¹ Falizitɔ lɛye kpodo Sadusitɔ lɛye kpo wa Jesu de bo le din na ɖo omɔ ni-i, bo ɖɔ ni-i ɖɔ ni bo ɖe josido ɖe xlɛ gbɔn nujiwu biblo mɛ, a bo do ɖe xlɛ mye lɛye ɖɔ Mawu bɛ bo so-ɛ sɔ ɖoxlan. ² E wɛ Jesu ɖo ego na ye ɖɔ: Na hwedo do ohwe bo gba amizɛn, mi nɔ ɖɔ ɖɔ: Osɔ ogbɛ lɔ mɛ na nyɔ. ³ Le zanfun nu, na ogbɛ lɔ mɛ bla zɛgɛ, mi nɔ ɖɔ ɖɔ: Jokun bo na ja egbe. Mi nyɔ ɖena ye nɔ ɖe oji we ninɔmɛ lɛye we tinmɛ ɖo, vɔ mi ka ma nyɔ ɖe ye nɔ ɖe ogan xixo xe lɛye we josido we tinmɛ gɛ. ⁴ Jijimɛ vi egbe tɔn lɛye, omɛ nyinyla gbeji manɔtɔ lɛye wɛ ye nyi. Enɛ lɛye le din josido Mawu tɔn ɖe xɔn, ye ka ma gɔ ja ɖe mɔ gbe gɛ adavo ɖɔɖayiɖɔtɔ Mawutɔn Jonasi tɔn lɔ go gɛ. Xena Jesu ɖɔ lemɔha vɔ, e jo ye do bo sɔn. ⁵ Jesu kpodo xodotɔ etɔn lɛye kpo sɔn yi otɔ lɔ godo, vɔ, xodotɔ etɔn lɛye ka ma flin bo hɛn kpɔnnɔ gɛ. ⁶ Jesu ka ɖɔ na ye ɖɔ: Mi cɔ miɖe lɛye do kpɔnnɔ tinkɛn Falizitɔ lɛye tɔn kpodo Sadusitɔ lɛye tɔn go. ⁷ Xena Jesu ɖɔ lemɔha na ye, ye jɛ ɖiɖɔ ji le yeɖe lɛye we cɛncɛn mɛ ɖɔ: Kpɔnnɔ xena mi ma flin bo hɛn lɔ gɛ wɛzɔn e do le ɖɔ lemɔha na mi. ⁸ Jesu ka nyɔ oxo xena ye le ɖɔ le yeɖe mɛ xɔn lɔ, bo ɖɔ na ye ɖɔ: Gbɛtɔ onu ɖiɖi ovu nɔ lɛye mi, ani wutu wɛzɔn mi do le ɖɔ le miɖe lɛye mɛ xɔn ɖɔ kpɔnnɔ xena mye lɛye bo ma hɛn lɔ wutu bɛ bo zɔn bɛ nyɔ bo do le ɖo lemɔha? ⁹ Mi gbɛ le ma nywɛ mɛ wɛ? Mi ma gɔ flin kpɔnnɔ atɔɔn xena gbɛtɔ akpo atɔɔn(15.000) ɖu lɔ kpodo jaxwi nɛmu-nɛmu ɖe xena mi bɛ lɔ baa? ¹⁰ Mi ka ma gɔ flin kpɔnnɔ canwe xena gbɛtɔ akpo ɛnɛ(4.000) lɛ lɔ ɖu kpodo jaxwi nɛmu-nɛmu xena mi bɛ lɔ baa? ¹¹ Ani wutu wɛzɔn mi ma do mɔ nukunnu jɛ emɛ ɖɔ nyɔ bo ma le ɖɔ oxo do kpɔnnɔ go na mye lɛye le osan gɛ, le hwexenu na un le ɖɔ na mi xɔn ɖɔ: Mye ni bo cɔ miɖe lɛye do kpɔnnɔ tinkɛn Falizitɔ lɛye tɔn kpodo Sadusitɔ lɛye tɔn go. ¹² Hwenɛnu gbɔn wɛ ye wa mɔ nukunnu jɛ ego ɖɔ e bo ma ɖɔ ye ni bo cɔ yeɖe lɛye do kpɔnnɔ tinkɛn go gɛ, vɔ ye ni bo cɔ yeɖe lɛye do Falizitɔ lɛye kpodo Sadusitɔ lɛye kpo we onukplan mɛ. ¹³ Xena Jesu wa Sezale Filiputɔn we kansin mɛ, e kanse xodotɔ etɔn lɛye ɖɔ: Ani wɛ nyɔ ovi gbɛtɔ tɔn lɔ nyi, wɛ omɛ lɛye nɔ ɖɔ? ¹⁴ Ye ɖɔ ni-i ɖɔ: omɛ ɖe lɛye nɔ ɖɔ ɖɔ yɔ bɛ bo nyi Jaan omɛ nylɔ do otɔ mɛ tɔ lɔ; omɛ ɖe lɛye ka nɔ ɖɔ ɖɔ yɔ bɛ bo nyi Elii, omɛ bu-e ka nɔ gɔ ɖɔ yɔ bɛ bo nyi Jelemi, alo ɖɔɖayiɖɔto Mawu tɔn ɖe. ¹⁵ Jesu ka kanse xodotɔ etɔn lɛye ɖɔ: Mye ɖe mɛ wɛ un nyi wɛ mi nɔ ɖɔ? ¹⁶ Simɔ xeni nɔ gɔ nyi Piyɛ ka ɖɔ na Jesu ɖɔ: Yɔ wɛ nyi Klisi Mawu gbɛɖe-gbɛɖe lɔ we vi. ¹⁷ Wɛ Jesu yi oxo bo ɖɔ na Piyɛ ɖɔ: Nyɔnanɔ wɛ a nyi Simɔ, ovi Jonasi tɔn ɖo gbɛtɔ mɛ ɖe onu nɛ lɔ xɔ xlɛ we gɛ, e ma ka nyi ohun kpo gbaza tɔwe lɛye kpo wɛ ɖe sɔ xlɛ we gɛ, vɔ atɛye xeni le sɛxwe lɔ wɛ ɖe-e sɔ xɔ xlɛ we. ¹⁸ Odin ma ɖɔ na we: Piyɛ wɛ nyikɔ tɔwe nɔ nyi, tin e mɛ etɔn wɛ nyi okpɛn, wɛ okpɛn nɛ lɔ ji wɛ na sɔ agun ce sɔ xɔ flɔn, wɛ oku we hɔnhlɔn ma kpego na wa onu ti ni gɛ. ¹⁹ Na bɛ axɔluɖuto sɛxwe tɔn lɔ we cavi lɛye do alɔ mɛ na we; wɛ onu ɖekpokpwe xena e na bla le anyizanji fi, na nyi bibla le sɛxwe tomɛ; wɛ onu ɖekpokpwe xena a na gɔ trun le anyizanji lɛye na gɔ nyi trun-trun le sɛxwe tmɛ. ²⁰ Enɛ godo, Jesu do osɛn na xodotɔ etɔn lɛye ɖɔ ye ni bo nɔ kpɔn ɖɔ na omɛ ɖe ɖɔ mye bɛ bo nyi Klisi lɔ gɛ ²¹ Bɛ sɔn ohwe e nɛ nu, wɛ Jesu jɛ ɖiɖexlɛ xodotɔ etɔn lɛye ji ɖɔ mye bo ɖo na yi Jeluzalɛmu, wɛ otomɛxo ye kpodo Mawu we avɔsantɔ ɖexo lɛye kpo osɛnkplan-omɛtɔ lɛye bo na do aya susu na mye, a bo hu mye, vɔ, le azan atɔn gɔ lɔgbe, Mawu bo na fɔn mye sɔn oku. ²² Wɛ Piyɛ wa yɔ Jesu do ovo bo jɛ onu gbɛ ni-i ji bo ɖɔ: Mawu ni nɔ kpɔn ɖi ke gɛ Aklunɔ, onu lemɔha tɔn ma ja jɔ do jiwe kpɔn gbeɖe gɛ. ²³ Jesu ka kpan nukɔn tɔ Piyɛ, bo ɖɔ ni-i ɖɔ: Bu do-un lɛgba! omɛ dɔndo onu nyinyla mɛtɔ wɛ a nyi, ɖo ayixa tɔwe ma sɔgbe xa ojlo Mawutɔn gɛ, gbɛtɔ we ayixa wɛ a ɖo. ²⁴ Jesu ka ɖɔ na xodotɔ etɔn lɛye ɖɔ: Na omɛ ɖe le din na xodo-un, e ɖo na gbɛ okɔ sɔn eɖe go, a bo ɖiɖa akluzu gban etɔn a bo xodo-un. ²⁵ Ɖo omɛ ɖekpokpwe xeni le din bo na hwlɛn ogbɛ etɔn gan, na bu-i, vɔ omɛ xeni ka na bu ogbɛ etɔn do nyɔ wutu, na hwlɛn ogbɛ etɔn gan. ²⁶ Ale bɔ tɔn wɛ ka le mɛ na omɛ xena ogbɛ lɔ kpokpo na trɔ zun etɔn vɔ ogbɛ etɔn bo na bu do-e? Ani wɛ gbɛtɔ ka na blo do ɖyɔ ogbɛ etɔn na? ²⁷ Ɖo nyɔ ovi gbɛtɔ tɔn lɔ na wa le gigo atɛye tɔn mɛ, nyɔ kpodo, wɛndotɔ etɔn lɛye kpo, bo na wa na ajɔ omɛ lokpo-lokpo na ozɔn xena e wa. ²⁸ Un le ɖɔ na mi le oxojɔxo mɛ ɖɔ: mɛɖe lɛye le mimɛ lɔ fi din tlotlo, bo ma le ku xɔn hwɛkpo na mɔ nyɔ ovi gbɛtɔ tɔn lɔ na ɖu axɔlu le gbɛtɔ lɛye kpokpo nu gɛ.