¹ Jesu le xo ɖɛ gbe lokpo le fi ɖe,devi etɔn lokpo ɖɔ ni ɖɔ:Aklunɔ,kpɔn mi le na ye nɔ xo oɖɛ ɖo ɖi ɖena Jaan kplan xodotɔ etɔn lɛye ɖo. ² Jesu yi oxo bo le ɖɔ na ye xɔn ɖɔ:Na mi le xo oɖɛ xɔn,mi nɔ ɖɔ:Atɛye na nyikɔ tɔwe ni nyi mimɛ,na acɛ kpikpa ni wa. ³ Na mi onuɖuɖu xena mi na ɖu mi ayihɔngbe-ayihɔngbe. ⁴ Sɔ ohwɛ mitɔn lɛye xɔ ke mi,ɖi ɖena miye lɛye can nɔ ze ohwɛ sɔ kɛ miye nɔvi xeni hu ohwɛ do mi lɛye gba.Nɔ kpɔn dɔn mi do tintɛnkpɔn mɛ gɛ. ⁵ Jesu ɖɔ na ye ɖɔ:Mɛ wɛ mi mɛ,wɛ e na ɖo hadwe lokpo,a bo yi e de le ozan xwete,a bo ɖɔ ni ɖɔ:Hadwe hwe kpɔnnɔ atɔn na-un, ⁶ ɖo hadwe ce lokpo wɛ wa bo jonɔ-un,vɔ un ka ma ɖo onuti le xɔmɛ gɛ: ⁷ Wɛ hadwe etɔn xeni le xɔmɛ lɔ yi oxo bo le ɖɔ ni xɔn ɖɔ:Nɔ kpɔn do tagba na-un gɛ.Un o su ohɔn,nyɔ kpo vikpɛ ce lɛye kpo o dɔ amlɔ,un ma kpego na gɔ fɔn a bo gɔ na we kpɔnnɔ lɔ gɛ. ⁸ Un le ɖɔ na mi xɔn,na e ma tlɛ gɔ fɔn bo do na mi kpɔnnɔ lɔ gɛ can ɖo mi yi hadwe etɔn wutu,kpo vivɛnu xena mi le do xɔn lɔ kpo,e na fɔn a bo na mi xena mi le din xɔn lɔ. ⁹ Un gɔ le ɖɔ na mi xɔn:Mi byɔ,wɛ ye na na mi;mi din,mi na mɔ,mi xuxu ye bo na hun na mi. ¹⁰ Ɖo omɛ ɖekpokpwe xeni byɔ e na mɔ,omɛ xeni ka din nɔ mɔ,omɛ xeni ka xuxu ye na hun ni-i. ¹¹ Ovitɔ bɔtɔn ha wɛ le mimɛ,wɛ na ovi etɔn byɔ ohwe wi-i,e na sɔ odan sɔ xɔ ni do ohwe we domɛ? ¹² Alo na e byɔ azin wi-i,e na sɔ hɔnkekle do alɔmɛ ni-i? ¹³ Na mimɛ gbɛtɔ xe nyla co bo nɔ nyɔ onu jijɔhun bo nɔ na vikpɛ mitɔn lɛye,nɛmu-nɛmu wɛ nyi myetɔ xeni le sɛxwe,ma ja na mimɛ xeni na byɛ gbigbɔ mimɛ wi lɛye? ¹⁴ E nɛ godo,Jesu nya gbigbɔ mawe tokunɔ ɖe,hwexenu na gbigbɔ lɔ tɔn,tokunɔ lɔ jɛ oxo ɖiɖɔ,e bo kpaca togun lɔ! ¹⁵ Amɔ mɛɖe lɛye ɖɔ ɖɔ:Gbɔn Bɛlizebulu,axɔvi gbigbɔ mawe lɛye tɔn,mɛ we acɛ wɛ e le nya gbigbɔ mawe lɛye le. ¹⁶ Mɛɖe lɛye le do-e kpɔn ɖɔ ni bo ɖe josido ɖexlɛ miye xeni sɔn oji. ¹⁷ Amɔ Jesu nyɔ susu yetɔn lɛye bo ɖɔ na ye ɖɔ:Axɔluɖuta xeni ma le e ɖe mɛ,e nɔ gba,wɛ oxwe ɖe xeni o ma,e nɔ hɔ. ¹⁸ Na lɛgba tesu ma,naɖe wɛ axɔluɖuto etɔn na nɔ ote ɖo?Ɖo mi nɔ ɖɔ ɖɔ nyɔ bo nɔ nya gbigbɔ mawe lɛye le Bɛlizebulu we nyikɔ mɛ. ¹⁹ Na un le nya gbigbɔ mawe lɛye le Bɛlizebulu we nyikɔ mɛ,a ni mɛ wɛ xodotɔ lɛye na nya ye le?Ɖo e nɛ lɔ wutu ye na yi ohwɛɖɔtɔ mitɔn. ²⁰ Amɔ na un le nya gbigbɔ mawe lɛye gbɔn alɔ Mawutɔn mɛ,be axɔluɖuta lɔ nyi mitɔn. ²¹ Na gbɛtɔ xeni ɖo hɔnhlɔn ɖe hɛn oxwe etɔn gbe,ɖagbwɛ etɔn lɛye le cicɔmɛ. ²² Amɔ na gbɛtɔ xeni gɔ ɖo hɔnhlɔn hugan e yɔ gɔ wa tɔn ahwan wi-i,be e na bɛ onu etɔn lɛye sese kpo. ²³ Omɛ xeni ma le okpɔ xa-un gɛ,e sɔ ta-un,wɛ omɛ xeni ka mɔ nɔ kpli xa-un gɛ na gba do. ²⁴ Xena gbigbɔ mawe lɔ tɔn le dahwe lɔ mɛ,e yi byɛ nɔtɛn xena mɛti ma le gɛ,bo yi gbɔjwɛ,xena gbigbɔ lɔ ma mɔ omɛ xemɛ na e na byɔ gɛ,e ɖɔ:Na gɔ lɛkɔ yi oxwe xegbe na etɔn sɔn. ²⁵ Xena e lɛkɔ wa,e mɔ oxwe lɔ le ziza ye bo to onu lɛye. ²⁶ Wɛ e lɛkɔ bo yi dɔn gbigbɔ mawe canwe xeni gɔ nyla ohun hugan e yɔ,we ye wa nɔ nɔtɛn lɔ.Odin ninɔmɛ mɛnɛ lɔ tɔn na nyla hu,tintantɔn lɔ. ²⁷ Xena e le ɖɔ oxo lemɔha tɔn lɛye,nyɔnusi ɖe do axwa le togun lɔ mɛ bo ɖɔ:Donanɔ wɛ nyi dɔmɛ xeni hɛn we,kpo anɔ xena a nɔ kpo. ²⁸ Amɔ e le ɖɔ ɖɔ:Donanɔ na omɛ xeni nɔ se oxo ce lɛye a bo nɔ hɛn lɛye. ²⁹ Xena togun lɔ le su xɔn,ye jɛ ɖiɖɔ ji ɖɔ:Jijimɛvi e nɛ lɛye,jijimɛvi nyinyla ye wɛ ye nyi.Ye le din josido ɖe,xeni gɔ gbɔn ovo na Jonasi we josido lɔ. ³⁰ Ɖo,lemɔha ke wɛ Jonasi can tlɔ zun josido na Ninivutɔye ɖo,lemɔha lɔ ke wɛ ovi gbɛtɔ tɔn can na tlɔ zun josido na jijimɛvi e xe lɔ ɖo nɛ. ³¹ Axɔsi afɔligbe tɔn lɔ na cite le ohwɛdida zangbe kpodo gbɛtɔ nɛ lɛye kpo a bo da ohwɛ na ye,ɖo ye sɔn ogbɛ lɔ we tonu bo na do se nunywɛ we oxo Salomɔ tɔn,e ɖiye e ka le fi din,omɛ ni hugan Salomɔ. ³² Le ohwɛdida zangbe,Ninivutɔye na cite kpan nukɔntɔ jijimɛvi e nɛ lɛye,a bo da ohwɛ na ye,ɖo xena ye se Mawu we oxo xena Jonasi ɖɔ lɔ,ye ɖyɔ jijɔ,vɔ omɛ xeni le fye,hugan Jonasi. ³³ Jesu gɔ yi e ji na ye, bo ɖɔ mɔsin:Omɛ ɖe mɔ nɔ ta zogbɛn a bo sɔ tɔka xɔ cɔn-ɛ gɛ,vɔ ye nɔ sɔ-ɛ sɔ ɖo onu ji na omɛ xeye ni byɛ ofi lɔ xɔn lɛye a do mɔ weziza etɔn. ³⁴ Nukun tɔwe wɛ nyi zogbɛn na gbaza tɔwe,na nukun tɔwe le ganji,be gbaza tɔwe lɔ sese le weziza mɛ.Vɔ na nukun tɔwe ma le ganji gɛ,be gbaza tɔwe le zinvlu mɛ. ³⁵ E wɛ zɔn,cɔ yɔ ɖe na weziza xeni le yɔ mɛ lɔ ni kpɔn wa tlɔ zun zinvlu gɛ. ³⁶ Na e nyi ɖɔ gbaza tɔwe lɔ sese le weziza mɛ,fi ti ka ma le zinvlu me gɛ,be gbaza tɔwe lɔ kpokpo le weziza mɛ ɖi ɖena zogbɛn nɔ ta do oji kpodo kinklɛn etɔn ɖo ha. ³⁷ Hwexenu na Jesu ɖɔ oxo lɔ,falizitɔ lɛye,ɖe wa yɔ-ɛ ɖɔ ni bo wa ɖu onu xa miye lɛye le oxwe myetɔn gbe.Jesu byɛ oxwe lɔ gbe bo yi tɛnmɛ bo na do ɖu onu. ³⁸ Xena falizitɔ lɔ mɔ ɖɔ Jesu bo ma klɔ alɔ ɖi ɖena walɔ yetɔn byɔ ɖo ha hwɛkpo do jɛ onuɖu ji gɛ;e kpa do-e. ³⁹ E wɛ Aklunɔ lɔ ɖɔ ni ɖɔ:Mi mɛ falizitɔ lɛye mi nɔ klɔ goto na glasin kpo gannu kpo na ye a do mɛ,vɔ oji mitɔn bo gɔ kpo ofɛn kpo danu wiwa kpo. ⁴⁰ Yɛyinɔ ye we mi nyi,omɛ xeni blo goto lɔ ke mɛ blo dɔmɛ lɔ can? ⁴¹ Mi sɔ onu xeni le glasin lɔ mɛ kpokpo sɔ na ayanɔ ye,hwenɛnu onu lɛye kpokpo na nyi onu mime na mi. ⁴² Ahelu na mi falizitɔye,ɖo mi nɔ na maɖo awo ama hwɛnywɛye tɔn matin tɔn kpo hlu kpo tɔn,mi bo gɔ nɔ na maɖo awo oma yetɔn,vɔ mi bo nɔ gɔ ɖe okɔ le onu jijlɔ biblo kpo owanyiyi na Mawu go.E nɛ lɔ we mi ɖo na blo e ka ma nyi mi na do jo onu gbokpwe lɛye can gba do mɛ gɛ. ⁴³ Ahelu na mi falizitɔye,ɖo mi nɔ nyi owan na okpo tintantɔn ji finflɔn le okpli tɛnmɛ mitɔn lɛye,mi bo nɔ gɔ yi owan na ye a do do ogbe na mi kpo sisi kpo le agbaŋugba. ⁴⁴ Ahelu na mi,ɖo mi le yɔdo xena ye ma ɖo josido e go ha gɛ,omɛ ye bo nɔ le gbɔn ye ji xɔn le manywɛ mɛ. ⁴⁵ E wɛ omɛ lokpo le osɛnkplantɔ lɛye mɛ bo ɖɔ ni ɖɔ:Onukplan omɛtɔ,ni a le ɖɔ oxo do lemɔha xɔn be a le zun miye can gba xɔn. ⁴⁶ Jesu bo yi ogbe ni ɖɔ:Ahelu na mi omɛ osɛnkplan omɛtɔ lɛye can!Mi nɔ do agban kpinkpɛn do ota na omɛ ye,vɔ miye tesu ka mɔ nɔ ɖo lɔvi lokpo tesu e go bo nɔ do hɛn ye gɛ. ⁴⁷ Ahelu na mi,ɖo Mawu we ɖɔɖanyiɖɔtɔ xeye na dagbo mitɔn lɛye hu ye,mi nɔ gɔ jla yɔdo yetɔn ye ɖo! ⁴⁸ E nɛ lɔ bo ɖexlɛ ɖɔ miye bo yi ogbe na onu xena ye bo blo lɛye,ɖo ye hu ɖɔɖayiɖɔtɔ lɛye,miye bo nɔ gɔ jla yɔdo yetɔn ɖo. ⁴⁹ Ewɛ zɔn,Mawu do ɖɔ oxo do gbɔn onu nyinywɛ etɔn mɛ ɖɔ:Na sɔ ɖɔɖanyiɖɔtɔ kpo omɛsɔɖoxlan lɛye ɖoxlan mi,ye na hu omɛ ɖe lɛye le yemɛ a bo do aya na omɛ ɖe lɛye. ⁵⁰ Do e nɛ lɔ wutu,Mawu na byɔ ɖɔɖanyitɔ xeye na ye hu sɔn ogbɛ we titɔ e ji gbɔn we ohlɔn do jijimɛvi egbe tɔn ye si. ⁵¹ Sɔn Abɛli ji gbɔɔn do wa yi jɛ Zakali xena ye hu le Mawu we xwegbe le avɔsinsan we agba kpo tɛnmɛ lɔ we gblamɛ ji.Ɛɛn,un le ɖɔ na mi xɔn,jijimɛvi egbe tɔn lɛye ji wɛ ye na byɔ ohlɔn do. ⁵² Ahelu na mi osɛnkplan omɛtɔ ye ɖo mi sɔ cavi xeni nɔ hun onu nyinywɛ we ohɔn lɔ,miye tesu ma le byɛ e mɛ xɔn gɛ,bo gɔ su omɔ do omɛ xeye ni jlo bo na byɔ e mɛ lɛye. ⁵³ Xena Jesu tɔn le oxwe nɛ lɔ gbe,onu kplan omɛtɔ lɛye kpo falizitɔ lɛye kpo jɛ tagba dido ni ji,bo le kan oxo wi se xɔn do onu vovwe ye go, ⁵⁴ ye do le tlɛ omɔ ni xɔn,a do kpɔn ɖɔ ye na mɔ ofɛn ɖe le oxo etɔn ɖiɖɔ mɛ ja,a bo da ohwe ni-i.