¹ Anɛyevi lɛye, mimɛ xe nɔ zan ogbɛ mitɔn ɖo onuɖiɖi xena mi ɖo do Aklunɔ mitɔn Jesu Klisi ji lɛye, mi nɔ kpɔn ɖe miɖe do ovo na miɖe gɛ. ² Akpa jlɛ, dahwe ɖɔkunnɔ ɖe ɖo sikakɔbɔ, bo do awu ɖagbwɛ-ɖagbwɛ ɖe, odin bo ɖyɛ agun mitɔn mɛ, dahwe wamɔnnɔ ɖe can dyɛ agun mitɔn mɛ gba, bo le awu nyinyla ɖe mɛ. ³ Xena ye dyɛ agun lɔ mɛ, mi ɖo sisi titewungbe ɖena ɖɔkunnɔ lɔ, bo ɖɔ ni-i ɖɔ: Wa flɔn anyi le fi, ɖe ofi dagbwɛ e xe, bo ka ɖɔ na wamɔnnɔ lɔ ɖɔ: Yɔ, nɔ te do finɛ, alo flɔn anyizanmɔ do afɔ ce kpa. ⁴ E nyi mi nɔ blo onu ɖo lemɔha, omɛ ɖe do ovo na omɛ nɛ mi le blo xɔn nɛ,susu nyinyla xena ayixa mitɔn kplan mi we onu nɛ mi le blo xɔn nɛ. ⁵ Anɛvi vivɛ lɛye, mi ɖoto: Mawu can wamɔnɔ ogbɛ xe mɛ tɔn lɛye, na ye a do nyi ɖɔkɔnnɔ le onu ɖiɖi mɛ, bo na do nyi axɔsuɖuta we akpagbe xena ye do na omɛ xeni yi wan ni lɛye we ovi. ⁶ Wɛ mi ye, mi gbɛ wan na wamɔnɔ lɔ! E ma ka nyi ɖɔkunnɔ lɛye wɛ nɔ tafu mi a bo le dɔn mi do yi ohwɛ nukɔn lɛye xɔn? ⁷ Ye lɛye mɛ nɔ nyla onu do nyikɔ ɖagbwɛ-ɖagbwɛ xena Mawu na mi lɔ go? ⁸ Le oxojɔxo mɛ, na mi nɔ nyi axɔsuɖuto Mawutɔn we osɛn ɖi ɖena Mawuxo wema lɔ ɖɔ do ha, onu ɖagbwɛ wɛ mi le wa xɔn; e wɛ nyi ɖɔ: Yi wan na nɔzo tɔwe ɖi yɔ tesu ha. ⁹ Amɔ, na mi nɔ ɖe mɛɖe do ovo na omɛɖe, ohwɛ wɛ mi le hu xɔn, wɛ osɛn lɔ le do ohwɛ na mi xɔn, ɖo mi le vɛ toli na osɛn lɔ. ¹⁰ Ɖo, na mɛɖe vɛ toli na onu na osɛn lɔ zɔn lokpo gee, e vɛ toli na osɛn lɛye kpokpo. ¹¹ Xojɔxo, omɛ xe ɖɔ: Nɔ kpɔn lɔga gɛ, omɛ lokpo nɛ lɔ wɛ gɔ ɖɔ: Nɔ kpɔn hu omɛ gɛ. E nɛ wɛ zɔn, na a ma lɔga gɛ bo ma ka gɔ hu mɛ gɛ, osɛn wɛ e gba. ¹² Mi nɔ ɖɔ oxo, bo nɔ wa onu ɖi omɛ xeni ɖo na ze osɛn xe nɔ ɖe omɛ sɔn omɛ kannu do ɖɔ ohwɛ do ha. ¹³ Ɖo omɛ xeni ma ku lɛblanu na omɛɖe gɛ, Mawu can ma le ku lɛblanu ni hwenu na e na ɖɔ ohwɛ xɛ gɛ, odin, lɛblanu ku na omɛ na ɖu le ohwɛɖiɖɔ ji. ¹⁴ A nɛye vi lɛye, e nyi omɛ ɖɔ:"Un ɖo onu ɖiɖi" bo mɔ nɔ ɖexlɛ ɖo onu wiwa etɔn lɛye go gɛ, aniwanu wɛ onu ɖiɖi e nɛ lɔ ka nyi? Onu ɖiɖi e nɛ lɔ ka na kpego hwlɛn gan? ¹⁵ E nyi ɖɔ avɔ alo onu ɖuɖu hwedo nɔvi sunuglo alo nɔvi nyɔnusi ɖe, ¹⁶ Mi nɔ kpo ɖike na xeni le ota ji wɛ ye na do nɔ ogbɛ ye gɛ,mi ɖɔ na ye ɖɔ: Mi na yi kpo fifa kpo, mi do awu ganji ye, bo ɖu onu na ɖɔgo a gɔmi, a ni ka wɛ e na wa na ye? ¹⁷ Le na e le na onuɖiɖi ɖo ha lɔ nɛ: E nyi ɖɔ e mɔ nɔ ɖe eɖe xlɛ gbɔn onuwiwa etɔn lɛye mɛ gɛ, be onuɖiɖi kuku wɛ e nyi le eɖe mɛ. ¹⁸ Amɔ, na omɛɖe ɖɔ: A ɖo onuɖiɖi, yɛ yɔn ɖo onuwiwa etɔn lɛye, yɔn na ɖɔ ni ɖɔ: Xlɛ-un ɖena onuɖiɖi tɔwe xeni ma ɖo onuwiwa etɔn lɛye gɛ, e nɛ, yɔn na xlɛ onuɖiɖi ce we gbɔn onuwiwa ce lɛye mɛ. ¹⁹ A ɖi onu ɖɔ Mawu lokponɔ gee wɛ le; e yɔn ganji! Gbigbɔ mawe lɛye can nɔ ɖi onu na Mawu ɖɔ yi ɖokponɔ gee bɛ bo le, wɛ ye nɔ ɖi obu gbɔɔn bo nɔ sisɔ. ²⁰ Ayixamasɔgbenanɔ! A jlo ɖɔ onuɖiɖi e mɔ nɔ wa onu ɖe gɛ xeni nyi onu vɔvɔ lɔ xlɛ we wɛ? ²¹ Tɔgbo mitɔn Ablaxamu lɔ, naɖe wɛ Mawu ka swɛ do mɔ ohwɛjijɔnɔ ɖo? Mawu swɛ do mɔ ohwɛjijɔnɔ na do gbɔn onuwiwa etɔn lɛye wutu; ɖo e sɔ oviɛ Izaki lokpo lɔ sɔ xwle Mawu le avɔsakpe ji, a mɔ din? ²² Onuɖiɖi etɔn kpodo onuwiwa etɔn lɛye kpo wɛ wa ozɔn ɖo okpɔ, wɛ onuɖiɖi etɔn tlɔzun onuɖiɖi titewungbe, ɖo onuɖiɖi etɔn kpodo onuwiwa etɔn lɛye kpo nɔ wa ozɔn ɖo okpɔ. ²³ E nɛ, onu xena ye wlan do Mawuxowema mɛ lɔ wa jɔ; e wɛ nyi ɖɔ: Ablaxamu ɖo onuɖiɖi na Mawu, wɛ Mawu kpɔn do onuɖiɖi etɔn go,bo swɛ do mɔ ohwɛjijɔnɔ na; e nɛ, ye nɔ yɔɛ ɖɔ Mawu we hadue. ²⁴ Mi mɔ odin ɖɔ Mawu nɔ sɔ gbɛtɔ do mɔ ohwɛjijɔnɔ ɖo onuwiwa etɔn lɛye wutu; e ma ka nyi onuɖiɖi xena e ɖo lɔ kɛɖɛ lɔ mɛ gɛ. ²⁵ Lemɔhake wɛ e nyi na Hlaxabu galɔtɔ lɔ can. Mawu sɔɛ do mɔ ohwɛjijɔnɔ na ɖo onuwiwa etɔn lɛye wutu; e wɛ yi ododin na onutɔye do xwegbe etɔn, bo gɔ kpe do ye go, wɛ ye gbɔn omɔ bu do sɔn. ²⁶ Xojɔxo, ɖena agbaza xe mɛ na alindɔn ma le gɛ do nyi onu kuku ha ɖo, lemɔhake wɛ onuɖiɖi xeni ma nɔ xlɛ onuwiwa etɔn lɛye gɛ can nyi onu kuku ɖo nɛ.