¹ Xena ye wa ji Jesu le Bɛtlɛxɛmu le Jude,le axɔlu Elodu we hwenu,onunywɛtɔ lɛye ni sɔn hweyixɔ do wa Jeluzalɛmu, ² wɛ ye ɖɔ:Bɔ wɛ Axɔlu Jwifunu lɛye tɔn xena ye ji odin lɔ le?Ɖo mi mɔ sunhwlɛvu etɔn le ohwezɛdo wɛzɔn mi wa bo na do wa sɛn. ³ Xena axɔlu Elodu se oxo nɛ,e caka le e ɖe mɛ kpodo Jeluzalɛmu we toxo lɔ kpo. ⁴ Elodu kpli avɔsanuxwletɔ lɛye kpo osɛnkkplanmɛtɔ oto lɔ tɔn lɛye kpokpo,bo kan ye se ɖɔ:Bɔwɛ ye ji Klisi lɔ do. ⁵ Ye le ɖɔ ni xɔn ɖɔ:Bɛtlɛxɛmu le Jude we oto mɛ,ɖo onu xena ɖɔɖanyiɖɔtɔ lƥɔ wlan ɖye: ⁶ Wɛ yɔ,Bɛtɛxlɛmu,anyizan Juda tɔn,le oxojɔxo mɛ,yɔ mɛ hwe hugan toxo ɖaxo gbokpwe lɛye ni le Juda we toxo le ye mɛ gbɔɔn oga de na wa sɔn flɛn bo na wa kplan oto ce gɛ. ⁷ E nɛ godo,Elodu wa yɔ onunywɛ tɔ lɛye do bibɛmɛ bo na do kanye se ɖɔ hwetɛnu wɛ sunhwlɛvi lɔ wa kle le oji tututu ja. ⁸ E ze ye do xlan Bɛtlɛxɛmu bo ɖɔ:Mi wɛ din o do na ovi vu lɔ, na mi mɔ-ɛ mi wa ɖɔ na-un,na nyɔ can ma yi sɛn gba. ⁹ Hwexenu na ye se axɔlu lɔ we oxo vɔ ye wle omɔ yetɔn wɛ sunhwlɛvi xena ye mɔ le hwezɛdo lɔ le nunkɔn na ye kaka yi jɛ ofi xena ovi vu lɔ le. ¹⁰ Hwexenu na ye mɔ sunhwlɛvi lɔ,ye gɔ kpodo awajijɛ ɖaxo ɖe kpo. ¹¹ Ye ɖyɛ oxwe lɔ gbe bo mɔ ovi lɔ kpo onɔ Malya kpo,ye litayi bo kpɛ-ɛ,ye hun dɔkunnu yetɔn lɛye bo wa ni sika kpodo celu xena ye nɔ yɔ ɖɔ milu, xeni gɔ vɛ kɔbɔ. ¹² Mawu wa ɖo gbesu ye gbɔn odrɔ mɛ ɖɔ,ye ni nɔ kpɔn lɛkɔ yi oto yetɔn mɛ gbɔn omɔ bu ji,bo do sɔn yi oto yetɔn mɛ. ¹³ Hwexenu na ye sɔn godo,wɛnzangun lokpo wa wa Jozɛfu de le odrɔmɛ bo ɖɔ:Cite,sɔ ovi vu lɔ kpo onɔ kpo bo sɔn yi Ejipu. Nɔ flɛn kaka na ma wa ɖɔxo na we ɖo Elodu le din na hu ovi lɔ. ¹⁴ Le ozan nɛ lɔ mɛ,Jozɛfu cite,bo ze ovi lɔ kpodo onɔ kpo bo sɔn yi Ejipu. ¹⁵ E nɔ flɛn kaka jɛ,hwexenu na Elodu ku do.E hɛn oxo xena Aklunɔ ɖɔ gbɔn ɖɔɖanyiɖɔtɔ mɛ wa cicɛmɛ: Le azɔge na Ejipu wɛ un yɔ ovi ce le. ¹⁶ Wɛ hwexenu na Elodu wa mɔ nukunnu jɛ e go ɖɔ,onunywɛtɔ lɛye bo zan mi-e,e sin xomɛ taŋu.E sɔ omɛ ɖoxlan ɖɔ ye ni bo hu vikpɛvu xeni ɖo oxwe awe kpodo xeni hwe xugan lemɔha,bo le Bɛtlɛxɛmu we toxo lɔ kpokpo mɛ ɖiɖe na onunywɛtɔ lɛye jlɛ ɖo ha. ¹⁷ E nɛ lɔ hɛn oxo na ɖɔɖanyiɖɔtɔ Jelemi ɖɔ wa cicɛmɛ: ¹⁸ Mi se ogbe ɖe le Hlama,avi lɛye kpodo okwe finfan ɖaxo lɛye,Hlacɛli vi avi na vikpɛ etɔn lɛye bo gbɛ ɖɔ mye bo ma le bɔnu xɔn gɛ,ɖo vikpɛ etɔn lɛye ma gɔ le gɛ. ¹⁹ Xena Elodu wa ku,wɛnzangun Aklunɔ tɔn wa wa Jozɛfu de le odlɔmɛ le Ejipu, ²⁰ bo ɖɔ:Cite,ze ovi lɔ kpodo onɔ kpo bo yi Izlayɛli we tomɛ ɖo omɛ ni le din na hu ovi lɔ,lɛye o ku. ²¹ Jozɛfu cite bo ze ovi lɔ kpodo onɔ kpo bo yi Izlayɛli we tomɛ. ²² Amɔ xena Jozɛfu se ɖɔ Akelawisi bo ɖu oga le Jude do Elodu we tɛnmɛ,e ɖibu bo na do yi.Xena Mawu wa ɖo gbesu wi godo gbɔn odlɔ mɛ,e wa sɔn yi Galile we oto lɔ mɛ, ²³ bo yi nɔ toxo ɖemɛ wɛ ye nɔ yɔ ɖɔ Nazalɛti,e nɛ lɔ hɛn oxo na ɖɔɖanyiɖɔtɔ lɛye ɖɔ wa cicɛmɛ,xeni nyi ɖɔ ye na yɔ ɖɔ Jesu Nazalɛti tɔn.