¹ Ye mɛ lɛye kpokpo ci ote do okpɔ,bo xodo Jesu do yi Pilati de. ² Ye bo jɛ ɖiɖɔ ni-i ji,bo ɖɔ mɔsin:Mi mɔ daxwe xe,e bo hlu togun mitɔn do e go,bo le ɖɔ ɖɔ ye ni bo nɔ kpɔn su takwa jɔ gɛ na axɔlu ɖaxo Hlɔmatɔn gɛ,e bo gɔ ɖɔ ɖɔ miye bo Klisi,axɔlu lɔ. ³ Pilati bo kan Jesu se ɖɔ:Yɔ wɛ nyi Jwifuye we axɔlu?Jesu bo ɖɔ ni ɖɔ:E lɔ nɛ a o ɖɔ. ⁴ Pilati bo ɖɔ na Mawu we avɔsantɔ ɖaxoye kpodo togun lɔ kpo ɖɔ:Un ma mɔ onu nyinyla ti le dahwe e go gbɔn bo na do da ohwɛ ni-i gɛ. ⁵ Vɔ ye bo mɔ gɔ tɛ oɖɛ e ji,bo ɖɔ:E kplan onu xɔn na omɛye a do fɔn ogu,e bo le blo lemɔha le Jude we oto lɔ mɛ sese,bɛ sɔn Galile we kansinmɛ gbɔɔn do wa jɛ fi. ⁶ Hwexenu na Pilati se oxo nɛ lɔ,e kan se ɖɔ mɔsin:Galile we kansinmɛ wɛ nyi dahwe xe? ⁷ Xena e mɔ ɖɔ Jesu bo sɔn kansin xe mɛ na Elodu kpa acɛ le,e ɖɔ ye ni bo kplan-ɛ do yi e de.Hwenɛnu lɔ can,Elodu bo le Jeluzalɛmu we toxo mɛ. ⁸ Xena Elodu mɔ Jesu,oji ɖaxo ɖe jɔ-ɛ,ɖo sɔn hweɖenu gbɔɔn wɛ e le din na mɔ do nukun go onu xeye e le se do e go lɛye,e bo le ɖo nukun ote xɔn,a do kpɔn onujiwu ɖe xena Jesu nɔ blo lɛye. ⁹ E bo kan oxo susu wi se,vɔ Jesu ka ma ɖo oxo ti e go ni-i gɛ. ¹⁰ Mawu we avɔsantɔ ɖaxoye kpodo osɛnkplan omɛtɔye bo le flɛn,bo le do ohwɛ ni-i xɔn titeŋugbe. ¹¹ Elodu kpodo sɔja etɔnye,bo dovɔn-ɛ,bo ko-e.E nɛ godo,ye bo sɔ awu xeni jɔhun ɖe bo sɔ do ni-i,Elodu bo ɖɔ ye ni bo gɔ dɔn-ɛ do yi Pilati de. ¹² Le gbenɛ lɔ gbe,Pilati xeni nyi kɛntɔ etɔn osan,tlɔ zun hadwe etɔn. ¹³ Pilati bo yɔ Mawu we avɔsantɔ ɖaxoye,otokplantɔ ye kpodo togun lɔ sɔ kpli, ¹⁴ bo ɖɔ na ye ɖɔ:Mi dɔn dahwe e xe do wa-un san,bo ɖɔ na-un ɖɔ e bo le hlu togun lɔ do e go xɔn,e wɛ nyɔ tesu kan oxo wi se le nukunmɛ mɛ mitɔn,un ka ma mɔ onu nyinyla ti le e go bo na do da ohwɛ ni-i gɛ. ¹⁵ Elodu can ma da ohwɛ ɖe ni-i gɛ,ɖo e gɔ lɛkɔ ni-i ɖoxlan mi,mi kpɔn dahwe e xe ma blo onuti xeni jɛxa oku gɛ. ¹⁶ E wɛ zɔn,un na na ogbe wɛ ye na xo-e,e nɛ godo na jo-e do. ¹⁷ Vɔ na ye ka jɛ yi ɖu dindinwayi we oxwe xɔn,Pilati ɖo na ɖe ogantɔ lokpo tɔn. ¹⁸ Omɛye bo le do axwa xɔn do okpɔ ɖɔ:Hu dahwe xe,a bo ɖe Balabasi tɔn,na mi! ¹⁹ Balabasi nɛ lɔ,ye sɔ-ɛ sɔ xɔ do ogankpamɛ osan,do ogu finfɔn do omɛ etɔn wutu,kpodo omɛ huhu we oxo wutu. ²⁰ Pilati bo gɔ ɖɔ oxo na ye ke,ɖo e jlo na jo Jesu do. ²¹ Ye bo le do axwa xɔn ɖɔ:Mi a kɛ-ɛ!Mi a kɛ-ɛ! ²² E gɔ ɖɔ na ye xɔn ɖɔ hwlatɔngɔ ɖɔ:Ohwɛ bɔtɔn wɛ e hu?Un ma mɔ onuti le emɛ xeni jɛ xa oku gɛ.Na jo-e do na mi,na dɔn oto ni-i vɔ. ²³ Amɔ ye le do axwa ɖaxo ɖe xɔn,ɖɔ miye lɛye bo na ka-ɛ.Axwa yetɔn bo hugan Pilati tɔn. ²⁴ Pilati gbɔ yi ogbe na ye. ²⁵ Ye gbɔ jo omɛ hutɔ xeni lɔ do,wɛ e jo Jesu so na ye. ²⁶ Hwexenu na ye le dɔn Jesu do sɔn xɔn,ye kpe dahwe ɖe xeni lɛkɔ sɔn glegbo,dahwe nɛ lɔ bo nɔ nyi Simɔ,e bo nyi Silɛnu we kansinmɛtɔ,ye bo kɔ atinsoga lɔ do kɔlimɛ ni-i,e bo na do hɛn-ɛ le godo na Jesu. ²⁷ Togun lɔ we omɛ susu gbagbagba bo xodo-e,le ye mɛ,nyɔnusi ɖeye le xo alɔ do akɔn nu xɔn,bo le vi avi xɔn,do ota mɛ na Jesu xɔn. ²⁸ Jesu bo li lɛ kpan nukɔntɔ ye bo ɖɔ ɖɔ:Nyɔnusi Jeluzalɛmutɔye tɔn,mi nɔ kpɔn vi avi na-un gɛ,vɔ mi vi avi na miɖe lɛye kpo vikpɛ mitɔn lɛye kpo. ²⁹ Ɖo mi kpɔn,azanye ja,ye bo nɔ ɖɔ ɖɔ:Nyɔnanɔ wɛ nyi ajikponɔye,omɛ xeye ni ma ji ovi gɛ lɛye,ye ka ma na anɔ ovi ɖe gɛ! ³⁰ E wɛ ye jɛ ɖiɖɔ ji na osoye ji ɖɔ:Mi hɔ jɛ mi ji!Ye bo gɔ ɖɔ na oso ovu lɛye ɖɔ:Mi cɔn mi! ³¹ Ɖo na ye le blo lemɔha xɔn na atin mumu xɔn,naɖe wɛ na nyi atin xuxutɔn? ³² Ye bo dɔn danuwatɔ awe ɖe lɛye can do sɔn xɔn,a do wa yi hu ye kpodo Jesu. ³³ Xena ye wa yi jɛ ofi lɔ,ye nɔ yɔ ɖɔ:Taka,sɔja lɛye ka Jesu do atinsoga ji le flɛn,ye bo ka danuwatɔ awe lɛye can le flɛn,lokpo le amyɔ mɛ ni-i,awegɔ bo le aɖusi mɛ ni-i. ³⁴ Jesu bo ɖɔ mɔsin:Atɛye,sɔ ohwɛ sɔ ke ye,ɖo ye ma nyɔ onu xena ye le blo xɔn gɛ,sɔja lɛye bo blo ovoɖiɖe bo do ma onudido etɔnye. ³⁵ Otogun lɔ wa nɔ ote le ofilin, wɛ ye le kpɔn ɖena ohwɛɖɔtɔ lɛye le kɔn acɔn do e go ɖo, bo nɔ ɖɔ: E wlin omɛ ɖe lɛye gan. Na ye nyi Mawu we ovi xo jɔxo, ni bo wlin eɖe gan na mi a kpɔn. ³⁶ Sɔja lɛye can le cɛko xɔn, bo wa sɛkpɔ-ɛ wa na osin vivɛ wi-i, ³⁷ ye nɔ ɖɔ: E ma nyi yɔ wɛ nyi axɔlu Jwifunu lɛye tɔn, bo wlin yɔ ɖe gan. ³⁸ Wɛ ye wa wlan onu winwlan ɖe do ota ligbe ni-i ɖɔ: Axɔlu Jwifunu lɛye tɔn. ³⁹ Omɛ lokpo ɖe ni le ajotɔ lɛye mɛ le zun-xɔn ɖɔ: Yɔ mɛ nyi Klisi lɔ? Bo wlin yɔ ɖe gan a bo wlin mye can gba gan. ⁴⁰ Vɔ, ome awe gɔ lɔ yi ogbe ni-i bo ɖɔ: Yɔ, a ma ɖo obu disi na Mawu gɛ wɛ, yɔ xeni le se awuvɛ lokpo lɛye xa mi xɔn lɔ? ⁴¹ Mye tɔn, mi jɛ xa oba xena mi le ɖu xɔn. Vɔ, omɛ xe ma wa onu winwlan ti gɛ. ⁴² Wɛ e dɔ na Jesu: Flin-un, hwexenu na a na wa gigo tɔwe mɛ. ⁴³ Jesu bo yi ogbe ni-i ɖɔ: Un le ɖɔ oxo jɔxo na we xɔn le egbe, a na nɔ okpɔ xa-un le sɛxwe. ⁴⁴ E o le xo ogan xixo ayizɛn gɔ lɔ xɔn, wɛ zinvlu do le anyizan lɔ kpokpo ji, kaka do wa jɛ ogan xixo cɛnnɛ gɔ lɔ mɛ, ⁴⁵ ohwe bo ci le oji, wɛ avɔ gbo ɖaxo xeni goxɔ lɔ mɛ, e fun do awe, sɔn oji do wa odo. ⁴⁶ Jesu bo do axwa lelele bo ɖɔ: Otɔ, un sɔ gbigbɔ ce sɔ do alɔ tɔwe mɛ. E ɖɔ oxo nɛ lɔ vɔ, e jo gbigbɔ do. ⁴⁷ Sɔja kanwekoga lɔ mɔ onu xeni jɔ lɔ sese kpo, bo jɛ susu kpikpa na Mawu ji bo ɖɔ: Dandanmɛ omɛ nɛ, dodonɔ wɛ e nyi. ⁴⁸ Wɛ omɛ xeni le flin lɛye sese mɔ onu xeni jɔ lɔ sese kpo, ye lɛkɔ do yi oxwe yetɔn lɛye gbe kpo alɔ xixo do akɔnnu. ⁴⁹ Omɛ ni nyɔ Jesu wi-i kpodo nyɔnnusi xeni xodo-e sɔn Galile lɛye le azɔga bo do le kpɔn onu lɛye xɔn. ⁵⁰ E ɖye, omɛ xena ye nɔ ylɔ ɖɔ Jozɛfu, gbɛtɔ dodonɔ bo gɔ nyi omɛ ɖagbwɛ, ⁵¹ e ma vivi ni-i na ohwɛ na ye sɔ kun kpla Jesu gɛ, e ka tɔn sɔn Alimate we kunkan lɔ mɛ le otoxo Jwifunu lɛye tɔn mɛ, e yɔ can le ote kpɔn axɔluta Mawu tɔn lɔ. ⁵² Omɛ nɛ lɔ wa yi Pilati de, bo byɔ ocɔ Jesu tɔn. ⁵³ Wɛ ye ɖe Jesu sɛ le akluzun lɔ ji, bo blɛ do avɔ fɛlɛ-fɛlɛ ɖe mɛ, bo sɔ-ɛ yi do oyɔdo xeni le oso kanmɛ lɔ mɛ, ye ka di omɛ ti do flin kpɔn gɛ. ⁵⁴ Hwexenu na ye le sɔ onu ɖayi na gbɔjwɛzangbe xɔn. ⁵⁵ Nyɔnusi xeye ni zɔn xa Jesu sɔn Galile gbɔɔn ye,bo xodo Jozɛfu do,ye bo mɔ yɔdo lɔ,kpodo ɖena ye sɔ Jesu we ocɔ sɔ do e mɛ ɖo. ⁵⁶ E nɛ godo,ye bo lɛkɔ sɔn yi oxwegbe bo wa yi oxwegbe,bo wa yi din ami sisi kpodo celu hwɛnywɛ kpo bo sɔ ɖo alɔ ji.E wɛ le gbɔjwɛ zanlɔgbe,ye gbɔjwɛ ɖi ɖena osɛn lɔ byɔ ɖo ha.