^{1 4} Xena Jesu mɔ togun lɔ,e xlɛ oso ji;xena e flɔn-anyi,xodotɔ Jesutɔn lɛye wa e de. ² Jesu yi oxo bo le kplan onu ye xɔn ɖɔ: ³ Nyɔnanɔ wɛ nyi ayanɔ xeni nɔ nɔ gbigbɔ mɛ lɛye,ɖo axɔluɖuta Mawu tɔn nyi yetɔn! Nyɔnanɔ wɛ nyi omɛ xeni le vivɛsise mɛ lɛye,ɖo ye na fa akɔn na ye. ⁵ Nyɔnanɔ wɛ nyi omɛ fifa lɛye ɖo ye na ɖu cinɔ anyizan tɔn! ⁶ Nyɔnanɔ we nyi omɛ xena dodo biblo we hovɛ kpo kɔmɛ le ci xɔn ,ɖo dɔgo na wa gɔ ye! ⁷ Nyɔnanɔ wɛ nyi omɛ xeni nɔ ku dɔŋuɖunu na omɛye,ɖo Mawu na ku dɔŋuɖunu na ye! ⁸ Nyɔnanɔ wɛ nyi omɛ xena oji we na lɛye,ɖo ye na mɔ Mawu! ⁹ Nyɔnanɔ wɛ nyi omɛ xe nɔ xo fifa we okan lɛye,ɖo ye na ylɔ ye ɖɔ Mawuvi! ¹⁰ Nyɔnanɔ wɛ nyi omɛ xena ye nɔ do aya na do dodo biblo wutu,ɖo sɛxwe tomɛ nyi yetɔn! ¹¹ Nyɔnanɔ wɛ nyi omɛ xena ye nɔ do aya na,bo nɔ zun,a bo kɔn acɔn ɖekpokpwe do ɖo nyɔ wutu. ¹² Mi ja wa,a bo nɔ jijwɛ mɛ,ɖo ajɔ mitɔn na su le sɛxwe,ɖo lemɔha wɛ ye do aya na ɖɔɖanyiɖɔtɔ xeni o jɛ nukɔn na mi lɛye ɖo. ¹³ Mye wɛ nyi ojɛ anyizan ji tɔn,vɔ na ojɛ bu vivi etɔn,na ɖe ye na blo ɖo bo na do do vivi e mɛ? Be e ma gɔ vo onuti gɛ,ye na sɔ-ɛ sɔ kɔn nyi ogbe,wɛ gbɛtɔye na gbɔn e ji. ¹⁴ Mye wɛ nyi hinhɔn ogbɛ lɔ tɔn,toxo xeni le oso ji ma kpego na bɛ gɛ. ¹⁵ Lemɔha ke wɛ ye mɔ nɔ ta zogbɛn bo nɔ sɔ-ɛ do tavo gɔ gɛ,amɔ ye nɔ sɔ-ɛ do zogbɛnhɛnnu ji wɛ e nɔ klɛn do omɛ kpokpo ji le xwegbe. ¹⁶ Hinhɔn mitɔn ni ta do gbɛtɔye ji,ɖo lemɔha,na ye a do mɔ ozɔn jijɔhun mitɔn lɛye a bo kpa gigo na myetɔ xeni le sɛxwetomɛ. ¹⁷ Mi nɔ kpɔn bu-i ɖɔ,un wa bo na do gu osɛn lɔ alo onu xena ɖɔɖanyiɖɔtɔ lɛye o wlan gɛ,vɔ un wa na ye a do mɔ nukunnu jɛ e go. ¹⁸ Le oxojɔxo mɛ,un le ɖɔ na mi xɔn,hweɖekpokpwe hwenu xena oji kpodo odo kpo ma wa yi gɛ,mɛti ma jan susu onu winwlan ovu tintin lokpo tesu le osɛn lɔ go gɛ kaka do yi cicɛmɛ,onu lɛye kpokpo tɔn. ¹⁹ E wɛzɔn omɛ ɖekpokpwe xena gba osɛn lokpo le osɛn vuvu nɛ lɛye mɛ,bo na gɔ kplan omɛ buye can ɖɔ ye ni bo blo do lemɔha,ye na ylɔ-ɛ dɔ vikpɛvu sese le sɛxwetomɛ;vɔ omɛ xena blo do e ji,bo na gɔ kplan omɛ buye can ɖɔ ye ni bo blo do lemɔha lɔ gba,ye na ylɔ-ɛ ɖɔ omɛ ɖaxo le sɛxwetomɛ. ²⁰ Ɖo,un le ɖɔ na mi xɔn,na ogbɛ jijlɔ zinzan mitɔn ma hugan osɛnkplanmɛtɔ kpo Falizitɔ lɛye tɔn gɛ,mi ma le ɖyɛ sɛxwetomɛ xɔn kpɔn gbeɖe. ²¹ Mi se oxo xena ye ɖɔ na dagbo mitɔn lɛye ɖɔ:Nɔ kpɔn hu omɛ gɛ,ɖo na omɛɖe hu omɛ,ye na da ohwɛ ni-i. ²² Vɔ nyɔ ka le dɔ na mi xɔn ɖɔ:Na omɛ ɖe do aɖi ɖo nɔvyɛ,ye na da ohwɛ ni-i,omɛ xe ka na zun awegɔ etɔn ɖɔ:Oklenɔ,e jɛ xa ɖɔ ohwɛɖɔtɔ ɖaxo lɛye na da ohwɛ ni-i;lemɔha ka wɛ omɛ xena ɖɔ na nɔvyɛ ɖɔ e bo nyi:Hanɔ!e jɛ xa ɖɔ ye na sɔ-ɛ sɔ flɛn do ozo maci-maci mɛ. ²³ Na a wa avɔsinsan we agba nukɔn bo jlo na na onu Mawu,wɛ le flɛn lɔ na a nyɔ-ɛ ɖɔ mye kpo omɛɖe kpo bo ɖo oxo ɖe, ²⁴ jo onunina tɔwe lɔ do le avɔsinsan lɔ we agba nukɔn hwɛkpo,a bo wa yi vɔ oxo xeni le yɔ kpo anɔwevi lɔ kpo we dodo mɛ,e nɛ godo,a sɔ onunina tɔwe na Mawu. ²⁵ Na yɔ kpo omɛɖe kpo ɖo oxo ɖe bo le dɔn xɔn,ɖebla bleŋu a bo wa yi vɔ oxo lɔ,xa-ɛ le hwexenu na e le dɔn we do le yi ohwɛ lɔ gbo gbe xɔn,na e ma nyi lemɔha gɛ,e na sɔ we na ohwɛɖɔtɔ,ohwɛɖɔtɔ na sɔ we na sɔja,wɛ ye na do su do gankpamɛ. ²⁶ Le oxojɔxo mɛ,un le ɖɔ na we xɔn ɖɔ,flan lokpo tesu ma le kpo le okɔ na we xɔn hwɛkpo a do tɔn gɛ. ²⁷ Mi nɔ se wɛ ye nɔ ɖɔ: Mi nɔ kpɔn lɔ oga gɛ. ²⁸ Vɔ nyɔ,un le ɖɔ na mi xɔn ɖɔ,omɛ ɖekpokpwe xeni mɔ nyɔnu ɖe wɛ e jlo-e,o lɔ oga xa-ɛ le oji etɔn mɛ. ²⁹ Na nukun tɔwe aɖusi mɛtɔn wɛ na nyi afɔklɛnnu na we ,ɖe sɛ bo ze sɔ xɔ flɛn,do dindɛnnu,e nyɔ na we na awutugonu lokpo gble le gbaza tɔwe go,hugan gbaza tɔwe sese na yi ozo maci mɛ. ³⁰ Alo na aɖusi lɔ tɔwe wɛ nyi afɔklɛnnu na we,be bo gbo-e sɛ a bo sɔ-ɛ flɛn do dindɛnnu,ɖo na gbaza tɔwe we akpaɖe ɖe crɔn,e na nyɔ na we hugan ɖɔ ye na sɔ agbaza tɔwe sese flɛn do ozo maci mɛ. ³¹ Ye ɖɔ ɖɔ:Omɛ xeni gbɛ asyɛ ɖo na wlan nyɔnu gbigbɛ we wema do alɔmɛ ni-i. ³² Vɔ nyɔ,un le ɖɔ na mi xɔn ɖɔ:Omɛ xeni gbɛ asyɛ,wɛ e ka ma nyi ɖɔ afɔ wɛ e do ogbe gɛ,e zɔn ogalilɔ wi,e wɛ sunnu xeni ɖe nyɔnu xena aswɔ gbɛ,do afɔ ogbe. ³³ Mi gɔ se ye nɔ ɖɔ na dagbo mitɔn lɛye ɖɔ: Nɔ kpɔn gɔn akpagbe xena a do na Mawu lɔ ɖiɖe gɛ,vɔ na a do akpagbe na Mawu bo ɖe. ³⁴ Vɔ nyɔ le ɖɔ na mi xɔn ɖɔ,mi nɔ kpɔn xwle onu ti gɛ,mi nɔ kpɔn xwle jinukunsin gɛ,ɖo e wɛ nyi axɔlu zinkpwe Mawu tɔn; ³⁵ mi nɔ kpɔn xwle anyizan gɛ ɖo afɔɖotɛn Mawu tɔn wɛ,mi nɔ kpɔn xwle Jeluzalɛmu gɛ,ɖo e wɛ nyi axɔlu ɖaxo we toxo. ³⁶ Nɔ kpɔn xwle ota tɔwe gɛ,ɖo a ma kpego bo na tlɔ oɖa tɔwe lokpo gee zun wewe alo yuyu gɛ. ³⁷ Ɛɛn mitɔn ni nɔ nyi,ɛɛn,oxo xeni na jɛ e ji,lɛgba de wɛ e nɔ sɔn. ³⁸ Ɖo ye nɔ ɖɔ na mi ɖɔ:Na omɛɖe gba nukun na we,yɔ can gba ni-i gba,na omɛɖe hɔn aɖu na we,yɔ cangba hɔn aɖu ni-i gba. ³⁹ Vɔ nyɔ le ɖɔ na mi xɔn ɖɔ,na omɛɖe blo onu nyinyla xa mi,mi nɔ kpɔn klɔn asɔ ni-i gɛ.Na omɛɖe xo otomɛ na we do aɖusi ji,gɔ tlɔ amyɔn mɛ tɔn lɔ ni-i. ⁴⁰ Na omɛɖe ka jlo na dɔn we wa ohwɛ nukɔn bo na do yi awu odotɔn tɔwe,gɔ jo awu tɔwe ɖaxo lɔ do ni-i. ⁴¹ Na omɛɖe zin ji we,bo ɖɔ yɔ ni bo zɔn zɔnlin okpɛntin lokpo,zɔn zɔnlin xa-ɛ na okpɛntin awe. ⁴² Na onu omɛ xeni byɔ we,a bo nɔ kpɔn gbɛ okɔ le omɛ xeni din na nya onu le asiwe gɛ. ⁴³ Mi nɔ se ye ɖɔ ɖɔ: A nyi owan na awegɔ tɔwe,a bo gbɛ owan na kɛntɔ tɔwe. ⁴⁴ Vɔ nyɔ le ɖɔ na mi xɔn ɖɔ:Mi nyi owan na kɛntɔ lɛye,a bo xo oɖɛ na omɛ xe nɔ nya ogbe mitɔn lɛye.Mi xo oɖɛ jijɔhun na omɛ xeni nɔ do onu mi lɛye,mi blo onu jijɔhun na omɛ xeni gbɛ owan na mi lɛye, ⁴⁵ e nɛ ye na ylɔ mi ɖɔ Mawu we ovi xeni le sɛxwetomɛ,ɖo Mawu nɔ na wɛ ohwe nɔ hun do ohunnylatɔ kpodo omɛ xeni nɔ blo onu jijɔhun lɛye,bo ka nɔ gɔ na wɛ jokun nɔ gɔ ja do dodonɔ lɛye kpo omɛ xeni ma nyi dodonɔ lɛye kpo ji. ⁴⁶ Ɖo na mi nyi owan na omɛ xeni nyi owan na mi lɛye kɛɖɛ,ajɔ bɔtɔn ha wɛ na nyi mitɔn le Mawu de?Ganjɔ jɔtɔye can mɔ nɔ blo lemɔha gba? ⁴⁷ Na omɛ xeni nɔ do ogbe na mi,lɛye kɛɖɛ jan wɛ,mi nɔ do ogbe naa,aniha wɛ mi blo gbɔn ovo?Kosi lɛye can mɔ nɔ blo lemɔha gba gɛ? ⁴⁸ E wɛzɔn,mi nyi omɛ xeni kpe ogan ɖi ɖena myetɔ xeni le sɛxwe lɔ kpe ogan ɖo ha.