¹ Le hwenɛnu,omɛ akpo donu nɛmu ɖe wɛ wa lɛ oto do Jesu,ye bo su gbɔɔn bo wa le tun afɔ-afɔ ji na ye ɖe lɛye xɔn,Jesu bo jɛ ɖiɖɔ na onukplanvi etɔn ji ɖɔ tintantɔn:Mi cɔ miɖe do kpɔnnɔ tinkɛn falizitɔye tɔn go,xeni nyi yɛmɛnu biblo. ² Onuti ma le nɔ bibɛtɛn xɔn,bo na gɔn agbaŋugba ma jɛ xɔn gɛ,lemɔha ke onuti ma le nɔ onugɔ xɔn wɛ ye ma wa le nywɛ xɔn gɛ. ³ E wɛ zɔn,oxo ɖekpokpwe xena mi na ɖɔ le zinvlu mɛ,ye na se le weziza nu,lemɔha ke oxo xena mi na ɖe okpa a do ɖɔ le oxɔ mɛ,ye na se le toxomɛ. ⁴ E wɛ zɔn hadwe ce lɛye mi,un le ɖɔ na mi xɔn ɖɔ,mi nɔ kpɔn ɖi obu na omɛ xeye ni nɔ hu agbaza vɔ bo ma gɔ kpe onuti go bo na blo kpe-e gɛ. ⁵ Ma ɖɔ omɛ xena mi ɖo na ɖi obu na lɔ.Mi ɖi obu na omɛ xeni nɔ hu omɛ,e nɛ godo e bo ɖo acɛ a bo do sɔ-ɛ do ozo mavɔ mɛ.Ɛɛn,un le ɖɔ na mi xɔn ɖɔ omɛ nɛ lɔ wɛ mi ɖo na ɖi obu na. ⁶ Wiziwizi atɔɔn ma le kɔbɔ ɖe ji gɛ,co Mawu mɔ nɔ wɔn lokpo tesu le ye mɛ gɛ. ⁷ Oɖa xeye le ota mitɔn can kpokpo wɛ nyi xixlɛ.Mi nɔ kpɔn gɔ ɖi obu gɛ,ɖo mi vɛ kɔbɔ na Mawu hugan wiziwizi lɛye. ⁸ Un le ɖɔ na mi xɔn ɖɔ,omɛ ɖekpokpwe xeni na ɖe kunnu le gbɛtɔye we nukun mɛ,ɖɔ miye bo nyi omɛ ce,ovi gbɛtɔtɔn lɔ can na ɖe kunnu ni-i le wɛnzangun Mawutɔn lɛye we nukun mɛ ɖɔ e bo nyi omɛ myetɔn, ⁹ amɔ omɛ xeni na gbɛ-un le gbɛtɔ lɛye we nukɔn,nyɔ gba na gbɛ-ɛ le wɛnzangun lɛye we nukɔn. ¹⁰ Omɛ ɖekpokpwe xeni na ɖɔ oxo do ovi gbɛtɔtɔn lɔ go,ye na sɔ ohwɛ sɔ xɔ kɛ,amɔ omɛ xeni na ca gbigbɔ mimɛ ko,ye ma le sɔ ohwɛ ke xɔn gɛ. ¹¹ Hwenuxena ye na sɔ mi do gbɔn goxɔ lɛye we nukɔn,acɛkpatɔye kpo xɔluye kpo we nukɔn,mi nɔ kpɔn jɛ tagba na ɖena mi na ɖɔ oxo ɖo gɛ,alo ɖena mi na ɖɔ oxo ɖe gɛ, ¹² ɖo gbigbɔ mimɛ na gɔkɔ na mi do onu xena mi na ɖɔ lɔ go. ¹³ Wɛ omɛ ɖe le togun lɔ mɛ bo ɖɔ:Cica ɖɔ na anɛyevi na ni a ma dɔkunnu ce xa-un. ¹⁴ Jesu bo ɖɔ ni ɖɔ:Dahwe,mɛ wɛ sɔ-un do blo ohwɛɖɔ na omɛtɔ alo ohwɛgbotɔ do mi ji? ¹⁵ Wɛ e le ɖɔ na ye xɔn ɖɔ:Mi cɔ miɖe do owanyiyi na dɔkunnu ɖiɖo go,ɖo gbɛtɔ gɔ ɖo acɛ do dɔkunnu etɔn lɛye ji can e ma ɖo acɛ do ogbɛ etɔn ji gɛ. ¹⁶ Wɛ Jesu gɔ do olo xe na ye,bo le ɖɔ xɔn ɖɔ:Ogle dɔkunnɔ ɖe tɔn, na sinsɛn susu, ¹⁷ wɛ e wa le ɖɔ le eɖe mɛ xɔn ɖɔ:Naɖe wɛ na blo ɖo,ɖo un ma nyɔ ofi xena na bɛ jinukun lɛye do gɛ? ¹⁸ E le ɖɔ xɔn ɖɔ:E ɖiye onu xena na blo lɔ ɖye.Na gɔ vɔ gba ava ce lɛye,a bo gɔ vɔ gba ɖaxo bu,e nɛ na bɛ dɔkunnu ce lɛye kpokpo do flɛn. ¹⁹ Na ɖɔ na alindɔn ce ɖɔ:Alindɔn ce,a ɖo dɔkunnu susu na oxwe susu.Gbɔjwɛ tɔwe,ɖu onu,a bo nɔ nyɔnamɛ. ²⁰ Amɔ Mawu le ɖɔ ni xɔn ɖɔ:Gbɛtɔ lulunɔ,hwedo e xe tesu na yi alindɔn tɔwe,wɛ onu xena a sɔ ɖo anyi lɛye,mɛ tɔn wɛ e na nyi? ²¹ Lemɔha ke wɛ e nyi na gbɛtɔ xeye ni fɔ dɔkunnu na e yɔ tesu,vɔ bo ka ma jɛ dɔkun na Mawu gɛ. ²² Jesu ɖɔ na xodotɔ etɔn lɛye ɖɔ:E wɛ zɔn un le ɖɔ na mi xɔn ɖɔ:Mi nɔ kpɔn jɛ tagba na ogbɛ mitɔn gɛ,na onu xena mi na ɖu lɔ go gɛ alo onu xena mi na do llɔ go gɛ. ²³ Ɖo ogbɛ mitɔn vɛ kɔbɔ hugan onuɖuɖu,lemɔha ke wɛ agbaza mitɔn can vɛ kɔbɔ hugan onuzinzan gba. ²⁴ Mi kpɔn onu do oxɛ lɛye go,ye mɔ nɔ do,ye ka mɔ nɔ ya gɛ.Ye ma ɖo ava gɛ,amɔ Mawu nɔ na onuɖuɖu ye.Mi vɛ kɔbɔ hugan oxɛ nɛ lɛye! ²⁵ Mɛ wɛ le mi mɛ,wɛ do gbɔn onu linkpɔn etɔn lɛye mɛ,e na do azan kpɛɖe ogbɛ etɔn ji? ²⁶ Na e nyi ɖɔ mi ma kpego na blo onu vɔvɔ nɛ tesu gɛ,a ni we tagba wɛ mi le jɛ xɔn? ²⁷ Mi kpɔn onu do flawa lɛye go,ye mɔ nɔ wa ozɔn ti gɛ,vɔ un le ɖɔ na mi ɖɔ Salomɔ xeni ɖo dɔkunnu gbagba,ma ɖo acɔ hu lokpo tesu le ye mɛ gɛ. ²⁸ Na Mawu nɔ ɖo acɔ na ogbe xeye ni le nukanmɛ lɛye,wɛ osɔ ye na do ye ozo,nɛmu-nɛmu wɛ e na ɖo acɔ na mi,ao gbɛtɔ onuɖiɖi ovunɔye mi! ²⁹ Mi nɔ kpɔn din onu xena mi na ɖu gɛ,alo onu xena mi na nu we tamɛ gɛ. ³⁰ Ɖo akɔta lɛye kpokpo nɔ le din ɖagbwɛ e nɛ lɛye sese,wɛ myetɔ tesu nyɔ-ɛ ɖɔ miye bo ɖo hudo etɔn. ³¹ Amɔ,mi din axɔluduta etɔn,wɛ ye na sɔ onu e nɛ lɛye sɔ xɔ kpe na mi. ³² Nɔ kpɔn ɖi obu gɛ,gbɔkpo ovu, ɖo myetɔ le jijwe mɛ bo do an mi axɔluɖuta lɔ. ³³ Mi sa nyɔna mitɔn lɛye a bo sɔ kɔbɔ lɔ sɔ xɔ ma na ayanɔ ye.Mi blo kɔbɔhɛnnu xeye ni mɔ nɔ gble gɛ,na miɖe lɛye,a bo kpli dɔkunnu mitɔn xeye ni nɔ gbleye gɛ ɖo sɛxwetomɛ,ofi xena ajotɔ ɖe mɔ nɔ sɛkpɔ gɛ,ofi xena onu ka mɔ nɔ jɛ ohwɛ gɛ le. ³⁴ Ɖo ofi xena dɔkun mitɔn le,flɛn ke wɛ ayixa mitɔn can na nɔ. ³⁵ Na awu gaga mitɔn lɛye ni nyi bibla,do gojiblanu mitɔn lɛye go,na zogbɛn mitɔn ni nɔ tita; ³⁶ a bo le ɖi omɛ xeye ni le nɔ kpɔn asu ɖo ha,we hwexenu na e na xuxu ye na hun bleŋu. ³⁷ Donanɔ na mɛsɛntɔ xeye na xwetɔ lɔ na lɛkɔ wa a bo wa mɔ ye le nukle.Le oxojɔxo mɛ,un le ɖɔ na mi,e na bla awu gaga yetɔn do gojiblanu etɔn go,a bo ze ye sɔ xɔ flɔn-anyi na onuɖuɖu. ³⁸ Na xwetɔ lɔ wa le azan kpo sɔ,alo azan kpo azan atɔn bo wa mɔ ye le ogbesisɔ,mɛsɛntɔ etɔn lɛye mɔ dona yi. ³⁹ Gɔ hugan lemɔha,mi nyɔ-ɛ ke,na xwetɔ ɖe nyɔ ogan xemɛ na ajotɔ ɖe na wa wɛ,e ma wa le jo oxwe etɔn gbe do xɔn gbɔɔn ajotɔ na wa fin onu gɛ. ⁴⁰ Mi nɔ aceji,ɖo mi ma nyɔ ogan xemɛ na ovi gbɛtɔtɔn lɔ na wa gɛ. ⁴¹ Piyɛ ka ɖɔ:Aklunɔ miye kɔkɔlɔkɔ jan wɛ a nɔ ɖɔ olo dido e xe lɔ na alo omɛ lɛye sese kpo? ⁴² Aklunɔ lɔ ɖɔ ni ɖɔ:Ma ɖɔ omɛ xena onujikpɔntɔ ogbejinɔtɔ lɔ xeni ɖo onunyinywɛ lɔ ɖɔ na mi:E le ɖi omɛ xena xwetɔ etɔn sɔ ɖo oxwe etɔn nu a do ma onuɖuɖu le oganxixo xeni jɛ xa lɔ mɛ,na ozɔnwatɔ gbokpwe lɛye ha. ⁴³ E bo le ozɔn lɔ ji,xwetɔ etɔn bo lɛkɔ bo wa mɔ-ɛ,nyɔnanɔ wɛ nyi ozɔntɔ e nɛ lɔ. ⁴⁴ Le oxojɔxo mɛ,un le ɖɔ na mi,e nasɔ-ɛ do nukɔn na dɔkun etɔn lɛye sese nu. ⁴⁵ Vɔ e na nyi ɖɔ ozɔnwatɔ e nɛ lɔ wa ɖɔ le eɖe mɛ ɖɔ:Xwetɔ ce,e ma ja yawu wa gɛ,e bo jɛ ozɔnwatɔ sunnuglo kpodo nyɔnusiye kpo xixo ji,bo jɛ onuɖuɖu kpodo ahan kpo nunu ji;gbɔɔn a bo mu, ⁴⁶ Aklunɔ etɔn na wa le ohwe hwexenu na e ma ɖo nukun gɛ kpodo xena e ma nyɔ-ɛ gɛ kpo,e na dɔn oto ni-i taŋu,e yɔ kpodo ogbeji manɔtɔ lɛye kpo bo na ɖo vivɔnu lokpo lɛye. ⁴⁷ Ozɔnwavi xeni nyɔ Aklunɔ etɔn we ojlo nu ye,vɔ e ka ma jla onuti ɖo anyi gɛ,e ka ma gɔ blo ɖo ojlo nu etɔn lɛye ji gɛ,e na ɖu oba taŋu. ⁴⁸ Vɔ omɛ xeni ma nyɔ-ɛ gɛ,e bo ka blo onu xeni jɛxa oba,e na ɖu oba ovuɖe,ye na byɔ onu susu omɛ xena ye na onu susu,omɛ xena ye sɔ onu xɔ do asi na,ye na gɔ byɔ-ɛ onu susu. ⁴⁹ Jesu ɖɔ mɔsin,un wa bo na do hɛn ozo wa anyizan ji,ojlo vivɛ ce wɛ nyi ɖɔ ozo lɔ o ɖo na wle. ⁵⁰ Ye do na nylɔ-un do vivɛsise mɛ,ɖi ɖena ye nɔ nylɔ omɛ do osin mɛ ɖo ha,un bo le onuxokpɔn mɛ taŋu,gbɔɔn do yi hwexenu na vivɛsise nɛ lɔ na wa jiye ɖo. ⁵¹ Fifa wɛ un hɛn do wa anyizan lɔ ji wɛ mi bu-i?Gbeɖe kpɔn,ma ɖɔ na mi:Kinklan wɛ un hɛn do wa. ⁵² Bɛ sɔn egbe,oxwe xe gbe na omɛ atɔɔn le,na ma,omɛ atɔn na cite do omɛ awe go,omɛ awe bo na cite do omɛ atɔn go. ⁵³ Ovitɔ na cite do ovyɛ sunnuglo go,ovi sunnuglo bo na cite do otɔ go,ovinɔ na cite do ovyɛ nyɔnusi go,ovi nyɔnusi bo na cite do onɔ go,asunɔ bo na cite do ovyɛsi go,ovyɛsi can bo na cite do aswɔnɔ go gba. ⁵⁴ Jesu gɔ ɖɔ na togun lɔ ɖɔ:Na mi mɔ sunwɔ cite sɔn ohweyixɔ,mi nɔ ɖɔ hɔnlokpo ɖɔ mɔsin:Jokun bo ja ja oxojɔxo. ⁵⁵ Na mi mɔ jɛhɔn xo le afɔligbe,mi nɔ ɖɔ ɖɔ:Zozo bo ja,e bo nɔ wa oxojɔxo. ⁵⁶ Yɛmɛnuwatɔye,na oji kpodo anyizan kpo na do ɖe,mi nɔ mɔ nukunnu jɛ e go,bo nɔ nyɔ onu xe ha na e nyi,a ni wɛ zɔn mi nɔ do mɔ nukunnu jɛ ogan xeye ni le xo odin xe lɛye mɛ gɛ? ⁵⁷ Ani wɛ zɔn lokpo-lokpo mitɔn lɛye mɔ nɔ sɔ gbeta do onu xeye ni le jɔ lɔ go gɛ? ⁵⁸ Na omɛ ɖe yɔ ohwɛ we,mi bo le sɔn yi ohwɛ nukɔn xɔn,tɛnkpɔn na mi a ɖɔ-ɛ,a bo gbo-e,le hwexenu na e le dɔn we do le sɔn xɔn,na e ma nyi ɖo lemɔha gɛ,e na dɔn we sɔ xɔ na ohwɛɖɔtɔ,ohwɛɖɔtɔ bo na sɔ we xɔ do asi na sɔja,sɔja lɔ bo na sɔ xɔ flɛn do gankpamɛ. ⁵⁹ Un le ɖɔ na we xɔn ɖɔ,keŋu hwɛkpo na a na do tɔn le gankpa lɔ mɛ,flan lokpo tesu ma ja kpo le okɔ na we xɔn gɛ.