¹ Hwenɛnu,Elodu xeni ɖu oga le Galile we kansinmɛ,se onu xena Jesu le blo xɔn lɛ,bo ɖɔ na mɛsɛntɔ etɔn lɛye ɖɔ:Jaan omɛnylɔ do osin mɛtɔ lɔ wɛ, ² e fɔn sɔn oku,e wɛzɔn e do ɖo hɔnhlɔn nujiwu biblo tɔn ³ Ɖo Elodu o ɖɔ Jaan te osan bo ɖe ogbe ɖɔ ye ni bo bo wle do ogankpamɛ a bo do caba ni-i,ɖo Elodyasi,Filipu syɛ wutu,Filipu lɔ bo nyi E lodu nɔvye, ⁴ ɖo Jaan le ɖɔ na Elodu xɔn ɖɔ:Omɔ ti ma le na we na a do sɔ-ɛ sɔ xɔ do blo nyɔnu gɛ. ⁵ Vɔ,Elodu din na hu Jaan osan wɛ,amɔ e le ɖi obu na otogun lɔ,ɖo omɛ lɛy nywɛ ɖɔ Jaan bo nyi Mawu we ɖɔɖanyiɖɔtɔ. ⁶ Amɔ gbexegbe na Elodu le ɖu jijigbezan etɔn we oxwe xɔn,Elodyasi we vyɛ nyɔnusi ɖu owe le cɛncɛn mɛ na jonɔ xena Elodu ylɔ lɛye we nukɔn e bo vivi na Elodu, ⁷ na do ɖexlɛ ovi lɔ ɖɔ e bo vivi na miye,e do akpagbe na ovi nyɔnusi lɔ ɖɔ,onu ɖekpokpwe xena a na byɔ-un na na we. ⁸ Dogbɔn nyɔnuvi lɔ onɔ we okplangbe mɛ,nyɔnuvi lɔ ɖɔ na Elodu ɖɔ:Na-un Jaan omɛnylɔdo otɔ mɛtɔ lɔ we ota do gannu gbagbaja mɛ,odin tlolo. ⁹ Xena e ɖɔ lemɔha,agbɔ kpe axɔlu,vɔ xena e ka do akpagbe ni-i,bo o xwle onu lɛye kpokpo le jonɔ lɛye we nukɔn e na gbe ɖɔ ye bo ze ni-i, ¹⁰ Wɛ e sɔ omɛ ɖoxlan ɖɔ ye ni bo yi Jaan we ota wa le gankpamɛ wa ni. ¹¹ Wɛ ye yi gbo ota etɔn do gannu gbagbaja mɛ,do wa na ovi nyɔnusi lɔ wɛ e sɔ xɔ yi na onɔ. ¹² Jaan we xodotɔ lɛye wa sɔ ocɔ etɔn bo yi ɖi,bo ka yi ɖɔ onu xeni jɔ lɔ na Jesu. ¹³ Xena Jesu se ɖɔ Jaan omɛnylɔdo otɔ mɛtɔ lɔ bo ku,e byɔ oɖɔ dahun ɖe mɛ,bo sɔn yi ofi xena omɛɖe ma ja mɔ-ɛ le gɛ,xena omɛ ye se,yetɔn sɔn toxoye mɛ bo zɔn afɔ bo jɛ godo na Jesu. ¹⁴ Xena Jesu wa tɔn le oɖɔ dahun lɔ mɛ,e mɔ gbɛtɔ ahwankpɔ ɖe lɛye,onu yetɔn bla wu ni-i wɛ egbɔ azɔn na azɔnnɔ xeni le ye mɛ lɛye. ¹⁵ Xena hwedo do,xodotɔ Jesu tɔn lɛye wa sɛ kpɔ-ɛ bo ɖɔ ni-i ɖɔ:Ofi xena mi le din lɔ,ma sɛkpɔ gletoxo ti gɛ,ozan ɖiye ka le do xɔn,gbɔ ɖe ogbe na ahwankpɔ lɔ na ye a yi din onu ɖe ɖu le gletoxo lɛye mɛ. ¹⁶ Jesu ka ɖo e go na ye ɖɔ:Ye ma ɖo na sɔn lemɔha gɛ,miye tesu mi na onuɖuɖu ye-e. ¹⁷ Xodotɔ lɛye ka ɖɔ ni-i ɖɔ:Kpɔnnɔ atɔɔn kpodo ohwe awe kpo jɛn le mi si. ¹⁸ Jesu ka ɖɔ na ye ɖɔ:Miye ze ye do wa na-un. ¹⁹ Wɛ e ɖe ogbe na omɛ lɛye,wɛ ye flɔn ogbe lɛye ji,wɛ e sɔ kpɔnnɔ atɔɔn lɛye kpodo ohwe awe lɛye kpo,bo kpɔn oji bo do okpɛ na Mawu,e nɛ godo e kan kpɔnnɔ lɛye,bo bɛ na xodotɔ etɔn lɛye,wɛ ye ma na omɛ lɛye. ²⁰ Ye mɛ lɛye kpokpo ɖu onu,bo gɔ dɔgo wɛ ye ma kpli onu xeni kpo lɔ,wɛ e gɔ jaxwi wyawe. ²¹ Omɛ xeni ka ɖu onu lɛ lɔ ka yi gbɛtɔ akpo atɔɔn(5000),ye ka ma xlɛ nyɔnusi lɛye kpodo vikpɛvu lɛye kpo do ye mɛ gɛ. ²² E nɛ godo tlolo,Jesu ɖɔ na ahwanvu etɔn leye ɖɔ,hwexenu na na le ɖe ogbe na omɛ xe lɛye xɔn,wɛ ye na do le sɔn yi oxwe gbe xɔn,miye mi byɔ oɖɔ dahun lɔ mɛ,a bo sɔn yi akpa ɖiyɛ xwe. ²³ Xena Jesu ɖe ogbe na omɛ lɛye wɛ ye bo sɔn vɔ,e wɛ yi xlɛ oso ɖe ji bo na do xo oɖɛ,ozando wɛ e kpo eyɔ lokpo nɔ ge-e le flɛn. ²⁴ Oɖɔ dahun lɔ bo ka le dindɛnnu voo,osin bo le gba kɔn do ohun lɔ go xɔn taŋu,ɖo e le kpe jɛhɔn. ²⁵ E wɛ le zangan ɛnɛ mɛ,Jesu zɔn zɔnlin gbɔn oxu lɔ ji,bo do le yi ye de xɔn. ²⁶ Xena xodotɔ etɔn lɛye mɔ-ɛ,e bo le zɔn zɔnlin gbɔn oxu lɔ ji,ayixa yetɔn gbado wɛ ye le ɖɔ xɔn ɖɔ:Kutɔ ɖiye mi le kpe xɔn mɔ!Wɛ obu jɛ ye ji,ye bo bɛ axwa. ²⁷ Jesu ka ɖɔ na ye hɔnlokpo ɖɔ:Mi kpan akɔn,nyɔ wɛ,mi nɔ kpɔn ɖi obu gɛ! ²⁸ Piyɛ ka ɖɔ na Jesu ɖɔ:Aklunɔ e nyi yɔ jan wɛ oxojɔxo,bo ɖe ogbe na-un na ma kpe we le otɔ lɔ ji. ²⁹ Wɛ Jesu ɖɔ ni-i ɖɔ:Wa! Piyɛ ka tɔn le oɖɔ dahun lɔ mɛ,bo jɛ zɔnlin zɔngbɔn otɔ lɔ ji bo na do yi Jesu de. ³⁰ Vɔ,xena Piyɛ mɔ dɔ jɔhɔn lɔ bo le syɛn do e ji xɔn,obu jɛ e ji,wɛ e jɛ zizyɔ ji,bo do axwa bo ɖɔ:Aklunɔ hwlɛn-un gan! ³¹ Hɔnlokpo,Jesu dlɛn alɔ,bo hɛn e go bo ɖɔ ni-i ɖɔ:Onuɖiɖi ovunɔ,ani wutu wɛ zɔn a do xo onu kpɔn? ³² Wɛ ye byɛ oɖɔ dahun lɔ mɛ,wɛ jɛhɔn lɔ ɖo te. ³³ Omɛ xeni le oɖɔ dahun lɔ mɛ lɛye wa jɛ oklo do nukɔn na Jesu bo ɖɔ:Mawu we ovi wɛ anyi xonugbo. ³⁴ Xena ye da sa otɔ lɔ vɔ,ye wa yi jɛ oto Jenɛzalɛti tɔn mɛ. ³⁵ Omɛ xeni ka le flɛn le lɔ ka mɔ ɖɔ Jesu bɛ bo wa,bo do owɛn ɖoxlan omɛ xeni le oto lɔ kpokpo mɛ,wɛ ye dɔn azɔnnɔ lɛye kpokpo wa na Jesu. ³⁶ Ye bo le fan okwe na Jesu xɔn ɖɔ:Ni bo na miye lɛye ogbe na miye a bo kpo awu etɔn we oto,wɛ azɔnnɔ xeni ɖo alɔ awu etɔn lɛye go lɛ mɔ azɔn hɛn gbɔ.