¹ Le azan nɛ lɛye gbe, Jaan Batisi ɖɔ Mawu xo le gbetotlomɛ Juɖe tɔn mɛ. ² E le ɖɔ: Mi dyɔ jijɔ mitɔn lɛye, ɖo axɔluto Mawutɔn o sɛ kpɔ. ³ Ɖo Jaan wɛ nyi omɛxe we oxo na ɖɔɖanyiɖɔtɔ Ezayi ɖɔ lɔ ɖye. E ɖɔ: Ogbe ɖe le ɖi le gbetotlomɛ xɔn " Mi jla Aklunɔ we omɔ ɖo, mi su odo lɛye ⁴ Kanlin gbaza we awu wɛ Jaan nɔ do, a bo bla akpakan xena ye sɔ kanlin we gbaza do blo. Owin kpo bɔsukle kpo wɛ nyi onu ɖuɖu etɔn. ⁵ Jeluzalɛmu tɔye kpo Jude tɔye sese, kaka bo wa jɛ Judɛn tɔye ji wa Jaan de. ⁶ Xena ye ɖɔ onu wanyido yetɔn lɛye sese, Jaan nylɔ ye do otɔ Judɛn tɔn mɛ. ⁷ Vɔ, xena Sadusitɔye kpodo Falizitɔye susu wa e de wɛ e na do nylɔ ye do osin mɛ, e ɖɔ na ye ɖɔ: Zakpata kunkan e mi, mɛ wɛ ɖɔ na mi ɖɔ mye ni bo do ada na ohwɛdida xeni ja lɔ? ⁸ E wɛ zɔn, mi zan ogbɛ jijlɔ, ⁹ A bo nɔ kpɔn le ɖɔ le miɖe mɛ xɔn ɖɔ: Mye tɔ bɛ bo nyi Ablaxamu gɛ! Ɖo, ma ɖɔ na mi Mawu hɛn na sɔ okpɛn xe lɛye do trɔ vikpɛye na Ablaxamu ¹⁰ Odin syɔvi lɔ o le atin we dodonu: Atin ɖekpokpwe xema na sinsyɛn ɖe gɛ, ye na gbo-e bo na do-e ozo. ¹¹ Un le nylɔ mi do osin mɛ xɔn na mi a do ɖyɔ jijɔ; vɔ omɛ xena wa wa le godo ce, e hugan nyɔ, wɛ un ma kpego bo na jlɛ afɔ ce do fɔkpa etɔn mɛ gɛ. E yɔ, na wa nylɔ mi do gbigbɔ ɖedovo tɔn mɛ kpo ozo kpo mɛ. ¹² Onutanu le a lɔmɛ ni-i, e na ɖe onukun lɔ do ovo le onuywɛ lɔ go. E na bɛ jinukun etɔn do ava mɛ, vɔ e tɔ ozo onuywɛ lɛye le ozo xe mɔ nɔ ci lɔ gɛ mɛ. ¹³ Jesu wa Galile le Judɛn we otɔto na Jaan a do nylɔ-ɛ do osin mɛ. ¹⁴ Vɔ Jaan gbɛ taŋu bo ɖɔ: Yɔ wɛ na nylɔ nyɔ do osin mɛ, yɔ ka gɔ wa tɔn le ɖye! ¹⁵ Jesu yi ogbe n-i bo ɖɔ: Yi ogbe na un a bo blo do lemɔha le odin, ɖo dena mi na nɔ blo onu xena Mawu ɖɔ na mi do nɛ. Wɛ Jaan nylɔ-ɛ do osin lɔ mɛ. ¹⁶ Xena Jaan nylɔ Jesu do osin lɔ mɛ, tintɔn Jesu tɔn tlololo, jan wɛ sɛxwe do hun, e mɔ gbigbɔ Mawutɔn jɛ ote do e ji ɖi hɔnnɛ we ninɔmɛ ha. ¹⁷ E wɛ, ogbe ɖe ɖi le oji bo ɖɔ: Omɛxe lɔ wɛ nyi ovi ce xena un nyi owan na, e wɛ nɔ do ojijwɛ na un.