¹ E nɛ godo, gbigbɔ ɖedovotɔn kplan Jesu do yi ogbe totlomɛ a do wa yi tɛn-ɛ kpɔn gbɔn lɛgba ji. ² Xena Jesu bla onu na azan kanɖe kpo okle kanɖe kpo vɔ, xovɛ ci-i. ³ Omɛ tɛnkpɔntɔ lɔ sɛkpɔ wi-i bo ɖɔ: Na e nyi ɖɔ Mawu we ovi janwɛ a nyi xojɔxo, be bo le ogbe na pkpɛn xe lɛye a tlɔ zun kpɔnnɔ na ma kpɔn. ⁴ Jesu ka yi ogbe ni-i ɖɔ: E nyi winwlan ɖɔ gbɛtɔ ma le ogbɛ na onu ɖuɖu kɔkɔ lɔkɔ gɛ, vɔ oxo ɖekpokpwe ni tɔn sɔn onu mɛ na Mawu. ⁵ Awovi kɔ-ɛ do yi toxo mimɛ lɔ mɛ le oji, ⁶ Bo ɖɔ ni-i ɖɔ: Na ovi Mawutɔn Jan wɛ a nyi hlɔn a bo flɛ jɛ o do ɖo e nyi wiwlan ɖɔ: E na ɖe ogbe na wɛnzangun etɔn lɛye na we wɛ ye na yi we do alɔ yetɔn lɛye mɛ, wɛ afɔ tɔwe ma le klɛn okpɛn ɖe xɔn gɛ. ⁷ Jesu yi ogbe ni-i ɖɔ: E gɔ nyi winwlan ɖɔ a ma le tɛn Aklunɔ Mawu tɔwe kpɔn xɔn gɛ. ⁸ Awovi gɔ kpla-ɛ do yi oso ɖaxo ɖe ji bo xlɛ-ɛ gigo kpo ɖɔkun ogbɛ xe mɛ tɔn lɛye sese wi, ⁹ Bo wa ɖɔ ni-i ɖɔ: Na a sɛn-un bo do onu odo na-un, be na sɔ onu e nɛ lɛye sese do alɔ mɛ na we. ¹⁰ Jesu yi ogbe ni-i ɖɔ: Awovi bɛ ɖe we le nukun mɛ na-un, ɖo e nyi winwlan ɖɔ Mawu tɔwe lokpo gee jan wɛ a sɛn a bo do onu odo na. ¹¹ Kpowun, awovi lɛ le ede bo sɔn wɛ wɛnzangun lɛye wa Jesu de bo jɛ sinsɛn-ɛ ji. ¹² Xena Jesu se ɖɔ ye bo wle Jaan omɛ nylɔ do osin mɛ tɔ, e si bo sɔn yi Galile we toxo lɔ mɛ. ¹³ Jesu tɔn le Nazalɛti we toxo lɔ mɛ bo wa ci Kapɛnawumu xe ni bo do oxu go, le kansin Zabulɔn kpo Nɛfutali tɔn mɛ. ¹⁴ Na omɛ xena ɖɔɖanyiɖɔtɔ Ezayi ɖɔ a do wa cicɛ mɛ: ¹⁵ Otogun xeni le Zabulɔn we kansin mɛ kpo otogun xeni le Nɛfutali we kansinmɛ xeni sɛkpɔ Galile we otɔ, le Juɖɛn we otɔ godo, Galile xe mɛ na omɛ xe ma nyi Jwifunu lɛye le, ¹⁶ Otogun xeni flɔn-anyi le zinvlu mɛ, e mɔ kinklɛn ɖaxo ɖe, wɛ omɛ xeni le zinvlu mɛ le kutomɛ lɛye, kinklɛn ɖe ta do ye ji. ¹⁷ Bɛ sɔn hwenɛnu, Jesu jɛ owɛndagbe lila ji, bo le ɖɔ xɔn ɖɔ: Mi ɖyɔ jijɔ mitɔn lɛye ɖo axɔluɖu sɛxwe tɔn lɔ o sɛkpɔ. ¹⁸ Xena e le gbɔn Galile we otɔto bo wa le yi xɔn, e mɔ nɔvi-nɔvi awe, Simɔ xenɔ nyi Piyɛ, kpo nɔvyɛ Andle, xe le da oɖɔ xɔn ɖo oɖɔ datɔ wɛ ye nyi. ¹⁹ Jesu ɖɔ na ye ɖɔ: Mi xo do-un, na ma sɔ mi do tlɔ zun gbɛtɔ wle tɔ. ²⁰ Le zɔn lokpo, ye jo odɔ ye tɔn lɛye do bo xodo-e. ²¹ Xena Jesu le sɔn xɔn zaande, e mɔ nɔvi-nɔvi awe bu ye, Jaki xeni nyi ovi Zebede tɔn kpo Jaan, ye le otɔjihun mɛ xa yetɔ Zebede bo le jla oɖɔ yetɔn lɛye ɖo xɔn. ²² Jesu ylɔ ye, wɛ ye jo yetɔ Zebede do le otɔjihun lɔ mɛ bo xodo-e. ²³ Jesu dan gbɔn Galile we oto lɔ sese mɛ bo le kplan onu le sinsɛnxɔ lɛye mɛ xɔn bo le la wɛndagbe sɛxwe tɔn lɔ xɔn, bo le gbɔ azɔn na azɔnnɔ lɛye kpo kplibɔnɔ lɛye kpo xɔn le otogun lɔ mɛ. ²⁴ Nyikɔ etɔn bo kpe Sili we oto lɔ mɛ sese wɛ omɛ ye nɔ hɛn azɔn nɔ ye kpo omɛ ɖekpokpwe xeni ɖo vivɛsise de le lanmɛ yetɔn lɛye wa ni-i, omɛ xena gbigbɔ mawe le e-mɛ wɛɛ, omɛ xeni nɔ ku kukpwe wɛɛ, kpo omɛ xeni kplibɔ lɛye, e nɔ gbɔ azɔn na ye sese kpo. ²⁵ Gbɛtɔ susu gbagbagba xodo-e sɔn Galile, Jeluzalɛmu, Jude, Judɛn we otɔ godo kpo toxo awo lɛye we kansinmɛ.