¹ Le hwenɛnu, Jesu le gbɔn jinukungle de mɛ le gbɔjwɛzangbe jwufuye tɔn hovɛ ci onukplanvi etɔn lɛye, wɛ ye jɛ oji nukun gbingbɛn ji bo le ɖu xɔn. ² Vɔ xe na Falizi tɔye mɔ lemɔha ye dɔ na Jesu ɖɔ: Kpɔn onukplanvi tɔwe lɛye gba osɛn le gbɔ jwɛzangbe ³ Vɔ Jesu ɖɔ na ye ɖɔ: Be mi ma xlɛ onu xena Davidi blo le hwexenu na hovɛ do ci-i e yɔ kpo omɛ xeye ni kplɛn-ɛ do lɛye kpo gɛ wɛ? Davidi ɖyɛ Mawu we xɔmɛ le ofi xena ye nɔ sɛn Mawu le. ⁴ Ye bo ɖu kpɔnnɔ xena ye do san avɔ na Mawu, vɔ kpɔnnɔ nɛ lɔ, e yɔ bo nɔ do yi ɖu nuɖuɖu xe na kpodo omɛ xeye ni xo do-e lɛye ka ma ɖo acɛ bo na do du zɛgbɔn avɔ santɔ Mawutɔn go gɛ. ⁵ Alo mi ma xlɛ le osɛn wema lɔ mɛ ɖɔ; gbɔjwɛ zangbe, avɔsantɔ Mawutɔn xeye ni nɔ wa ozɔn le Mawu we oxwegbe lɛye nɔ gba we osɛn lɔ co ye mɔ nɔ do ohwɛti na ye gɛ wɛɛ? ⁶ Vɔ ma ɖɔ na mi ɖɔ: Onu xeni hugan Mawu we oxwe lɔ wɛ le ofi e xe. ⁷ Ye wlan do Mawu we oxo lɔ mɛ ɖɔ: Ɖɔŋʔuɖunu kpinkpɔn na omɛ wɛ un le din xɔn, un ma le din avɔsinsan xɔn gɛ. Na mi do mɔ nukunnu jɛ oxo nɛ lɔ mɛ wɛ mi ma le do ohwɛ na omɛ xeye ni ma hu ohwɛ ɖe xɔn gɛ. ⁸ Ɖo ovi gbɛtɔ tɔn wɛ ɖo acɛ do gbɔjwɛzan ji. ⁹ Jesu lɛ le flɛn bo ɖyɛ sinsɛnxɔ yetɔn mɛ. ¹⁰ Mɛɖe ka le flɛn wɛ alɔ etɔn lokpo ku. Falizitɔye na ye na do ɖo omɔ na Jesu, ye le kan Jesu se xɔn ɖɔ: Be osɛn mitɔn ka na ogbe ɖɔ ye ni bo gbɔ azɔn na omɛ le gbɔjwɛzangbe wɛɛ? ¹¹ Jesu yi gbe na ye ɖɔ: Mɛ wɛ le mi mɛ, bo na do lɛngbɔ lokpo gee wɛ lɛngbɔ lɔ flɛ jɛ dotɔ mɛ le gbɔjwɛzangbe wɛ omɛ lɔ ma le ɖe-e tɔn-ɛ le gbɔjwɛzangbe, wɛ omɛ lɔ na xɔn gɛ? ¹² Gbɛtɔ hugan lɛngbɔ hwlanɛmu ɖe be gbɔn osɛn mitɔn mɛ, ye na blo onu jijɔhun le gbɔjwɛzangbe. ¹³ E wɛ Jesu ɖɔ na dahwe lɔ ɖɔ: Drɛn alɔ tɔwe. Dahwe lɔ bo drɛn alɔ etɔn wɛ alɔ lɔ gbɔ ni-i bo sɔgbe ɖi alɔ awegɔ lɔ ha. ¹⁴ Falizitɔ lɛye tɔn le sinsɛn xɔ lɔ mɛ, bo yi okpli do e go, a bo kan ayi do ɖena ye na blo ɖo bo na ɖo hu-i. ¹⁵ Xena Jesu se ɖɔ ye bo le bla ogbe na miye xɔn e lɛ le ofi xena e le lɔ. Omɛ susu ka xodo Jesu wɛ e gbɔ a azɔn na ye omɛ sese. ¹⁶ E nɔ ɖɔ na omɛ xeye na e gbɔ azɔn na lɛye ɖɔ, ye ni bo nɔ kpɔn ɖɔ na omɛti gɛ. ¹⁷ E nɛ, oxo xena ɖɔanyiɖɔtɔ Ezayi ɖɔ na do wa cicɛ mɛ. ¹⁸ Oxo xena Ezayi ɖɔɖanyiɖɔtɔ lɔ ɖye: Mɛsɛntɔ ce xena un can ɖye; wannyinanɔ ce, mɛ xe go na alindɔ ce nɔ ja wa do. Na ze gbigbɔ ce do e mɛ, wɛ e na jla ohwɛ jijwɛ ɖiɖɔ ce na omɛ kpokpo. ¹⁹ E ma le dɔn onu xa omɛɖe xɔn gɛ e ma le do axwa xɔn gɛ, omɛ ɖe ma le se ogbe etɔn xɔn le omɔ ye ji xɔn gɛ. ²⁰ E ma le wɛn okɔn xena ye xa gɛ. E ma le ci ozo xeni o le ci xɔn gɛ kaka do jɛ hwexenu na omɛ kpokpo na xodo osɛn Mawutɔn bo na jɛ nyinyi ji. ²¹ Wɛ omɛsese na ɖo nukun we. ²² E nɛ godo,e kplan omɛ xemɛ na gbigbɔ mawe le ɖe wa na Jesu.Omɛ e nɛ lɔ mɔ nɔ ɖo oxo gbɔɔn bo nɔ mɔ onu cangba gɛ, Jesu gbɔ azɔn ni-i wɛ e mɔ onu bo jɛ oxo ɖiɖɔ ji. ²³ E kpaca togun lɔ kpokpo wɛ ye ɖɔ: E ma nyi Davidi we ovi mɛ nyi xe?. ²⁴ Vɔ xe na Falizitɔye se nujawu xe na Jesu blo lɔ: Bɛluzebulu gbigbɔ mawe lɛ we xɔlu we nyikɔmɛ wɛ Jesu nɔ blo nujiwu le. ²⁵ Xena Jesu ka nyɔ ayixa yetɔn lɛye bo ɖɔ na ye ɖɔ: Axɔluɖuta xe mɛ na gbenɔkpɔ ma le gɛ, gba wɛ e nɔ gba, oxwe xe gbe na gbenɔkpɔ ma le gɛ, gba wɛ e nɔ gba. ²⁶ Na lɛgba ka tɔn ahwan eɖe, e nɔ kankan bo nɔ ma, axɔluɖuta etɔn ma kpego na nɔ ote gɛ. ²⁷ Na Bɛluzebulu we nyikɔ mɛ wɛ un nɔ nya gbigbɔ mawe lɛye le mɛ wɛ na acɛ onukplanvi mitɔn lɛye na ye do le nya gbigbɔ mawe lɛye xɔn? Onukplanvi mitɔn lɛye tesu wɛ na. ²⁸ Vɔ, na e nyi ɖɔ gbigbɔ Mawutɔn wɛ un nɔ zan bo nɔ do nya gbigbɔ mawe be axɔluɖuta Mawutɔn lɔ wa kaka mide. ²⁹ Naɖe wɛ omɛɖe ka na blo a bo yi sunnuglo glegbenu ɖe we oxwegbe a do wa yi bɛ onu etɔn lɛye, na e ma o bla sunnuglo glegbenu nɛ lɔ ɖo anyi hwɛkpo gɛ ɖo? Na e bla-ɛ vɔ, e na bɛ onu xeye ni le oxwe etɔn gbe lɛye. ³⁰ Omɛ xeni ma kpɔ xa-un gɛ, be e bo cite do jiye, na omɛɖe ma le ma ka le kpli omɛ ye xa-un xɔn gɛ, be e bo le nya ye do ogbe xɔn. ³¹ E wɛzɔn un le ɖɔ na mi xɔn ɖɔ: Ye na sɔ onu nyinyla alo acɔn ɖekpokpwe xena ye na kɔn do Mawu go sɔ kɛ gbɛtɔ ye, vɔ omɛ ɖekpokpwe ni na kɔn acɔn do gbigbɔ Mawutɔn go ye ma sɔ xɔ le kɛ xɔn gɛ. ³² Omɛ ni na ɖɔ oxo nyinyla do ovi gbɛtɔ tɔn lɔ go,na mɔ ohwɛ sɔ kɛ,vɔ omɛ ɖekpokpwe xeni na ɖɔ oxo nyinyla do gbigbɔ Mawutɔn go,ma le mɔ ohwɛ sɔ kɛ le ogbɛ e xe mɛ xɔn gbɔɔn a bo do mɔ sɔ kɛ le ogbɛ xeni ja lɔ mɛ can gba gɛ. ³³ Atin ɖagbwɛ, sinsyɛn ɖagbwɛ wɛ e nɔ na,wɛ atin nyinyla lɔ nɔ na sinsyɛn nyinyla;ɖo sinsyɛn atin tɔn wɛ ye nɔ kpɔn bo nɔ nyɔ atin alɔkpa xena e nyi. ³⁴ Jakpata kunkanye,omɛ nyinyla ye wɛ mi nyi,mi na kpego na ɖɔ oxo jijɔhun doo?Ɖo onu xeni gɔ ooji mɛ wɛ onu nɔ ɖɔ. ³⁵ Gbɛtɔ ganji,onu ɖagbwɛ xeni le oji etɔn mɛ e nɔ ɖe tɔn,wɛ gbɛtɔ nyinyla nɔ ɖe onu nyinyla xeni le oji etɔn mɛ tɔn. ³⁶ Ma ɖɔ na mi:hwɛɖɔzangbe oxo ma sɔ gbe xeye na gbɛtɔ ɖɔ sese,ye na jo akɔnŋuta yetɔn. ³⁷ Ɖo oxo ni tɔn le onu tɔwe mɛ wɛ ye na do ɖo kojo na we,e ke wɛ na ɖexlɛ ɖɔ yɔ bo nyi omɛ jijlɔ. ³⁸ E wɛ osɛnkplan-omɛtɔ ɖe lɛye kpo Falizitɔye ɖɔ na Jesu ɖɔ:Onukplan-omɛtɔ,mi jlo ɖɔ a jlɛ onu lokpo na mi,na mia kpɔn. ³⁹ Vɔ Jesu ɖo e go na ye ɖɔ:Jijimɛvi egbetɔn xeye ni nyi omɛ nyinylaye kpo ogbejimavɔ tɔye le din onujijlɛ xɔn,vɔ ɖɔɖanyiɖɔtɔ Jonasi we onujijlɛ jan wɛ mi na mɔ. ⁴⁰ Ɖi ɖena Jonasi blo azan atɔn okle atɔn kpo le dɔmɛ na ohwe ɖaxo lɔ ɖo ha,lemɔha ke wɛ ovi gbɛtɔ tɔn na blo azan atɔn,okle atɔn la anyizan gɔ ɖo. ⁴¹ Le ohwɛ dida zangbe,Ninivutɔ lɛye na cite do jijimɛvi xe lɛye ji,a bo da ohwɛ na ye,ɖo xena ye se Mawuxo xena Jonasi ɖɔ,ye ɖo lɛvɔjɔ,vɔ omɛ xeni le fi xe hugan Jonasi. ⁴² Le ohwɛɖɔ zangbe,nyɔnusi xeni ɖu xɔlu osan le saba we kansinmɛ,na cite do jijimɛvi xe lɛye ji a bo da ohwɛ na ye,ɖo kansin dindɛnnu tɔn ye mɛ wɛ e sɔn bo do wa se onunyinywɛ we oxo Salomɔtɔn,vɔ omɛ xeni le fixe hugan Salomɔ. ⁴³ Na gbigbɔ mawe,tɔn le mɛɖe mɛ,e nɔ wayi dan gbɔn gbetotlo mɛ xɔn,a bo do din ofi xena e na mɔ gbɔjwɛ le,vɔ e mɔ nɔ mɔ gɛ. ⁴⁴ E nɔ ɖɔ:Na gɔ lɛ okɔ sɔn yi oxwe ce gbe xena un sɔn,na e lɛkɔ,e nɔ mɔ o²xwe lɔ le toto wɛ e nɔ le ziza. ⁴⁵ Na e mɔ-ɛ ɖo lemɔha,e nɔ wa yi kplan gbigbɔ mawe canwe xeye ni nyla hugan-ɛ ye bɔ do e ɖe go,ye nɔ ɖyɛ oxwe lɔ gbe,a bo jɛ agban do flɛn,na do wa,vɔ enu, omɛ nɛ lɛ lɔ we ninɔmɛ nɔ gɔ nyla hugan osan tɔn. lemɔha ke wɛ e na nyi na jijimɛvi nyinyla egbetɔn xe lɛye. ⁴⁶ Hwenu xe na Jesu ie ɖɔ oxo na togun lɔ xɔn, onɔ kpo onɔvyɛ ye kpo wa bo le gaji, bo jlo na ɖɔ oxo ni-i. ⁴⁷ E wɛ mɛde ɖɔ na Jesu ɖɔ: eɖye anɔwe kpodo anɔwevi lɛye kpo le gaji bo jlo na ɖɔ oxo na we. ⁴⁸ Vɔ Jesu ɖɔ na omɛ xeni ɖɔ oxo ni-i ɖɔ: mɛ wɛ nyi anɛye?, mɛ wɛ nyi anɛyevi lɛye? ⁴⁹ Ewɛ Jesu drɛn alɔ do xlan ahwanvi etɔn lɛye bo ɖɔ: omɛ xe ni nyi anɛye kpo anɛyevi lɛye kpo ɖiye. ⁵⁰ Ɖo omɛ ɖekpokpwe xe ni le sɛxwetomɛ lɔ tɔn wɛ nyi anɛyevi sunu, anɛyevi yɔnnu kpo do anɛyevi si kpo.