¹ Vɔ,onuɖiɖi wɛ nyi kandeji kpatakli ɖiɖo do onu xeye na ye le ɖo nukun xɔn,bo gɔ nyi ɖiɖexlɛ onu xeye na ye ma mɔ gɛ. ² Yise xena dagbo mitɔn lɛye ɖo,wɛ zɔn ye do ɖo kunnuɖiɖe jijɔhun. ³ Yiseɖiɖo wɛ zɔn na mi do nyɔ-ɛ ɖɔ Mawu bo sɔ oxo etɔn bo do da ogbɛ lɔ,e bo blo wɛ onu xena mi le mɔ xɔn tɔn sɔn onu xena mi ma le mɔ xɔn gɛ mɛ. ⁴ Yise xena Abɛli ɖo wɛ zɔn na e do blo avɔsinsan xeni jɔhun hugan kanyɛ tɔn na Mawu,yise nɛ lɔ wɛ zɔn na Mawu do ɖe kunnu do e go ɖɔ e bo nyi omɛ jijlɔ,bo gɔ ɖe kunnu do onunina etɔn go,yise nɛ lɔ wɛ zɔn wɛ Abɛli ku co,bo gɔ gbɛ kpɔtɔ le ɖɔ oxo xɔn. ⁵ Yise xena Enɔki ɖo, wɛ zɔn na ye do kɔ-ɛ do sɔn yi sɛxwe,na e ma gɔ do le ku xɔn gɛ,omɛti ka ma gɔ wa mɔ-ɛ gɛ ɖo Mawu kɔ-ɛ do sɔn,le oxojɔxo mɛ,hwɛkpo na Mawu do kɔ-ɛ do sɔn,ye ɖe kunnu do e go ɖɔ e bo nyɔ kpinkpɔn na Mawu lɔ. ⁶ Le oxojɔxo mɛ,na omɛɖe ma ɖo yise gɛ,e ma le nyɔ kpinkpɔn na Mawu xɔn gɛ,ɖo omɛ xeni le sɛkpɔ Mawu xɔn,ɖo na ɖinu ɖɔ Mawu lɔ bo le,e bo nɔ su axɔ na omɛ xeye ni bo le din-i xɔn lɛye. ⁷ Yise xena nɔwe ɖo wɛ zɔn na xena Mawu xokpa ni-i do onu xena ye ma o mɔ hɔnɖe go gɛ,e sɔ oxo lɔ bo do ylɔ oxo vivɛ,bo ta aklo ɖaxo bo do hwlɛn hwɛndo etɔn gan,yise xena e ɖo nɛ lɔ wɛ e do da ohwɛ na ogbɛ lɔ bo tlɔ zun cinnɔɖutɔ ogbɛ jijlɔ tɔn xena ye yi gbɔn yise mɛ. ⁸ Yise xena Ablaxamu ɖo wɛ zɔn na hwexenu Mawu yɔ-ɛ,e yi ogbe,bo setonu,bo sɔn yi oto xe we cinɔ na e na ɖu mɛ,e bo sɔn,e ka ma nyɔ ofi xena e le yi xɔn lɔ can gɛ. ⁹ Yise xena e oɖ nɛ lɔ wɛ zɔn na e do wa jɛ oxwe do anyizan xa kpagbe tɔn lɔ ji ɖi jonɔ ha,goxɔ ye mɛ wɛ e nɔ nɔ,lemɔha ke wɛ Izaki kpo Jakɔbu xeye ni o ɖu akpagbɛ nɛ lɔ we ogu can nɔ goxɔ ye mɛ ɖo gba. ¹⁰ Ɖo Ablaxamu le ote kpɔn toxo xeni ɖo dodwe sinsyɛnxu xena Mawu tesu ɖe oyɛ etɔn bo gɔ gba-ɛ. ¹¹ Yise xena Saala tesu ɖo wɛ zɔn e nyi ajikponɔ bo kpo nyɔxo co, bo ɖo hɔnhlɔn gbɔɔn bo mɔ xoxo, ɖo e kan do Mawu xeni do akpagbe lɔ ni-i ji ɖɔ ogbejinɔtɔ bɛ e bo nyi. ¹² E lɔ ke wɛzɔn na, omɛ lokpo xe we agbaza ni o dɛ, ji omɛ susu gbagbagba ɖi osunhwlɛ vi ojinukunsin tɔn lɛye ha, bo do maxlɛ di nyisa xeye ni le oxuta ha. ¹³ Gbɔn onuɖiɖi lɔ mɛ wɛ ye ku le sese, wɛ onu xeye we akpagbe na ye do na ye, ye ma tlɛ yi can gba gɛ, vɔ ye mɔ onu lɛye le dindɛnu ɖoxlan voo bo do wezɔn na ye bo nyɔ-ɛ ɖɔ jonɔ kpo ohwɛnzɛtɔye bɛ miye bo nyi le anyizan ji. ¹⁴ Le oxojɔxo mɛ, omɛ xeye ni le ɖɔ oxo do lemɔha mɛ xɔn lɛye le ɖexlɛ xɔn ɖɔ oto ɖe bɛ miye lɛye bo le din xɔn. ¹⁵ Na e do nyi ɖɔ oto xe mɛ na ye tɔn le lɔ wɛ do le anyimɛ na ye, be ye o na lɛkɔ a do sɔn yi e mɛ xoxo. ¹⁶ Le oxojɔxo mɛ, ye le din oto jijɔ hun lɔ xɔn; tin e mɛ etɔn wɛ nyi sɛxwe. E wɛ zɔn na ŋunya ma do wa Mawu na ye do yɔ-ɛ ɖɔ Mawu yetɔn gɛ. Ɖo e blo oto ɖe ɖo anyi na ye. ¹⁷ Onuɖiɖi xena Ablaxamu ɖo wɛ zɔn wɛ hwexenu na Mawu do do kpɔn, e sɔ ovi etɔn Izaki do san avɔ na Mawu. Ablaxamu wɛ Mawu do akpagbe lɔ na, co e bo le ogbesisɔ bo na do sɔ lokponɔ vi etɔn do san avɔ na Mawu. ¹⁸ Mawu ɖɔ na Ablaxamu ɖɔ, Izaki wɛ na gba gba okun tɔwe. ¹⁹ Ablaxamu nyɔ-ɛ ɖɔ Mawu bo ɖo acɛ bo na do fɔn Izaki sɔn oku. Na ye na do ɖɔ, Ablaxamu gɔ vɔ mɔ ovi etɔn Izaki ɖi omɛ xeni oku wɛ ye gɔ fɔn-ɛ sɔn oku ha. ²⁰ Onuɖiɖi xena Izaki ɖo wɛ zɔn wɛ e xo dona we oɖɛ na Jakɔbu kpo Esawi kpo do ɖena osɔ yetɔn na wa ci ɖo. ²¹ Onuɖiɖi xena Jakɔbu ɖo wɛ zɔn hwexenu e ja kuku gbe, e xo oɖɛ na Josɛfu we vikpɛ lɛye lokpo-lokpo kpokpotɔn etɔn wɛ e zyɔn bo do sɛn Mawu. ²² Onuɖiɖi xena Jozɛfu ɖo wɛ zɔn hwexenu e ja kuku gbe, e ɖɔ oxo do tintɔn Izlayɛli vikpɛye tɔn go le Ejiputi, bo gɔ ɖɔ ɖena ye na blo oxu etɔn leye we onu ɖo. ²³ Onuɖiɖi xe mɛ na ye ji Mɔyizi do, e zɔn wɛ ye sɔ-ɛ sɔ hwla na osunzan atɔn, ɖo ye mɔ ɖɔ ovi lɔ bo jɔhun; e nɛ wutu wɛ ye ma tlɛ ɖi obu na osɛn xena xɔlu do gɛ. ²⁴ Onuɖiɖi xena Mɔyizi ɖo wɛ zɔn hwexenu na e hwɛn, e gbɛ ɖɔ ye ni bo nɔ kpɔn gɔ ylɔ miye ɖɔ Falawɔnwe ovi nyɔnusi we ovi gɛ. ²⁵ E yi ogbe ɖɔ ye ni bo do aya na miye kpo otogun Mawutɔn kpo e ne lɔ vivi ni-i hu vivi xena e na mɔ le ohwɛhuhu mɛ na hwenu ovuɖe. ²⁶ E nyɔ-ɛ ɖɔ na omɛye gbɛ owan na miye ɖi ɖena ye gbɛ owan na Klisi ɖo ha, e bo kpe na miye hugan dɔkun Ejiputi tɔn lɛye; ɖo nukun etɔn le ajɔ xeni ja osɔ godo ji. ²⁷ Onuɖiɖi xena Mɔyizi ɖo wɛ zɔn e tɔn le Ejiputi we oto mɛ obu ma ɖi na xomɛsin axɔlu lɔ tɔn ɖo e kpan akɔn bo ci ɖi omɛ xeni le mɔ Mawu xena ye mɔ nɔ mɔ lɔ gɛ ha. ²⁸ Onuɖiɖi xena Mɔyizi ɖo wɛ zɔn na e do sɔ dindin wayi we oxwe ɖo anyi, bo ɖe ogbe ɖɔ ye ni bo si ohun do ohɔn lɛye go, na wɛnzangun Mawutɔn xeye nɔ hu omɛ lɛye ni nɔ kpɔn do hu ovi tintan Izlayɛli vikpɛye tɔn gɛ. ²⁹ Onuɖiɖi xena Izlayɛli vikpɛye ɖo wɛ zɔn wɛ ye do gbɔn oxuvɛvɛ mɛ bo din ɖi anyzan vɔvɔ ji wɛ ye le gbɔn xɔn ɖɔhun vɔ Ejiputitɔye ni kpɔ do yetɔn go lɛye ku otɔ ku sese. ³⁰ Onuɖiɖi xena Izlayɛli vikpɛye ɖo wɛ zɔn hwexenu na ye tlɔ do adokpa Jeliko tɔn na azan canwe, adokpa lɔ hɔ. ³¹ Onuɖiɖi wɛ zɔn na hlaxabu xeni nyi galɔtɔ lɔ ma do ku xa ogufinfɔn lɛye gɛ. Ɖo e yi jonɔ na ododinna-onutɔ lɛye kpo xomɛ hunhunkpo. ³² A ni ha wɛ na gɔ ɖɔ? Ganmɛ ti ma gɔ le asi ye na na do ɖɔ oxo do Jedewɔn, Balaki, Samusɔn, Jɛfute, Davidi, Samyɛli kpodo ɖɔɖanyiɖɔtɔ Mawutɔn lɛye go gɛ. ³³ Onuɖiɖi xena ye ɖo wɛ zɔn ye fun ahwan bo ɖu le oto susu ji, ye blo onu jijlɔ, ye mɔ akpagbe xena Mawu do na ye yi, bo do ogan onu na kinikini lɛye. ³⁴ Onuɖiɖi xena ye ɖo wɛ zɔn ye ci ozo xeni le hun hɛhɛhɛ lɔ, ye glo ohi, ye glo le hɔnhlɔn xena azɔn nɔ ɖo do ji si. Ye tlɔ zun ahwanfuntɔ sinsyɛn, bo nya ahwanfuntɔ jɔnɔ lɛye do ogbe. ³⁵ Onuɖiɖi wɛ zɔn nyɔnusi ɖe lɛye do we omɛ seye ni oku osan xoxo do wa fɔn sɔn oku, vɔ ye do vivɛsise taŋu na omɛ ɖe lɛye. E nɛ, ye na do mɔ finfɔn sɔn oku xeni nyi hugan. ³⁶ Omɛ ɖe lɛye le wɛ ye ko ye, bo xo ye kpo olanba kpo, ye do kpɛŋubɛ na ye, bo su ye do ogankpamɛ. ³⁷ Ye xu okpɛ omɛɖe lɛye kaka ye ku, ye sɔ saka bo do zɛ omɛ ɖe lɛye, ye sɔ ohi bo do hu omɛ ɖe lɛye, omɛɖe lɛye zan fluflu we ogbɛ, omɛɖe lɛye nɔ do ogbɔ gbaza kpo lɛngbɔ gbaza kpo, ye do aya na ya. ³⁸ Ye ma jɛ xa na nɔ ogbɛ mɛ ɛ. Ye nɔ le flu le ogbetotlo mɛ kpo oso ye ji xɔn, a bo le flu gbɔn okpɛn ɖaxo-ɖaxo ye kpo odo ye mɛ xɔn. ³⁹ Ye omɛ e nɛ lɛye sese xeye go na ye ɖe kunnu do gbɔn onuɖiɖi gblamɛ, ma o mɔ akpagbe yetɔn lɔ yi gɛ. ⁴⁰ Ɖo Mawu o blo onu xeni hugan e nɛ ɖo anyi na miye, e nɛ, ye ma gɔ le nyi omɛ xeni sɔgbe miye mɛvɔ xɔn gɛ.