Ota 12

1 E wɛ zɔn xena omɛ susu gbagbagba nɛ xeni sɔ onuɖiɖi yetɔn sɔ xlɛ lɛye lɛ oto do mi,mi a gbɛ okɔ sɔn onu ɖekpokpwe xeye ni nɔ do tagba na mi le Mawu sinsɛn we mɔji go,a bo jo onunyinyla xena mi nɔ ɖebla blo le fɛɛ mɛ do,a bo do vivɛnu na mi lɔ mɛ. 2 Mi a sɔ nukun mitɔn do Jesu ji,e yɔ ji wɛ onuɖiɖi mitɔn bɛ sɔn,e yɔ ke ji wɛ e na vɔ do,ɖo awajijɛ xeni le ote kpɔn-ɛ wutu,e do oji le atinsoga ji,bo yi ogbe na ŋunya,bo flɔn anyi le aɖusi mɛ na xɔluzinkpwe lɔ. 3 Le oxojɔxo mɛ,mi flin ɖena e do oji ɖo le hwexenu an ohwɛhutɔ lɛye do tagba ni-i ɖo,e nɛ na miye can ni nɔ kpɔn do jo miɖe do na gbɔjɔ-gbɔjɔ a ɖu le mi ji gɛ. 4 Ahwan xena mi le fun xa ohwɛhuhu xɔn,mi ma o fun-i gbɔɔn do yi okugbe hɔnɖe gɛ. 5 Mi wɔn glagla do lanmɛ we oxo xena ye ɖɔ na mi ɖi vikpɛvu ha ɖɔ:Ovi ce,na Aklunɔ Mawu le dɔn oto an we xɔn,nɔ kpɔn bo bu-i ɖɔ vɔvɔ wɛ gɛ,na e le tɔ ogbe we xɔn,nɔ kpɔn na agbɔ ni kpe we gɛ. 6 Ɖo omɛ xena Aklunɔ Mawu yi owan na wɛ e nɔ dɔn oto na,bo nɔ do oba na omɛ xeni nyi ovi etɔn. 7 Na mi a do yi okplan wɛzɔn mi do le ɖu aya xɔn,Mawu lɔ le hɛn mi xɔn ɖi vikpɛye ha,le oxoxjɔxo mɛ,ovi bɔtɔn wɛ le,wɛ otɔ mɔ nɔ dɔn oto na gɛ? 8 Na e nyi ɖɔ ye mɔ nɔ dɔn oto na mi ɖi ɖena e nɔ nyi ɖo na vikpɛ ye sese ha gɛ,be oganviye wɛ mi nyi,mi ma nyi ovi tesu gɛ. 9 Miye tɔ anyizanji tɔn lɛye nɔ kplan onu mi,wɛ mi nɔ ɖo sisi an ye,nɛmu-nɛmu wɛ na nyi miye tɔ xeni le sɛxwe lɔ tɔn?Be mi ma kpego na sɔ miɖe sɔ hwe ni-i a bo do nɔ ogbɛ gɛ wɛɛ? 10 Miye tɔ anyizanji tɔn lɛye nɔ kplan onu mi na hwenu ovuɖe ɖi ɖe ye mɔ ɖɔ e bo nyɔ ɖo ha ɔ,vɔ Mawu ka nɔ kplan onu mi do nyɔna mitɔn wutu na mi a do tlɔ zun omɛ mimɛ ɖi e yɔ tesu ha. 11 Hwexenu na ye le dɔn oto na omɛ ɖe xɔn, e mɔ nɔ nyi ojijwɛ we onu ni-i gɛ,onulilo mɛ wɛ e nɔ le,vɔ le nukɔn mɛ, nɔ hɛn fifa kpo ogbɛ jijlɔ we walɔ do wa ni-i. 12 Mi kɔ alɔ mitɔn xeni ku oyɛ do oji,a bo na hɔnhlɔn klitaa mitɔn xeye ni le hunhun xɔn lɛye; 13 mi ɖe omɔ jijɔ a bo gbɔn e ji,e nɛ sɛkunnɔ ye we afɔ ma gɔ do le gli xɔn gɛ,vɔ na afɔ etɔn ni jɛ afɔ tɛnmɛ ni-i. 14 Mi din fifa xa omɛ kpokpo,a bo ɖo klando zun wiwe,xena mi ma ɖo gɛ,mɛti ma le mɔ Mawu xɔn gɛ. 15 Mi nɔ nukle omɛti ni nɔ kpɔn tɔn le fɛnu Mawutɔn mɛ gɛ,omɛti ni nɔ kpɔn ciɖi atinkyɔn vivɛ kpaɖa-kpaɖa ha gɛ,xenɔ gba okun gbɔn ofi kpokpo wɛ vivɛ etɔn nɔ do azɔn omɛ susu gɛ. 16 Omɛɖe ni nɔ kpɔn nyi galɔtɔ,alo osuɖu na Mawutɔ ɖi Esawu ha,e yɔ xeni kpɔn do onuɖuɖuka lokpo go bo sɔ ovi tintan etɔn we acɛ sɔ sa,gɛ. 17 Le oxojɔxo mɛ,le nukɔn mɛ ɖi ɖena mi nyɔ-ɛ ɖo ha,hwexenu na e wa jlo ɖɔ miye tɔ a bo xo oɖɛ fifa tɔn na miye ye gbɛ-ɛ wɛ e fankwe kpo avi le nukunmɛ co,blo ɖo ɖe ma gɔ le gɛ. 18 Mi o sɛkpɔ onu xena ye hɛn ye na do alɔ e go,ozo xeni hun le oso sinayi tɔn ji,zinvlu xeni do ahun xeni su,jɛhɔn sinsyɛn xeni xo, 19 okpɛn we ogbe xeni ɖi le oji,omɛ xeye ni se lɛye gbɛ ɖɔ ye ni bo nɔ kpɔn gɔ ɖɔ oxo do e go ke na miye gɛ, 20 ɖo ye ma kpego na nyi osɛn nɛ lɔ gɛ e wɛ nyi ɖɔ:Omɛ ɖekpokpwe xeni na ɖo alɔ oso lɔ go,alo e gɔ do nyi kanlinɖe wɛ kpo-e vɔvɔ can,ye na xu okpɛn wi-i gbɔɔn e na ku. 21 Onu xeni jɔ lɔ do obu gbɔɔn Mɔyizi bo ɖɔ:Un le ɖi obu xɔn,gbɔɔn bo le sisɔ xɔn. 22 Vɔ,miye ka sɛkpɔ sinayi we oso lɔ,bo sɛkpɔ toxo Mawu gbɛɖe-gbɛɖe lɔ tɔn,e wɛ nyi Jeluzalɛmu sɛxwetomɛtɔn lɔ,bo sɛkpɔ wɛnzangun wɔbu-wɔbu lɛye, 23 mi sɛkpɔ Mawu tintantɔn xeye ni kpli bo le ɖu oxwe xɔn lɛye wɛ nyikɔ yetɔn o nyi winwlan le sɛxwe lɛye,mi sɛkpɔ Mawu xeni nɔ da ohwɛ na omɛ kpokpo,bo sɛkpɔ omɛ xeye ni nyi ohwɛjijɔnɔ wɛ Mawu sɔ ye do tlɔ omɛ mimɛ xeye go na onu vɔ le lɛye, 24 mi sɛkpɔ Jesu xeni nyi omɛdo mɛblo tɔ,bo sɛkpɔ ohun etɔn xe kɔn ɖo anyi lɔ,ohun nɛ lɔ gɔ le ɖɔ oxo xɔn hugan Abɛli tɔn. 25 Mi nɔ nukle a bo nɔ kpɔn gbɛ ogbe na omɛ xeni le ɖɔ oxo na mi xɔn gɛ,na otodindɔn we oba nɔ xo omɛ xeye ni nɔ vɛtoli na omɛ xeni ɖɔ Mawuxo ni ye le anyizanji, nɛmu-nɛmu ɖe wɛ na nyi otodindɔn can tɔn,na mi gbɛ og e an omɛ xeni le sɛxwe bo le ɖɔ oxo na mi xɔn, 26 le hwenɛnu,ogbe etɔn hunhun anyizan lɔ,odin e do akpagbe ɖɔ:Na gɔ hunhun anyizan lɔ obu ke,vɔ e ma gɔ le nyi anyizan lɔ kɔkɔlɔkɔ xɔn gɛ,na hunhun sɛxwe can. 27 Oxogbe xeni nyi na gɔ hunhun le ɖexlɛ xɔn ɖɔ onu xeye na Mawu blo lɛye na hunhun a bo bu,e nɛ onu xeye ni ma kpego na hunhun gɛ lɛye na do nɔ anyi. 28 Xeni nyi ɖɔ xɔluɖuɖu xeni ma kpego na hunhun gɛ,wɛ mi le yi xɔn,be mi a hɛn fɛnu xe lɔ go,fɛnu nɛ lɔ mɛ mi le gbɔn godo le sɛn Mawu xɔn gbɔn walɔ xeni na nyɔ ni-i mɛ,mi bo le sɛn-ɛ xɔn gbɔn obuɖisi kpo omɛɖe sɔ hwe kpo mɛ, 29 ɖo Mawu mitɔn,ozo xenɔ gble onu wɛ e nyi.