¹ Jesu yɔ devi etɔn wyawe lɛ,bo na ye hɔnhlɔn kpodo acɛ kpo,na ye na do nya gbigbɔ mawe lɛ,bo na gɔ do gbɔ azɔn na azɔn lɛye. ² E sɔ ye ɖoxlan,na ye na jla axɔsuɖuta Mawu tɔn we oxo,bo gbɔazɔn na azɔnnɔ lɛ. ³ Jesu ɖɔ na ye ɖɔ:"Mi nɔ kpɔn hɛn onuti na tomɛ yiyi mitɔn lɔ gɛ:mi nɔ kpɔn hɛn okpogɛ,sakivi gɛ,onuɖuɖu gɛ,kɔbɔ gɛ,mɛɖe ni nɔ kpɔn ka hɛn awu a we gɛ. ⁴ Na mi byɔ oxwe ɖekpokpwe gbe,mi nɔ flɛn kaka a do lɛ leo oto lɔ mɛ. ⁵ Wɛ omɛ xeni ma yi mi lɛ gɛ,na mi ja tɔn le oto lɔ mɛ,mi xuxu afɔ kɔ mitɔn lɛ ɖo ofi lemɔha tɔn,ɖi ta nyi ɖi josido kunuɖiɖe tɔn do ye go ha." ⁶ Wɛ xwedotɔ Jesu tɔn lɛ, sɔn yi gletoxo lɛ mɛ,bo le jla owɛnɖagbe lɔ,bo gɔ le gbɔ azɔn na omɛ le fi lɛ kpokpo. ⁷ E ɖye,Elodu axɔlu lɔ se onu xeni le jɔ lɛye sese kpo,wɛ e caka ɖo mɛɖe lɛ nɔ ɖɔ Jaan omɛ nylɔ do osin mɛtɔ lɔ bɛ bo fɔn sɔn oku. ⁸ Mɛ ɖe lɛ nɔ gɔ ɖɔ Eli bɛ bo lɛkɔ do wa, alo ɖɔɖayiɖɔtɔ xoxo lɛ bɛ bo g ɔ lɛ okɔ do wa. ⁹ Elodu ka ɖɔ:"Un ka gbo ota na Jaan ma,mɛ ka gɔ nyi omɛ xena un gɔ le se onu lemɔha tɔn lɛye do e go?"Wɛ Elodu le din omɔ bo na mɔJesu. ¹⁰ Hwenuena omɛ xena uye sɔ ɖoxlan lɛye e wa,ye ɖɔ onu xena ye-e blo lɛye wa,ye ɖɔ onu uxena ye-e blo lɛye sese kpo na Jesu.Wɛ Jesu dɔn ye do sɔn yi Bɛtisayida we oto mɛ. ¹¹ Xena otogun lɔ se oxo nɛ lɛye -e,ye xo do Jesu,wɛ Jesu yi ye bo jɛ axɔlu ɖuto Mawu tɔn we oxo lɔ ɖiɖɔ na ye ji,bo nɔ gbɔ azɔn na omɛ xeni le din azɔn hɛngbɔ. ¹² Xena ozin le cɔn xɔn,xwedotɔ Jesu tɔn wyawe lɛ wa e de bo le ɖɔ:"Nya togun lɔ na ye a yi gletoxo xeni lɛto do mi lɛye mɛ,na ye na do ɖu onu ,ɖo mi le ogbe tlo-tlo mɛ. ¹³ Amɔ Jesu ɖɔ na ye ɖɔ:"Miye mi na ye onuɖu ɖu na ye a ɖu.Amɔ ye bo ɖɔ ni ɖɔ:"Kpɔnnɔ atɔɔn,ohwe awe jɛn wɛ mi ɖo,alo mi a yi lxɔ onuɖu ɖu na gbɛtɔ ahwankpɔ xe lɛ." ¹⁴ Amɔ sunnuglo mɛxo akpo atɔɔn(5000) wɛ le ofi lɔ.E ɖɔ na xwedotɔ etɔn lɛye ɖɔ:"Mi sɔ ye sɔ flɔn anyi sɔnu-sɔnu,a bo ma ye do kanɖe awo." ¹⁵ Wɛ ye bo blo do lemɔha lɔ,wɛ ye mɛ lɛ kpokpo flɔn anyi. ¹⁶ Jesu sɔ kpɔnnɔ atɔɔn lɔ kpo ohwe awe lɔ kpo,bo kpɔn oji bo do okpɛ na Mawu bo wɛn ye do,bo sɔ na xwedotɔ etɔn lɛ ɖɔ ye ni bo ma na togun lɔ. ¹⁷ Otogun lɔ kpokpo ɖu,bo gɔ dɔgo wɛ jaxwi wyawe gɔ -gɔ. ¹⁸ Jesu le xo oɖɛ le gbelokpo, wɛ xwedotɔ etɔn lɛ bo le akpa ni-i wɛ e le kan oxo se ye ɖɔ:"Mɛ wɛ un nyi wɛ ye nɔ ɖɔ?" ¹⁹ Ye yi ogbe bo ɖɔ ni-i ɖɔ:"Omɛ lɛye nɔ ɖɔ yɔ bo nyi Jaan omɛ nylɔ do osin mɛtɔ lɔ bɛ yɔ bo nyi,mɛɖe lɛ nɔ ɖɔ yɔ bo nyi Eli,mɛ ɖe lɛ nɔ gɔ ɖɔ yɔ bo nyi ɖɔɖanyi ɖɔtɔ xoxo xeni fɔn sɔn oku lɛ." ²⁰ Jesu le ɖɔ na ye ɖɔ:"Mɛ wɛ unu nyi wɛ mye nɔ ɖɔ?"Piyɛ yi gbe ɖɔ:"Yɔ wɛ nyi Klisi Mawu tɔn." ²¹ Amɔ e gbɛ na ye titeŋugbe ɖɔ ye ni-i nɔ kpɔn ɖɔ oxo lemɔha tɔn na omɛ ti gɛ. ²² E bo gɔ ɖɔ na ye ɖɔ:"Ovi gbɛtɔ tɔn lɔ ɖo na ɖu aya.Oto mɛxo,Mawu we avɔsantɔ ɖaxoɖaxo lɛ kpodo osɛnkplan omɛtɔ lɛye na gbɛ,ye na hu-i amɔ ule azan etɔn gɔ lɔ gbe,e na fɔn sɔn oku." ²³ Jesu bo ɖɔ na ye mɛ lɛ kpokpo ɖɔ:"Na omɛ ɖe na xo do-un,e ɖo na gbɛ kɔ sɔn eɖe go,a bo kɔ atinsoga etɔn le ayihɔngbe -ayihɔngbe a bo xo do-un. ²⁴ Ɖo omɛ ɖekpokpwe xeni na hwlɛn ogbɛ etɔn gan na bu-i,amɔ omɛ xeni na bu-i do nyɔ wutu na hwlɛn ogbɛ gan. ²⁵ Na omɛ ɖe ɖo dɔkun gbɛmɛ fye tɔn lɛye sese kpo bo ka bu ogbɛ etɔn,a le bɔtɔn wɛ e gɔ mɔ le mɛ. ²⁶ Omɛ ɖekpokpwe xeni na ku un nya na nyɔ kpo oxo ce lɛ kpo,ovi gbɛtɔ tɔn can na ku un nya ni-i le hwenuena e na wa le gigo etɔn mɛ kpo gigo otɔ lɔ tɔn kpo mɛ gba. ²⁷ A mɔ,le oxojɔxo mɛ,omɛ ɖe lɛye ma le ku le mimɛ hwɛkpo na do mɔ axɔlu ɖuta Mawu tɔn gɛ. ²⁸ E wa e mɛ le azan cantɔn gbe godo,hwenuena Jesu ɖɔ oxo etɔn lɛye vɔ,e dɔn Piyɛ,Jaan kpo Jaki kpo do yi oso lɔ ji na ye na do yi xo oɖɛ. ²⁹ Hwenuena Jesu le xo oɖɛ lɔ,nukun mɛ etɔn ɖyɔ wɛ awu xeni le okɔ ni-i lɔ tlɔ zun wewe ɖi kploba ha. ³⁰ Xena Jesu le xo oɖɛ lɔ,Mɔyizi kpo Eli kpo wa e de. ³¹ Omɛ awe lemɔha tɔn lɛye zɔn gigo ɖaxo ɖe mɛ.Ye le ɖɔ na Jesu ɖɔ e bo na wa ojlo Mawu tɔn le Jeluzalɛmu. ³² Le ogan xixo e nɛ mɛ Piyɛ kpo Jaan kpo Jaki le amlɔn mɛ.Amɔ hwenuena ye mɛ atɔn lɛye wa fɔn sɔn amlɔn yetɔn mɛ,ye mɔ gigo Jesu bo mɔ Eli kpo Mɔyizi kpo le akpa etɔn. ³³ Hwenuena Mɔyizi kpo Eli kpo le Jesu de,Piyɛ ɖɔ ni-i ɖɔ:"Cica,fye na mi,le xe e nyɔ,mi na blo zava atɔn,lokpo na nyi tɔwe,lokpo na Mɔyizi ,lokpo na Eli."Amɔ Piyɛ ma nyɔ oxo xena e ɖɔ xɔn gɛ. ³⁴ Hwenuena ye le ɖɔ oxo nɛ lɛye,akplɔ-kplɔ ɖaxo ɖe wa cɔn ye-e wɛ obu jɛ ye ji. ³⁵ Ogbe ɖe ɖi sɔn akplɔ-kplɔ lɔ mɛ ɖɔ:"Omɛ xe wɛ nyi ovi ce xena un sɔ mi ɖo oto wi-i." ³⁶ Hwenuena ogbe lɔ ɖo te,Jesu lokpo nɔ wɛ le ofi lɔ wɛ onu e nɛ lɛye, xena Jesu mɔ onu e nɛ lɛye e ma ɖɔ na omɛ ti gɛ. ³⁷ Le ayihɔngbe etɔn,xena e jɛ te le oso lɔ ji,gbɛtɔ ahwankpɔ ɖe lɛye kpe ye-e. ³⁸ Wɛ dahwe lokpo le otogun lɔ mɛ bo daxwa bo ɖɔ:"Cica kɛnklɛn gbɔ azɔn na ovi na ɖo e yɔ lokpo nɔ ge-e wɛ un ɖo. ³⁹ Hwe ɖe lɛ nu gbigbɔ lɔ nɔ jɛ e ji wɛ e nɔ do axwa , a bo le hunhun xɔn le ote,odɛ bo nɔ le gbɔn onu ni xɔn,gbigbɔ lɔ bo nɔ do vivɛ sise ni-i ta-un. ⁴⁰ Un fan okwe na xwedotɔ tɔwe lɛye ɖɔ ye ni-i bo gbɔ azɔn lɔ ni-i,amɔ ye ma kpego gbɔ azɔn lɔ ni-i gɛ." ⁴¹ Jesu yi ogbe bo ɖɔ na ye ɖɔ gbɛtɔ onumaɖitɔ lɛye mi,kaka jɛ hwetɛnu wɛ mi na nɔ okɔ ji na-un jɛ.Idɔn ovi tɔwe wa na-un." ⁴² Xena dahwe lɔ we ovi ja,gbigbɔ mawe lɔ ze jɛ anyi do ayizanmɔ,bo hunhun-i kpo adan kpo.Amɔ Jesu ɖegbe do gbigbɔ lɔ,bo gbɔ azɔn ovi lɔ bo sɔ-ɛ na otɔ. ⁴³ Agbadido Mawu tɔn lɔ kpaca ye mɛ lɛye kpokpo.Onu xena Jesu blo lɔ le kpaca ye mɛ lokpo-lokpo,wɛ Jesu ɖɔ na xwedotɔ etɔn lɛye ɖɔ: ⁴⁴ "Miye oxo xeni byɔ tomɛ na mi ganji ɖo ovi gbɛtɔ tɔn o ye na jowe do alɔ mɛ na gbɛtɔ lɛ." ⁴⁵ Amɔ, ye ma le mɔ do na-a oxo xena e le ɖɔ lɛ gɛ.Mawu sɔ hwla do ye na ye ni nɔ kpɔn do mɔ nukunnu jɛ e mɛ gɛ, wɛ ye mɛ ti ka ma gɔ gla bo kan oxo se gɛ. ⁴⁶ Xodotɔ lɛye bo jɛ onu dɔn ji le yeɖe mɛ ji,a do nyɔ omɛ xeni nyi omɛ ɖaxo lɔ le ye mɛ. ⁴⁷ Xena Jesu nyɔ susu xeni le oji yetɔn lɛye mɛ,e dɔn vikpɛvu lokpo bo sɔ do akpa etɔn. ⁴⁸ Jesu bo ɖɔ na ye ɖɔ:"Omɛ ɖekpokpwe xeni na yi vikpɛvu xe le nyikɔ ce mɛ,nyɔ tesu wɛ e yi,wɛ na omɛ ɖe gɔ yi-un be omɛ xeni sɔ-un sɔ ɖoxlan wɛ e nyi.Ɖo omɛ ɖekpokpwe xeni yi onu vu le mimɛ na wa tlɔ zun onu ɖaxo. ⁴⁹ Jaan bo yi oxo bo ɖɔ na Jesu ɖɔ:"Cica,mi mɔ dahwe ɖe,e bo le nya gbigbɔ mawe le nyikɔ tɔwe mɛ xɔn,mi bo le din na gbɛ ni-i ɖo e ma nyi xwedo tɔ tɔwe ɖi miye ha gɛ." ⁵⁰ Amɔ,Jesu bo ɖɔ na ye-e ɖɔ:"Mi nɔ kpɔn gbɛ ni gɛ,ɖo omɛ xeni ma sɔ ota mi gɛ,omɛ mitɔn wɛ e nyi." ⁵¹ Vɔ,hwexenu na Jesu na sɔn yi Mawu de,le sɛkpɔ e bo sɔ gbeta bo na do yi Jeluzalɛmu. ⁵² Jesu bo sɔ owɛn dotɔ ye ɖoxlan,na ye an jɛ nukɔn ni-i.Owɛn dotɔ lɛye bo jɛ omɔ ye ɖyɛ Samalitɔye we oto mɛ,a do blo nɔtɛn ɖo a yi ni-i. ⁵³ Vɔ,oto lɔ mɛ tɔye ma yi-i gɛ,ɖo e le sɔn yi Jeluzalɛmu we oto mɛ xɔn. ⁵⁴ Xena xodotɔ Jesu tɔn lɛye mɔ do lemɔha, Jaan kpo Jaki kpo,ye ɖɔ na Jesu ɖɔ:"Cica, a jlo na mi a ylɔ ozo sɔn oji wɛ e na fyɔ ye wɛɛ. ⁵⁵ Amɔ,Jesu gbɛ na ye-e. ⁵⁶ Odin ye lɛ le flɛn bo sɔn yi gletoxo obu mɛ. ⁵⁷ Hwexenu na ye le omɔ lɔ ji do le sɔn xɔn,omɛ lokpo ɖɔ ni ɖɔ:"Na xodo we gbɔn ofi lɛye kpokpo." ⁵⁸ Vɔ,Jesu yi ogbe ni-i ɖɔ:"Owɔ lɛye ɖo xemɛ na ye nɔ mlɔ,oxɛ lɛye bo ɖo adɔ yetɔn xemɛ na ye nɔ nɔ,amɔ ovi gbɛtɔ tɔn lɔ ma ɖo ofi xena e na sɔ ota sɔ xɔ ɖo gɛ." ⁵⁹ Jesu bo ɖɔ na omɛ ɖe ɖɔ:"Xodo-un."Vɔ, omɛ lɔ bo ɖɔ ni-i ɖɔ:"Ɖe omɔ na-un na ma wa yi ɖi atɛye keŋu hwɛkpo." ⁶⁰ E wɛ,Jesu ɖɔ ni-i ɖɔ:"Jo omɛ kuku lɛye do n aye a ɖi ye ɖe lɛye,yɔ wa yi jla Mawu we axɔluɖuta lɔ we oxo." ⁶¹ Omɛ bu bo gɔ ɖɔ na Jesu ɖɔ:"Aklunɔ,nyɔ na xodo we,vɔ ɖe omɔ na-un na ma wa yi byɔ ogbe le oxwegbe keŋu hwɛkpo." ⁶² Jesu bo ɖɔ ni-i ɖɔ:"Omɛ ɖekpokpwe xeni le lɛ ogle xɔn,vɔ bo gɔ le kpɔn godo xɔn, e ma jɛ xa Mawu we axɔluɖuta gɛ."