¹ Bɔ wɛ ahwanfunfunye kpodo ojlɛ wiwaye kpo xeni le cincin mitɔn mɛ nɔ sɔn? e ma nyi ojlo nyinyla xeye ni le wa ahwan le agbaza mitɔn lɛye mɛ, mɛ wɛ ye nɔ sɔn wɛɛ? ² Mi nɔ jlo omɛbu we onu, wɛ mi ma kpego na mɔ gɛ; do gbɔn e nɛ lɔ go mi le ogbe sisɔ mɛ bo na do hu omɛ, onu nɔ jlo mi zɛ ojlɛ go vɔ mi ka ma kpego na mɔ gɛ, e nɛ lɔ wɛzɔn wɛ mi nɔ jɛ ojlɛ wiwa ji, bo jɛ ahwan fɔn do miɖe lɛye ji ji, mi mɔ nɔ mɔ onu xena mi le din xɔn gɛ ɖo mi ma byɔ Mawu gɛ. ³ Mi tlɛ byɔ can mi mɔ nɔ mɔ gɛ, ɖo ayixa nyinyla wɛ mi do le byɔ onu lɔ xɔn, ɖo onu xena mi le byɔ xɔn mi jlo na zan na miye tesu we ogbɛɖuɖu. ⁴ Gbejimanɔ na Mawutɔ xe lɛye! Mi ma ka kpayi do e go ɖɔ na ye bo nyi owan na ogbɛ lɔ, ye bo nɔ tlɔzun Mawu we okɛntɔ? omɛ xeni nyi zadue na ogbɛ xe, e sɔ eɖe tlɔzun okɛntɔ Mawutɔn. ⁵ Mi bwi ɖɔ vɔvɔ wɛ ye wlan oxo e xe do Mawuxowema lɔ mɛ sin? E wɛ nyi ɖo, Mawu yi owan na gbigbɔ xena e sɔ do mimɛ, bo nɔ hwanwu do gbigbɔ lɔ wutu. ⁶ E le lemɔha co, e nɔ gɔ na fɛnu xeni hugan do mi ji, ɖo Mawuxowema lɔ ɖɔ: Mawu nɔ cite kpan nukɔn ogoyitɔye, vɔ bo nɔ ɖe dɔmɛnywɛ etɔn sɔ xlɛ omɛ xeni nɔ sɔ yeɖe sɔ hwe lɛye. ⁷ Xena e le lemɔha, mi bo sɔ miɖe hwe na Mawu, mi cite kpan nukɔn lɛgba, e nɛ, e na bu eɖe le nukɔn na mi, a bo sɔn yi dindinnu. ⁸ Mi sɛkpɔ Mawu na Mawu can ni sɛkpɔ mi. Mimɛ ohwɛhutɔye mi klɔ alɔ mitɔn sɛ le ohwɛ mitɔn lɛye mɛ, mimɛ yɛmɛnuwatɔ lɛye, mi slawu na ayixa mitɔn lɛye. ⁹ Mi nɔ aluwɛ mɛ, mi viavi, bo na ale; onu kiko mitɔn ɖo na tlɔzun aluwɛ,bo gɔ sɔ awajijɛ mitɔn ni bo tlɔzun aluwɛ. ¹⁰ Mi sɔ miɖe hwe le Aklunɔ we nukɔn, e nɛ e na sɔ mi su. ¹¹ Anɛyevi lɛye, mi nɔ kpɔn gɔ ɖɔ miɖe lɛye we oxo nyinyla gɛ. Omɛ xeni nɔ ɖɔ nɔviɛ we oxo nyinyla, alo bo nɔ le da ohwɛ ni xɔn, osɛn lɔ we onu nyinyla wɛ e le ɖɔ xɔn bo gɔ le da ohwɛ na osɛn lɔ. Vɔ, na a le da ohwɛ na osɛn lɔ xɔn, a ma gɔ nyi omɛ tonu setɔ na osɛn lɔ gɛ, vɔ atlɔ ohwɛ datɔ na osɛn lɔ. ¹² Mawu lokponɔ gee wɛ nɔ do osɛn, e yɔ lokponɔ gee wɛ nyi ohwɛ da tɔ, e yɔ lokponɔ gee wɛ nɔ hwlɛn omɛ gan, bo na gɔ hu omɛ. Yɔ omɛ xeni le da ohwɛ na nɔso tɔwe xɔn, omɛ wɛ a sɔ yɔɖe do mɔn? ¹³ Odin, mimɛ xeni nɔ ɖɔ: Egbe alo osɔ mi na yi oto ɖe mɛ, mi na nɔ finɛ na oxwe ɖokpo, mi na wa ajɔ bo na mɔ kɔbɔ susu, mi ɖotoŋu. ¹⁴ Mi ma yɔn onu xena ogbɛ mitɔn na wa nyi osɔ xeni ja gɛ, ɖo mi ciɖi ahun ha, e nɔ su kaka jɛ oganxixo ovuɖe mɛ, e nɛ godo, ogbɛ lɔ mɛ nɔ gɔ hɔn sese kpo. ¹⁵ Oxo xena mi ɖo na ɖɔ ɖie: Na Mawu jlo, mi na nɔ ogbɛ a bo blo onu xe alo e nɛ xlan. ¹⁶ Vɔ, odin mi nɔ le kanfu miɖe xɔn le ogonyi-ogonyi mitɔn lɛye we ayixa mɛ. Kanfu e nɛ ha, onu nyinyla wɛ e nyi. ¹⁷ Na omɛ ɖe nyɔ onunywɛ biblo, vɔ e ka mɔ blo gɛ, onu nyinyla wɛ e do blo, e hu ohwɛ.