¹ Hwexenu na Jesu lɛ le Judɛn we otɔto,e o gɔ kpo do gbigbɔ Mawutɔn,wɛ gbigbɔ lɔ kplɛn-ɛ do yi gbetotlomɛ. ² Lɛgba wa tɛn-ɛ kpɔn le flɛn lɔ na azan kaneɖe.Jesu ma ɖu onuti gbɔɔn azan kanɖe lɔ do vɔ gɛ.Xena azan e nɛ lɛye wa yi vɔ,xovɛ ci-i. ³ E wɛ lɛgba ɖɔ ni-i ɖɔ:"Na e nyi ɖɔ Mawu we ovi jan wɛ a nyi,be bo ɖe ogbe na okpɛn e nɛ na ni-a tlɔ zun kpɔnnɔ." ⁴ Jesu ɖo e go ni-i ɖɔ mɔsin:"E nyi winwlan le Mawu we oxo mɛ ɖɔ"gbɛtɔ ma le ogbɛ na onuɖuɖu kɔkɔlɔkɔ gɛ. ⁵ Lɛgba gɔ kplan Jesu do yi oji,bo xlɛ-ɛ xɔluɖuto xeni le anyizan lɛye le cɛju ovuɖe mɛ. ⁶ E ɖɔ ni-i ɖɔ:"Na sɔ acɛkpikpa kpodo dɔkunnu ,xɔluɖuto tɔn nɛ lɔ sɔ xɔ na we,ɖo nyɔ wɛ ye sɔ xɔ do alɔmɛ na.Un hɛn na sɔ ye sɔ na omɛ xeni jlo-un. ⁷ Yɔ na a do onu odo na-un,be onu lɛye sese kpo na nyi tɔwe. ⁸ Jesu ɖo e go ni-i ɖɔ:"Aklunɔ Mawu tɔwe wɛ a do onu odo na, e yɔ lokpo gee wɛ a sɛn." ⁹ E nɛ godo,lɛgba lɔ gɔ wa kplɛn-ɛ do yi Jeluzalɛmu,bo sɔ-ɛ ɖo ota na oxɔ Mawutɔn le oji voo o ɖo ni-i ɖɔ:"Na a nyi Mawu we ovi doo,be bo hlɔn sɔn oji fi a bo jɛ anyi zanmɔ. ¹⁰ Ɖo ye wlan le Mawu we oxo lɔ mɛ ɖɔ:"Mawu na ɖe ogbe na Wɛnzangun etɔn lɛye wɛ ye na kpedo go we. ¹¹ Lemɔha ke wɛ wɛnzangun Mawutɔn lɛye na hɛn we do alɔ yetɔn mɛ wɛ afɔ tɔwe ma gɔ le klɛn okpɛn ɖe xɔn gɛ." ¹² Jesu ɖo e go ni-i ɖɔ:"Mawu we oxo ɖɔ mɔsin:"Nɔ kpɔn tɛn Aklunɔ Mawu tɔwe kpɔn gɛ." ¹³ Xena lɛgba blo onu e nɛ lɛye bo do tɛn Jesu kpɔn vɔ,e lɛ le e e de hwɛkpo. ¹⁴ Jesu xlɔ wa Galile kpodo gbigbɔ Mawutɔn we hɔnhlɔn kpo.Omɛ kpokpo le ɖe kunnu ni-i xɔn le Galile we kansin lɔ sese mɛ. ¹⁵ E nɔ kplan onu le Jwifunu lɛye we okpli tɛnmɛ lɛye,omɛ lɛye kpokpo nɔ le kanfu nyikɔ etɔn xɔn. ¹⁶ Jesu wa Nazalɛti le ofi xena e hwɛn le.E ɖyɛ Jwifunu lɛye we okplitɛnmɛ le gbɔjwɛzangbe ɖi ɖena e o nɔ blo ɖo le osan ha.E cite bo na do xlɛ Mawu we oxo. ¹⁷ Ye sɔ ɖɔɖanyiɖɔtɔ Ezayi we wema sɔ ni-i ɖɔ ni bo xlɛ na miye lɛye,xena e hun-i,e xlɛ ofi xena ye wlan do ɖɔ: ¹⁸ "Akluno Mawu we gbigbɔ le ijiye ɖo e can-un^na ma do wa yi do owɛn nywɛ na omɛye xeni le ɖu aya xɔn lɛye,e ɖo-un ɖoxlan na ma do wa yi ɖɔ na omɛye ni nyi ogantɔye ɖɔ ye bo na ɖe ogan na ye,a bo gɔ ɖɔ na nukungbigba nɔ ye ɖɔ ye bo na mɔ nukunnu,a bo ɖe ogbe do omɛ xena ye le do aya na xɔn lɛye ɖɔ ye boo jɛ yeɖe si. ¹⁹ A bo do wa ɖɔ oxo do oxwe ɖe go,oxwe xe mɛ na Aklunɔ Mawu kpɔn dɔŋuɖunu na omɛ ɖe wa. ²⁰ E nɛ godo,e su wema lɔ,bo sɔ-ɛ na ozɔnwatɔ lɔ,bo flɔn anyi.Ye omɛ sese xini le okplitɛnmɛ lɔ lɛye le kpɔn-ɛ xɔn tlintlin. ²¹ E bo le ɖɔ na ye xɔn ɖɔ:"Mawu we oxo xena mise le egbe ,wa cicɛmɛ." ²² Ye omɛ lɛye sese le ɖe kunnu jijɔhun do e go xɔn.Fɛnu we oxoye xeni nɔ le tɔn sɔn onu etɔn mɛ xɔn nɔ le kpaca do ye xɔn wɛ ye nɔ le ɖɔ xɔn ɖɔ:"Ovi Jozɛfu tɔn lɔ mɛ nyi e nɛ gɛ wɛɛ? ²³ Jesu ɖɔ na ye ɖɔ:"Un ɖo,kanɖo e ji ɖɔ miye bo na wa do olo xena-un:"Doto,gbɔ azɔn na ɖe we".Mi bo na gɔ wa ɖɔ na-un ɖɔ:"Blo onu xeye na a blo le Kapɛnawumu na mi se lɛye can le ofi e xe le oto tɔwe mɛ. ²⁴ E gɔ ɖɔ na ye ɖɔ:"Le oxojɔxo mɛ,un le ɖɔ na mi xɔn ye mɔ nɔ yi ɖɔɖanyiɖɔtɔ ti ganji le oto etesu tɔn mɛ gɛ. ²⁵ Le oxojɔxo mɛ un le ɖɔ na mi xɔn,okposi susu wɛ le Izlayɛli we tomɛ le Eli we hwenu.Hwexenu na jokun gbɛ jija na oxwe atɔn kpo sunzan ayizɛn,xovɛ ɖaxo ɖe wa tɔn le oto lɔ sese kpo mɛ. ²⁶ Co ganke,Mawu ma ɖo Eli ɖoxlan ye omɛ ti kɔn gɛ.Vɔ e ɖo-e ɖoxlan okposi ɖe kɔn le Salɛputa we toxo mɛ xeni le Sidɔn we Kansinmɛ. ²⁷ Lemɔha ke wɛ gudunɔ susu wɛ le Izlayɛli we oto mɛ le ɖɔɖanyiɖɔtɔ Elize we hwenu,co ye omɛ ti ma mɔ azɔnhɛngbɔ gɛ,a mɔ,Naama xeni sɔn Sili we oto mɛ,bo ma nyiJwifunu gɛ wɛ e gbɔ azɔn na. ²⁹ Xena ye se lemɔha,aɖi ɖo ye omɛ kpokpo le okplitɛn lɔ. ²⁸ Ye cite bo ɖe Jesu tɔn le oto lɔ mɛ bo dɔn-ɛ do yi oso xe ji na Nazalɛti lɔ le,a do tintin-i jɛ odo. ³⁰ Vɔ Jesu gbɔn cɛncɛnmɛ na ye bo sɔn. ³¹ Jesu wa Kapɛnawumu we toxo mɛ le Galile we kansinmɛ.E le kplan onu omɛye le jwifunu lɛye we gbɔjwɛzangbe. ³² Onukpinkplan etɔn lɔ wa hu onu do ye,ɖo e le ɖɔ oxo xɔn kpo acɛkpikpa kpo. ³³ Dahwe gbigbɔ mawe nɔ ɖe le flɛn lɔ,e do axwa lelele bo ɖɔ: ³⁴ "Awo! Jesu Nazalɛtitɔn,naɖe a hɛn mi ɖo?A wa bo na do wa va okun mitɔn su do wɛ?Un nyɔ omɛ xena a nyi yɔ wɛ nyi omɛ mimɛ xena Mawu sɔ ɖoxlan. ³⁵ Jesu ɖe ogbe do-e vivɛɖe ɖɔ:"Ɖo oɖa,a bo tɔn le dahwe xe mɛ!"Gbigbɔ mawe lɔ sɔ dahwe lɔ sɔ xu anyi le omɛ kpokpo we nukunmɛ bo tɔn le e mɛ,e ka ma do afɔku ti wi-i gɛ. ³⁶ Obu jɛ omɛ lɛye kpokpo ji wɛ e kpaca do ye,wɛ ye kan oxo yeɖe se ɖɔ:"Oxo bɔtɔn ha wɛ nyi e xe?Dahwe xe nɔ ɖe ogbe do gbigbɔ mawe ye kpo acɛkpikpa kpo hɔnhlɔn kpo,wɛ ye nɔ tɔn le omɛye mɛ." ³⁷ E nɛ godo,nyikɔ Jesu tɔn gbakpe gbɔn ofi lɛye kpokpo le kansin lɔ mɛ. ³⁸ Xena Jesu lɛ le okplitɛn Jwifunu lɛye tɔn vɔ, e yi Simɔ we xwegbe,vivɔ cɔn Simɔ lɔ asyɛnɔ taŋu,wɛ ye do kɛnklɛn na Jesu ɖɔ ni bo wa yi gbɔ azɔn ni-i. ³⁹ Jesu sɛkpɔ azɔnnɔ lɔ,bo fɛɛ,bo ɖe ogbe do vivɔ lɔ titeŋugbetɔn wɛ vivɔ lɔ hɔn ni-i.Le otɛndo lokpo lɔ mɛ,nahwe fɔn cite bo jɛ jonɔ yetɔn yiyi ji. ⁴⁰ Xena ozan do,omɛ kpokpo hɛn azɔnnɔ hamɛ-hamɛye wa Jesu de,wɛ Jesu nɔ ɖo alɔ na ye lokpo-lokpo,a bo gbɔ azɔn naye. ⁴¹ Gbigbɔ maweye can tɔn le omɛ susu mɛ kpo axwa kpo ɖɔ:"Yɔ, ovi Mawu tɔn wɛ a nyi!"Vɔ Jesu nɔ tɔ ogbe ye titeŋugbe ɖɔ ye ni bo ɖo oɖa,ɖo gbigbɔ mawe lɛye nyɔ-ɛ ɖɔ e yɔ bɛ bo nyi Klisi lɔ. ⁴² Xena anyihɔn,Jesu tɔn le toxo lɔ mɛ,bo sɔn yi ofi xena omɛti ma le gɛ.Omɛ susu bo le din-i xɔn,xena ye wa yi mɔ-ɛ,ye jlo na ci e ji na e ma gɔ do le lɛ le yede xɔn gɛ. ⁴³ Vɔ,Jesu ɖɔ na ye ɖɔ:"E le vivɛɖe na ma do jla owɛn sɛxwe tɔn lɔ na toxo gbokpweye can,ɖo e nɛ lɔ wutu wɛ Mawu do ɖo-un ɖoxlan." ⁴⁴ Jesu ɖɔ Mawu we oxo gbɔn okplitɛn jwifunu lɛye tɔn le oto lɔ mɛ.