¹ Mi do vivɛnu le owanyiyi ɖiɖo na miɖe mɛ. ² Mi nɔ yi jonɔ ganji,ɖo gbɔn jonɔ yiyi mɛ,omɛ ɖe lɛye yi wɛnzangun Mawutɔn lɛye we jonɔ le ma nyɔ-ɛ ³ Mi nɔ flin omɛ xeye ni le ogankpamɛ lɛye ɖi miye tesu wɛ le ogankpamɛ ha,mi nɔ flin omɛ xeye na ye le do aya na xɔn lɛye ɖi gbaza mitɔn wɛ ye le do aya na xɔn ha. ⁴ Na nyɔnu ɖiɖe ɖiɖe a lo asu ɖiɖe ni nyi onu sisi,asu kpo asi kpo ni nɔ ogbeji na ye ɖe,ɖo Mawu na da ohwɛ na onu ɖuɖu blo tɔ lɛye kpo galɔtɔ lɛye kpo. ⁵ Mi nɔ kpɔn yi owan na kɔbɔ zɛ ojlɛ go gɛ,na onu xena mi ɖo ni kpe mi ɖo Mawu lɔ tesu wɛ ɖɔ:Un ma le jo we do xɔn gɛ,un ma le ɖe okɔ le go we xɔn gɛ. ⁶ E nɛ wutu mi hɛn mi na ɖɔ kpo kande ji kpo ɖɔ:Aklunɔ wɛ nyi alɔgɔtɔ ce,un ma le ɖi obu na onuti xɔn gɛ,a ni ha wɛ gbɛtɔ an kpego bo na blo na-un? ⁷ Mi nɔ flin nukɔnnɔtɔ mitɔn xeni nɔ ɖɔ Mawuxo lɔ na mi,a bo bu ota mɛ do ɖena ye nɔ zan ogbɛ yetɔn gbɔɔn do yi okugbe,mi kpɔn do yise yetɔn go. ⁸ Jesu Klisi nyi onu lokpo nukunmɛ le osɔ xe wa yi,bo nyi le egbe kaka doyi-doyi. ⁹ Mi nɔ kpɔn jo miɖe do na onukplan omɛ bubu ye a glɔn omɔ na mi gɛ,na e na do jɛ e ji,fɛnu Mawutɔn ni blo na ayixa mitɔn ni li odo,ni nɔ kpɔn nyi dɔ osɛn xena ye do do onuɖuɖu vovwe lɛye go wɛ na zɔn ayixa mitɔn na li odo gɛ,omɛ xeye ni nɔ nyi osɛn e nɛ lɛye mɔ nɔ mɔ ale ti e mɛ kpɔn gbeɖe. ¹⁰ Avɔsinsan we agba le mi si,avɔsantɔ xeye ni nɔ wa ozɔn le goxɔ lɔ mɛ lɛye ma ɖo acɛ bo na do ɖu onu xeye na ye do san avɔ le agba lɔ ji gɛ. ¹¹ Le oxojɔxo mɛ,avɔsantɔye we oga lɔ nɔ hɛn kanlin we ohun a bo do ɖyɛ nɔ tɛn mimɛ sesese lɔ mɛ,a do san avɔ do ohwɛ otogun lɔ tɔn we tamɛ,vɔ kanlin e nɛ lɛye na ye hu,ye nɔ bɛ ye do oxu godo a bo do ozo ye ji. ¹² E wɛ zɔn Jesu do ɖu aya le toxo lɔ godo,a bo do sɔ ohun etesu tɔn do san avɔ na otogun lɔ. ¹³ E wɛ zɔn mi a yi toxo godo lɔ a bo do wa yi ɖu ŋunya lokpo nuknmɛ lɔ xa-ɛ. ¹⁴ Ɖo mi ma ɖo toxo xeni na nɔ anyi tɛgbɛ-tɛgbɛ le ogbɛ xe mɛ gɛ vɔ,toxo xeni na wa wa lɔ wɛ mi le din xɔn . ¹⁵ Mi a nɔ kpa Mawu tɛgbɛ gbɔn Jesu Klisi ji,Mawu kpikpa e nɛ lɔ le ɖi avɔsinsan ha xeni nɔ tɔn le onumɛ na omɛ xe le kanfu nyikɔ etɔn xɔn. ¹⁶ Mi nɔ kpɔn wɔn onu jijɔhun biblo gɛ,a bo nɔ kpɔn wɔn onunina omɛ gɛ,ɖo avɔsinsan lemɔha tɔn,wɛ nɔ nyɔ na Mawu. ¹⁷ Mi nɔ setonu na nukɔnnɔtɔ

mitɔn lɛye,a bo nɔ sɔ miɖe hwe na ye,ɖo ye nɔ kpe nukun do alindɔn mitɔn go le hweɖekpokpwe hwenu a do wa jo kɔŋuta etɔn,hwenɛnu ye na blo-e kpo ojijwɛ kpo wɛ e ma gɔ le nyi kpo aɖukunkun kpo xɔn gɛ,ɖo e nɛ lɔ ma le na ale ti na mi xɔn gɛ.

¹⁸ Mi nɔ xo oɖɛ do ota na mi,ɖo mi ɖo kandeji ɖɔ le onu ɖekpokpwe mɛ,mi ɖo ojlo bo na do ɖo walɔ jijɔhun. ¹⁹ Un le byɔ sɔn mide xɔn vivɛɖe ɖɔ miye ni bo byɔ sɔn Mawu de an mza do ɖebla wa mi de. ²⁰ Mawu fifa tɔn xeni fɔn lɛngbɔnyitɔ ɖaxo Aklunɔ mitɔn Jesu Klisi sɔn oku le omɛ kuku lɛye mɛ gbɔn ohun okancica mavɔ-mavɔ tɔn lɔ mɛ, ²¹ ni blo na mi a do le ogbesisɔ le onujijɔhun ɖekpokpwe biblo mɛ,Jesu tɔn wɛ nyi gigo sɔn mavɔ-mavɔ do yi mavɔ-mavɔ!Ami! ²² Nɔvinɔ yisenɔ ye,un le byɔ sɔn mi si xɔn ɖɔ miye ni bo yi suulu,a bo ɖo oto akɔnkpinkpan we oxo xeye an un ɖɔ ɖoxlan mi lɛye ɖo onu xena un wlan ɖoxlan mi lɔ can ma su gɛ. ²³ Un ka gɔ jlo na ɖɔ na mi ɖɔ,ye boo jo miye nɔvi Timɔte do;na e ɖebla wa,be nyɔ kpodo e yɔ kpo na wa mide. ²⁴ Mi do ogbe ɖoxlan nukɔnnɔtɔ mitɔn lɛye kpo yisenɔ lɛye sese kpo.Italitɔye do ogbe ɖoxlan mi. ²⁵ Fɛnu Mawutɔn ni nɔ xa mi omɛ sese!Ami!