. ²⁵ E nɛ wutu, ma ɖɔ na mi: Dinkan ni nɔ kpɔn so mi ɖo onu xena mi na ɖu, bo na do nɔ ogbɛ, kpodo onu xena mi na do kpo gɛ, alo ogbɛ ma xɔ kɔbɔ xu onu ɖuɖu, alo gbaza lɔ ka ma xɔ kɔbɔ xu onu zinzan? ²⁶ Mi kpɔn oxɛ oji tɔn lɛye, ye mɔ nɔ do oji nukun gɛ, ye ka mɔ nɔ ya oji nukun do agɔ alo ava mɛ gɛ. Co myetɔ xeni le oji lɔ nɔ na onu ɖuɖu ye, mye mi ka ma xɔ kɔbɔ xu oxɛ nɛ lɛye? ²⁷ Mɛ ka le mimɛ wɛ tamɛ bubu etɔn na zɔn wɛ e na do azan kpɛɖe ogbɛ ninɔ etɔn ji? ²⁸ Odin a ni wutu mi ka nɔ le jɛ tagba do onu xena mi na do lɔ go, mi kpɔn ɖena flawa lɛye nɔ su le nukan lɛye mɛ ɖo, ye mɔ nɔ wa ozɔn ti gbɔn bo nɔ do lɔn avɔ tesu gɛ; ²⁹ vɔ, ma ɖɔ na mi: Axɔlu Salumɔ tesu ɖo ɖɔkun gbagbagba co, e ma ɖo acɔ hugan lokpo tesu le ye mɛ gɛ. ³⁰ Na Mawu ka ɖo acɔ na ogbe lɛye le nukanmɛ, egbe wɛ jɛ o sɔ ye na gɔ doye ozo, na ɖe wɛ e ma kpego na na mi onu xena mi na do lɔ gɛ ɖo, onu ɖiɖi ovu tintin nɔ xe lɛye? ³¹ Be na e nyi ɖo lemɔha, mi bo nɔ kpɔn nɔ gɔ jɛ tagba a bo ɖɔ: Ani wɛ mi na ɖu, alo ani wɛ mi ka na do gɛ? ³² Ɖo omɛ xeni ma ɖi onu na Mawu gɛ lɛye wɛ na le wezun ji, le onu nɛ lɛye godo. Ɖo myetɔ xeni le sɛxwe tomɛ nywɛ ɖɔ mye bo ɖo hudo onu nɛ lɛye tɔn. ³³ Axɔlu ɖuɖu Mawutɔn kpodo ojlo etɔn wiwa kpo ni nɔ bya nukun na mi tinta hwenɛnu e na na onu nɛ lɛye kpokpo mi. ³⁴ Mi nɔ kpɔn bu tamɛ do osɔ xeni ja lɔ go gɛ, ɖo osɔ xeni ja lɔ tesu na kpe nukun do e de go. Ɖo tagba xena azan lokpo-lokpo na hɛn wa okpe na azan nɛ lɔ.