¹ Le oxojɔxo mɛ,onu jijɔhun xeye ni na wa wa lɛye we ninɔmɛ tesu-tesu mɛ nyi osɛn lɔ gɛ,alindɔn yetɔn wɛ e nyi,ɖo e nɛ lɔ go avɔsinsan lokpo nukunmɛ xeye na ye nɔ le blo xɔn tɛgbɛ-tɛgbɛ le oxwesɔ-oxwesɔ,osɛn lɔ ma kpego na gbɔn ye ji a bo do na na omɛ xeye ni le sɛkpɔ Mawu xɔn lɛye a sɔgbe kpɔn gbeɖe. ² E ma do nyi lemɔha gɛ wɛ,be ye o na ɖo avɔsinsan nɛ lɛye te,ɖo na e nyi ɖɔ ye slawu hwlalokpo gee wɛ e vɔ do flɛn,omɛ xeye ni le sɛn Mawu xɔn ɖo lemɔha lɛye mɔ nɔ gɔ ɖo susu ɖe ɖɔ ohwɛhuhu miye bo gbɛ le okɔ na miye gɛ? ³ Vɔ le oxojɔxo mɛ,dogbɔn avɔsinsan nɛ lɛye mɛ,ye nɔ gɔ le flin onunyinyla lɛye xɔn oxwesɔ-oxwesɔ; ⁴ ɖo nyibusuye kpo ogbɔsuye we ohun ma kpego na ɖe ohwɛ huhu sɛ kpɔn gbeɖe. ⁵ E wɛ zɔn,hwexenu na Klisi lɔ le ɖyɛ ogbɛ lɔ mɛ xɔn,e ɖɔ mɔ sin:A ma din avɔsinsan gbɔɔn do din onunina gɛ,vɔ a blo agbaza na-un; ⁶ Avɔsinsan fifyɔ ma nyɔ na we gbɔɔn avɔsinsan do ota mɛ na ohwɛhuhu can do nyɔ na we gba gɛ. ⁷ E wɛ un ɖɔ:Nyɔ ɖiye,awo Mawu un wa bo na do blo ojlo tɔwe(ɖo nyɔ we oxo wɛ ye ɖɔ le winwlan lɔ mɛ). ⁸ Jɛnukɔn e ɖɔ:Un ma din avɔsinsan,onunina alo avɔsinsan fifyɔ gbɔɔn do din avɔsinsan do otamɛ na ohwɛhuhu gɛ,co ɖena osɛn lɔ byɔ ɖo wɛ ye na san avɔ nɛ lɛye do, ⁹ e ɖɔ mɔsin:Nyɔ ɖiye,un wa bo na do blo ojlo tɔwe.E susu tito tintantɔn lɔ bo sɔ awegɔ sɔ ɖo anyi. ¹⁰ Ojlo Mawutɔn ne lɔ wɛ Jesu Klisi blo bo do slawu na mi gbɔn agbaza etɔn xena a do san avɔ hwlalokpo gee wɛ e do vɔ do flɛn. ¹¹ Avɔsantɔ ɖekpokpwe nɔ le ote anyihɔngbe-anyihɔngbe a bo do blo ozɔn etɔn lɛye,a bo le san avɔ lokpo nukunmɛ lɛye xɔn hwla nɛmu-nɛmu ɖe,avɔsinsan e nɛ lɛye ka ma kpego bo na eɖe ohwɛ huhu lɛye sɛ kpɔn gbeɖe, ¹² vɔ e yɔ xena blo avɔsinsan lokpo gee do ota mɛ na ohwɛhuhu,e flɔn anyi le aɖusi mɛ na Mawu tɛgbɛ, ¹³ flɛn lɔ wɛ e le odin bo do le tle kpɔn Mawu xɔn na ni a do sɔ kɛntɔ etɔn lɛye do blo afɔgɔnu etɔn. ¹⁴ Le oxojɔxo mɛ,dogbɔn avɔ lokpo gee,xena e san mɛ,e zɔn wɛ omɛ xeye na e slawu na lɛye sɔgbe tɛgbɛ. ¹⁵ E nɛ lɔ ji ke wɛ gbigbɔ mimɛ ɖo okpɛn na mi bo ɖɔ: ¹⁶ Aklunɔ Mawu ɖɔ mɔsin,okancica xena na blo xa ye,le azan nɛ lɛye godo,na ze osɛn ce lɛye do oji yetɔn mɛ,na wlan ye do ayixa yetɔn mɛ. ¹⁷ Un ma gɔ wa le flin onunyinyla yetɔn lɛye kpo ohwɛhuhu yetɔn lɛye xɔn gɛ. ¹⁸ Vɔ,ofi xena ohwɛsɔkɛ omɛ le,avɔsinsan do ota na onunyinyla ma gɔ le gɛ. ¹⁹ E wɛ zɔn nɔvi yisenɔye dogbɔn ohun Jesutɔn mɛ,mi ɖo kandeji kpatakli ɖɔ mi bo na ɖyɛ tɛnmɛ mimɛ taŋu lɔ mɛ. ²⁰ E hun omɔ yɔyɔ gbɛgbɛ na mi dogbɔn hlido xeni le sinsɛnxɔ lɔ mɛ,tin e mɛ etɔn wɛ nyi ɖɔ,dogbɔn e yɔ tesu we agbaza ji, ²¹ e yɔ wɛ mi do ɖo avɔsantɔ ɖaxo xena ye sɔ ɖo Mawu we oxwe lɔ nu. ²² E wɛ zɔn mia sɛkpɔ Mawu kpo oji oxojɔxo tɔn kpodo yise blebu,oji xena ye slawu na le onu ɖekpokpwe xeni nɔ da ohwɛ na ayixa kpo agbaza xena ye lɛ osin mimɛ na. ²³ Nukun ɖiɖo xe we oxo xena mi le jla xɔn lɔ,mi a hɛn e go gbaŋu-gbaŋu,ɖo omɛ xeni do akpagbe lɔ,ogbejinɔtɔ wɛ e nyi. ²⁴ Mia nɔ nukle le miye tesu lɛye ji a bo do do akpakpa wanyiyi kpo ozɔn jijɔhun lɛye tɔn lanmɛ na miɖe. ²⁵ Mi nɔ kpɔn na mia nɔ gbɛ agun mitɔn lɛye ji yiyi ɖi ɖena omɛ ɖe lɛye sɔ walɔ mɛ bo nɔ blo ɖo ha gɛ,vɔ mia nɔ do glagla lanmɛ na miɖe,ɖo Aklunɔ we azan lɔ o sɛkpɔ ɖi ɖena miye tesu ye o le mɔ-ɛ xɔn ɖo ha. ²⁶ Ɖo xena mio nyɔ oxojɔxo lɔ vɔ,na miye tesu gɔ sɔ ojlo do wa le blo onu nyinyla xɔn,avɔsinsan ti ma gɔ le na onunyinyla nɛ lɛye gɛ, ²⁷ vɔ onu xena mi na tle kpɔn kpo obuɖiɖi kpo jan wɛ nyi ohwɛdida Mawutɔn kpodo ozo hɛhɛhɛ xeni na fyɔ ogufɔntɔ lɛye. ²⁸ Na mɛɖe gba osɛn Mɔyizi tɔn lɔ,wɛ omɛ awe alo atɔn gbɛ ɖekunnu ni-i ɖɔ oxojɔxo bɛ,ye mɔ nɔ gɔ kpɔn dɔŋuɖunu na omɛ lemɔha tɔn gɛ,hu jan wɛ ye nɔ hu-i; ²⁹ naɖe e na nyi ɖo na omɛ xeni gbɛ owan na Mawu we ovi lɔ,omɛ xeni sɔ okancica we ohun xena ye do slawu ni-i do mɔ onu vɔvɔ,bo zun gbigbɔ xeni nɔ na fɛnu lɔ?Mi bu-i kpɔn,otodindɔn etɔn na syɛnxu diin? ³⁰ Le oxojɔxo mɛ,mi nyɔ omɛ xeni ɖɔ:Nyɔ wɛ nɔ ba ohlɔn,nyɔ wɛ nɔ su axɔ xeni jɛxa omɛ lokpo-lokpo:Omɛ e nɛ lɔ ke wɛ ɖɔ:Aklunɔ n ada ohwɛ na togun etɔn. ³¹ E vyawu bo dobu na ye a do jɛ Mawu gbɛɖe-gbɛɖe we alɔmɛ. ³² Mi flin onu xeni gbo mi le hwexenu na mi mɔ kinklɛn Mawutɔn,mi ɖu aya taŋu,bo do oji le ahwan sinsyɛnxu mɛ, ³³ le hweɖe lɛye nu,ye nɔ le zun mi xɔn,bo nɔ le do tagba na mixɔn le agbaŋugba,le hweɖe lɛye nu,mi nɔ nɔ ogbesisɔ a bo do ɖu aya xa omɛ xeye na ye le do aya na xɔn lɛye ɖi miye ha. ³⁴ Le oxojɔxo mɛ,mi ku nublawu na omɛ xeye na ye wle do ogankpamɛ lɛye,mi bo yi ogbe kpo jijwɛ kpo le hwexenu na ye bɛ onu mitɔn lɛye le mi si,ɖo mi nyɔ-ɛ ɖɔ dɔkunnu xeye ni bo jɔhun hugan e nɛ lɛye bo nɔ dɔji ganji bɛ miye bo ɖo. ³⁵ Be mi bo nɔ kpɔn bu nukun ɖiɖo mitɔn gɛ,ɖo ale ɖaxo ɖe le e mɛ. ³⁶ Le oxojɔxo mɛ,onu xeni hudo mi wɛ nyi ɖɔ,mi na do vivɛnu le ojlo Mawutɔn biblomɛ,a bo do mɔ onu xe we akpagbe na e do na mi yi. ³⁷ Le oxojɔxo mɛ,e kpo oganxixo ovuɖe,oganxixo ovuɖe,wɛ omɛ xeni ɖo na wa lɔ,na wa e ma gɔ dɛn xɔn hwɛkpo na wa gɛ. ³⁸ E wɛ omɛ jijlɔ na nɔ ogbɛ dogbɔn yise etɔn mɛ,vɔ na e gblɔn yi godo,onu etɔn ma gɔ le vivi na-un xɔn gɛ. ³⁹ Miye mi ma le omɛ xeye ni nɔ gblɔn yi godo,a bo do wa yi bu ye,mɛ gɛ,vɔ mi le omɛ xeye ni ɖo yise na alindɔn yetɔn lɛye a do mɔ hwlɛngan mɛ.