¹ Le Jwifunu ye we gbɔjwɛ zangbe, Jesu dƴɛ Falizitɔye we oga we oxwegbe, a do ɖu nu, omɛ xeni le oxwe lɔ gbe lɛye bo le bɛ-ɛkpɔn. ² Iwɛ dahwe ɖe, le xena Finflan zɔn le go. ³ Jesu bo yi oxo bo ɖɔ na osɛn kplamɛtɔ kpo Falizitɔye kpo ɖɔ: Osɛn mitɔn na ogbe ɖɔ ye ni bo gbɔ azɔn na omɛ le gbɔjwɛ zangbe wɛ, alo e gbɛ? ⁴ Ye bo bɔ onu xwi-i. E wɛ, Jesu ɖo alɔ azɔnnɔ lɔ go, bo gbɔ azɔn ni-i, bo ni ɖɔ ni bo wa sɔn. ⁵ E nɛ godo, Jesu bo ɖɔ na ye ɖɔ: Mɛ wɛ le mi mɛ, na ovyɛ alo nyibu etɔn flɛ jɛ dotɔ mɛ le gbɔjwɛ zangbe, e bo ma ja ɖe tɔn le zɔn ɖokpo gɛ? ⁶ Ye ka ma kpego bo ɖɔ oxo ti do oxo nɛ lɔ go gɛ. ⁷ Xena Jesu kpɔn ɖe na omɛ xena ye yɔ lɛ flɔn anyi ɖo okpo tintan tɔn lɛye ji ɖo, e do oto xena ye-e bo le ɖɔ xɔn ɖɔ: ⁸ Na omɛ ɖe yɔ we, na a do wa yi ɖu onu le alɔ wiwle tɛn mɛ ɖe, a kpɔn wa yi flɔn anyi le okp tintan lɛye mɛ gɛ. Ɖo e na wa nyi ɖɔ ye sɔ tɛn mɛ nɛ lɔ sɔ xɔ ɖo ayi na omɛ xeni xugan we. ⁹ Omɛ xeni ka le ma tɔn, na wa ɖɔ na we ɖɔ: Jo tɛnmɛ tɔwe do ni-i, ŋuyan wɛ e na yi na we a ɖo yi flɔn anyi le nɔtɛn godo tɔn lɔ mɛ. ¹⁰ Amɔ na ye ka yɔ we do nɔtɛn lemɔha tɔn, yi a bo flɔn anyi do godo, enɛ omɛ xeni yɔ we lɔ hɛn e na ɖɔ: Hadwe yi nukɔn. Hwenɛnu e na yi gigo na we le nkun mɛ na omɛ xe kpo yɔ kpo yi nɔtɔn lemɔha tɔn lɛye. ¹¹ Ɖo, omɛ ɖekpokpwe xeni na kɔ eɖe, do yi oji, ye na zin-i do odo, omɛ xeni ka na sɔ eɖe sɔ hwe, ye na kwɛ do yi oji. ¹² E nɛ godo, Jesu ɖɔ na dahwe xeni yɔ-ɛ do wa nɔtɛn lemɔha tɔn lɔ dɔ: Na a ja hwedo nuɖuɖu mɛ ɖe alo hwemɛ tɔn na omɛ ye, kpɔn gɔ yɔ hadwe tɔwe lɛye gɛ, alo a nɔwevi lɛye gɛ, alo hadwe tɔwe kɔbɔ tɔ lɛye gɛ, ɖo taŋu ɖo ye can na wa yɔ we e bo na yi axɔsu na onu xena a na ye. ¹³ Amɔ, na a ɖo agɔ ɖuɖu ɖaxo ɖe, yɔ ayanɔ lɛ, afɔ gbonɔ lɛye sɛkunɔ ye-e kpo nukun gbanɔ ye kpo. ¹⁴ E nɛ a na yi nyɔna nɔ, ɖo ye mɛ nɛ lɛye ma kpe go su we onu le mɔ ha tɔn lɛye gɛ. E nɛ, Mawu tesu na su axɔ etɔn na we le hwexenu na e na fɔn ohwɛ jijwɛ nɔ lɛye le oku. ¹⁵ Hwexenu na omɛ xeni le tavoto lɛ se oxo lɔ omɛ lokpo le ye-e mɛ, bo ɖɔ na Jesu ɖɔ: Nynanɔ wɛ na nyi omɛ xeni na ɖu onu ɖuɖu etɔn le axɔsuɖuta Mawu tɔn mɛ. ¹⁶ Amɔ Jesu bo ɖo e go ni-i ɖɔ: Dahwe lokpo, ɖo agɔ ɖuɖu ɖaxo ɖe, bo yɔ omɛ susu. ¹⁷ Xena onu ɖuɖu lɔ sɔgbe, dahwe lɔ sɔ omɛsɛntɔ etɔn lɛye ɖoxlan omɛ xena ye yɔ lɛye lɔ bo ɖɔ: Mi wa ɖo onu lɛye kpokpo le ogbesisɔ mɛ. ¹⁸ Amɔ, ye mɛ lɛ kpokpo bo jɛ ogbe byɔ ji, omɛ tintɛn tɔn lɔ ɖɔ na mɛsɛntɔ dahwe lɔ tɔn ɖɔ: Un xɔ ogle ɖe un ka ɖo na yi kpɔn ogle lɔ un jɛ oklo na we-e sɔ xɔ kɛŋu. ¹⁹ Wɛ omɛ bu gɔ ɖɔ ni-i ɖɔ: Un nyi bu awe-awe donu atɔn, un ka le sɔn bo na do yi do ye-e kpɔn: Un do kɛnklɛn na we sɔ xɔ kɛŋu. ²⁰ Omɛ bu ke bo gɔ ɖɔ ni ɖɔ: Odin wɛ un wle alɔ, i wɛzɔn un ma kpego na do wa gɛ. ²¹ Mɛsɛntɔ lɔ lɛ nɔ bo wa ɖɔ onu e nɛ lɛye na cica etɔn. E wɛ xomɛ sin cica lɔ wɛ e ɖɔ na mɛsɛntɔ etɔn ɖɔ yi omɔ lɛye ji kpo ntɛn oto lɔ mɛ tɔn kpo a bo yi ylɔ, ayanɔ afɔ gbonɔ, nukun gbanɔ kpo sɛkunɔ lɛye kpo do wa nŋu. ²² Mɛsɛntɔ lɔ yi gbe na oga etɔn ɖɔ, onu xena azɔn lɔ yi wiwa, wɛ tɛn mɛ gɔ kpo. ²³ Cica lɔ ɖɔ na mɛsɛntɔ lɔ ɖɔ: Yi ogle mɔ lɛye ji kpo jikpamɛ lɛye we akpa, a bo do tagba na ye kaka na ye a wa, na oxwe ce gbe nya gɔ taŋu-taŋu. ²⁴ Ɖo un le ɖɔ na mi ɖɔ: omɛ xena un o yɔ san lɛye ye ti ma le tɔnu onu ɖuɖu ce gɛ. ²⁵ Gbɛtɔ ahwankpɔ lɛye le zɔn xa Jesu, wɛ e li lɛ okɔ bo ɖɔ na ye ɖɔ: ²⁶ Na omɛ ɖe na wa ɖiye ni bo gbɛkɔ sɔn otɔ onɔ, asyɛ, ovi nɔvyɛ kpo ogbɛ e yɔ tesu tɔn , kpo go gɛ, e ma kpo na nyi hwedotɔ ce gɛ. ²⁷ Na omɛ ɖe ma kɔ atin soga etɔn bo xo doŋu gɛ, e ma kpo na nyi xwedo tɔ ce gɛ. ²⁸ Alo, mɛ wɛ le mimɛ na e ja gba singbo ɖe, e ma ja flɔn anyi, bo na blo kɔŋuta ɖɔ un kpo na kpego ja-a? ²⁹ Na e ma nyi lemɔha gɛ, e bo na jɛ oxɔ lɔ gba ji san ma fo oxɔ lɔ gɛ omɛ xeni na mɔ lɛ na ko-e. ³⁰ Ye na ko-e bo na le ɖɔ ni ɖɔ: Dahwe xe bɛ oxɔ etɔn gbigba san ma fo bo hwe de go. ³¹ Alo axɔsu bo tɔn na wɛ na jlo ahwan san ma kan oxo se do axɔsu xena e jɛ kpan nu kɔn tɔ lɔ gɛ. ³² Alo na e na kpe awe gɔ etɔn xeni le didɛnnu lɔ, e na dɔn afɔ sɔ ɖo tetɔ etɔn sɔ xɔ ɖoxlan-ɛ a bo byɔ ɖɔ mye lɛ a dɔn fifa do wa. ³³ Iɖye, omɛ ti ma kpo na nyi xwedotɔ ce san ma gbɛ okɔ sɔn onu xeni ɖo lɛ sese kpo gɛ. ³⁴ Ojɛ e nyɔ, amɔ na ojɛ wa bu vivi etɔn, a ni mi na gɔ do ɖyɔ vivi etɔn nɛ lɔ? ³⁵ E ma gɔ ja nyɔ na anyizan gbɔn do nyɔ na ojinukun ye can gɛ. Ye na sɔ-ɛ sɔ ku gbe. Na omɛ xeni ɖo oto bo na do se onu, ni se.