¹ Jesu ɖyɛ Jeliko,bo gbɔn toxo lɔ mɛ wayi. Dahwe ɖe le toxo lɔ mɛ,ye bo nɔ yɔ-ɛ ɖɔ ² Zace,dahwe e nɛ lɔ wɛ nyi oga na takwajɔtɔye,e bo nyi dɔkunnɔ. ³ E jlo na mɔ omɛ xeni nyi Jesu lɔ,vɔ e ma kpego bo mɔ-ɛ gɛ,ɖo gbɛtɔ susu wɛ le godo na Jesu,e yɔ bo gɔ hwete. ⁴ E wɛ e do wezun do yi nukɔn,bo wa yi xlɛ atin ɖe ji,a do kpego mɔ Jesu lɔ,ɖo flɛn wɛ e na gbɔn a do wa yi. ⁵ Xena Jesu jɛ ofi xena Zace le lɔ,e ɖe okpɔ kpɔn oji,bo ɖɔ ni-i ɖɔ mɔsin:Zace,jɛ ote bleŋu,ɖo un le din na nɔ oxwe tɔwe gbe. ⁶ E wɛ Zace jɛ ote bleŋu,bo yi Jesu kpo awajijwɛ kpo. ⁷ Xena omɛye mɔ ɖo lemɔha,ye mɛ lɛye kpokpo jɛ oxo ɖiɖɔ ji,bo ɖɔ mɔsin:Mi kpɔn onu nyinylawatɔ we oxwegbe wɛ e wa yi! ⁸ Zace wa nɔ ote le nukunmɛ na Aklunɔ lɔ bo ɖɔ ni ɖɔ:Aklunɔ kpɔn,na ma dɔkun ce ɖo awe,a bo sɔ akpa lokpo na ayanɔye,omɛ xeye na un tafu ye,un na sɔ kɔbɔ xena un yi le yesi lɛye we donu ɛnɛ a do su axɔ ye. ⁹ E wɛ Jesu ɖɔ ni ɖɔ:Le egbe,omɛ xeye ni le oxwe xe gbe lɛye,ye mɔ hwlɛngan,ɖo yɔ can Ablaxamu we jijimɛvi wɛ a nyi. ¹⁰ Ɖo ovi gbɛtɔtɔn lɔ wa,a do din omɛ xeye ni bu lɛye,a do hwlɛn ye gan. ¹¹ Xena omɛye le se oxo e nɛ lɛye xɔn,Jesu gɔ do olo ɖe na ye,ɖo e le sɛkpɔ Jeluzalɛmu xɔn,omɛye bo nu-i ɖɔ odin bɛ Mawu bo na ɖe axɔluɖuɖu etɔn lɔ sɔ xɔ xlɛ ha. ¹² E wɛ e le ɖɔ na ye xɔn ɖɔ:Dahwe ɖe tɔn sɔn axɔluye we xwedogbe,e wɛ le gbelokpo,e yi oto dindɛn ɖe mɛ,na ye a wa yi sɔ-ɛ do ɖo axɔlu,e nɛ godo,e na lɛkɔ wa oto etɔn mɛ. ¹³ Keŋu hwɛkpo e na sɔn,e yɔ ozɔnwavi etɔn awo,bo sɔ sika we kɔbɔ,lokpo-lokpo na ye,bo ɖɔ na ye ɖɔ ye ni bo do le do ajɔ xɔn na miye a bo wa. ¹⁴ Vɔ oto etɔn mɛ tɔye,bo gbɛ owan ni-i,e wɛ ye sɔ afɔsɔɖote yetɔnye ɖoxlan,na ye a do wa yi ɖɔ na omɛ xeni sɔ-ɛ do ɖo axɔlu lɔ ɖɔ mɔsin:Mi ma jlo na ni a ɖu axɔlu le mi nu gɛ. ¹⁵ Coganco ye bo sɔ-ɛ do ɖo axɔlu,xena e lɛkɔ,ozɔnwatɔ etɔn xeye na e ma kɔbɔ na lɛye,ni a do kpɔn ale xena ye ɖu. ¹⁶ Omɛ tintantɔn lɔ wa bo ɖɔ:Aklunɔ,sika kɔbɔ awo wɛ un ɖu ɖo lokpo lɔ ji. ¹⁷ E bo ɖɔ ni ɖɔ:E jɔhun,ozɔntɔ ganji wɛ a nyi,xena a kpego nɔ gbeji le onu ovuɖe mɛ,un sɔ we do ɖo oga le toxo awo nu. ¹⁸ Omɛ awegɔ wa,bo ɖɔ:Aklunɔ,sika kɔbɔ atɔɔn wɛ un ɖu do lokpo lɔ ji. ¹⁹ E bo gɔ ɖɔ ni ɖɔ:Yɔ can un sɔ we do ɖo oga na toxo atɔɔn. ²⁰ Ozɔnwatɔ bu gɔ wa,bo ɖɔ:Aklunɔ sika kɔbɔ tɔwe ɖiye,un bu-i do avɔ mɛ,bo sɔ xɔ hwla ɖo anyi na we. ²¹ Un le ɖi obu na we xɔn,ɖo ohunnylatɔ wɛ a nyi,onu xena a ma sɔ ɖo ofi ɖe gɛ,wɛ a nɔ yi sɔ,jinukun xena a ma do dɛ wɛ a nɔ wɛ yi ɖe. ²² Aklunɔ lɔ bo ɖɔ ni ɖɔ:Ozɔnwatɔ nyinyla wɛ a nyi,oxo xena yɔ tesu o ɖɔ,wɛ na do da ohwɛ na we,a nyɔ-ɛ ganji ɖɔ un bo nyla ohun,onu xena un bo ma do ɖo ofi ɖe gɛ,flɛn bɛ un bo nɔ ɖe le,ojinukun xena un ka ma do gɛ,flɛn bɛ un bo nɔ ɖe le. ²³ Odin le,a ni wɛ zɔn a ma do sɔ kɔbɔ ce do kɔbɔɖoxwe ɖe gɛ,e nɛ na un wa lɛkɔ wa vɔ,na wa yi kpodo jivi kpo gɛ? ²⁴ E bo ɖɔ na omɛ xeye ni le ofi lɛye ɖɔ:Mi yi kɔbɔ lɔ le e si,a bo sɔ xɔ na omɛ xeye ni ɖo sika kɔbɔ awo lɔ. ²⁵ Ye bo ɖo e go ni-i ɖɔ:Aklunɔ sikakɔbɔ lɔ,awo o le e yɔ si. ²⁶ Aklunɔ lɔ bo ɖɔ na ye ɖɔ:Omɛ xe si na onu le,ye na gɔ ni-i kpe,vɔ omɛ xeni ma ɖo onu ɖe gɛ,ye na gɔ yi ovu lɔ le e si. ²⁷ Xeni nyi kɛntɔ ce lɛye tɔn,ye mɛ xeye ni ma jlo na ma ɖu oga le yenu lɛye gɛ,mi dɔn ye do wa na-un,a bo gbo ohlo na ye le nukun mɛ na-un. ²⁸ Xena Jesu ɖɔ oxo nɛ lɔ vɔ,e jɛ nukɔn na togun lɔ,a do sɔn yi Jeluzalɛmu. ²⁹ Hwexenu na e le sɛkpɔ Bɛtifaje kpodo Betani xɔn,le akpa na oto xeji na olivutinye le,e ɖo onukplanvi etɔn awe ɖoxlan: ³⁰ Bo ɖɔ mɔsin:Mi yi otota xeni le nukɔn nɛ mɛ,na mi ɖyɛ e mɛ,mi na mɔ osɔkɛtɛvu ɖe,xeji na omɛ ti ma sɛkpɔ gɛ,mi tlun-i,a bo sɔ-ɛ wa. ³¹ Na omɛ ɖe kan mi se ɖɔ a ni bɛ bo zɔn miye bo do le tlun-i xɔn,mi ɖɔ ni-i ɖɔ:Aklunɔ lɔ bɛ bo ɖo ohyan etɔn. ³² Omɛ xeye na e sɔ ɖoxlan lɛye,mɔ onu lɔ pɛpɛpɛ ɖi ɖena Jesu ɖɔ na ye ɖo ha. ³³ Xena ye ye le tlun osɔkɛtɛvu lɔ xɔn,omɛ xeye tɔn ni nyi lɔ le kan yese ɖɔ:A ni wɛ zɔn mi do le tlun osɔkɛtɛvu lɔ xɔn? ³⁴ Ye bo ɖo e go ni-i ɖɔ:Aklunɔ lɔ wɛ ɖo ohyan etɔn. ³⁵ Ye hɛn osɔkɛtɛvu lo wa na Jesu,xena ye fɔ awu yetɔnye ɖo e ji vɔ,ye kɔ Jesu do e ji. ³⁶ Xena Jesu lɔ le sɔn xɔn,omɛye le tɛ awu yetɔnye do omɔ lɔ ji xɔn. ³⁷ Hwexenu na Jesu le sɛkpɔ Jeluzalɛmu lɔ xɔn,bo jɛ ote sɔn oto xeji na olivuntinye le,onukplanvi susu gbagbagba mɔ jijwɛ ɖaxo ɖe,ye bo jɛ Mawu kinkanfu ji,kpodo axwa kpo,do onu jiwu kpokpo xena ye mɔ ye go. ³⁸ Ye bo le ɖɔ xɔn ɖɔ:Mawu ni do na axɔlu xeni ja lɔ mɛ le Aklunɔ Mawu lo we nyikɔ mɛ!Fifa le sɛxwe,gigo na Mawu le ojixwe! ³⁹ Falizitɔ ɖe lɛye le togun lɔ mɛ,bo ɖɔ na Jesu ɖɔ:Onukplan omɛtɔ,ɖe ogbe na onukplanvi tɔwe lɛye an ye a bɔ onu. ⁴⁰ Jesu ka ɖo e go na ye ɖɔ:Un le ɖɔ na mi xɔn:Na ye gɔ do bɔ onu can,okpɛnye na do axwa. ⁴¹ Hwexenu na Jesu sɛkpɔ Jeluzalɛmu we toxo lɔ,bo kpɔn-ɛ ɖoxlan,e vi avi do ota ni-i. ⁴² E bo ɖɔ ɖɔ:Awo!Jeluzalɛmutɔye,e do nyi ɖɔ miye can,o do nyɔ ɖena mi na blo ɖo,a do mɔ fifa le egbe wɛɛ!Vɔ oo!E ɖiye ye sɔ hwla do nukun mitɔn lɛye. ⁴³ Ɖo azan ɖe lɛye ja,kɛntɔ mitɔn lɛye na do adokpa lɛdo mi,ye na tlɔ do toxo lɔ,bo na jan mi gbɔn ofi lɛye sese. ⁴⁴ Ye na va miye kpodo toxo lɔ kpo sesese,ye ka ma le jo okpɛn ɖe do ɖeji gɛ,ɖo mi ma nyɔ hwexenu na Mawu wa bo kpe do mi go gɛ. ⁴⁵ Jesu ɖyɛ Mawu we oxwe lɔ gbe,bo jɛ omɛ xeye ni le sa onu xɔn ye,nyinya ji. ⁴⁶ E bo ɖɔ na ye ɖɔ:Ye wlan le Mawu we oxo lɔ mɛ ɖɔ:Oxwe ce gbe,oɖɛxotɛn wɛ,vɔ miye bo wa sɔ do ajotɔye we okplitɛn. ⁴⁷ Ayihɔngbe-ayihɔngbe,Jesu nɔ kplan onu omɛye xɔn le Mawu we oxwe lɔ gbe,avɔsantɔ ɖaxoye,osɛnkplan omɛtɔye kpodo otomɛxoye jlo an hu-i. ⁴⁸ Vɔ ye ma nyɔ ɖena ye na blo ɖo gɛ,ɖo togun lɔ kpokpo wɛ le ɖo oto-e xɔn vivɛɖe.