¹ Yɔ Jaki, xeni nyi Mawu kpodo Aklunɔ Jesu Klisi we ozɔnwavi, un do ogbe na omɛ Jwifunu yisenɔ seye ni tɔn sɔn akɔta wyawe lɛye mɛ, bo gbakpe gbɔn ogbɛ lɔ mɛ sese, yɔn wɛ wlan wema xe doxlan mi. ² Anɛyevi lɛye, na didokpɔn hamɛ-hamɛ wa jɛ mi ji, ni nyi awjijɛ na mi, ³ Mi na nyɔ ɖɔ yise mitɔn na li okyɔn gbɔn didokpɔn lɛye mɛ, e na hɛn vivɛnu dido do wa. ⁴ Vɔ, na ohun kuku mitɔn ni wa ozɔn etɔn do yi vivɔnu, na mimɛ sese ni hwihwen, na onu ti ni nɔ kpɔ glɔn omɔ na mi gɛ. ⁵ Na omɛ ɖe le mime na onunywɛ hwe do-e, ni bo byɔ Mawu xeni nɔ na onu ɖekpokpwe omɛ ma kpɔn godo lɔ, wɛ Mawu na na omɛ lɔ. ⁶ Vɔ, omɛ lɔ ni bo byɔ kpo onu ɖiɖi kpo, a bo nɔ kpɔ xo kpɔn gɛ, ɖo omɛ xeni nɔ xo onu kpɔ, omɛ nɛ ciɖi jɛhɔn ɖaxo xeni le xo otɔ ɖe do yi adusi mɛ kpo amyɔ mɛ kpo ha. ⁷ Na ogbɛtɔ ɖe ci lemɔha, ni nɔ bu-i ɖɔ miye bo na mɔ onu ɖe yi le Aklunɔ ɖe gɛ: ⁸ Be ogbɛtɔ nɛ ha yi lulunɔ, bo ma sɔgbe le omɔ etɔn lɛye ji gɛ. ⁹ Na nɔvi xeni nɔ sɔ eɖe sɔ hwe, ni bo jawya na ote cici dona omɛ sɔ hwe etɔn tɔn. ¹⁰ Na dɔkunnɔ, ni jaya do ayi jijɛ etɔn wutu; ɖo e na zan ogbɛ etɔn wayi ɖi ama xe jayi le ati le ji ha. ¹¹ Ohwe ɖiye cite kpo zozo ɖaxo etɔn kpo, wɛ ama e nɛ we ohun jijɔ fyɔ bo bu: Lemɔhake wɛ dɔkunnɔ na bu le ozɔn etɔn lɛye mɛ ɖo ha nɛ. ¹² Nyɔnanɔ wɛ nyi omɛ xeni nɔ ɖu le xwlekpɔn ji; ɖo na e ɖu le eji vɔ godo, e na yi jɛgbakun ogbɛtɔn, xena Aklunɔ sɔ ɖa nyi gbɔn akpagbe etɔn mɛ na omɛ ɖekpokpwe xeni nyi owan ni-i lɛye. ¹³ Na omɛ ɖe le xwlekpɔn mɛ, ni nɔ kpɔ ɖɔ: Mawu bɛ bo le xwle miye kpɔn xɔn gɛ. Ɖo Mawu mɔ nɔ xwlemɛkpɔn gbɔn onu nyinyla ji gɛ, e ka mɔ nɔ xwlekpɔn xeni hugan omɛ do wa na omɛ ti gɛ. ¹⁴ Vɔ, gbɛtɔ nɔ byɛ xwlekpɔn mɛ gbɔn ayixa mawe onu jijlo gbɛmɛ fiye lɛye tɔn mɛ. ¹⁵ E nyi e mɔ ojlo gbɛmɛ fiye tɔn lɛye we dɔgo vɔ, e nɔ ji ovi xeni nyi ohwɛ, wɛ ohwɛ nɛ, hwenu na e we flɔn anyi ganji, e nɔ tlɔzun oku. ¹⁶ Mi nɔ kpɔn blɛ miɖe gɛ, anɛyevi vivɛna ce lɛye: ¹⁷ Fɛnu ɖagbwɛ kpodo onu nina xeni jɛxa nɔ sɔn oji le otɔ xeni nyi weziza, e ɖe xena zinvlu ti ma ɖo acɛ le filin gɛ. ¹⁸ E ji mi gbɔn ojlo etɔn mɛ, gbɔn oxo lɔ we oxojɔxo lɔ mɛ, na mi a do nyi onu dida tintan le onu dida lɛye sese kpo mɛ. ¹⁹ Mi nyɔ-ɛ, anɛyevi vɛna-vɛna lɛye. Na gbɛtɔ lɛye sese ni nɔ ogbe sisɔ mɛ ɖo oto, mi nɔ kpɔ nɔ ya onu mitɔn do oxo lɛye sese mɛ gɛ, mi nɔ kpɔn ɖebla do aɖi gɛ; ²⁰ Ɖo ɖi dido mɔ nɔ hɛn Mawu we ojlo wa cicɛ mɛ gɛ. ²¹ E we zɔn, mi gbɛ okɔ le onu xe doɖu lɛye go kpo zinzin hugan omɛ lɛye sese, e nɛ mi na yi fifa xena ye do do mi mɛ gbɔn oxo lɔ mɛ, wɛ oxo nɛ hɛn e na wlɛn mi gan. ²² Mi wa oxo lɔ we ozɔn, a bo nɔ kpɔn gbɔn akpa na gɛ, a bo nɔ kpɔn blɛ miɖe lɛye ɖu gbɔn oxo ma sɔgbe lɛye mɛ gɛ. ²³ Ɖo, na omɛ ɖe se oxo Mawutɔn bo ma ze wa zinzan mɛ gɛ, omɛ lɔ nɔ ciɖi omɛ xeni le kpɔn nukpɔ-ɛ mɛ bo nɔ mɔ nukunmɛ agbaza mɛ tɔn lɔ, ²⁴ wɛ, na e kpɔn vɔ, e nɔ sɔn bo nɔ wɔn onu xena e nyi. ²⁵ Vɔ, omɛ xeni nɔ kpɔn osɛn jijɔ Mawu tɔn lɔ mɛ, xeni nyi osɛn omɛ kannu jijɛ lɔ tɔn mɛ, bo nɔ se oxo lɔ bo mɔ nɔ wɔn, vɔ bo zan do e ji, omɛ nɛ na nyi nyɔnanɔ le onu wiwa etɔn lɛye mɛ. ²⁷ Na omɛ ɖe bu-i ɖɔ miye bo le sɛn Mawu xɔn, bo ka mɔ nɔ hɛn oɖɛ etɔn gɛ, e le blɛ ayixa etɔn ɖu xɔn, wɛ Mawu sinsɛn omɛ nɛ lɔ tɔn nɔ nyi onu vɔvɔ. ²⁶ Sinsɛn mimɛ xena odu ti ma le ogo xɔn gɛ le nukɔn na Mawu lɔ, wɛ nyi ɖɔ, ye na nɔ kpe nukun do otɔcɔvi-nɔcɔviye kpodo kposi lɛye go le vivɛsise yetɔnye mɛ, a bo klan omɛ ɖe do ovo le ogbɛ lɔ we onu ɖuɖu lɛye go.