¹ Jesu le ɖɔ na xodotɔ etɔn lɛye ɖɔ,"Dahwe dɔkunnɔ ɖe le,bo onu ji kpɔn tɔ ɖe,omɛ ye bo wa jɛ ohwɛ ni ɖɔ onu ji kpɔn tɔ bo le zan onu etɔn do ɖejan-ɖejan mɛ xɔn. ² E bo nyɔ-ɛ bo ɖɔ ni ɖɔ:Oxo bɔtɔn ha wɛ nyi na un le se do guwe xɔn?Wa jo kɔnŋuta na-un ɖo ɖena azan onu lɛye ɖo,a ma kpego na gɔ nyi onu jikpɔntɔ ce ba gɛ. ³ Onujikpɔntɔ lɔ bo ɖɔ le eɖe mɛ ɖɔ:Xwetɔ ce ma gɔ jlo ɖɔ ma bo nɔ onu etɔn lɛye nu gɛ,na ɖe na blo ɖo odin?Ogle wɛ na wɛ yi lɛ?Un ma kpego gɛ,onu byɔ ɖu tlɔ wɛ na tlɔ zun?Un nya na wa-un. ⁴ Un nyɔ onu xena na blo,e nɛ na xwetɔ ce nya-un le ozɔn mɛ,omɛ ɖe lɛye na le abo yi-un do oxwe yetɔn gbe. ⁵ E we e yɔ omɛ xeye ni ɖu axɔ do xwetɔ etɔn lɛye ɖe bɔ do ɖego,bo ɖɔ na omɛ tintantɔn ɖɔ:Axɔ nɛmu wɛ a ɖu do xwetɔ ce? ⁶ Omɛ lɔ bo ɖɔ ni ɖɔ:Ami ogba kanweko we axɔ,onu jikpɔntɔ lɔ bo ɖɔ ni ɖɔ,yi wema tɔwe flɔn-anyi ble-un a bo wlan ogba kanɖe awo. ⁷ E gɔ ɖɔ na omɛ bu ɖɔ:Yɔ ɖe axɔ nɛmu wɛ a ɖu,ome nɛ lɔ bo ɖɔ ni ɖɔ:Jinukun dɔkpo kanweko we axɔ wɛ un ɖu,e bo ɖɔ ni ɖɔ:A bo wlan dɔkpo kanwe. ⁸ Xwetɔ lɔ bo kanfu onujikpɔntɔ ogbeji ma nɔ tɔ lɔ do bibi etɔn wutu.Ɖo ogbɛ xemɛ we vikpɛ lɛye ye nɔ bi le onu wiwa yetɔn ye mɛ do kpan nukɔn yetesu ye hugan weziza mɛ we vikpɛye. ⁹ Jesu bo ɖɔ,e wɛ nyɔ un le ɖɔ na mi xɔn,mi zan dɔkunnu xena mi ɖo dogbɔn omɛ biblɛ nu mɛye,a do ɖo hadwe ye,e nɛ na dɔkunnu nɛ lɛye wa vɔ,Mawu bo na yi do nɔtɛn mavɔ-mavɔ mɛ. ¹⁰ Omɛ xeni nɔ nɔ ogbeji le onuvu mɛ,e nɔ gɔ nɔ ogbeji le onu ɖaxo mɛ.Lemɔha ke,omɛ xeni nyi omɛ blɛɖu tɔ le onuvu mɛ,e nɔ gɔ blɛ omɛ ɖu onu ɖaxo mɛ. ¹¹ Na e nyi ɖɔ mi ma kpego nɔ ogbeji le dɔkunnu xena mi ɖo dogbɔn omɛ biblɛɖu mɛ gɛ,mɛ wɛ na ɖe oji do mi go?Abo do sɔ dɔkun jɔ dɔkun sɔ do asi na mi? ¹² Na mi ma kpego nɔ ogbeji le omɛ bu ye we onu mɛ gɛ,mɛ wɛ na sɔ onu xeni nyi miye tesu tɔn sɔ xɔ na mi? ¹³ Ozɔnwatɔ ti ma kpego an wa ozɔn na xwetɔ awe gɛ,ɖo e na gbɛ owan omɛ lokpo a bo nyi owan na omɛ awegɔ lɔ,alo e na wle o bo na ome lokpo a bo do vɔnu ome awegɔ lɔ.Mi ma kpego an sɛn Mawu a bo gɔ sɛn kɔbɔ can gɛ. ¹⁴ Falizitɔye le se oxo e nɛ lɛye xɔn bo ko Jesu xɔn,ɖo yi nyi owan na kɔbɔ. ¹⁵ E bo ɖɔ na ye dɔ:Miye mi nɔ mɔ miɖe do mɔ ome jijlɔ,le gbɛtɔye we nukɔn,vɔ Mawu nyɔ oji mitɔn.Onu xeye ni nɔ nyɔ kpinkpɔn na gbɛtɔye wɛ nɔ nyi onu xyawu le Mawu we nukun mɛ. ¹⁶ Osɛn Mɔyizi tɔn kpo ɖɔɖanyiɖɔtɔ lɛye we winwlan wɛ ye nɔ kplan omɛye,gbɔɔn wa jɛ hwenu na Jaan Mawu we osin lɛ na omɛtɔ lɔ wa wa ¹⁷ .Vɔ be sɔn Jaan lɔ ji,ye nɔ jla Mawu we axɔluta we wɛnɖagbe xɔn,omɛ ɖekpokpwe bo nɔ do hɔnhlɔn a do ɖyɛ e mɛ. Vɔ e na fa na oji kpodo odo kpo na do vɔ,hugan ɖɔ winwlan lokpo vɔvɔ na susu le osɛn lɔ mɛ. ¹⁸ Omɛ ɖekpokpwe ni gbɛ asyɛ bo wa yi ɖe nyɔnu bu,e do afɔ ogbe,lemɔha ke na omɛ ɖe wa yi ɖe nyɔnu xena aswɔ gbɛ-ɛ e gɔ do afɔ ogbe. ¹⁹ Dahwe dɔkunnɔ ɖe le,bo nɔ do awu jijɔhun xeye ni vɛ kɔbɔ lɛye,ayihɔngbe-ayihɔngbe e nɔ le jijwɛ mɛ a bo le ɖu agɔ xɔn. ²⁰ Ayanɔ ɖe xena ye nɔ yɔ ɖɔ Laza flɔn-anyi le xɔmɔnu ni-i,a bi kɛɖɛ bo le goto ni-i, ²¹ e nɔ jlo-e ɖɔ ni a can onuɖukwin xeni flɛ le dɔkunnɔ lɔ we tavo to a bo ɖu,vɔ hugan lemɔha duviye wɛ nɔ wa ɖiɖɔ abo etɔn ye. ²² Ayanɔ lɔ wa ku,wɛnzangun Mawutɔn lɛye bo kɔ-ɛ sɔ yi ɖo akpa na Ablaxamu.Dɔkunnɔ lɔ can wa ku,ye bo ɖi-i. ²³ Le okutomɛ xena e le se vivɛ xɔn taŋu,e kɔ okɔ bo mɔ Ablaxamu ɖoxlan Laza bo le akpa ni-i. ²⁴ E bo do axwa bo ɖɔ:Atɛye Ablaxamu,kpɔn dɔŋuɖunu na-un,ɖo Laza ɖoxlan ni a do lɔvi osin mɛ,a bo ja do oɖɛ ji na-un a do fa kɔmɛ na-un,ɖo un le awuvɛ le ozo xe mɛ xɔn diin. ²⁵ Vɔ Ablaxamu bo ɖo e go ni-i ɖɔ:Ov! ce,a flin ɖɔ,a nyi nyɔna tɔwe ye le ogbɛ hwenu,vɔ Laza e yɔ bo ɖu aya.Odin e mɔ akɔn fifa le fi-e. ²⁶ Xeni gɔ hugan lemɔha,odo ɖaxo ɖe le miye kpo miye we cɛncɛn,e nɛ omɛ ti ma kpego na lɛ le mide a do wa yi mide gɛ,lemɔha ke omɛti ma kpego na sɔn mide a do wa mide gɛ. ²⁷ Dɔkunnɔ lɔ bo ɖɔ mɔsin:Kɛnklɛn ɖo Laza ɖoxlan atɛye we xwegbe. ²⁸ Ɖo un ɖo nɔvi sunnuglo atɔɔn,ni a wɛ nyi gba okpa na ye,na ye can ma gɔ do wa le tɔn le vivɛsise we nɔtɛn xe xɔn gɛ. ²⁹ Ablaxamu ɖo e go ni-i ɖɔ:Ye ɖo Mɔyizi we osɛn lɔ kpo winwlan ɖɔɖanyiɖɔtɔ lɛye tɔn,ye ɖo na zɔn do ye-e ji. ³⁰ Dɔkunnɔ lɔ bo ɖɔ:O o,atɛye Ablaxamu,na omɛ ɖe sɔn okutomɛ bo wa yi ɖɔ na ye,ye na ɖyɔ jijɔ. ³¹ Vɔ Ablaxamu ɖo e go ni-i ɖɔ:Na ye ma zɔn do Mɔyizi we osɛn lɔ kpo ɖɔɖanyiɖɔtɔ lɛye we oxo ji gɛ,na omɛɖe gɔ do fɔn sɔn okutomɛ,bo wa yi ɖɔ na ye can,ye ma le ɖi onu xɔn gɛ.