¹ Azan ayizɛ godo, Jesu ɖɔn Piyɛ, Jaki kpodo Jaan xeni nyi Jaki nɔviyɛ, ye bo wa yi jɛ ovo le oso ɖe ji do yi xo oɖɛ. ² Ninɔmɛ etɔn trɔ le nukunmɛ na ye, nukunmɛ etɔn bo klɛn ɖi ohwe ni zɛtɔn ha, wɛ awu ni le okɔ ni bo nɔ dazo ɖi zogbɛn wewe pepepe ha. ³ Ɛɖie, Mɔnyizi kpo Eli kpo wa tɔn do nukunmɛ na ye bo le ɖɔ oxo xa Jesu. ⁴ Piyɛ bo ɖɔ na Jesu ɖɔ, Aklunɔ na ajlo, na gba oxɔ atɔn do fie tɔwe na yi lokpo, Mɔnyizi tɔn na yi lokpo wɛ Elii tɔn can na yi lokpo gba. ⁵ Xena egbɛ le ɖɔ oxo xɔn, kinklɛn ɖe sɔn oji bo ta do yemɛ kpokpo ji. Ogbe ɖe bo le ɖi le kinklɛn lɔ mɛ xɔn ɖɔ: Ovi ce vivɛna xena un sɔ ayixa ce kpo oji ce kpo ɖo eji lɔ nɛ, mi ɖo oto-e. ⁶ Xe xodotɔ Jesutɔn lɛye se lemɔha, obu ɖaxo ɖe jɛ ye ji wɛ ye bo jɛ anyi bo cɔn nukunmɛ do odo. ⁷ Vɔ Jesu wa ɖo alɔ ye go bo ɖɔ na ye ɖɔ: Mi cite, dinkan ni nɔ kpo so mi gɛ. ⁸ Flɛn wɛ ye wa kɔ okɔ bo kpɔn oji vɔ ye ma gɔ mɔ omɛ ti zɛgbɔn Jesu kɛɖɛ go gɛ. ⁹ Xena ye jɛte sɔn oso lɔ ji, Jesu do osɛn na ye ɖɔ: Mi nɔ kpo ɖɔ onu xena mimɔ xe lɔ na omɛ ti gɛ kaka wa jɛ ogan xe mɛ na gbɛtɔ vi lɔ na wa nyi fifɔn sɔn oku hwɛ kpo. ¹⁰ Xodotɔ Jesutɔn lɛye wa le kɛnse xɔn ɖɔ: Ani wutu wɛ osɛn kplanmɛtɔ lɛye ɖɔ Eli bɛ bo na wa dan-dan mɛ hwɛ kpo? ¹¹ Jesu bo ɖo ego na ye ɖɔ: Xojɔxo, Eli ɖo na wa bo na jla onu lɛye kpokpo ɖo. ¹² Vɔ, un le ɖɔ oxojɔxo na mi: Eli owa amɔ ye ma ka nywɛ wi gɛ, xe gɔ nyila lɔ wɛ nyi ɖɔ ye swɛ do wa onu xeni jlo ye. Lemɔhake wɛ ovi gbɛtɔtɔn lɔ na se wuvɛ susu le alɔ yetɔn lɛye mɛ. ¹³ Flɛnlɛn wɛ xodotɔ etɔn lɛye wa le mɔ ɖɔ Jaan omɛylɔn do tɔmɛtɔ lɔ xo bɛ Jesu bo le ɖɔ xɔn. ¹⁴ Xena e lɛkɔ do wa oto gun lɔ mɛ, dahwe ɖe wa nukɔn etɔn bo jɛ oklo na Jesu bo ɖɔ: ¹⁵ Aklunɔ, kpɔn ɖɔŋuɖunu na ovi ce sunnuglo xe na-un, ɖo e nɔ ku adigbe bo jɛ ozo mɛ kpo osin mɛ kpo ɖe hweɖelɛnu bo nɔ se vivɛ ta-un. ¹⁶ Un hɛn ovi ce nɛ lɔ dowa na xodotɔ tɔwe lɛye wɛ ye ma kpogo na gbɔ azɔn lɔ ni-i gɛ. ¹⁷ Xena Jesu se oxo dawe lɔ tɔn, e ɖɔ na xodotɔ etɔn lɛye ɖɔ: Gbɛtɔ nyinyla onu ma ɖi tɔ xe lɛye, kaka hwe tɛnu kpɔɔn wɛ na nɔ mide jɛ? kaka jɛ hwe tɛnu ha wɛ mi na nɔ okɔ ji na-un jɛ? Mi ɖɔn azɔnnɔ lɔ dowa na-un. ¹⁸ Wɛ ye dɔn ovi lɔ dowa, Jesu gbo kpo ohun nyinyla do ota na yɛmawe xe le ovi lɔ ji, wɛ etɔn le le emɛ, hɔnlokpo-hɔnlokpo azɔn gbɔ na ovi lɔ le otɛn do lokpo lɔ mɛ. ¹⁹ E nɛ lɔ godo, xodotɔ etɔn lɛye wa imɔ Jesu ɖo ovo bo kɛn se ɖɔ: Ani wutu wɛ miye ma kpe gbigbɔ mawe nɛ lɔ go bo nya gɛ? ²⁰ Jesu bo ɖɔna ye ɖɔ: Onu ɖiɖi ovu na mi ɖo lɔ wɛzɔn. Ma ɖɔ oxo jɔxo na mi, na onu ɖiɖi mitɔn gɔ hwe ɖi okɛn ha can, na mi trɛ ɖɔna oso ɖɔ ni bo lɛ le ofi na e le a bo yi jɛ flɛn daxwe e na cite; wɛ onu ti wiwa ma gɔ le glo mi gbɔn onu ɖiɖi nɛ lɔ mɛ xɔn gɛ. ²¹ Vɔ gbigbɔ mawe e nɛ lɔ, oɖɛ kpodo onu bibla kpo jɛn nɔ kpe go. ²² Jesu kpodo xodotɔ etɔn lɛye kpo kple yeɖe le Galile, wɛ e le ɖɔ na ye ɖɔ: E na wa jɔ wɛ nyɔ gbɛtɔvi lɔ, ²³ ye na wa jo-un do alɔmɛ na gbɛtɔye; ye na hu-un, wɛ azɔntɔn gbe etɔn na fɔn. Oxo e nɛ lɔ ku aba kanmɛ na xodotɔ etɔn lɛye taŋu. ²⁴ Xe ye wa Kapɛnawumu, omɛ xe ni nɔ yi takwɛ cɔcixɔ mɛtɔn lɛye sɛ kpɔ Piyɛ bo kɛnse ɖɔ: Cica mitɔn lɔ nɔ na takwɛ sinsɛnxɔ mɛ tɔn lɔ ɖee? ²⁵ E yi ogbe na ye. Hwexenu na Piyɛ byɛ oxwe lɔ gbe,Jesu jɛ nukɔn bo kan se wi-i ɖɔ:Axɔlu xe le ogbɛ mɛ fiye lɛye,mɛ si wɛ ye nɔ yi onu jijɔ kpodo takwɛ kpo le?Tovi lɛye de wɛɛ alo jonɔ lɛye si?A ni wɛ yɔ ka mɔ do oxo e nɛ lɔ go? ²⁶ Piyɛ ɖo e go ni-i ɖɔ:"Jonɔ lɛye si wɛ.Jesu ka ɖo e go ni-i ɖɔ:Na e nyi ɖo lemɔha,be tovi lɛye ma le emɛ gɛ. ²⁷ Vɔ, na mi nɔ kpɔn wa nyi afɔklɛnnu na ye wutu gɛ, yi oxu ji a bo yi ɖo omlɛ, ohwe xena a na wle tintan, kɛ onu etɔn, a na mɔ kɔbɔ xeni na kpe takwa nyɔ kpo yɔ kpo tɔn lokpo le e mɛ, swɛ, a bo do yi su takwa nyɔ kpo yɔ kpo tɔn lɔ.