¹ Le enɛ godo, Jesu can xwedotɔ kanɖegban bu ye bo ɖo ye ɖoxlan awe-awe le oto xe mɛ na etesu ɖo na yi. ² E ɖɔ na ye ɖɔ:"Ojinukun ɖiɖe lɔ su,vɔ ozɔnwatɔ ma su gɛ,mi fankwe na ogletɔ lɔ na ni a sɔ ozɔnwatɔ ɖoxlan ogle lɔ mɛ. ³ E ya!Mi sɔn un sɔ mi ɖoxlan ɖi ogbɔye ha le kini-kini ye mɛ. ⁴ Mi nɔ kpɔn sɔ kɔbɔ alo saki kpo fɔkpa gɛ,a bo nɔ kpɔn do ogbe na mɛɖe le omɔjoi gɛ o. ⁵ Le oxwe ɖekpokpwe xe gbe na mi na ɖyɛ,mi ɖɔ jɛnukɔn ɖɔ:"Fifa kɔn do mi ji." ⁶ Na fifa we omɛ ɖe le flɛn,be fifa mitɔn ni bo nɔ xa-ɛ,vɔ na e ma nyi le mɔ ha gɛ,fifa lɔ ni gɔ lɛkɔ wa mide. ⁷ Mi nɔ oxwe nɛ lɔ gbe a bo ɖu onu,a bo nu onu xena ye na na mi lɛye ɖo ozɔnwatɔ na ɖu ozɔn xeni le wa xɔn we onu.Mi nɔ kpɔn dangbɔn xwegbe-xwegbe gɛ. ⁸ Na mi ɖyɛ toxo ɖe mɛ wɛ ye yi mi,mi ɖu onu xena ye na xwlemi ⁹ mi gbɔ azɔn na azɔnnɔye xeni le flɛn lɔ.Mi ɖɔ na ye ɖɔ:"Sɛxwe tomɛ lɔ sɛkpɔ mi". ¹⁰ Amɔ fiɖekpokpwe xena mi na yi le toxo lɔ mɛ wɛ ye ma yi mi gɛ,mitɔn le oto lɔ mɛ a bo jɛ dogbaji a bo ɖɔ: ¹¹ "Mi xuxu okɔgudu oto mitɔn tɔn xeni le afɔ mitɔn ye doxlan mi!A mɔ mi nyɔ-ɛ ɖɔ sɛxwe tomɛ lɔ o sɛkpɔ." ¹² Jesu gɔ ɖɔ na ye ɖɔ,le ohwɛdida we azangbe,oto dindɔn toxo nɛ lɔ tɔn na hugan Sodɔmu we oto dindɔn. ¹³ Ahelu na mi Kolazɛn tɔ ye! Ahelu na mi Bɛtizayida tɔye! Na onujawu xeye ni jɔ le mide,do jɔ le Tii kpo Sidɔn kpo wɛɛ,be sɔn xoxo gbɔn wɛ ye na ɖyɔ jijɔ,a bo sɔ dɔkpoye sɔ do a bo flan nyi le zofinmɛ. ¹⁴ E wɛ zɔn le ohwɛɖɔzangbe,oto dindɔn mitɔn na hugan Tiitɔye kpo Sidɔntɔye tɔn. ¹⁵ Yɔ, Kapɛnawumu, a bu-i ɖɔ Mawu na kɔ toxo tɔwe do yi kaka oji wɛɛ?Gbeɖe kpɔn, kaka okutomɛ wɛ e na tintin do yi. ¹⁶ Omɛ xeni ɖo oto mi,ɖo oto nyɔ cangba,omɛ xeni gbɛ mi,gbɛ nyɔ cangba;omɛ xeni ka ɖo gbɛ nyɔ cangba,gbɛ omɛ xeni sɔ-un sɔ ɖoxlan. ¹⁷ Onukplanvi kanɖegban lɛye lɛkɔ wa kpo awajijɛ kpo bo ɖɔ:"Aklunɔ, gbigbɔ mawe lɛye tesu nɔ li ota anyi na mi le nyikɔ tɔwe mɛ. ¹⁸ Jesu ɖo e go na ye ɖɔ"Nyɔ cangba,un mɔ lɛgba wɛ e flɛ sɔn oji ɖi kinklɛn ha. ¹⁹ E ɖye un na mi acɛ na mi na do zɔnzɔnlin gbɔn odan lɛye kpo kekle lɛye kpo ji,bo na gɔ ɖu le hɔnhlɔn kɛntɔ tɔn lɛye ji wɛ onuti ma le wa mi xɔn gɛ. ²⁰ Mi nɔ kpɔn kpɔn ɖɔ gbigbɔ mawe lɛye ooli ota anyi na mi kpowun a do jɔ oji gɛ,vɔ mi jɔ oji toli ɖɔ nyikɔ mitɔn oo nyi winwlan le ogbɛ wema mɛ. ²¹ Le hwenɛlɔnu,gbigbɔ Mawutɔn do awajijɛ na Jesu wɛe ɖɔ:"Oo un do okpɛ na we atɛye,oji kpo anyizan kpo da tɔ,ɖo a hlwa onunyinwyɛ tɔwe lɛye do zinzintɔye kpo onunywɛtɔ lɛye kpo bo wa ɖeye xlɛ onumanywɛtɔ lɛye.Ɛɛn otɔ a jlo ɖɔ ni nyi do lemɔha. ²² "Atɛye sɔ onu kpokpo na-un,wɛ mɛɖe ma nyɔ ovi lɔ zɛgbɔn oṭɔ lɔ go gɛ,mɛɖe ka ma gɔ nyɔ otɔ lɔ zɛgbɔn ovi lɔ kpodo omɛ xena ovi lɔ jlo bo na ɖe-e xlɛ gɛ." ²³ E nɛ godo Jesu kpan nukɔn tɔ devi etɔn lɛye bo ɖɔ na ye lokponɔ ɖɔ:"Nyɔnanɔ wɛ nyi omɛ xeni mɔ onu xena mi le mɔ le odin xɔn. ²⁴ Ɖo ɖɔɖanyiɖɔṭɔ susu kpo xɔluye oo jlo na mɔ onu xena mi le mɔ xɔn,vɔ bo ma kpego mɔ gɛ,ye le din bo na se vɔ bo ma kpego se gɛ." ²⁵ Osɛnkplan omɛ tɔ ɖe yi oxo bo na do do Jesu kpɔn bo ɖɔ:"Cica, a ni ha wɛ na blo bo na do yi sɛxwe?" ²⁶ Jesu yi oxo bo ɖo e go ɖɔ:"A ni wɛ ye wlan do osɛn lɔ mɛ?"A ni ha wɛ mi xlɛ le e mɛ? ²⁷ Osɛnkplan omɛtɔ yi ogbe ni-i bo ɖɔ:"A nyi owan na Mawu tɔwe kpo oji tɔwe kpo,alindɔn tɔwe kpo,susu tɔwe kpo,a bo nyi owan na hatɔwetɔ ɖi yɔ tesu ha" ²⁸ Jesu ɖɔ ni-i ɖɔ:"Ɛɛn, a ɖɔ-ɛ ganji nɔ blo do lemɔha na a nɔ ogbɛ." ²⁹ Vɔ na do ɖexlɛ ye ɖɔ ohwɛ mye tɔn bo jɔ,onukplan omɛtɔ lɔ kan Jesu se ɖɔ:"Mɛha wɛ nyi ohacetɔ lɔ?" ³⁰ Jesu yi ogbe ni-i bo ɖɔ:"Mɛɖe sɔn Jeluzalɛmu bo wa le yi Jeliko xɔn.Na e do le sɔn xɔn, e wɛ ɖyɛ ajotɔye we alɔmɛ,ye xo-e kaka gbɔɔn bo do fɔku wi-i,wɛ e ci beɖe-beɖe,bo bɛ onu etɔn sese. ³¹ Vlavo ɖe kpowun,avɔsantɔ Mawutɔn ɖe gbɔn omɔ lɔ ji,kaka e na mɔ omɛ xe jɛ fɔku lɔe gbɔn azɔge ni-i bo sɔn. ³² Levititɔ lokpo can gbɔn omɔ nɛ lɔ ji bo mɔ dahwe xe jɛ fɔku lɔ gba,e yɔ can gbɔn akpa ni-i bo sɔn. ³³ Vɔ Samalititɔ ɖe can gbɔn omɔ lɔ ji,bo mɔ,bo mɔ omɛ xe jɛ fɔku lɔ.Na e do mɔ-ɛ,onu etɔn ɖu adɔnu ni-i. ³⁴ E sɛkpɔ-ɛ bo bla abi xe le e go lɔ bo kɔn ami kpo vɛn do abi lɔ mɛ.E nɛ godo,e kɔ-ɛ do osɔkɛtɛ etɔn ji bo hɛn-ɛ do yi mɔjiyitɔye we oxwegbe na ye a do kpe do e go ganji. ³⁵ Ayihinhɔngbe etɔn,Samalititɔ lɔ sɔ akwagan awe sɔ na oxwejikpɔntɔ lɔ bo le ɖɔ ni-i xɔn ɖɔ:"E ɖye yi kɔbɔ xe na a do kpedo e go na un ganji.Na e hwe ɖe bo zan do e go,un lɛ okɔ, na su na we. ³⁶ Le ye mɛ atɔn lɛye mɛ,mɛ ha wɛ nyi ohamɛtɔntɔ wɛ a nyɔ-ɛ?" ³⁷ Onukplanmɛtɔ lɔ ɖɔ:"Omɛ xeni ku nublawu na dahwe lɔ wɛ."Jesu ɖɔ ni-i ɖɔ:"Sɔn a bo wɛ blo do lemɔha." ³⁸ Xena Jesu kpo onukplanvi etɔn lɛye le mɔji bo le sɔn xɔn,Jesu wa ɖyɛ gletoxo ɖe mɛ,nyɔnu lokpo xena ye nɔ yɔ ɖɔ Mata bo yi-i do oxwe etɔn gbe. ³⁹ Mata lɔ ɖo nɔvi nyɔnusiɖe wɛ e nɔ nyi Mali.Mali lɔ wa flɔn anyi le akpa na Jesu bo le ɖo oto oxo etɔn xɔn. ⁴⁰ Vɔ Mata jɛ tagba jijɛ ji bo na do yi jonɔ Jesu tɔn.E wa Jesu de bo ɖɔ ni-i ɖɔ:"Jesu,be ɖena anɛyevi jo ozɔn lɛye do okɔ ji na un ɖoo,e ma ɖi onuti na we?Bo ɖɔ ni-i ɖɔ ni bo wa kpedo gwe." ⁴¹ Amɔ, Jesu ɖɔ ni-i ɖɔ:"Mata,Mata jikan le so-e xɔn wɛ a le jɛ tagba do onu susu go xɔn. ⁴² Vɔ ɖe onu lokpo gee wɛ le otaji.Mali sɔ onu adodwe lɔ,wɛ omɛti ma le yi-i le e si xɔn kpɔn gbeɖe."