¹ Odin, mimɛ dɔkunnɔ lɛye, mi ɖo oto-o! mi viavi, a bo na ale, ɖo onu nyinyla xeni na wa jɛ do mi ji wutu. ² Dɔkun mitɔn lɛye nyɔ, wɛ onu ɖu avɔ mitɔn lɛye. ³ Sika mitɔn lɛye kpodo ogan we-we mitɔn lɛye sese kpo jɛ ohwɛ; ohwɛ jijɛ e nɛ lɔ bo na nyi kunu ɖiɖe nyinyla do kpan nukɔn mi, e bo na fyɔ agbaza mitɔn ɖi ozo ha. Mi le kple dɔkunye xɔn coganke azan vivɔnu lɛye bo wa. ⁴ Eɖie, mi ma su axɔ na ozɔnwatɔye xeni wa ozɔn le ogle mitɔn lɛye mɛ gɛ, mi ɖoto ovo xena ye le sa xɔn, omɛ xeni le bɛ ojinukun mitɔn lɛye do yi oxwe mitɔn lɛye gbe na mi xɔn, ye le axwa nu, kaka axwa yetɔn bo wa ɖyɛ oto mɛ na Mawu ahwankpa lɛye tɔn. ⁵ Ogbɛ ɖuɖu kpodo acɔ ɖiɖo mɛ wɛ mi nɔ, le anyizan ji, mi bo do oju ɖi kanlin ha na huhu we azangbe. ⁶ Mi do ohwɛ na omɛ jijɔ lɛye bo hu ye, wɛ ye ma dɔn onu xa mi gɛ. ⁷ Anɛyevi yisenɔ lɛye, mi do ogan kaka wa jɛ hwexenu na Aklunɔ lɔ na wa. Mi kpɔn ɖena oglelɛtɔ nɔ do ogan ɖo, a bo le tle kpɔn ojinukun jijɔhun xeye na anyizan lɔ na lɛye xɔn, kaka jokun titan kpodo vivɔnu gɔ na wa ja ɖo. ⁸ Miye can, mi kuhun, a bo do oji taŋu, ɖo Aklunɔ lɔ we wiwa o sɛkpɔ. ⁹ Nɔvi ce yisenɔ lɛye, mi nɔ kpɔn gɔ do ohwɛ na mi le lɛye gɛ, na Mawu ni nɔ kpɔn wa do ohwɛ na mi xɔn gɛ. Mi kpɔn ohwɛɖɔtɔ lɔ o wa oxɔn lɔ ji. ¹⁰ Anɛyevi lɛye mi, ogbeɖotɔ xeye ni nɔ ɖɔ oxo le Aklunɔ lɔ we nyikɔ mɛ lɛye, ye ni nyi ayaɖuɖu kpodo agbɔxo dido we kpɔndewu na mi. ¹¹ Mi kpɔn, omɛ xeni nɔ nɔ ote gliŋu lɛye, mi nɔ yɔ ye ɖɔ nyɔnanɔ lɛye. Mi se ɖena Jɔbu do oji ɖo, bo kpɔn onu xena Aklunɔ lɔ wa wa ni-i le vivɔnu, ɖo Aklunɔ lɔ nyɔn dɔmɛ taŋu, bo nɔ kpɔ dɔŋuɖunu na omɛ. ¹² Anɛyevi lɛye, xe le vivɛɖe, mi nɔ xle sɛhwe alo anyizan ji gɛ kaka jɛ onu ɖekpokpwe ji gɛ. Vɔ na ɛɛn mitɔ ni nyi ɛɛn wɛ na oo mitɔn ni nyi oo, na mi nɔ kpɔn wa janyi le ohwɛ dida mɛ gɛ. ¹³ Omɛ ɖe ka le mimɛ bo le wuvɛ mɛ wɛ? Ni ho oɖɛ. Omɛ ɖe ka le ayajijɛ mɛ? Ni bo ji oxan Mawutɔn lɛye. ¹⁴ Omɛ ɖe ka le mimɛ bo le jazɔn xɔn wɛ? Ni bo ylɔ omɛxo agun mɛ tɔn lɛye, na ye a xo oɖɛ ni-i, a bo do ami ota ni-i le Jesu Klisi we nyikɔ mɛ; ¹⁵ oɖɛ onuɖiɖitɔ tɔn nɔ gbɔ azɔn na azɔnnɔ a bo hwlɛngan, wɛ Aklunɔ lɔ na ze do oji, wɛ na e hu ohwɛ, Aklunɔ lɔ na sɔ xɔ kɛɛ a bo sla ahu ni-i. ¹⁶ Mi ɖɔ ohwɛ mitɔn lɛye na miɖe lɛye, bo xo oɖɛ na miɖe lɛye, e nɛ godo mi na mɔ azɔn hɛngbɔ. Oɖɛ yise nɔ tɔn, e ɖo hɔnhlɔn taŋu. ¹⁷ Eli gbɛtɔ wɛ e nyi ɖi miye cangba ha: E xo oɖɛ sisyɛn kaka na jokun ni nɔ kpɔn do ja gɛ, wɛ jokun lɔ gɔn jija do anyizan ji na oxwe atɔn sunzan ayizɛn. ¹⁸ E nɛ godo e gɔ xo oɖɛ bu, wɛ sɛhwe hun bo na jokun wɛ anyizan lɔ ji na sinsyɛn etɔn. ¹⁹ Anɛyevi lɛye, na omɛ ɖe le mimɛ bo janyi le oxo jɔxo lɔ mɛ bo le zɔga na oxo lɔ, omɛ bu ni gɔ alɔ ni-i bo gɔ vɔ kplɛn-ɛ do wa oxo jɔxo lɔ mɛ, ²⁰ mi nyɔ-ɛ ɖɔ na omɛ ɖe kplan ohwɛ hu tɔ ɖe wa oxo jɔxo lɔ kɔn, e hwlɛn alindɔn ohwɛ hu tɔ lɔ tɔn gan le oku si, e nɛ lɔ wɛ na zɔn wɛ Mawu na bu onu do ohwɛ susu ni-i, wɛ e na mɔ sɔkɛ yi.