¹ Le oxojɔxo mɛ,Mɛlicisedɛki nɛ lɔ,xeni nyi xɔlu Salɛmu tɔn bo gɔ nyi avɔsantɔ na Mawu ɖaxo wɛ wa yi kpe Ablaxamu do mɔ ji le hwexenu na e lɛkɔ sɔn ahwan xena e wa yi fun kpanta xɔsu lɛye bo ɖu le ye ji lɔ.Mɛlicisedɛki lɔ bo xo fifa we oɖɛ ni-i, ² eyɔ lɔ wɛ Ablaxamu sɔ nu sese we maɖo awo sɔ xɔ na nyikɔ Mɛlicisedɛki we tinmɛ wɛ nyi,onu jijlɔ wiwa we xɔlu,nyɔ kpe ɖɔ:e bo gɔ nyi Salɛmu we xɔlu,tinmɛ etɔn wɛ nyi:"Fifa we xɔlu, ³ Mɛlicisedɛki lɔ ma ɖo otɔ kaka do ɖo onɔ gɛ,e ka ma ɖo kunkan gɛ,e ma ɖo jijizangbe kaka do ɖo kuzangbe gɛ,amɔ e le ɖi Mawu we ovi ha,bo nyi vɔsantɔ sɔn mavɔ-mavɔ do yi mavɔ-mavɔ. ⁴ Mi kpɔn ɖena Mɛlicisedɛki lɔ nyi omɛ ɖaxo ɖo gbɔn Ablaxu xeni nyi dagbo-dagbo sɔ nu xena e hɛn sɔn ahwan we maɖo awo sɔ ni-i. ⁵ Amɔ ɖi ɖena osɛn lɔ ɖɔ do ha,omɛ xeni jɔ le Lewi we kunkan mɛ bo nyi vɔsantɔ lɛye wɛ nɔ yi maɖo awo le Izlayɛli tɔ si,tin e mɛ etɔn wɛ nyi ye nɔvyɛ lɛye,Ablaxamu we jijimɛvi lɛye wɛ ye ka nyi co; ⁶ vɔ Mɛlicisedɛki xeni ma sɔn kunkan nɛ lɔ mɛ gɛ wɛ yi maɖo awo le Ablaxamu si bo xo fifa we oɖɛ na omɛ xena Mawu do kpagbe na lɛye. ⁷ Onu didɔn ti ma gɔ le flɛn gɛ, omɛ xeni nɔ xo fifa we ɖɛ na mɛ xugan omɛ xena ye le xo fifa we ɖɛ na lɔ. ⁸ Omɛ xeni ma sɔn lewi we kunkanmɛ gɛ bo nɔ yi maɖawo lɛye, gbɛtɔ ye wɛ ye nyi bo nɔ ku, amɔ xeni kan Mɛcisedɛki, omɛ xena ye ɖe kunu dego ɖɔ e bo le gbɛ lɔ wɛ. Ye hɛn ye na ɖɔ ɖɔ, ⁹ Lewi we kunkan xeni nɔ yi maɖawo lɔ, eyɔ tesu can bo na maɖawo gbɔn Ablaxamu ji; ¹⁰ ɖo hwexenu na Mɛlicisedɛki wa yi kpe Ablaxamu, Lewi we kunkan lɔ ma o jɔ gɛ,amɔ e le hun mɛ na Ablaxamu. ¹¹ Togun Izlayɛli tɔn we osɛn flɔn vɔsantɔ lɛye we ozɔn xena Lewi we vikpɛ lɛye nɔ blo ji,vɔ na e do nyi ɖɔ vɔsinsan we ozɔn nɛ lɔ do sɔgbe sese wɛ,be e na gɔ jɛxa ɖɔ vɔsantɔ bu ɖi Mɛlicisedɔki ha gɔ wa wɛ? ¹² Ɖo na e nyi ɖɔ ɖena ye nɔ ɖu vɔsantɔ ɖo lɔ ɖyɔ,be osɛn lɔ can na ɖyɔ dandan. ¹³ Le oxojɔxo mɛ,omɛ xe go na ye ɖɔ xo nɛ lɔ do,akɔta bu mɛ wɛ e jɔ sɔn,mɛti ka ma jɔ le akɔta nɛ lɔ mɛ bo blo avɔsantɔ we zɔn le vɔsinsan we agba ji kpɔn gɛ; ¹⁴ ye ɖo na nyɔ-ɛ ganji ɖɔ Aklunɔ mitɔn jɔ sɔn Juda we akɔta mɛ,Moyizi ka mao ɖɔ vɔsinsan we zɔn we xo do akɔta nɛ lɔ go gɛ. ¹⁵ Onu ni gɔ ɖe xlɛ ganji wɛ nyi ɖɔ vɔsantɔ bu xeni wa lɔ,gɔ le ɖi Mɛlicisedɛki tɔn ha pɛpɛpɛ, ¹⁶ e ma nyi vɔsantɔ dogbɔn osɛn xeni nɔ ɖɔ kunkan xemɛ na ye na jɔ sɔn mɛ gɛ,vɔ dogbɔn hɔnhlɔn xeni nɔ na wɛ ye nɔ nɔ gbɛ tɛgbɛ-tɛgbɛ mɛ wɛ; ¹⁷ le oxojɔxo mɛ,onu winwlan lɔ ɖɔ de go ɖɔ:A nyi vɔsantɔ kaka do yi mavɔ-mavɔ,ɖi ɖena Mɛlicisedɛki nyi ɖo ha. ¹⁸ Xena e le lemɔha,ye gu kun na osɛn xoxo lɔ ɖo e ma ɖo hɔnhlɔn ɖe,alo ale ɖe gɛ, ¹⁹ le oxojɔxo mɛ osɛn lɔ ma na na nu lɛye sese kpo sɔgbe gɛ,le mɔ bu nu,nukun ɖiɖo bu xeni gɔ xugan wɛ wa,mi bo gbɔn e nɛ lɔ ji bo do sɛkpɔ Mawu. ²⁰ Nyɔ bo gɔ le ɖɔ xɔn ɖɔ:Onu wɛ Mawu xwle bo do blo lema,ye mɛ gbokpwe lɛye,e ma xwle nu hwɛkpo ye do nyi vɔsantɔ lɛye gɛ, ²¹ vɔ Jesu e yɔ,Mawu xwle nu hwɛkpo bo do ze do sɔ vɔsantɔ,bo ɖɔ de go ɖɔ:Aklunɔ Mawu lɔ wɛ xwle nu bo ɖɔ ɖɔ:A nyi vɔsantɔ kaka do yi mavɔ-mavɔ.E ka ma gɔ wa le lɛkɔ wa oxo etɔn ji gɛ o. ²² E wɛzɔn Jesu wa tlɔzun okancica xeni jɔhun xu satani we jiɖuɖu. ²³ Nyɔ bo gɔ na ɖɔ,omɛ susu wɛ ɖu vɔsantɔ,ɖe xo do ɖe,ɖo ye nɔ ku wɛ ye mɔ nɔ kpego wa wa ozɔn lɔ kaka do yi gɛ. ²⁴ Vɔ Jesu xeni le gbɛ kaka do yi,vɔsantɔ we ozɔn etɔn ma kpego na byɛ alɔ mɛ na mɛ ɖe gɛ. ²⁵ E nɛ lɔ ke wɛ zɔn e na do kpego hwlɛn omɛ xeni gbɔn e ji do sɛkpɔ Mawu lɛye gan tɛgbɛ-tɛgbɛ,ɖo e le gbɛ tɛgbɛ bo na do xo ɖɛ do ta na ye. ²⁶ Le oxojɔxo mɛ vɔsantɔ lɛye we oga nɛ lɔ ha wɛ jɛ xa mi.E le mimɛ,e ma hu hwɛɖe gɛ,oɖu ti ka ma le e go gɛ,ye ɖe do vo na nunyinyla watɔ lɛye,bo kɔ-ɛ do yi Mawu de. ²⁷ E ma jɛxa ɖɔ anyihɔngbe-anyihɔngbe e na san vɔ do ta na eyɔ tesu we onu nyinyla lɛye hwɛkpo gɛ,e nɛ godo,e na gɔ wa blo do ta na togun lɔ we onu nyinula lɛye ɖi ɖena vɔsantɔ ɖaxo gbokpwe ɖyɛ lɛye nɔ blo do ha.E blo e nɛ lɔ hwla lokpo gee e bo vɔ do flɛn ɖo e sɔ eɖe do san vɔ. ²⁸ Le oxojɔxo mɛ,osɛn lɔ nɔ sɔ gbɛtɔ xeni ɖo gbɔjɔ-gbɔjɔ lɛye do ɖo vɔsantɔ ɖaxo lɛye,vɔ le osɛn lɔ godo,Mawu we oxo xena e ɖɔ bo xwle nu,wa sɔ ovi xeni sɔgbe sese kaka do yi do ɖo vɔsantɔ ɖaxo.