¹ Anɛvi lɛye mi, mi mɛ susu ni nɔ kpɔn din na nyi onukplan omɛyetɔ gɛ, ɖo mi nywɛ ɖɔ mi mɛ onukplan omɛyetɔ lɛye, Mawu na ɖɔ ohwɛ xa mi wɛ e na syɛn hugan omɛɖeyetɔn tintɛnŋugbe. ² Mi mɛ sese kpo wɛ nɔ wa onu nyi odo gbɔn alɔkpa susu mɛ. E nyi omɛɖe ma wa onu nyi odo gbele ɖo oxo ɖiɖɔ etɔn mɛ lɛye gɛ, be omɛ nɛ nyi gbɛtɔ jijɔ, wɛ e hɛn, e na ɖu le agbaza eɖe tɔn sese kpo ji. ³ Mi nɔ do ogan onu na osɔ lɛye na ye a do se otonu na mi, e nɛ, ofi e jlo mi wɛ mi nɔ kpla ye do yi. ⁴ Alo mi kpɔn onu do otɔjihun daxo xeni le otɔji lɛye go, ye dagba co ganke wɛ jɛhɔn bo gɔ nɔ titiye co, onu na ye nɔ do jɔ okɔ na ye, onu vu titi ɖe wɛ, wɛ otɔjihunkuntɔ lɔ nɔ do jɔ okɔ na otɔjihun etɔn bo nɔ do yi ofi xena ye jlɔ. ⁵ Lemɔhake, oɖɛ xeni le numɛ, agbaza we wujɔnu ovuɖe wɛ e nyi, odin, e na ze onu ɖaxo ɖaxo do jla ajɔ na eɖe. Mi kpɔn ɖena ozo ovu titi ɖe okpe bo na do ozo nukan ɖaxo ɖo! ⁶ Oɖɛ can, ozo wɛ e nyi; e ci ogbɛ xena onu nyinyla kpacɛ na ha. Bo ɖo tɛnmɛ etɔn le agbaza mitɔn mɛ, e nɔ sɔ ogbɛzan lɔ xɔ doɖu sese kpo, ozo xeni sɔn ozomavɔ mɛ wɛ e nɔ sɔ do bi gbɛzan mitɔn sese kpo. ⁷ Kanlin alɔkpa-alɔkpa lɛye sese, oxɛye wɛ, odanye wɛ, otɔmɛlanye wɛ, gbɛtɔ nɔ kpego bo nɔ kpe ye ji, e bo kpe ye ji oxojɔxo. ⁸ Vɔ, oɖɛ gbɛtɔ ti ma kpego na kpe e ji gɛ, onu nyinyla wɛ e nyi, bo nɔ le gli xɔn, bo gɔ kpodo adivɛ xeni nɔ hu omɛ kpo. ⁹ Oɖɛ lɔ wɛ mi nɔ do do okpɛ na Aklinɔ miyetɔ lɔ, oɖɛ lɔke wɛ mi nɔ gɔ sɔ do do onu gbɛtɔye xena Mawu da ɖo ninɔmɛ etɔn lɔ mɛ. ¹⁰ Okpɛ do na Mawu we oxo kpodo nudomɛ we oxo kpo nɔ tɔn sɔn onu lokpo lɔ mɛ. Aneyevi lɛye, ni nɔ kpɔn nyi lemɔha na mi gɛ. ¹¹ Otɔjɔtɛn ɖe nɔ tɔn osin vivi kpodo osin vivɛ kpo gbɔn omɔn ɖokpo lɔ nu wɛ? ¹² Aneyevi lɛye mi, figitin ɖe na kpego na sɛn olivu wɛ, wɛ viwuntin ɖe na kpego na gɔ sɛn figi wɛ? lemɔhake wɛ otɔjɔtɛn ɖe we osin xeni nɔ vɛjɛ lɔ ma kpego na na osin vivi gɛ. ¹³ Mɛɖe le mi mɛ, bo ɖo onunyinywɛ kpodo zinzin kpo? Ni ɖe-e sɔ xlɛ dogbɔn afɔɖiɖe ɖagbwɛ mɛ, kpodo omɛ ɖe sɔ hwe kpo onunyinywɛ we ozɔnwiwaye kpo. ¹⁴ Vɔ, na awu hwinhwan ɖaxo kpodo onudindɔn le oji mɛ na mi, mi nɔ kpɔn gɔ kanfu miɖe ɖɔ miye bɛ bo ɖo onunyinywɛ, mi nɔ kpo gɔ tɔ ota te na oxojɔxo lɔ gɛ. ¹⁵ Onunyinywɛ nɛ ma sɔn sɛxwe gɛ, anyizan ji tɔn wɛ e nyi, bo nyi gbɛtɔye tɔn, bo nɔ sɔn gbigbɔ mawe lɛye kɔn. ¹⁶ Ɖo, ofi xena awu hwinhwan kpodo onudindɔn ye kpo le, hannya-hannya kpodo walɔ nyinyla hamɛ-hamɛye wɛ nɔ nɔ ofi nɛ. ¹⁷ Vɔ, sɛxwe we onunyinywɛ, onu mimɛ wɛ e o nyi jɛ nukɔn, gɔ bɔ do e go, e nɔ hɛn fifa do wa, e nɔ wa onu do ojlɛ mɛ, e nɔ dɔn omɛ do okpɔ, e gɔ kpo dɔŋuɖunu kpinkpɔn taŋu kpodo sinsyɛn dagbwɛ-dagbwɛye, e mɔ nɔ ɖe omɛɖe do ovo na omɛɖe gɛ, e ka mɔ nɔ gɔ wa yɛmɛnu gɛ. ¹⁸ Omɛ xeye ni nɔ hɛn fifa do wa lɛye, fifa wɛ ye nɔ do do omɛye mɛ, onu xena ye nɔ ɖe, bo nyi ogbɛ jijɔhun.