¹ Okancica tintan tɔn lɔ can ɖo osɛn xeji na ye na nɔ blo sinsɛn lɔ do,bo gɔ ɖo sinsɛnxɔ anyizan ji tɔn. ² Le oxojɔxo mɛ,ye blo avɔsanxɔ lokpo,tɛnmɛ tintan tɔn xeni le emɛ lɔ nyi tɛnmɛ mimɛ,flɛn lɔ wɛ zogbɛnhɛntin,tavo kpodo kpɔnnɔ xena ye nɔ sɔ na Mawu le. ³ Tɛnmɛ awegɔ xena ye nɔ ylɔ ɖɔ mimɛ taŋu le godo na xɔmɛgbovɔ awegɔ xeni ma vɔsan xɔ lɔ mɛ, ⁴ flɛn lɔ wɛ sikanu kpodo kancica we ɖaka xe go na sika gbɔn fi kpokpo na le.Le okancica we ɖaka lɔ mɛ,ozɛn sika tɔn xemɛ na mana le,le e mɛ okpotin Alɔntɔn xeni wu lɔ,le mɛ kpodo okpɛn we okpo xeji na okancica we osɛn lɛye. ⁵ Gigo we celubɛn lɛye le ta na ɖaka lɔ bo vun cɔn fi xena ye nɔ kɔn vɔsinsan we ohun do,a bo do sɔ onu nyinyla lɛye sɔ xɔ kɛ mɛ,vɔ odin mɛ na tin onu lɛye sese kpo mɛ gɛ. ⁶ Xena onu lɛye sese le tito ɖo,lemɔha vɔsantɔ lɛye nɔ byɛ vɔsanxɔ lɔ mɛ,le tɛn tintan tɔn lɔ mɛ le ohwe ɖekpokpwe hwenu bo nɔ do wa zɔn yetɔn; ⁷ vɔ tɛnmɛ awegɔ lɔ,vɔsantɔ lɛye we oga lokpo nɔ gee wɛ nɔ byɛ e mɛ hwla lokpo gee le oxwe lokpo mɛ.E ka mɔ nɔ byɛ e mɛ na e hɛn kanlin we hun a bo do san avɔ do ota mɛ e yɔ tesu we onu nyinyla kpodo otogun lɔ we onu nyinyla lɛye ⁸ Gbigbɔ ɖedovo tɔn lɔ le ɖexlɛ gbɔn flɛn ɖɔ e nyi na tɛnmɛ tintan lɔ gbɛ le ote jan wɛ,omɔ ni yi otɛn mimɛ lɔ kpokpo mɛ lɔ ma o nyi hunhun gɛ, ⁹ onu enɛ lɔ ɖexlɛ ɖe wɛ e nyi bo le ɖɔ oxo do hwenu xena mi le din lɔ go,onu enɛ lɔ le tin emɛ ɖɔ onu jijɔ xena ye nɔ na Mawu kpodo avɔsinsan xena ye nɔ sɔ kanlin do san ni lɔ kpo ma kpego na blo na na omɛ xeni le sɛn Mawu we ayixa ma kpego na mɛ gbɔɔn wɛ onu kpokpo na dɛn le ego gɛ, ¹⁰ ɖo sinsɛn gbɔn lemɔha,onu ɖuɖu kpo ahan nunu kpo awu sisla we walɔ tɛnmɛ-tɛnmɛ lɛye kpo sinsɛn vɔvɔ wɛ,tito gbɛtɔ tɔn kpoŋu wɛbo wa ozɔn kaka jɛ hwexenu na Mawu vɔ onu lɛye sese kpo. ¹¹ Vɔ,Klisi wa bo nyi avɔsantɔ lɛye we oga na onu jijɔhun xeni o wa lɛye,e gbɔn avɔxɔ xeni klo bo sɔgbe,xena alɔ gbɛtɔ tɔn ma blo gɛ,tin e mɛ etɔn wɛ nyi ɖɔ,avɔxɔ enɛ lɔ tɔn bo ma nyi ogbɛ xemɛ tɔn; ¹² e byɛ tɛnmɛ wiwe taŋu lɔ mɛ hwlalokpo gee,e bo vɔ do flɛn,enɛ ma hɛn agbosuye kpo nyibuvi lɛye we ohun do byɛ e mɛ gɛ,vɔ e yɔ tesu we ohun wɛ e hɛn,bo do su axɔ do ota na mi tɛgbɛ. ¹³ Ɖo na e nyi ɖɔ ye nɔ kɔn agbosu lɛye we ohun kpodo nyibu asu xena ye fyɔ we afi do omɛ xeni ɖu osu lɛye ji, a bo do sla awu na ye, ye bo na gɔ vɔ do jɛ okpɔ xa Mawu, ¹⁴ Klisi lɔ we ohun ma kpego na gɔ wa ozɔn hugan lemɔha? E yɔ xeni gbɔn gbigbɔ mavɔ-mavɔ ji, bo sɔ eɖe do sanvɔ na Mawu ɖi avɔsannu xe go na oɖu ti ma le gɛ ha, be ohun etɔn ma kpego na sla awu na ayixa mitɔn lɛye a bo ɖe ozɔn xeni nɔ dɔn omɛ do yi oku gbenu sɛ, na mi a do wa ozɔn na Mawu gbɛɖe-gbɛɖe lɔ! ¹⁵ E lɔ wɛ zɔn e do nyi omɛ do mɛ jlaɖotɔ alɛnu yɔyɔ tɔn. Klisi bo do su axɔ do ota na onnyinyla xeye na ye blo lo alɛnu xoxo lɔ we acɛ gɔ ye, e nɛ, omɛ xeye na Mawu ylɔ lɛye na do yi cinɔ mavɔ-mavɔ xe we akpagbe na Mawu do na ye. ¹⁶ Ɖo ofi xena cinɔ sisɔ we wema le, e le dandan mɛ ɖɔ ye ɖo na xlɛ ɖɔ omɛ xeni wlɛn-ɛ lɔ ku. ¹⁷ Ɖo na omɛ xe wlɛ-ɛ le ogbɛ jan wɛ, be wema lɔ ma wa ozɔn gɛ. Hwexenu na omɛ lɔ ku, jan wɛ wema lɔ na wa ozɔn. ¹⁸ E wɛ zɔn ohun do kɔn ɖo anyi hwɛkpo okancica yɔyɔ lɔ do bɛ ozɔn. ¹⁹ Le oxojɔxo mɛ, xena Moyizi xlɛ osɛn lɔ sese na otogun lɔ ɖi ɖena osɛn wema lɔ ɖɔ ɖo ha, vɔ , e sɔ nyibuviye kpo ogbɔsuye we ohun kpodo osin, bo gɔ sɔ avɔ vɛvɛ cɛcɛcɛ ɖe kpo izɔpu, bo sɔ do osin lɔ kpo ohun lɔ kpo mɛ, bo mimi do wema lɔ go, bo gɔ mimi do otogun lɔ sese go. ²⁰ Bo ɖɔ mɔsin: E xe lɔ wɛ nyi okancica we ohun xe we osɛn Mawu do na mi. ²¹ Lemɔhake, Myizi gɔ mimi ohun lɔ na goxɔ kpo onu ɖekpokpwe xeye na ye nɔ do blo sinsɛn lɛye gba. ²² Le osɛn lɔ mɛ, ohun wɛ ye nɔ do slawu na ohwɛ sisɔkɛ. Na ohun ma ɖo anyi gɛ, be ohwɛ sisɔkɛ ma le gɛ. ²³ Na e nyi ɖɔ akɔnu wiwa nɛ lɛye wɛ ye nɔ blo a bo do slawu na onu xeye ni le sɛxwe we oyɛye, be e le vivɛɖe ɖɔ onu xeye ni le sɛxwe lɛye tesu can avɔsinsan adodwe wɛ ye na do slawu na ye can. ²⁴ Le oxojɔxo mɛ, e ma nyi tɛnmɛ mimɛ xena alɔ gbɛtɔ tɔn blo wɛ e nyi xeni le sɛxwe lɔ we oyɛ kpoŋu mɛ Klisi ɖyɛ gɛ, vɔ sɛxwe lɔ tesu wɛ e ɖyɛ, a bo do le nukɔn na Mawu odin do ota mitɔn mɛ. ²⁵ E ka ma ɖyɛ e mɛ a bo do sɔ eɖe do san avɔ susu ɖiɖe avɔsantɔ ɖaxo we oga nɔ ɖyɛ tɛnmɛ mimɛ taŋu lɔ mɛ oxwesɔ-oxwesɔ kpodo ohun bu xeni ma nyi etesu tɔn gɛ; ²⁶ e do nyi ɖo lemɔha wɛ,be sɔn ogbɛ lɔ we titɔ e ji gbɔɔn wɛ e o na ɖu aya hwla nɛmu-nɛmu ɖe,le oxojɔxo mɛ,odin le ogbɛ lɔ we vivɔnu wɛ e wa ɖe eɖe xlɛ hwla lokpo gee kpoŋu wɛ e do xɔ do flɛn,a bo do vɔ okun na onu nyinyla dogbɔn e yɔ tesu we avɔsinsan mɛ. ²⁷ E wɛ zɔn,ye o jlado ɖo anyi na gbɛtɔ ɖɔ e na ku hwla lokpo gee,e nɛ godo ohwɛ dida na wa, ²⁸ lemɔha ke wɛ Klisi xeni sɔ e ɖe do san avɔ hwla lokpo gee,a bo do sɔ omɛ susu gbagbagba we ohwɛ sɔ kɛ ye,e na gɔ wa ɖe e ɖe sɔxlɛ hwlawegɔ ke,e ka ma nyi onunyinyla wutu mɛ e na wa do gɛ,vɔ a do wa hwlɛn omɛ xeye ni le ote kpɔn-ɛ lɛye gan.