¹ Dindinwayi we oxwe lɔ we azan ya. ² Wɛ avɔsantɔga lɛye kpo osɛnkplanmɛtɔ lɛye jɛ okuwe omɔ din do Jesu go ji, vɔ bo ka le ɖi obu na otogub lɔ xɔn. ³ Lɛgba wa yi Juda Isikalyɔtu, xeni nyi xodotɔ lokpo le ye mɛ wyawe lɛye mɛ do. ⁴ Juda wa yi bla ɖɔ xa avɔsantɔ kpo omɛcɔtɔ lɛye we oga a bo do sɔ Jesu sɔ jo na ye. ⁵ E vivi na ye, wɛ ye ɖɔ mye bo na na kɔbɔ wi-i. ⁶ E nyɔ ni-i wɛ sɔn gbegbe nɛ lɔ e jɛ de na e na blo ɖo bo na do sɔ-ɛ sɔ jo wɛ mɛɖe ma le nywɛ xɔngɛ. ⁷ Owɔ xuxu ma do tinkɛn azan xegbe na ye na hu lɛn gbɔvu lɔ na dindin wayi we oxwe lɔ wa. ⁸ Jesu sɔ Piyɛ kpo Jaan kpo ɖoxlan bo ɖɔ na ye ɖɔ: Mi yi a bo wɛ da dindinwayi we onuɖuɖu na mi a ɖu. ⁹ Ye bo kan-ɛ se ɖɔ: Bɔ ha wɛ mi na ɖa onuɖuɖu lɔ le. ¹⁰ Jesu ɖo e go na ye ɖɔ: Mi ɖo oto un ganji, na mi dyɛ toxo lɔ mɛ, mi na kpe sunnuglo ɖe wɛ e na hɛn osin do ota. Mi xodwe do yi oxwe xegbe na e na ɖyɛ. ¹¹ Wɛ mi na ɖɔ na xwetɔ lɔ ɖɔ: Cica le kan we se xɔn ɖɔ oxɔ bɔ tɔn mɛ wɛ mye kpo xodo tɔn myetɔn lɛye na ɖu dindin wayi we oxwe lɔ le jaa? ¹² E na wa xlɛ oxɔ ɖaxo ɖe mi xe mɛ na zinkpwe ye kpo tavoye sɔ ogbe le. Flɛn wɛ mi na ɖa oxwe we onuɖuɖu lɔ le. ¹³ Piyɛ kpo Jaan kpo sɔn, bo wa yi do onu xena Jesu ɖɔ na ye ji pɛpɛpɛ. Wɛ ye ɖa onuɖuɖu lɔ. ¹⁴ Xena oxweɖuɖu lɔ wegan xo, Jesu flɔn anyi xa devi etɔn lɛye. ¹⁵ Bo ɖɔ na ye ɖɔ: E jlo-un ganji na ma do ɖu dindinwayi we oxwe xe lɔ xami hwɛ kpo na ye a do do a ya na un. ¹⁶ Ɖo ma ɖɔ na mi, un ma gɔ le ɖu ɖe xami xɔn kaka bo na yi sɛxwe gɛ. ¹⁷ E nɛ godo, Jesu sɔ ahan we glasi lɔ bo do okpɛ na Mawu bo ɖɔ: Mi yi a bo nu. ¹⁸ Ɖo un ma gɔ le nu vɛɛn ɖe xami xɔn kaka bo na yi sɛxwe gɛ. ¹⁹ E nɛ godo, e ze kpɔnnɔ bo do okpɛ na Mawu bo ɖɔ: Mi yi a bo ɖu, ɖo e xe lɔ wɛ nyi agbaza ce xena un na mi. Mi ɖu a bo nɔ do flin-un. ²⁰ Lemɔha lɔ ke xena ye ɖu hwedo we onu vɔ, e sɔ ahan lɔ bo ɖɔ: Ahan xe wɛ nyi okan cica yɔyɔ xena un sɔ na mi le ohunce xe kɔn do anyi na mi mɛ. ²¹ Vɔ, mi cɔ miɖe, omɛ xeni na sa un lɔ le okpɔ xa-un le tavo xe kɔn. ²² Ɖo ovi gbɛtɔ tɔn na ku ɖi ɖena ye ɖɔ ɖo ha. Vɔ ahelu na omɛ xeji na oku etɔn na gbɔn. ²³ Wɛ xodotɔ leye wa jɛ otɔ xodo ye ɖe ji bo ɖɔ: Mɛha wɛ le mimɛ bo na sɔ-ɛ sɔ sa? ²⁴ Ojlɛ kpo onu dindɔn de can wa bɛ le xodotɔ Jesu tɔn lɛye we cincin; ɖo omɛ lokpo nɔ sɔ eɖe do mɔ ɖɔ e wɛ hugan omɛ gbokpwe lɛye. ²⁵ Jesu ɖɔ na ye ɖɔ: Axɔlu ogbɛ xe mɛ tɔn lɛye nɔ kpacɛ ganna-ganna do gbɛtɔ lɛye ji, wɛ oga lɛye nɔ jlo ye a nɔ kanfu ye. ²⁶ Vɔ, mye tɔn, ni nɔ kpɔn nyi lemɔha gɛ. Na omɛxo xeni le mimɛ, ni ci ɖi vikpɛvu ha, na mɛjɔmɛ ni ci ɖi alɔ gɔ na mɛ tɔ ha. ²⁷ Omɛ xe flɔn anyi le tavo kɔn kpo omɛ xe nɔ fɔ onuɖuɖu do wa ha mɛ, mɛ wɛ nyi omɛ ɖaxo hugan mɛɖe? E ma nyi omɛ xeni fɔn-anyi le tavo kɔn le wɛɛ? Co, nyɔ un le ɖi omɛsɛntɔ ha le mimɛ. ²⁸ Mye wɛ nyi omɛye xeni nɔ godo na un le tagba ce lɛye mɛ. ²⁹ Nyɔ, na na mi sɛxweto mɛ ɖi ɖena otɛye na-a nyɔ can do ha. ³⁰ Na mye can a do ɖu onu, a bo gɔ nu le tavo ce ji le sɛxwe, a bo wa kpacɛ na akɔta wyawe Izalayɛli tɔn lɛye. ³¹ Jesu ɖɔ na simɔ Piyɛ ɖɔ: Simɔ, Simɔ, cɔ ɖe we ganji. Lɛgba byɔ ogbɛ, wɛ ye ni-i, ni a do zlɛ mi ɖi ɖena ye nɔ zlɛ ojinukun ɖo ha. ³² Vɔ, nyɔ un xo oɖe na we na yise tɔwe a do nɔ ote. Yɔ, hwexenu na a wa lɛkɔ wa ɖye, do glagla lanmɛ na mɛɖyɛ lɛye. ³³ Piyɛ ɖɔ ni-i ɖɔ: Aklunɔ ce, nyɔ un le gbesisɔ bo na do yi ogankpamɛ alo bo na ku xawe. ³⁴ E wɛ Jesu ɖɔ na Piyɛ ɖɔ: Piyɛ, e dye un le ɖɔ na we xɔn, hwɛkpo koklo na do ase le e gbe, a gbɛ-un hwlatɔn kpete. ³⁵ Jesu gɔ kan ye se ɖɔ: Xena un sɔ mi ɖoxlan asigba-alɔgba kɔbɔ ma hɛn, fɔkpa kpo saki kpo ma hɛn, be onuɖe wɛ yi hwedo mi wɛɛ? Ye bo yi ogbe ni-i ɖɔ: Onuti! ³⁶ Wɛ e ɖɔ na ye ɖɔ: Vɔ odin, omɛ xe ni ɖo kɔbɔ, ni sɔ-ɛ, omɛxe ni ɖo saki, ni sɔ-ɛ gba. Omɛxe ni ma ɖo ohi onu awenɔ gɛ, ni bo wa yi sa onu zinzan etɔn a bo do xɔ ohi onu awe nɔ. ³⁷ Ɖo un le ɖɔ na mi xɔn, onu xena ye wlan do guye do na wa cicɛmɛ. Ye xlɛ nyɔ can do nylado nɔ ye mɛ; ɖo onu ni kan-un lɔ, e o ja jijɔ gbe. ³⁸ Xodotɔ etɔn leye ɖɔ: Aklunɔ, dɛnkpwe awe ɖye. E bo ɖɔ na ye ɖɔ: E kpe. ³⁹ Xena ye ɖu onu vɔ, Jesu tɔn bo yi olivu we osoji ɖe e o nɔ bloɖo le osan ha. Onukplanvi etɔn lɛye bo xodwe. ⁴⁰ Xe ye jɛ flɛn-ɛ lɔ vɔ, e ɖɔ na ye ɖɔ: E ya mi xɖɛ na mi a nɔ kpɔn do jɛ tintɛnkpɔn mɛ gɛ. ⁴¹ E nɛ godo, Jesu sɛyi le ye go ovuɖe bo jɛ oklo bo le xo oɖɛ xɔn. ⁴² E le ɖɔ xɔn ɖɔ: Otɔ, na e jlo-e bo ɖe vivɛsise we glasi lɔ sɛ le ɖye, vɔ, ni nɔ kpɔn nyi ojlo ce gɛ; amɔ ojlo tɔwe ni nyi wiwa. ⁴³ E wɛ Mawu we wɛnzangun ɖe wa do hɔnhlɔn lanmɛ ni-i. ⁴⁴ Kpodo vivɛsise xeni le Jesu ji, oɖɛ etɔn gɔ syɛn do e ji kaka odɛn wa le flɛ le goto ni-i xɔn di ohungo ha do ayizanmɔ. ⁴⁵ Xena e xodɛ vɔ, e cite bo wa yi onukplavi lɛye de, bo wa yi mɔ ye le amlɔ mɛ, ɖo ye ci awublamɛ. ⁴⁶ E ɖɔ na ye ɖɔ: Xwɔ, amlɔ wɛ mi le dɔ xɔn, mi cite a bo xoɖɛ na mi a nɔ kpɔn do jɛ tintɛnkpɔn mɛ gɛ. ⁴⁷ Oxo nɛ lɔ wɛ Jesu le ɖɔ xɔn kpoŋu, e jan wɛ omɛ susu ɖe lɛye wa kpodo Juda Isikalyɔtu xeni nyi lokpo le onukplanvi etɔn lɛye mɛ. E wa Jesu ɖe bo kisi ni-i. ⁴⁸ Vɔ Jesu ɖɔ ni-i ɖɔ: Juda, be osi wɛ a ki na ovi gbɛtɔtɔn bo na do sɛ-ɛ? ⁴⁹ Xena onukplanvi xeni le Jesu kɔn lɛye le mɔ onu ni ja jijɔgbe, ye ɖɔ: Aklunɔ, mi a xu ohi ye wɛɛ? ⁵⁰ E wɛ omɛ ɖokpo xu ohi avɔsantɔga we zɔnwavi ɖokpo bo gbo adusimɛ we oto ni-i. ⁵¹ Vɔ Jesu yi oxo bo ɖɔ: Mi gbɔ, ni nɔ lemɔha! Wɛ e wa sɔ oto lɔ sɔ ca. ⁵² Jesu ɖɔ na Mawu we avɔsantɔ ɖaxoye, oxwe cɔtɔye we oga kpodo oto mɛxoye ni wa wiwle-e gbe lɛye ɖɔ: Jaguda wle gbe wɛ mi ja bo do hɛn okpoye kpo dɛnkpweye kpo? ⁵³ Un le okpɔ xami tɛgbɛ le Mawu we oxwe lɔ gbe, mi ka ma wle-un gɛ, a mɔ, ogan mitɔn wɛ xo. Lɛgba zinvlu mɛ nu wɛ e nɔ blo. ⁵⁴ Xena ye wle Jesu, ye kplɛn do sɔn yi avɔsantɔye we oga de. Piyɛ ka le azɔge voo bo do xodo ye. ⁵⁵ ye bo ozo do gaji le oxwe lɔ gbe, omɛye flan-anyi do okpɔ bo do le xu ozo lɔ xɔn. Piyɛ flan anyi le ye mɛ. ⁵⁶ Nyɔnusi ɖe mɔ Piyɛ le ozo lɔ kɔn. E hu nukun wi tlintlin bo ɖɔ: Dahwe xe can nɔ xodo Jesu! ⁵⁷ A mɔ Piyɛ gbɛ bo mɔnu bo ɖɔ: Nahwe, un ma nyɔ-ɛ gɛ. ⁵⁸ Zaande, mɛbu gɔ mɔ-ɛ bo ɖɔ ni-i ɖɔ: Yɔ cangba a le omɛ etɔn lɛye mɛ. Piyɛ gɔ ɖɔ mɔ sin: Ee dahwe un ma le yemɛ gɛ. ⁵⁹ Kaka e na blo ganxixo lokpo mɛbu gɔ jɛ oxo zinzin do e ji ji bo ɖɔ: Un kan do e ji ɖɔ dahwe nɛ can nɔ xodwe ɖo Galile ke wɛ e sɔn. ⁶⁰ Piyɛ ɖo e go ni-i ɖɔ: Dahwe un ma mɔ odo na oxo xena a le ɖɔ xɔn gɛ. Hɔnlokpo kpoŋu koklo do ase le hwexenu na e le mɔ onu xɔn. ⁶¹ Jesu lilɛ okɔ bo kpɔn Piyɛ. E wɛ Piyɛ flin oxo xena Jesu o ɖɔ ni san ɖɔ e bo na gbɛ mye. E ɖɔ ni-i ɖɔ Hwɛkpo koklo na do ase le egbe, a na gbɛ-un hwlatɔn. ⁶² Piyɛ tɔn le oxwe lɔ gbe, bo jɛ avivi ji vivɛe. ⁶³ Omɛye xeni le cɔ Jesu xɔn lɛye, le ko-e xɔn, bo le xo-e xɔn. ⁶⁴ Xena ye cɔn onu nkunmɛ ni-i vɔ ye kan oxo xwi se bo ɖɔ: Ɖɔ omɛ xeni xo-e lɔ na mi. ⁶⁵ Ye kɔn acɔn susu bubu ye do e go. ⁶⁶ Xena a nyi hɔn, otomɛxoye, avɔsantɔ ɖaxoye, kpodo osɛnkplan omɛ tɔye wa kpli, wɛ ye kplan Jesu do wa ohwɛɖɔtɔ ɖaxo lɔ we nukɔn. ⁶⁷ Ye kɛn-ɛ se ɖɔ: Na e nyi ɖɔ yɔ wɛ nyi Klisi lɔ bo ɖɔ na mi. Vɔ e ɖɔ na ye ɖɔ: Na un tlɛ ɖɔ na mi can, mi ma le ɖi onu xɔn gɛ. ⁶⁸ Na un tlɛ kan oxo mi se can, mi ma kpego na ɖo e go gɛ. ⁶⁹ Ovi gbɛtɔ tɔn lɔ na wa flɔn anyi le adusimɛ na Mawu. ⁷⁰ Ye mɛ lɛye kpokpo kan-ɛ se ɖɔ: Be ovi Mawu tɔn wɛ anyi? E yi ogbe na ye bo ɖɔ: E nɛ mi ɖɔ, ⁷¹ Kpoŋu, ye ɖɔ mi ma gɔ ɖo na kan mɛɖe se nɛ do e tesu oo ɖɔ na mi gbɔn onu etɔn mɛ.