¹ E wa wa emɛ gbe lokpo Jesu le kplan onu omɛ xeye le goxɔ mɛ bo do le la wɛnɖagbe, vɔsanuxwletɔ kpo osɛnwlantɔ lɛye kpodo omɛ xoxo lɛye kpo le goxɔ lɔ mɛ. ² Ye le ɖɔ na Jesu: Ɖɔ na mi, gbɔn acɛ bɔtɔn mɛ wɛ a nɔ blo onu lemɔha tɔn lɛye ɖe? Alo mɛ wɛ nawe acɛ nɛ lɛye? ³ Jesu le yi ogbe na ye ɖɔ: Na kan oxo lokpo mi se. Mi ɖɔ naŋu, ⁴ Osindota Jaan tɔn sɔn oji alo gbɛtɔye de? ⁵ Ye wa le din ohwɛ jijwɛ le ye ɖe lɛye mɛ ɖɔ: Na mi ka ɖɔ oji ɖi, e na ɖɔ: A ni wutu wɛ mi ma ɖi onu gɛ? ⁶ Wɛ na mi ka gɔ ɖɔ: Gbɛtɔ lɛye, togun lɔ na mɛ okpɛn na mi ɖo ye nywɛ ɖɔ ɖɔɖanyiɖɔtɔ bɛ Jaan bo nyi. ⁷ Ye bo wa le ɖo e go na Jesu ɖɔ mye bo ma nyɔn fi na e bo sɔn gɛ. ⁸ Jesu le ɖɔ na ye ɖɔ: Yɔn can gba ma jan ɖɔ gbɔn acɛ xemɛ na un le blo onu nɛ lɛye na mi xɔn gɛ. ⁹ Jesu le do olo xena togun lɔ ɖɔ: Dahwe ɖe wa do viŋu bo ze xɔ nyan na viŋglelɛtɔ lɛye bo zɛhwɛn yi oto bu mɛ na azan didɛn. ¹⁰ Le nukun yiya hwenu e sɔ mɛsentɔ lokpo sɔ xɔ ɖohlan viŋuglelɛtɔ lɛye na ye ni do na viŋu we sisɛn lɛye wi. Viŋuglelɛtɔ nɛ lɛye xo mɛsɛntɔ lɔ bo nyɛ asigba alɔgba. ¹¹ E gɔ sɔ mɛsɛntɔ bu doxlan wɛ ye gɔ xo e yɔ cangba, bo do unyan wi, bo yɛn asigba alɔgba . ¹² E gɔ sɔ omɛ atɔn gɔ ɖoxlan wɛ ye gɔ xo-e bo do fɔku wi. ¹³ Caca xe tɔn yi vŋugle lɔ wa le ɖɔ: A mi wɛ na blo? Na ze ovi ce vɛna-vɛna sɔ ɖoxlan, vlavo ye to ɖo sisi ni-i ma. ¹⁴ Amɔ xena viŋuglelɛtɔ lɛye wa mɔ-ɛ, ye le ɖɔ le ye ɖe lɛye mɛ ɖɔ: Oguɖutɔ lɔ ɖye wa, mya wle na ogu ɖudu lɔ ni nyi mitɔn. ¹⁵ Ye wa ɖe sɛ le viŋu lɔ mɛ bo wle bo sɔ hu. Odin a ni wɛ viŋu we cica lɔ na blo naye? ¹⁶ E na wa bo na wa hu viŋglelɛtɔ nɛ lɛye, bo na wa ze viŋu lɔ sɔ xɔ na mɛ bu. Xena ye se oxo nɛ lɛye godo, ye ɖɔ: Mawu ni nɔ kpɔn ɖike gɛ. ¹⁷ Amɔ Jesu kpɔn ye bo ɖɔ: A ni wɛ onu wiwalan xe lɔ ɖɔ? Okpɛn xena oxɔgbatɔ lɛye gbɛ wa tlɔzun okpɛn adodwe? ¹⁸ Omɛ ɖekpokpwe ni na jɛ e ji na hannya , wɛ omɛ xe ye ji e na hɔ jɛ na gba. ¹⁹ Lemɔhake avɔsantɔ kpodo osɛnwlantɔ lɛye le din na wle Jesu le ganxixo nɛ lɔ mɛ xɔn lokpo do ye nywɛ ɖɔ mye xo bɛ bo le ɖɔ xɔn. Amɔ ye le ɖibu na togun lɔ. ²⁰ Ye wa gbatamɛ kaka bo wa sɔ onu na mɛsaɖutɔ lɛye na ye ni do dahwɛ agwɛ-agwɛ na Jesu a bo do mɔntɛ do sɛ na oto ga lɔ ²¹ Ye wa le kan Jesu se ɖɔ: Cica mi ywɛn ɖɔ a nɔ ɖɔxo bo nɔ kplan onu omɛ gbɔn jijlo ji, wɛ mɛti mɔ nɔ dobu nawe gɛ, wɛ a nɔ kplan onu omɛ gbɔn Mawu we osɛn lɔ ji le oxojɔxo mɛ. ²² E jɛ xa a lo e ma jɛ xa na mya do su otkwa na Seza? ²³ Vɔɔ Jesu mɔ nukunnu jɛ ayxa ye tɔn lɛye go bo le ɖɔ na ye ɖɔ: ²⁴ Mi xlɛ un ogankwa lokpo. Mɛ we oyɛ kpodo nyikɔ kpo wɛ ye wlan do e ji? Ye wa yi ogbe ɖɔ: Seaz. ²⁵ Jesu le ɖɔ na ye ɖɔ: E nɛ mi ze onu ni nyi Seza tɔn sɔ na Seza bo sɔ Mawu tɔn sɔ na Mawu. ²⁶ Ohwɛdo na omɛtɔ nɛ lɛye ma gɔ wa mɔ oxo ɖɔ do oxo gio ɖe na Jesu le togun lɔ nukɔn gɛ. Oxo ɖe go Jesu tɔn lɔ kpaca omɛ kpokpo wɛ ye ma gɔ ɖɔ xoti gɛ. ²⁷ Hwexenu na Sadusitɔ ɖe lɛye ni nɔ fɔn sɔn ku bo ma le gɛ wa sɛkpɔ Jesu bo le kan oxo xe wi se ɖɔ: ²⁸ Cica e ɖye Moyizi wlan na mi: Na nɔvinɔ ɖe ku wɛ asyɛ ma ɖo ovi ti ni-i gɛ, nɔvyɛ bu hɛn e na ze yɔnnu lɔ bo na ji ovi lokpo le e go na nɔnvyɛ xeni ku lɔ. ²⁹ Vɔ e ka ɖo nɔvi canwe, omɛ titan tɔn lɔ ɖe nyɔnnu bo ma ji ovi ti gɛ bo ku. ³⁰ Omɛ awe gɔ lemɔhake pɛpɛpɛ, wɛ omɛ atɔn can nyi do lemɔha gba. ³¹ Wɛ e ci do lemɔha na ye mɛ canwe lɛye wɛ ye ma ji ovi hwɛ kpo do ku gɛ. ³² Zan ɖe, nyɔnnu lɔ can ku gba. ³³ Le fɔn sɔn ku hwenu, mɛ tɔn wɛ na nyi yɔnnu lɔ le ye omɛ lɛye sese kpo mɛ ? Ɖo ye omɛ canwe lɛye kpokpo wɛ ze do blo nyɔnnu. ³⁴ Jesu le ɖo e go ni-i xɔn ɖɔ: Anyihɔn mɛnu lɛye wɛ nɔ ɖe ye ɖe bo nɔ ze ye ɖe sɔ na alɔ wiwle. ³⁵ Amɔ ye mɛ ni na wa mɔ hwɛ jijwɛ le fɔn sɔn oku godo mɔ nɔ wle alɔ alo bo nɔ ze ye ɖe sɔ xɔ na alɔ wiwle gɛ. ³⁶ Ye mɛ nɛ lɛye ma kpo gɔ ku gɛ ɖo ye na wa ci ɖi onu lokpo lɛye xa wɛnzangun Mawutɔn lɛye, wɛ ye na nyi Mawu we vi ɖi fɔn sɔn oku we vi ha. ³⁷ Omɛ kuku lɛye ni fɔn Mɔyizi tesu can o xlɛ le ozo hɛhɛ ni nɔ ji nu, e ywɛ ɖɔ Mawu Ablaxamutɔn, Mawu Izakitɔn kpodo Mawu Jakɔbutɔn. ³⁸ Odin, Mawu ma nyi Mawu omɛ kuku lɛye tɔn gɛ, amɔ omɛ xeni le ogbɛ lɛye tɔn wɛ, ɖo ye mɛ kpokpo le gbɛ gbɔn e mɛ.. ³⁹ Osɛnwlantɔ ɖe lɛye wa yi gbe ɖɔ: Cica a ɖɔ xo ganji. ⁴⁰ Wɛ ye ma gɔ kpego bo gɔ kan oxo bu ti wi se gɛ. ⁴¹ Jesu ɖɔ na ye ɖɔ: Na ɖe wɛ ye nɔ ɖɔ do ɖɔ Klisi lɔ bo nyi Davidi we vyɛ do? ⁴² Davidi tesu ɖɔ le hanji wema mɛ: Aklunɔ ɖɔ na Aklunɔ ce flɔn anyi le aɖusixwe ce, ⁴³ kaka na ma wa ze kɛntɔ tɔwe lɛye do blo afɔɖizɔnnitɛn ce. ⁴⁴ Davidi nɔ yɔ Klisi ɖɔ: Aklunɔ. Odin na ɖe wɛ e gɔ nyi Davidi we vyɛ ɖo? ⁴⁵ Hwexenu na togun lɔ kpokpo le ɖoto wi e le ɖɔna devi zɔnwatɔ etɔn lɛye ɖɔ: ⁴⁶ Micɔ miɖe do osɛnwlantɔ nɛ lɛye ni nɔ nyi wan na osa ɖiɖi kpodo awu gaga le okɔ na ye kpo , bo na nyi owan na ogbe dido gbɔnvo le hwɛnɔtin lɛye mɛ, bo nɔ din tɛnmɛ titan le go xɔ lɛye mɛ kpodo agɔ lɛye ji kpo. ⁴⁷ Ye nɔ wa gba asu kusinɔ lɛye we oxwe, bo nɔ vlɛ oɖɛ gaga xo tɔ. Ye na mɔ hwɛdida daxo.