¹ Le hwenɛnu, xodotɔ lɛye wa Jesu ɖe bo le ɖɔ ni-i ɖɔ: Omɛ wɛ na ɖu oga le mi nu le axɔsuɖuta olɔn tɔn mɛ? ² Jesu ka ylɔ ovikpɛvu lokpo ɖe, bo sɔ-ɛ sɔ ɖo cincin ye tɔn mɛ, ³ bo ɖɔ: Un le ɖɔ oxo jɔxo na mi, e nyi mi ma ɖyɔ jijɛ gɛ bo cidi vikpɛvu e xe lɛye ha gɛ, mi ma le biyɛ axɔsuɖuta olɔn tɔn lɔ mɛ xɔn gɛ. ⁴ E wɛ zɔn, omɛ ɖekpokpwe xeni na cidi ovi kpɛvu xe ha wɛ na nyi omɛ xo le axɔsuɖuta olɔn tɔn mɛ. ⁵ Wɛ omɛ ɖekpokpwe xeni na yi ovi kpɛvu ɖe gbɔn nyikɔ ce mɛ e yi yɔn tesu gba. ⁶ Vɔ, na omɛ ɖekpokpwe glɔn omɔ na ovivu lokpo gee xeni ɖi onu na-un, e gɔ yɔn ni-i hugan na ye sɔ okan do okɔ ni-i bo gɔ sɔ okpɛn ɖaxo do e ji, bo sɔ-ɛ nyi do oxu gɔngɔn gɔ. ⁷ Ota nyinyla na ogbɛ lɔ na omɔ glɔnu etɔn! Ɖo e le dandan mɛ wɛ omɔ glɔnu na wa; vɔ ota nyinyla na omɛ xeye ji na omɔ glɔ lɔ gbɔn bo do wa! ⁸ E nyi ɖɔ alɔ tɔwe alo afɔ tɔwe we na nyi omɔ glɔn na we hun, bo gbo-e sɛ na ni a ni ga do we; e yɔn na we hun gan na a nyi afɔgbonɔ alo alɔ gbonɔ bo yi sɛhwe hu gan onu lɛye sese kpo na sɔ gbe na we wɛ anyi tɔn le ozo ma ci mɛ. ⁹ E nyi ɖɔ nukun tɔwe wɛ na nyi afɔ klɛnu na we, bo ɖe sɛ a bo sɔ-ɛ nyido ofi dindɛn; e yɔn na we hugan na azɔn nukun gbigba do yi sɛhwe, wɛ nukun tɔwe awe lɛye kpokpo na sɔgbe wɛ anyi tɔn le ozo maci-maci mɛ. ¹⁰ Mi nɔ kpɔ ɖike bo gbɛ owan na ovivu lkpo gee gɛ; ɖo wɛnzangun ye tɔn xeni le sɛhwe e le Mawu otɔ lɔ we nukɔn xwe lɛye kpokpo nu. ¹¹ Ɖo ovi gbɛtɔ tɔn wa ogbɛ lɔ mɛ na do wlɛn omɛ xeni bu omɔ lɛye. ¹² A ni wɛ mi na lin do oxo xe go? Na omɛ ɖe ɖo lɛngbɔ kanwe ko (100) wɛ na lokpo vɔvɔ bu le emɛ, e mɔ nɔ jo lɛngbɔ kanwe fɔtɔn nukun ɛnɛ(99) lɛye do nyi ofi lokpo le oso kanmɛ fiɖe, a bo nɔ yi lokpo lɔ gbemɛ gɛ wɛ? ¹³ Wɛ na e mɔ-ɛ, ma ɖɔ oxo jɔxo na mi, e nɔ mɔ jijwɛ hugan lɛngbɔ kanwe fɔtɔn nukun ɛnɛ xeni jodo oso kanmɛ lɛye sese kpo. ¹⁴ Lemɔhake, e ma gɔ nyi ojlo ɖagbwɛ na miye tɔ Mawu mitɔn le sɛxwe na ovi lokpo ɖe bu le onu ɖiɖi etɔn mɛ. ¹⁵ Na anɔwevi hu ohwɛ, yi mɔ-ɛ na mi an ɖɔ le miɖe lɛye mɛ gbo, yɔ kpo anɔwevi lɔ kpo. E nyi e se oxo tɔwe, a ɖu ji ni-i. ¹⁶ Vɔ, na ma so oxo tɔwe gɛ, yi yɔ omɛ lokpo alo omɛ awe do yɔ ɖe ji, na oxo lɔ a do nyi ɖiɖɔ gbo le omɛ lokpo alo omɛ awe e nɛ lɛye we nukɔn na ye a do nyi kunnu ɖe tɔ tɔwe. ¹⁷ Na e ka gbɛ ogbe na oxo ye tɔn, wa yi ɖɔ le agun mɛ; wɛ gɔ gbe ogbɛ na agun, bo gbɔ nyɔ-ɛ ɖɔ e bo yi kosi alo takwɛjɔtɔ. ¹⁸ Un le ɖɔ le oxojɔxo mɛ xɔn ɖɔ, onu ɖekpokpwe xena mi bla le anyizan lɔ ji, e na nyi bibla le sɛxwe gba, lemɔhake onu ɖekpokpwe xena mi tlun le anyizan lɔ ji e na nyi tlun-tlun le sɛxwe gba. ¹⁹ Ma gɔ ɖɔ na mi ɖɔ, na mi mɛ awe nɔ okpɔ le gbigbɔ lokpo lɔ mɛ bo do le byɔ onu ɖe xɔn, e na nyi nina gbɔn atɛye xeni nle sɛxwe lɔ ji. ²⁰ Ɖo ofi xena omɛ awe alo omɛ atɔn kpli do le nyikɔ ce mɛ, un le cincin mɛ na ye. ²¹ E nɛ godo Piyɛ wa wa Jeu ɖe bo ɖɔ ni-i ɖɔ: Aklunɔ, wla nɛ mu wɛ na nɔ sɔ ohwɛ sɔ xɔ kɛ a nɛyevi na e hu ohwɛ do-un? Kaka do yi wla canwe mɛ? ²² Jesu bo ɖo e go ni-i ɖɔ: Un ma le ɖɔ na we ɖɔ wla canwe kɛɖɛ kpoŋu mɛ gɛ, vɔ do yi kanɖe-gban kanɖe-gban donu wla canwe. ²³ E nɛ wɛ zɔn, axɔluta sɛxwe tɔn lɔ, onu xe go un hɛn na jlɛ do lɔ ɖiye: Gbe ɖo kpo wɛ xɔlu ɖe jlo na xlɛ onu xena e sɔ xɔ na omɛ sɛntɔ etɔn lɛye le osan kpɔn ɖɔ e sɔ ogbe jaa. ²⁴ hwexenu e wa le xlɛ onu lɛye kpɔn xɔn, ye hɛn omɛ lokpo wa ni-i wɛ e yɔ ɖu axɔ sikagankwa ɖaxo degba awe afɔ awo do e. ²⁵ Xena e ma ka ɖo onu ti na do su axɔ lɔ gɛ, axɔlu lɔ ɖɔ ni-i ɖɔ ni bo sa oka etɔn ogo etɔn, ovi etɔn asiyɛ kaka yi jɛ e tesu ji a bo do su axɔ xena e ɖu lɔ. ²⁶ Omɛ sɛnto e nɛ ka jɛ klota bo do onu odo na axɔlu lɔ bo ɖekɔ ni-i ɖɔ: Aklunɔ kɛnklɛn bo nɔte vuɖe kpɔŋu, na su sikagankwa tɔwe we. ²⁷ Xena e ɖɔ lemɔha, onu etɔn ɖu ɖɔŋu ɖunu na xɔlu lɔ wɛ e jo-e do, bo sɔ axɔ xeni ɖu lɔ sese sɔ xɔ kɛ ɛ. ²⁸ Hwexenu na omɛ sɛntɔ lɔ lɛkɔ le xɔlu lɔ de godo, le omɔ ji e yi kpe ozɔngbɛ etɔn xeni ɖu axɔ gankwɛ kanwe ko do-e le omɔ lɔ ji. Xena e mɔ ozɔngbɛ etɔ nɛ lɔ kpoŋu, e wle okɔ ni-i bo nɔ fyɔn, kaka bo na ogbekan etɔn, wɛ e ɖɔ ni-i ɖɔ: Ni bo su axɔ miyetɔn miye. ²⁹ Ozɔngbɛ etɔn lɔ ɖɔ ni-i kpo okwe finfan kpo bo jɛ oklo ni-i, bo jɛ kɛnklɛn do ni ji bo ɖɔ: Nɔte kpɛɖe kpɔŋu na ma su axɔ tɔwe we. ³⁰ E ka ma jlo gɛ, bo kplɛn ozɔngbɛ etɔn lɔ do yi gankpa mɛ, wɛ e na nɔ finɛ kaka yi jɛ hwexenu na e na su axɔ xeni ɖu do-e vɔ lɔ wɛ e na tɔn sɔ gankpa lɔ mɛ. ³¹ Ozɔngbɛ etɔn lɛye bu ka mɔ onu xeni jo nɛ lɔ sese kpo wɛ awu ku ye sese wɛ ye wa yi ɖɔ oxo lɔ na axɔlu lɔ. ³² Odin axɔlu lɔ ylɔ omɛ sɛntɔ xeni ɖu axɔ do-e lɔ bo ɖɔ: Omɛ sɛntɔ nyinyla wɛ anyi, un ma sɔ axɔ tɔwe lɛye kpokpo sɔ kɛwe, ɖo asa ovo na-un wɛ un ku lɛblanu na we; ³³ a ma kpego na ku lɛblanu na ozɔngbɛ tɔwe lɔ, ɖe na un ku lɛblanu na we ɖo? ³⁴ Wɛ axɔlu lɔ ɖaɖi do-e taŋu, bo kplɛn do yi gankpamɛ gba wɛ ye na do o ya ni kaka yi jɛ hwexenu na e yɔ cangba na su axɔ etɔn sese kpo. ³⁵ Wɛ bo do su ota na oxo lɔ, Jesu ɖɔ: Miye can e nyi lokpo-lokpo mitɔn lɛye can ma sɔ ohwɛ sɔ kɛ miɖe lɛye kpo ayixa mitɔn sese kpo gɛ, lemɔhake wɛ atɛye xeni le sɛxwe lɔ na blo ɖo na miye can gba nɛ.