¹ Le Jwifunuye we gbɔjwɛzan ɖe gbe,Jesu kpo onukplanvi etɔn lɛye gbɔn ojinukun we ogle ɖe mɛ bo do wa le yi xɔn,onukplanvi lɛye bo din ojinukun ɖe lɛye bo le fle ɖu xɔn. ² Falizitɔ ɖe lɛye ɖɔ ba ye ɖɔ: "A ni wutu wɛ mi do le blo onu xena nyi osɛn le gbɔjwɛ zangbe xɔn?" ³ Jesu ɖo e go na ye ɖɔ:Be mi ma xlɛ onu xena Davidi blo le hwexenu na xovɛ ci-i,e yɔ kpodo omɛ xeye ni kplɛn-ɛ do kpo gɛ wɛɛ? ⁴ Davidi ɖyɛ ofi xena ye nɔ sɛn Mawu le,bo sɔ kpɔnnɔ xena ye do san avɔ na Mawu,bo ɖu vɔ omɛɖe ma ɖo acɛ bo na do ɖu kpɔnnɔ e nɛ lɔ adavo avɔsantɔ Mawutɔn lɛye kɛɖɛ?" ⁵ Jesu gɔ do na ye ɖɔ:"Ovigbɛtɔ tɔn lɔ wɛ kpacɛ na gbɔjwɛ zan lɔ." ⁶ Le gbɔjwɛzan bu gbe,Jesu ɖyɛ Jwifunuye we okplitɛn,bo le kplan onu omɛye xɔn.Dahwe ɖe le ofi lɔ,wɛ aɖusi we alɔ etɔn ku. ⁷ Osɛnkplan-omɛtɔye kpo Falizitɔye le kpɔn Jesu xɔn ɖɔ etɔn na gbɔ azɔn le gbɔjwɛzangbe wɛ ja!Ɖo ye le din ohwɛ jijɔ xɔn a bo do da ohwɛ ni-i. ⁸ Vɔ,Jesu o mɔ onu jɛ ayixa yetɔn mɛ,e wɛ e ɖɔ na dahwe xena alɔ ku na lɔ ɖɔ:"Cite,a bo nɔ ote le nukɔn na omɛ kpokpo."Dahwe lɔ cite bo nɔ ote. ⁹ Jesu ɖɔ na ye ɖɔ:"Ma kan oxo xe mi se,le osɛn mitɔn lɛye mɛ ɖe,ye hɛn ye na blo onu jijɔhun le gbɔjwɛzangbe loo,,alo onunyinyla wɛ ye na blo?Mi na hwlɛn omɛ gan loo,alo mi na gble ogbɛ na omɛ?" ¹⁰ Jesu da nukun etɔn gbɔn omɛ sese ji bo ɖɔ na dahwe lɔ ɖɔ:"Dlɛn alɔ tɔwe."Dahwe lɔ bo dlɛn alɔ etɔn wɛ azɔn lɔ gbɔ ni-i. ¹¹ Onu e nɛ lɔ do oja nukun mɛ na Falizitɔye kpodo osɛnkplan-omɛtɔ lɛye kpo wɛ ye jɛ oxo ɖiɖɔ le yeɖe mɛ ji,a do nyɔ onu xena ye na blo xa Jesu. ¹² Le hwenɛ lɔ nu,Jesu xlɛ oso ɖe ji a bo do xo oɖɛ,e xo oɖɛ na Mawu le ozan blebu lokpo mɛ. ¹³ Xena anyihɔn,e ylɔ onukplanvi etɔn lɛye,bo can omɛ wyawe le ye mɛ,bo ɖo nyikɔ na ye ɖɔ:Omɛɖe ɖoxlan ye. ¹⁴ Nyikɔ yetɔn lɛye ɖi ye:Simɔ xena Jesu ɖo nyikɔ na ɖɔ Piyɛ,kpo Andle xe nyi Simɔ nɔvyɛ,kpodo Jaki,Jaan,Filipu,Batelemi, ¹⁵ Matiye,Toma,Jaki Alufe we ovi,Simɔ ohwɛ yi na ototɔ Zelɔtu, ¹⁶ Juda Jaki we ovi kpo Juda Isikalyɔti xeni wa sa Jesu. ¹⁷ Odin,Jesu jɛte sɔn oso lɔ ji do jɛ anyizanmɔ,wɛ oto susu kpodo Jude we omɛ lɛye kpo,kpodo Jeluzalɛmu we akpaxwe xeni sɔn Ti kpodo Sidɔni kpo lɛye le flɛn. ¹⁸ Ye wa bo na do mɔ azɔn gbɔ a bo do se oxo etɔn lɛye.Wɛ omɛ ni ɖo gbigbɔ mawe lɛye can mɔ okan tlutlu. ¹⁹ Otogun lɔ kpokpo le din na ɖo alɔ Jesu go,ɖo hɔnhlɔn Mawutɔn ɖe nɔ tɔn le emɛ a bo gbɔ azɔn na ye mɛ susu wutu. ²⁰ Odin,Jesu kpɔn ahwanvu etɔn lɛye bo ɖɔ:Nyɔnanɔ,wɛ mi nyi mi mɛ ayanɔ lɛye,ɖo axɔsuɖuta Mawu tɔn yi mitɔn. ²¹ Nyɔnanɔ, wɛ nyi mi mɛ xeye na xovɛ le ci xɔn lɛye,ɖo dɔgo na gɔ mi.Nyɔnanɔ,wɛ nyi mi mɛ xeni le vi avi xɔn odin lɛye,ɖo mi na ko odɛ. ²² Nyɔnanɔ wɛ mi nyi hwexenu na gbɛtɔ lɛye na gbɛ owan na mi,a bo gbɛ mi,a bo zun mi xɔn,a bo le ɖɔ oxo mitɔn nyinyla xɔn,ɖo ovi gbɛtɔ wutu. ²³ Le hwexenu na e na wa le jɔ ɖo lemɔha,mi jawa,a bo hlɔn jɛ ote,ɖo ale ɖaxo ɖe le te kpɔn mi le sɛxwe.Ɖo, lemɔha ke wɛ dagbo yetɔn lɛye nɔ do oya na ɖɔɖayiɖɔtɔ lɛye ɖo osan lɔ nɛ. ²⁴ Vɔ babaɖe na mi mɛ dɔkunnɔ lɛye,ɖo mi o yi nyɔna mitɔn! ²⁵ Babaɖe na mi mɛ xeni ɖu onu dɔgo bo gɔ mi odin lɛye,ɖo xovɛ na wa ci mi!Baba na mi mɛ xeni le ko odɛ xɔn odin lɛye,ɖo mi na wa nɔ awubla mɛ,a bo vi avi. ²⁶ Baba ɖe na mi,hwexenu na gbɛtɔ lɛye na le ɖɔ oxo mitɔn nywɛ xɔn,ɖo lemɔha ke wɛ dagbo yetɔn lɛye nɔ blo na ɖɔɖayiɖɔtɔ awonɔ lɛye le osan. ²⁷ Vɔ un le ɖɔ na mi xɔn,mi mɛ xeni le ɖo oto-un lɛye ɖɔ ,mi yi owan na kɛntɔ lɛye a bo wa ɖagbwɛ na omɛ ni gbɛ owan na mi lɛye, ²⁸ mi do na omɛ xeni nɔ do onu mi lɛye a bo gɔ xo oɖɛ na omɛ xeni nɔ saya na mi lɛye. ²⁹ E nyi ɖɔ mɛɖe gba oto mɛ na we ɖo aɖusi xwe,bo gɔ tlɔ amyɔn mɛtɔn lɔ ni.E ka yi ɖɔ omɛ wa ze awu tɔwe bo jo-e do. ³⁰ Nɔ na onu omɛ xeni nɔ byɔ we lɛye,e ka yi omɛ ɖe wa ze onu tɔwe,bo jo-e do,nɔ kpɔn gɔ byɔ-ɛ gɛ. ³¹ Onu xena mi nɔ din na omɛye a blo na mi,mi nɔ blo na ye gba. ³² Na e nyi ɖɔ omɛ xeni nyi owan na mi jan wɛ mi nɔ nyi owan na,ɖagbwɛ bɔtɔn wɛ mi wa wɛ ye na nywɛ na mi?Amɔ ohwɛ hutɔ lɛye wɛ nɔ wa onu do lemɔha. ³³ Na e nyi omɛ xeni nɔ wa ɖagbwɛ na mi jan wɛ mi nɔ wa ɖagbwɛ na,ɖagbwɛ bɔtɔn wɛ mi wa wɛ ye na nywɛ na mi?Amɔ ohwɛ hutɔ lɛye wɛ nɔ wa onu do lemɔha. ³⁴ E yi ɖɔ mi nɔ hwe onu na omɛ xena mi nɔ ɖo nukun ɖɔ miye bo na gɔ yi,ɖagbwɛ bɔtɔn wɛ mi ka blo wɛ ye na nywɛ na mi?Ɖo ohwɛ hutɔ lɛye can nɔ hwe onu na ome a bo gɔ ɖo nukun susu eton bo na yi. ³⁵ Amɔ mi nyi owan na kɛntɔ mitɔn lɛye a bo nɔ wa ɖagbwɛ na ye.A bo nɔ hwe onu na ye ma ɖo nukun susu etɔn na yi le ye si,e nɛ godo,mi na yi Axɔluɖuta Mawu tɔn we vikpɛye,ɖo Mawu nɔ ku lɛblanu na ohwɛhutɔ lɛye can gba. ³⁶ Mi nɔ ku lɛblanu na omɛ,ɖi ɖena mi e tɔ xeni can nɔ ku lɛblanu na omɛ ɖo ha gba. ³⁷ Mi nɔ kpɔn da ohwɛ na omɛ ɖe gɛ,e nɛ ye ma ja da ohwɛ na mi gba gɛ.Mi nɔ kpɔn da ohwɛ na omɛ ɖe do onu nyinyla etɔn wiwa wutu gɛ.Mi sɔ ohwɛ kɛ miɖe lɛye,e nɛ ye na ze ohwɛ sɔ xɔ kɛ mi e can. ³⁸ Mi na onu omɛ ɖyɛ lɛye,na ye a na miye can gba.Ɖo ɖena mi nɔ na onu omɛye ɖo,lemɔha ke wɛ Mawu na do na mi ɖo. ³⁹ Jesu gɔ do olo lokpo:"Nukun gbanɔ awe na kpego na xlɛ omɔ yeɖe wɛ?E yi ye mɛ awe lɛye wa do kpɔn,ye ma wa le jɛ odo mɛ? ⁴⁰ Mɛsɛntɔ ti ma le oji na oga etɔn gɛ,vɔ eyi e se otonu na oga etɔn,e na ci ɖi oga lɔ ha. ⁴¹ A ni wutu wɛ ale mɔ onu nywɛ xeni le nukun ji na anɔwevi ɖiyɛ, bo ka ma le mɔ atinkpo xeni le nukun tɔwe ji gɛ? ⁴² Na ɖe a blo ɖo a bo ɖɔ na anɔwevi ɖyɛ ɖɔ: Anɛevi, nɔte ma ɖe onuywɛ xeni le nukun ji na we sɛ, vɔ yɔ tesu ka ma le mɔ atinkpo xeni le nukun tɔwe ji xɔn gɛ. Yɛmɛnuwatɔ, ɖe atinkpo xeni le nukun tɔwe ji sɛ tintan, e nɛ a na mɔ onu ganji, a bo do wa yi ɖe onuywɛ sɛ le nukun ji na anɔwevi ɖyɛ. ⁴³ Atin ɖagbwɛ ɖe mɔ nɔ na sinsyɛn nyinylan ɖe gɛ,lemɔha ke atin nyinyla ɖe mɔ nɔ sinsyɛn ɖagbwɛ gɛ. ⁴⁴ Ye nɔ nyi atin lokpo-lokpo gbɔn sinsyɛn yetɔn dali.Ye mɔ nɔ gbɛn figi le owun mɛ gɛ,lemɔha ke ye mɔ nɔ gbɛn hlɛzɛn le xɛŋutin ji gɛ ɖo nɛ. ⁴⁵ Gbɛtɔ ɖagbwɛ, xeni ɖo ayixa ɖagbwɛ,nɔ ɖe onu ɖagbwɛ tɔn,lemɔha ke wɛ gbɛtɔ nyinyla lɔ can nɔ ɖe onu nyinyla tɔn.Ɖo ayixa mɛ wɛ onu lɛye sese kpo nɔ tɔn sɔn keŋu hwɛkpo onu nɔ do ɖɔ. ⁴⁶ A ni wɛzɔn mi do le yɔ-un ɖɔ:"Aklunɔ,Aklunɔ" bo mɔ nɔ do se to nu na-un gɛ? ⁴⁷ Gbɛtɔ ɖekpokpwe xeni na wa di-e bo se oxo ce bo gɔ zan do e ji,na xlɛ mi onu na e nyi. ⁴⁸ E le ɖi gbɛtɔ ɖe xeni gba oxwe etɔn do oso ji ha.Wɛ hwexenu na oji jɛhɔn xo,sinsahwin can bo gbɔn e go,co e ma wa onu ti ni gɛ,ɖo oxɔ lɔ e nyi gbigba ganji. ⁴⁹ Vɔ gbɛtɔ xeni se oxo ce bo ka ma zan do e ji gɛ,e le ɖi gbɛtɔ ni gba oxwe etɔn do anyizan vɔvɔ ji ha ma ɖo dodwe.Hwexenu na sinsahwin gbɔn agɔ ni-i,e hɔ wɛ sinsahwin oxwe enɛ tɔn lɔ klo."