¹ Onu xeni le vivɛɖe le oxo xena mi le dɔ mɛ wɛ nyi ɖɔ mi ɖo vɔsantɔ lɛye we oga nɛ ha e bo flɔn anyi le aɖusi mɛ na xɔsu zinkpwe,xɔsu hɔnhlɔn lɛye sese kpo tɔn le sɛxwe, ² bo le wa zɔn le sisɛn xɔ xeni nyi vɔsanxɔ tesu-tesu hɛn gbɛtɔ ma blo gɛ,wɛ Aklunɔ Mawu lɔ tesu wɛ blo,mɛ. ³ Vɔsantɔ lɛye we oga ɖekpokpwe,nɔ sɔ-ɛ xɔ ɖa nyi ni a bo do sɔ nunina kpodo vɔsisan lɛye sɔ na Mawu e wɛ e do jɛ xa ɖɔ e yɔ can ɖo na ɖo nu ɖe sɔ na. ⁴ Na e do nyi dɔ anyizan ji wɛ Klisi lɔ do le wɛ e ma din na nyi vɔsantɔ gɛ,ɖo omɛ xeni nɔ sɔ nunina lɛye do san vɔ na Mawu ɖi ɖena osɛn lɔ ɖɔ do ha,o le ⁵ (vɔsantɔ we ozɔn na ye nɔ blo nyi oyɛ kpodo ɖexlɛ onu ni le sɛxwe lɛye tɔn ɖi ɖena Mawu ɖo afɔji na Moyizi ɖo ha le hwenu e din na blo vɔsinsan bo ɖɔ ɖɔ:Kpɔn,le ma wɛ e ɖɔ ni-i bo gɔ ɖɔ:A na blo onu lɛye sesekpo do ninɔmɛ xena un ɖe sɔ xlɛ we le oso lɔ ji. ⁶ Vɔ odin,ozɔn xena Jesu yi,klo taŋu ɖo e yɔ wɛ nyi mɛdo mɛ jlaɖotɔ na kancica yɔyɔ xeni jɔhun xugan satani tɔn,okancica nɛ lɔ bo flɔn anyi do kpagbe xeni jɔhun xugan ye ji. ⁷ Le oxojɔxo mɛ e do nyi ɖɔ kancica tintan tɔn lɔ ma do ɖo ofɛn ɖe gɛ wɛ,be ye ma wa le sɔ awegɔ ɖe do ɖyɔ-ɛ gɛ. ⁸ Le oxojɔxo mɛ,onu wɛ Mawu gbɛ na togun etɔn bo do ɖɔ:Azan lɛye ja,Aklunɔ Mawu lɔ wɛ le ɖɔ lemɔha xɔn.E wɛ na blo okancica yɔyɔ,xa Izlayɛli kpodo Juda we togun lɛye, ⁹ e ma gɔ le ciɖi kancica xena un blo xa dagbo yetɔn lɛye ha gɛ,azan xe gbe na un hɛn alɔ na ye,bo ɖe ye tɔn le Ejipu we oto mɛ,xena ye ma nɔ gbeji na okancica ce lɛye gɛ,nyɔ can un ɖe alɔ le ye go,Aklunɔ Mawu lɔ wɛ ɖɔ lemɔha. ¹⁰ Aklunɔ Mawu gɔ ɖɔ ɖɔ:Azan ne lɛye godo,okanciv=ca xena na blo xa togun Izlayɛli lɛye ɖye:Na ze osɛn ce lɛye sɔ xɔ ɖo ayixa mɛ na ye,na wlan ye do oji yetɔn mɛ.Na nyi Mawu yetɔn,ye can na nyi otogun ce. ¹¹ Mɛti ma gɔ wa le kplan nu oto etɔn mɛtɔ alo nɔvyɛ ɖe gɛ,a bo le ɖɔ ni xɔn dɔ:Nyɔ Aklunɔ Mawu!Ɖo omɛ sesekpo na nyɔ-ɛ bɛ sɔn vikpɛvu ji kaka do yi mɛxo ji; ¹² ɖo na ku dɔŋuɖunu na ye do onu ma sɔgbe yetɔn go,wɛ na wɔn onu nyinyla yetɔn lɛye. ¹³ Xena Mawu ɖɔ oxo do okancica yɔyɔ go,be e sɔn tintan tɔn lɔ do tlɔzun onu xoxo,e wɛ onu ni tlɔzun xoxo lɔ,gɔ le doxo do e ji xɔn,e o din na bu omɔ nu.