¹ Le azan nɛ lɔ gbe, Jesu lɛ le oxwe xegbe na e le xɔn bo wa flɔn oxuto. ² Gbɛtɔ wɔbu-wɔbu wa lɛ oto do-e wɛ e gbɔjwɛ bo wɛ flɔn anyi le otɔjihun mɛ. Otogun lɛye bo le otɔ lɔ to. ³ Jesu wa ɖɔ oxo susu na ye gbɔn olo dido ye mɛ. E ɖɔ na ye ɖɔ: E ɖye onu dotɔ ɖe tɔn bo na do wa yi do onu. ⁴ Hwexenu na e le do onu lɔ xɔn nukun ɖe lɛye flɛ jɛ omɔji wɛ oxɛ ye wa bo ɖu ye. ⁵ Nukun ɖe lɛye flɛ jɛ okpɛn mɛ, fi xena okɔ ma le gɛ. Tlololo ye o wu ɖo okɔ lɔ ma yi odo diin gɛ. ⁶ Vɔ xena ohwe wa bɛ hunhun, ye fyɔ sese bo ku ɖo ye ma ɖi okyɔn gɛ. ⁷ Nukun ɖe lɛye flɛ jɛ owunkanmɛ owun lɛye vun bla ye bo hu ye. ⁸ Nukun ɖe lɛye jɛ anyizan ji jɔhun ji. Ye na sinsyɛn wɛ lokpo syɛn kanweko, ɖe syɛn kanɖeko, ɖe bo gɔ syɛn ogban. ⁹ Na omɛ xeni ɖo oto ni se. ¹⁰ Devi Jesutɔn lɛye sɛkpɔ Jesu bo ni-i ɖɔ: Ani wutu wɛ a nɔ do olo bo nɔ do ɖɔ oxo na ye? ¹¹ Jesu yi ogbe bo ɖɔ: Mye wɛ ye na ota ɖagbwɛ na mi a do mɔ nukunnu jɛ onu hwiwla sɛxwetomɛ tɔn mɛ, vɔ ye ma na ye lɛye gɛ. ¹² Ɖo omɛ xeni ɖo, ye na gɔ ni-i do e ji wɛ e na su le esi. Vɔ omɛ xeni ma ɖo gɛ, ye na gɔ yi ovu xeni le esi lɔ. ¹³ E wutu wɛ un nɔ do ɖɔ oxo na ye gbɔn olo dido mɛ, na ye mɔ can, ye ma mɔ gɛ, na ye se can, ye ma se gɛ bo ma do lemɔ nukunnu jɛ onuti mɛ xɔn gɛ. ¹⁴ Do ye wutu wɛ ɖɔdanyiɖɔtɔ Ezayi we oxo wa cicɛmɛ. E ɖɔ: Mi na se, bo ka ma le mɔ nukunnu jɛ e mɛ xɔn gɛ; mi na mɔ kpo nukun mitɔn kpo bo ka ma mɔ gɛ. ¹⁵ Ɖo oji otogun xe tɔn syɛn. Oto yetɔn ku wɛ nukun yetɔn can gba na ye ni nɔ kpɔn do mɔ kpo nukun kpo; a bo se kpo oto kpo; a bo mɔ nukun jɛ e mɛ le oji yetɔn mɛ, a bo ɖyɔ jijɔ na ma nɔ kpɔn do gbɔ azɔn na ye gɛ. ¹⁶ Vɔ mye, nyɔnanɔ wɛ mi nyi ɖo nukun mitɔn lɛye le mɔ onu xɔn, oto mitɔn lɛye can bo le se onu xɔn. ¹⁷ Ma ɖɔ na mi, le oxojɔxomɛ, ɖɔdanyiɖɔtɔ kpo dodonɔ susu jlo na mɔ onu xena mi le mɔ xɔn din co bo ma mɔ gɛ; ye jlo bo na se onu xena mi le se xɔn xe, ca bo ma se gɛ. ¹⁸ Mye, mi ɖo oto olo lɔ we tin e mɛ. ¹⁹ Hwexenu na omɛ ɖe se Mawu we oxo lɔ bo ma mɔ nukunnu jɛ e mɛ gɛ, awovi nɔ wa bo nɔ wa ɖe onu xena ye do do oji mɛ ni-i lɔ sɛ. Omɛ le mɔ hatɔn wɛ nyi omɛ xe ni yi oxo lɔ le omɔ ji. ²⁰ Omɛ xeni yi onukun le okpɛn mɛ, wɛ nyi omɛ xe nɔ se oxo lɔ a bo yi-i hɔnlokpo tolololo kpo aya jijɛ kpo. ²¹ Vɔ, e ma ɖo okyɔn ɖe bo na do lido gɛ. Na vivɛsise alo tagba ɖe wa do oxo lɔ wutu, e nɔ mɔ omɔ gbɔn flɛn a bo jɛ anyi. ²² Omɛ ni yi oxo lɔ le owunjamɛ lɔ wɛ nyi omɛ xe nɔ se oxo lɔ, vɔ linkpɔn kpo ɖɔkun gbɛmɛ fye tɔn lɛye nɔ vunbla oxo lɔ le oji ye tɔn mɛ wɛ oxo lɔ mɔ gɔ na sinsyɛn gɛ. ²³ Omɛ xe nɔ yi oxo lɔ do anyizan jijɔhun lɔ ji, wɛ nyi omɛ xeni nɔ se oxo lɔ a bo mɔ nukunnu jɛ e mɛ. E nɔ na sinsyɛn wɛ lokpo nɔ syɛn kanweko, ɖe kanɖeko, bu nɔ syɛn ogban. ²⁴ Jesu gɔ do do bu na ye bo ɖɔ: Sɛxwetɔmɛ lɔ gɔ ciɖi ogletɔ xeni do ojinukun adodwe do ogle etɔn gbo ha. ²⁵ Vɔ, hwexenu na omɛye le amlɔmɛ, kɛntɔ, etɔn wa ogle lɔ mɛ bo wa do pgbe nyinyla do jinukun lɛye mɛ. ²⁶ Hwexenu na jinukun lɛye wu, bo jɛ sinsyɛn ji, ogbe nyinyla lɛye cangba wu. ²⁷ Ozɔnwatɔ gletɔ lɔ tɔn wa, bo ɖɔ: Oga, a ma do jinukun adodwe do ogle tɔwe lɔ mɛ? A ni wutu ogbe nyinyla ye do le e mɛ? ²⁸ Wɛ edɔ na ye ɖɔ: Kɛntɔ we ozɔn wɛ ozɔnwatɔ lɛye gɔ yi oxo lɔ ɖɔ: A jlo na mi a wɛ yi hɔn ye sɛ wɛɛ? ²⁹ Oga yetɔ ɖo e go bo ɖɔ: O o o, na mi sin ogbe nyinyla lɛye hihɔn gbe, mi na gble ojinukun na un. ³⁰ Mi jo ye do na ye a hɛn kpɔkpɔ kaka do jɛ ojinukun yiya hwenu.Na ojinukun yiya hwenu do, na ɖɔ na ojinukun yatɔ lɛye ɖɔ: Mi hɔn ogbe nyinyla lɛye jɛ nukun, a bo bla ye a bo kpli ye do okpɔ na ye a bi ye le ozo mɛ. E nɛ godo, mi bɛ jinukun lɛye do ava mɛ na un. ³¹ E nɛ godo, Jesu gɔ do olo bu na ye bo ɖɔ: Sɛxwetomɛ ci ɖi onukun ovutintin xena gletɔ ɖe do do ogle etɔn mɛ ha. ³² Onukun nɛ lɔ le we hugan onukun ɖyɛ lɛye sese. Vɔ xena ye wa do-e wɛ e wa wu bo hwɛn, e wa tlɔzun atinsu ɖaxo le ogle lɔ mɛ, kaka oxɛ lɛye nɔ do aɖɔ yetɔnye do alɔ klan lɛye mɛ. ³³ Jesu gɔ do olo bu na ye bo ɖɔ: Sɛxwetomɛ ci di dokɔtinkɛn xena nyɔnusi ɖe sɔ bo kɔn do owɔ nyiya gannu atɔn mɛ ha, owɔ nyinya nɛ lɔ wa lɔn jeke. ³⁴ Jesu nɔ le kpla onu otogun lɔ xɔn gbɔn olo dido mɛ. E mɔ nɔ ɖ oxo ɖe na ye olo ma do gɛ. ³⁵ Lemɔhake wɛ e blo na oxo xena ɖɔdanyiɖɔtɔ o o ɖɔ a do wa cicɛmɛ. E ɖɔ: Na nɔ do olo do ɖɔ oxo na ye, a bo nɔ jla onu xeni le hwihwlatɛn sɔn ogbɛ lɔ we dida hwenu gbɔn na ye. ³⁶ Xena Jesu wa sɔn yi oxwegbe, onukplanvi etɔn lɛye wa sɛkpɔ-ɛ bo ɖɔ ni-i ɖɔ: Ogbe nyinyla lɔ we olo lɔ, tin-i e mɛ na mi. ³⁷ Jesu yi ogbe ɖɔ: Omɛxeni do ojinukun jijɔhun lɔ, ovi gbɛtɔ tɔn wɛ. ³⁸ Ogle lɔ wɛ nyi ogbɛ lɔ. Onukun jijɔhun lɛye wɛ nyi sɛxwetmɛ we vikpɛye, ogbe nyinyla lɛye wɛ nyi awovi we vikpɛye. ³⁹ Kɛntɔ xeni do ogbe nyinyla lɔ, wɛ nyi lɛgba. Onukun yiya lɔ, wɛ nyi ogbɛlɔ we vivɔnu. Ojinukun yatɔ lɛye, wɛ nyi wɛnzangun lɛye. ⁴⁰ E wɛ zɔn ɖi ɖena ogbe nyinyla lɛye nyi kpikpli wɛ ye na do ozo ha, lemɔha wɛ e na nyi ɖo le ogbɛ lɔ we vivɔnu. ⁴¹ Ovi gbɛtɔ tɔn lɔ na wa sɔ wɛnzangun etɔn lɛye ɖoxlan wɛ ye na wa bɛ nyla do kpo nylado nɔ lɛye kpo sɛ le sɛxwetomɛ. ⁴² Bo na wa sɔ ye sɔ flɛn do ozo maci-maci lɔ mɛ, ofi xena avin kpo aɖukun-kun le. ⁴³ Wɛ dodonɔ lɛye na klɛn ɖi ohwe ziza ha le axɔluɖuto yetɔ tɔn mɛ. Na omɛ xena oto le ote na ni se. ⁴⁴ Axɔluɖuto sɛxwe tɔn lɔ gɔ ciɖi dɔkunnu xeni le hwihwla le oglemɛ ha. Omɛ ɖe mɔ-ɛ, bo sɔ-ɛ hwla. Kpo a yajijɛ kpo, e na wa yi sa onu etɔn lɛye sese, a bo xɔ ogle nɛ lɔ. ⁴⁵ Xugan lemɔha, axɔluɖuto sɛxwetɔn lɔ gɔ ciɖi ajɔtɔ xeni le din ojɛ jijɔhun ye bo na xɔ ha. ⁴⁶ Xena e wa mɔ ojɛ kɔbɔ vivɛtɔn, e wayi sa onu etɔn lɛye sese b o xɔ-ɛ. ⁴⁷ Axɔluɖuto sɛxwetɔn lɔ le ɖi oɖɔ xena ye da do otɔ mɛ ha wɛ, e wle ohwe vwe-vwe, e ye xena ye dɔn jɛ aga. ⁴⁸ E nɛ godo, oɖɔdatɔ lɛye flɔn anyi bo can ohwe xeni le ganji lɛye do jaxwi mɛ, vɔ xe ye ni ma le ganji gɛ lɛye, ye sɔ ye flɛn. ⁴⁹ Lemɔha lɔ ke wɛ e na wa nyi le ogbɛ lɔ we vivɔnu. Wɛnzangun lɛye na wa a bo ɖe omɛ jijɔhun do ovo na omɛ nyinyla lɛye. ⁵⁰ Ye na sɔ ye sɔ flɛn do ozo maci-maci mɛ, ofi xena avin kpo adukunkun le. ⁵¹ Be mi ka mɔ nukunnu jɛ onu nɛ lɛye mɛ? onukplanvi lɛye yi ogbe bo ɖɔ: ⁵² Ɛɛn! mi mɔ odo na. Kpoŋu Jesu ɖɔ: Osɛnkplan omɛ tɔ xeni wa tlɔzun onukplanvi, e ciɖi omɛ xeni ɖo oxwe etɔn bo wa ɖe onu yɔyɔ kpo onu xoxo twɛn le ɖɔkunnu etɔn mɛ. ⁵³ Xena Jesu do olo nɛ lɛye vɔ, e lɛ le flɛn lɔ,. ⁵⁴ Bo sɔn yi oto etɔn mɛ, bo jɛ onukpinkplan omɛye ji le sinsɛn xɔmɛ. Omɛ xeni le se onukpinkplan etɔn lɛye nɔ ɖɔ: Bɔ wɛ omɛ xe lɔ hɛn onunyinywɛ xe lɔ kpo onujawu xelɔ kpo sɔn? ⁵⁵ Omɛxe lɔ ɖe, alo e me nyi atin kpatɔ lɔ we vi mɛ? Mali mɛ ka nyi onɔ ɔ? Jaki, Jozɛfu, Simɔ kpo Judasi kpo mɛ ka nyi nɔvyɛ lɛye? ⁵⁶ Nɔvyɛ nyɔnusi lɛye sese ka ma le mi mɛ? Odin, bɔ na wɛ omɛ xe lɔ hɛn onu nɛ lɛye sɔn? ⁵⁷ E nɛ lɔ wɛ zɔn ye ma do ɖi onu ni-i gɛ. A mɔ, Jesu yi ogbe na ye ɖɔ: Ɖɔɖanyiɖɔtɔ ti mɔ nɔ ɖo kpinkpɛn mɛ le oto etɔn mɛ kpo oxwe etɔn gbe gɛ . ⁵⁸ E ma blo onujawu susu le flɛn lo gɛ do onu ma ɖi yetɔn wutu.