¹ Kpoŋu, Jesu do olo xe na ye do gbɔn dena ye na nɔ xo oɖɛ maɖote-maɖote ɖo. ² E ɖɔ: Le oto ɖe mɛ, ohwɛɖɔtɔ ɖe le, e mɔ nɔ ɖo sisi na Mawu gbɔɔn do jɛ gbɛtɔ ji gɛ. ³ Le oto lɔ mɛ, nahwe asukusi ɖe le, bo nɔ ɖɔ na ohwɛɖɔtɔ lɔ ɖɔ: Da ohwɛ jijɔhun na-un le kɛntɔ ce lɛye we nukɔn. ⁴ Sɔn hweɖe hwenu gbɔɔn, wɛ ohwɛɖɔtɔ lɔ nɔ gbɛ. Vɔ e nɔ wa ɖɔ le e ɖe mɛ ɖɔ: Ɖi ɖena un mɔ nɔ ɖo sisi na Mawu bo mɔ nɔ gɔ si gbɛtɔ can ɖo gɛ, ⁵ E le lemɔha co, xena nahwe xe le do tagba na un xɔn zɛ ojlɛ go, be nyɔ na da ohwɛ jijɔ lɔ ni-i, hwenɛnu, na do mɔ vivo le e si. ⁶ Kpoŋu, Aklunɔ ɖɔ: Mi se onu xena ohwɛdatɔ dodo ji ma nɔ tɔ lɔ ɖɔ. ⁷ Mawu ma kpego bo na do da ohwɛ jijɔ na omɛ ɖiɖe etɔn xe nɔ le oxlɔ-ɛ le okle kpodo ozan kpo? Alo e ma ɖebla le kpɔn e ɖe xɔn gɛ wɛɛ. ⁸ Nyɔ un le ɖɔ na mi xɔn ɖɔ: E bo na da ohwɛ jijlɔ ni-i bleŋu. Lemɔha lɔke na ovi gbɛtɔtɔn, Jesu wa lɛkɔ waa, be e ka na mɔ yise le anyizan lɔ ji?. ⁹ Wɛ e gɔ do olo xe do omɛ xeni oo nɔ sɔ eɖe do mɔ ohwɛjijɔnɔ bo nɔ le ko oha etɔn tɔ ye xɔn. ¹⁰ Omɛ awe yi pɖɛ xixo gbɛ le cɔci xomɛ omɛ tintantɔn nyi Falizitɔ, omɛ awe gɔ bo nyi ¹¹ Falizitɔ lɔ cite bo jɛ oɖɛ xixo ji ɖo le ha xɔn: Mawu, un do okpɛ na we ɖɔ nyɔ un ma le ɖi mɛɖyɛ lɛye ha gɛ xeni nyi ajotɔ, dodo ma blotɔ, galɔtɔ, alo awe gɔ ce xe ha gɛ. ¹² Un nɔ bla onu hwlawe le kɔsiɖa lokpo mɛ bo nɔ gɔ na maɖo awo ce lɛye sese. ¹³ Vɔ, ganjɔ jɔtɔ lɔ makpego kɔ okɔ etɔn do yi oji tesu gɛ, e le xoɖɛ xɔn ɖɔ: Mawu ce, ku nublawu na un ɖo ohwɛ hutɔ wɛ un nyi. ¹⁴ Un le ɖɔ na mi xɔn ɖɔ: Omɛ xe mɔ ohwɛ sɔ ke yi hugan Falizitɔ ɖo omɛ xe nɔ ze eɖe do yi oji, ye na sɔ-ɛ do ji odo, vɔ omɛ xe nɔ ze eɖe do yi odo, ye na sɔ-ɛ do yi oji. ¹⁵ Omɛ ye can le hɛn vikpɛ yetɔn ye do wa na Jesu na ni-a do ɖo alɔ yego, vɔ xwe dotɔ Jesu tɔn lɛye nɔ le yan ye xɔn, wɛ ¹⁶ Jesu wa yɔ ye bo ɖɔ na ye ɖɔ: Mi na omɔ vikpɛvu lɛye can na ye a wa dye. Mi nɔ kpɔn gɔ su omɔ do ye gɛ ɖo sɛxwetomɛ lɔ ci ɖi omɛ xena ɖo ninɔmɛ ɖi vikpɛvu ha. ¹⁷ Jesu yi oxo bo ɖɔ: Le oxojɔxo mɛ un le ɖɔ na mi xɔn ɖɔ omɛ ɖekpokpwe ni ma yi sɛxwetomɛ ɖi vikpɛvu ha gɛ, ma le ɖyɛ e mɛ xɔn gbeɖe gɛ. ¹⁸ Jwifunuye we oga ɖe kan oxo Jesu se bo ɖɔ: Cica jijɔhun, a ni ha wɛ na blo a do yi sɛxwetomɛ? ¹⁹ Jesu ɖo e go ni-i ɖɔ: A ni wutu wɛ a yɔ-un ɖɔ cica jijɔhun? Mawu lokpo gee jan wɛ nyi omɛ jijɔhun. ²⁰ A o nyɔ osɛn lɛye wi: A ma le lɔ oga xɔn gɛ, a ma le hu omɛ xɔn gɛ, a ma le jɛ ajo xɔn gɛ, a ma le ɖe kunnu agɔ-agɔ do mɛɖe go xɔn gɛ, a ɖo bubu na atɔwe kpo anɔwe kpo. ²¹ Jwifuye we oga lɔ ɖɔ: sɔn vikpɛvu mɛ ce gbɔɔn wɛ un boo le nyi osɛn nɛ lɛye sese xɔn. ²² Xena Jesu se oxo ni ɖɔ nɛ lɔ, e ɖɔ ni-i ɖɔ: Odin, e kpo onu lopko na we, a sɔ ɖɔkunnu tɔwe lɛye sese sɔ sa a bo ma kɔbɔ lɔ na ayanɔ lɛye, hwe hɛnu a do dɔkunnu susu le sɛxwetomɛ. A blo lemɔha vɔ, a wa dye a bo xodo-un. ²³ Vɔ xena ɖahwe nɛ lɔ se lemɔha, e ci alwɛmɛ bo jɛ ayi kinkan ji ɖo e jɛ dɔkun taŋu. ²⁴ Kpowun, xena Jesu mɔ-ɛ le alwɛ mɛ e ɖɔ: E na vɛ awu na dɔkunnɔye na ye a do yi sɛxwetomɛ! ²⁵ E na fa na osɔkpotɔnɔ na do gbɔn winnyɛ we otlonu hugan dɔkunnɔ na do ɖyɛ sɛxwetomɛ. ²⁶ Omɛ ɖekpokpwe xeni se oxo nɛ lɔ jɛ ɖiɖɔ ji ɖɔ: Omɛ bɔtɔn ha wɛ na kpego yi sɛxwetomɛ? ²⁷ Jesu yi ogbe na ye bo ɖɔ: Onu xeni glo gbɛtɔ leye, ma glo biblo na Mawu gɛ. ²⁸ Piyɛ yi oxo bo ɖɔ: E ɖye mye mi jo onu lɛye kpokpo do, bo xodo we. ²⁹ Jesu ɖɔ na ye ɖɔ: Le oxojɔxomɛ un le ɖɔ na mi xɔn omɛ ɖekpokpwe xeni jo asyɛ, oxwe etɔn, nɔvyɛ lɛye omɛjitɔ etɔn lɛye alo vikpɛ etɔn ye do do nyɔ wutu. ³⁰ Mawu na ni-i onu xeni jodo lɛye donu nɛmu-nɛmu ɖe le ogbɛ xe mɛ, a bo gɔ ni-i ogbɛ mavɔ-mavɔ le ogbɛ xeni jamɛ. ³¹ Xena e kpli xwedotɔ wyawe lɛye vɔ, e ɖɔ na ye ɖɔ: E ɖye mi jlɔ Jeluzalɛmu wɛ onu xena ɖɔɖanyiɖɔtɔ lɛye wlan do ovi gbɛtɔ tɔn lɔ go, na wa cicɛ mɛ. ³² Ɖo ye na sɔ-ɛ sɔ sa do kosi lɛye, wɛ ye na cɛ-ɛ ko bo na wa tun otan alo okpɛnɖɔ do e go. ³³ Na ye wa xo-e vɔ, ye na wa hu-i, wɛ azan atɔngɔ gbe e na fɔn sɔn oku. ³⁴ Ye ma mɔ do na oxo nɛ lɛye ti gbɔɔn bo do nyɔ onu xeni na jɔ lɛye ti gɛ. ³⁵ Xena Jesu le sɛkpɔ Jeliko xɔn nukun gbigbanɔ ɖe le anyi fin flɔn le omɔto, ³⁶ Xena e se gbɛtɔ susu we ogbe wa le din xɔn, e wa din odo na onu xeni le jɔ xɔn. ³⁷ Ye bo ɖɔ ni-i ɖɔ Jesu Nazalɛti tɔn bɛ bo wa le sɔn xɔn. ³⁸ E jan wɛ nukun gbigbanɔ lɔ djɛ axwa dido ji bo ɖɔ: Jesu, Davidi we ovi ku nublawu na un. ³⁹ Omɛ xe ye nɔ nɔ nukɔn na nukun gbigba nɔ lɛye le ɖɔ na ye ɖɔ ye ni bo bɔnu. Vɔ, odin gbɔn wɛ e gɔ le daxwa do e ji ɖɔ: Ovi Davidi tɔn, ku lɛblanu na-un. ⁴⁰ Jesu se axwa gbe lɔ bo nɔte ɖɔ ye ni bo dɔn-ɛ do wa. Xena nukun gbigba nɔ lɔ wa, Jesu ɖɔ ni-i ɖɔ: ⁴¹ A ni a le din na ma blo na we? Wɛ nukun gbigba nɔ lɔ ɖɔ: Aklunɔ, un le din na mɔ onu. ⁴² Jesu ka ɖɔ ni-i: Bo mɔ onu din. Onuɖiɖi tɔwe gbɔ azɔn na we. ⁴³ Le otin do lokpo lɔ mɛ, e mɔ onu bo xwedo Jesu bo jɛ susu kpikpa na Mawu ji. Otgun lɔ kpokpo mɔ onu jiwu e nɛ bo jɛ Mawu kpikpa ji.